Woo bɛ ŋa 13

À cica Baanabasi do Sɔlu à bɛ ŋa

1 Walii do woo kɔsi cio gɔ ŋa à wa si inɔi inɛi igbɛi Jesu ŋa Antiɔsi bɛ. Iri nŋa wee. Baanabasi, do Simeɔ̃ iyi í jɛ amanɛ dũdũ, do Lusiusi inɛi Sirɛni, do Manahɛnu, nŋu iyi à bíi do Herodu ilaaluu inya akã, do Sɔlu. 2Ajɔ nŋu si bɛi inɛ ŋau à waa tɔɔ Lafɛ̃ɛ do anu ku dĩ ajɔ, ŋɔi Hundei Ilaaɔ̃ í sɔ̃ ŋa í ni, i cica Baanabasi do Sɔlu i nya ŋa ikã a ce icɛ iyi ǹ kpe ŋaò. 3Iyi à ce anu ku dĩ do kutɔɔu à tã, ŋɔi à lea Baanabasi do Sɔlu awɔ si iri, nɔ à jɔ̀ ŋa à nɛ.

Baanabasi do Sɔlu à bɔ Kitimu

4Bɛɛbɛi Hundei Ilaaɔ̃ í bɛ Baanabasi do Sɔlu fei. Nɔ à to ilu gɔ iyi à ya kpe Selɛsi. Hai bɛi à lɔ akɔi inyi à bɔ gũngũm gɔ iyi à ya kpe Kitimu. 5Iyi à to si ilui Kitimu gɔ iyi à ya kpe Salamini ŋɔi à wasi ku waazo idei Ilaaɔ̃ si ile ikã ikã bii Zuifu ŋa à ya ce kutɔtɔɔ nŋa ŋau. Zãa Maaku mɔ í too ŋa wa sobi ŋa.

6Nɔ à dabii si gũngũm nɔu fei hee à to si iluɛ gɔ iyi à ya kpe Pafɔsi. Pafɔsi bɛi à yɛ Zuifu woo ce dobu dobu gɔ iyi í jɛ walii ilu ibo. Iriɛi Baa-Jesu. 7Í wɛɛ do Seejiu Pɔlusi, ilu ilɛi Sipu ilu bisiu. Ilu ilɛu í ni a kpe Baanabasi do Sɔlu wa si na iyi í jɔ̀ wa bi ku gbɔ idei Ilaaɔ̃. 8Amma woo ce dobu dobuu iyi à ya nyi a kpe Elimasi do feei Gɛrɛki má wa bi ku ganji ŋa. Wa ce kookaai ku sinda ilu ilɛu hai si kpãai naanɛ ku dasi si Jesu. 9Nɔ Sɔlu iyi à ya nyi a kpe Pɔlu máu í kɔ̃ò Hundei Ilaaɔ̃ nɔ í kãsi woo ce dobu dobuu iju, 10í ni, awɔ iyi ì jɛ ilu bisi laalɔ do woo takii inɛ, awɔ inɛi Seetam nii nɔ ì jɛ mbɛɛi mii iyi í jɛ dee dee fei. Hee waati yoomai aa leekĩò ide ntɔi Aɔ̃ Lafɛ̃ɛu ku kpaasi do ibo má. 11To, nsɛi, Ilaaɔ̃ á to siɛ awɔ, aa fɛɛju, i kaa yɛ ilu má si zakai ajɔ minjiu ihɛ̃. Bɛ gbakã í fɛɛju, nɔ í nɛ wa dabii wa dɛdɛ inɛ gɔ iyi á mu awɔɛ. 12Iyi ilu ilɛu í yɛ mii iyi í ceu ŋɔi í dasi naanɛ si na iyi í jɔ̀ idei Lafɛ̃ɛ Jesu í to siɛ ntɔ ntɔ.

Pɔlu do Baanabasi à wa Antiɔsi si ilɛi Pisidi

13Si anyiɛ ŋɔi Pɔlu do kpaasiɛ ŋa à lɔ akɔi inyi hai Pafɔsi à nɛ nɔ à to Pɛɛzu si ilɛi Panfili. Amma Zãa Maaku í jɔ̀ ŋa hai bɛ í sinda í nyi Zeruzalɛmu. 14Hai Pɛɛzu bɛ Pɔlu ngu ŋa à mɔsi à bɔ Antiɔsi si ilɛi Pisidi. Iyi ajɔi kusĩmi í to ŋɔi à bɔ ile bii Zuifu ŋa à ya ce kutɔtɔɔ à buba. 15Nɔ inɛ gɔ í cio si tia iyi Moizi do walii ŋau à kɔ. Iyi í cio í tã, ŋɔi inɛ ngboi igbɛ ŋau à ni inɛ gɔ koo bee ŋa ku ni, iŋɛ kpaasi ŋa, bii ì nɛ ide iyi aa muaò inɛ ŋa gbugbã i fɔ ŋa.

16Ŋɔi Pɔlu í dede í ni a coko do awɔ nɔ í ni, iŋɛ inɛi Izirɛli ŋa do iŋɛ dimi mmu ŋa iyi ì waa jirima Ilaaɔ̃, i de itĩ i gbɔ ŋa. 17Aɔ̃ Lafɛ̃ɛ nwai í cica inɛi Izirɛli bala nwa ŋa nɔ í kɔ̃ɔsi kukpɔ nŋa waati iyi à waa jɛ inɛ njoo si ilɛi Ezibiti. Si anyii nŋu, í nya ŋa hai ilɛi Ezibiti do gbugbãɛ, 18nɔ í yɔkɔò ŋa temua zakai adɔ̃ ciiji si gbaau. 19Í kpa dimi ikã ikã mɛɛje si ilɛi Kanaã nɔ í so ilɛ nŋau í na ŋa í jɛ tu ŋa. 20Iyi bɛ ŋa fei í cei zakai adɔ̃ cĩɔ mɛɛ do ciitaa.

Si anyii nŋu, Ilaaɔ̃ í jilɛ nŋa woo kiiti ŋa hee í koo í toò waatii Samuɛli waliiu. 21Ŋɔi à ni aŋa à bi ilaalu, nɔ Ilaaɔ̃ í mu nŋa Saulu amai Kisi hai si dimii Bɛnzamɛɛ nɔ í jɛ bommau adɔ̃ ciiji. 22Nɔ Ilaaɔ̃ í nyaa bomma í sãsi Davidi. Davidiui í jɛaa sɛɛda í ni, ǹ yɛ Davidi amai Izai í jɛ dimii inɛ iyi ǹ bi, nŋui á ce idɔɔbim fei.#13:22 Cɔ Samuɛli 1, 13:14; Iri ku kɔ̃ 89:21. 23Hai si dimii Davidii Jesu í fita, inɛ iyi Ilaaɔ̃ í cica ku jɛ woo faabai inɛi Izirɛli ŋa si bɛi í tako í ce nŋa kuwãɛu. 24Jesu ku bɛi ku naa, Zãa í cea inɛi Izirɛli ŋa fei waazo í ni a kpaasi idɔ nŋa nɔ a ce inyi ku dasi. 25Waati iyi icɛi Zãa í maai ku kpa iri í ni, kù jɛ amui ì waa degbe ŋa, amma inɛ gɔ á naa si anyim iyi n kù to n bate n fũ ikũi baataɛ.

26To, iŋɛ kpaasi ŋa, iŋɛ iyi ì jɛ dimii Aburahamu ŋa, do dimi mmu ŋa iyi ì waa jirima Ilaaɔ̃, iŋɛi à sambaa idei faabau ihɛ̃ wa. 27Wee inɛi Zeruzalɛmu ŋa do inɛ ngbo nŋa ŋa a kù mà yooi Jesu í jɛ dee dee, a kù nɔ a kù gbɔ yaasei idei walii ŋa iyi à ya maa cio si ajɔi kusĩmi feiu. Amma do nŋu fei à jɔ̀ ideu í kɔ̃ si waati iyi à yɛ taalei Jesu. 28A kù yɛ siɛ ngɔgɔ iyi á jɔ̀ a kpaa, amma do nŋu fei à tɔɔ Pilati ku jɔ̀ a kpaa. 29Ŋɔi à ce mii iyi à kɔ na iriɛu fei. Si anyiɛ nɔ à kitaɛ hai si jĩi ku gaauu à dasi ikuɛ si inɔ balɛ. 30Amma Ilaaɔ̃ í jũu hai si balɛ, 31nɔ si afei ajɔ nkpɔ nkpɔ í nyisi inɛ gɔ ŋa araɛ. Inɛ ŋau, aŋai à tooɛ wa wo hai ilɛi Galilee à naa Zeruzalɛmu. Aŋai à waa jɛ sɛɛdai ideɛ nsɛi bi inɛi Izirɛli ŋa. 32Awa mɔ idei kuwã iyi Ilaaɔ̃ í cea bala nwa ŋau, nŋui à waa sɔ̃ ŋɛ. 33Í jɔ̀ kuwãu í kɔ̃ si waati nwa. Awa tɔku nŋa ŋa, awai à yɛ kuwãu í kɔ̃ waati iyi í jĩ Jesu hai si balɛ si bɛi à kɔɔ si tiai Iri ku kɔ̃ ŋa iri minjisia à ni,

Ilaaɔ̃ í ni, awɔi ì jɛ amam,

hai nnyi ǹ jɛ Baaɛ.#13:33 Cɔ Iri ku kɔ̃ 2:7.

34Ilaaɔ̃ í fɔ wo í ni nŋu á jũu hai bi iku ŋa ku ba ku maà na ku sãmi. Bɛɛbɛi í fɔ waati iyi í ni,

an wee nŋɛ dee dee bɛi ǹ wãò Davidi wo,

kù nɔ kù nɛ sika.#13:34 Cɔ Ezai 55:3.

35Na ŋɔi í ce Davidi í fɔ má í ni,

i kaa jɔ̀ arai Inɛ Kumáɛ ku sãmi.#13:35 Cɔ Iri ku kɔ̃ 16:10.

36Davidi takaɛ í ce mii iyi Ilaaɔ̃ í dasiɛ í bɛi í ku, nɔ à suu kɔkɔi balaɛ ŋa nɔ araɛ í sãmi, mà irei. 37Amma Jesu inɛ nŋu Ilaaɔ̃ í jũu hai si balɛ kù sãmi. 38Debɛi, iŋɛ kpaasim ŋa, i jɔ̀ i mà ŋa iyi na saabuɛi à waa sisi nŋɛ iyi Ilaaɔ̃ á kpa idei dulum du ŋɛ. 39Inɛ iyi í dasiɛ naanɛ fei, nŋui á jɔ̀ lafɛ̃ɛ ku jɛ dee dee bi Ilaaɔ̃. Amma woodai Moizi kaa yɔkɔ ku ce bɛɛbɛ. 40Na nŋu, i ce laakai ŋa mii iyi walii ŋa à fɔu ku maà ba ŋɛ, iyi à ni,

41iŋɛ woo yaako amu Ilaaɔ̃, i gbɔ idem ŋa.

Aa biti ŋa nɔ aa ce nfe ŋa,

domi an ce mii gɔ si waati nŋɛ iyi

baa bii í jɛ inɛ gɔ í na wa sisi nŋɛ i kaa dasi naanɛ ŋa.#13:41 Cɔ Abakuku 1:5.

42Iyi Pɔlu í fɔ bɛɛbɛ í tã ŋɔi nŋu do Baanabasi à waa bi a fita hai ile bii à ya ce kutɔtɔɔu, ŋɔi inɛ ŋau à waa tɔɔ ŋa a nyi wa má a naa a waazo si ide akãu si ajɔi kusĩmi mmu iyi wa baa. 43Iyi inɛ ŋau à fita ŋɔi Zuifu nkpɔ do inɛ ŋa iyi à waa too kucei Zuifu ŋa nɔ à mà bɛɛrɛi Ilaaɔ̃u à waa too ŋa. Ŋɔi Pɔlu do Baanabasi à ba ŋa ide ku fɔ à mu nŋa gbugbã ku ba a leekĩ dim dim si didɔ̃i Ilaaɔ̃.

44Si ajɔi kusĩmi mmuu inɛi ilu ŋau fei à tɔtɔɔi a ba a gbɔ idei Lafɛ̃ɛ. 45Iyi Zuifu ŋau à yɛ zamaau ŋɔi à dedeò igu ku ja à waa jã ide iyi Pɔlu wa fɔu nɔ à waa buu. 46Amma Pɔlu do Baanabasi à sɔ̃ ŋa do wɔɔkɔ à ni, tilasii iŋɛ Zuifu ŋa a tako a sɔ̃ ŋɛ idei Ilaaɔ̃. Amma si na iyi í jɔ̀ ì waa kɔ̀si ŋa nɔ i kù ka ara nŋɛ si inɛ ŋa iyi à bi a ba kuwɛɛ hai tã, na nŋu, aa ka jɔ̀ ŋɛ nɔ ka bɔ bi dimi mmu ŋa, 47domi nŋu bɛi Lafɛ̃ɛ í dasi wa ku ce í ni,

ǹ ce ŋɛi bɛi fitila bi dimi mmu ŋa

ku ba i bɔò idei faabau hee kɔɔi andunyau ŋa.#13:47 Cɔ Ezai 49:6.

48Iyi hai jɛ Zuifu ŋau à gbɔ ideu, ŋɔi í dɔ̃ nŋa si, à waa saabu Lafɛ̃ɛ na ideɛu. Nɔ inɛ ŋa iyi Lafɛ̃ɛ í jilɔɔ si a ba kuwɛɛ hai tãu fei à dasi naanɛ.

49Nɔ idei Lafɛ̃ɛu í fangaa si ilɛu fei. 50Amma Zuifu ŋau à dede idɔɔkɔ̃i ilu irii ilu ŋau do inaabo ilu amani ŋa iyi à waa too kucei Zuifu ŋau. Nŋui í jɔ̀ à kpã Pɔlu do Baanabasi iju à lele ŋa hai bɛ. 51Ŋɔi woo bɛ ŋau à gbugbã si ŋa sãai baata nŋa ŋa à waa nyisiò iyi mii iyi á na ku ba ŋa í jɛ idei iri nŋa. Si anyiɛ nɔ à nɛ Ikonimu. 52Amma inɛi Antiɔsi ŋa iyi à waa too kpãai Jesu à wɛɛò inɔ didɔ̃ nɔ à kɔ̃ò Hundei Ilaaɔ̃.

المحددات الحالية:

Woo bɛ ŋa 13: MKL

تمييز النص

نسخ