IRPHUTNA 3
3
Mihriam thu zômloina
1 #
Thup 12.9; 20.2 Khan Rengpa Pathianin ramsa a isiam murdi laia mirûl hi a vâr irlet tak a nia. Khanchu mirûlin nupangnu kuang khan, “Pathianin irhuana thing rahai hi nin ifâk hrang ni mah a iti ma ni?” a tia. 2Khan nupangnu khan mirûl kuang, “Ti ma, irhuana thing rahai hi kin fâk thei, 3irhuan lâitaka thing ra hi chu Pathianin, ‘Nin ifâk hrang ni ma, an them khom nin inthem hrang ni ma, nin inthema nin fâkin chu nin ithi hrang kêng;’ a iti a ni,” a tia.
4Khan mirûlin nupangnu kuang khan, “Thi viat no chin ni; 5nin fâk nî renga khan nin mit hong vâr a ta, a sia le a sa inhriatin Pathian hong ang nin ta, ti Pathianin nangni a inhriat chian a ni khate,” a tia.
6Khanchu nupangnu khan thing ra kha fâk thei zât a nih ti le mit lâktak a nih ti le, mihai invârtir theitu thing ra irzukom tak a nih ti an hriatin chu, a ra senkhat irhmalin a fâk tâka; khan, a pasal khom a pêka a fâk sa tâka. 7Khanchu an ruaiin an mit a hong vâra, korongboi an nih ti an irhriat suak tâka; khanchu theipui hnâ insui irkopin puanbom hrangin an siam tâka. 8Khan, Rengpa Pathian chu irhuan enin chohnung misa dâia a zuang irhâi an inhriata; khanchu Adama le a dôngma chu irhuana thing kâra Rengpa Pathian kha an le’rbîksan pe tâka. 9Khan, Rengpa Pathian khan Adama kha a koia, a kuang, “Adama khôn mo ni iom tâk? a tia.
10Khan ama khan, “Irhuana ni’rhâi kin hriata, korongboia om ki nih sikin, ki chi tâka; khasika khan ki irbîk tâk a ni,” a tia.
11Khan, ama khan, “Korongboi ni nih ti tu’n mo nang a inhril? Thei ra faloi hrang tia nang ki ihril kha ni ifâk tâk ma ni?” a tia.
12Khan Adama’n, “Keima ni ompui hranga nupang ni ni ipêk khan thei ra a ni pêka, ki ifâk tâk a ni,” a tia.
13 #
2 Kor 11.3; 1 Tim 2.14 Khan, Rengpa Pathianin nupang kuang khan, “Ni sintho hi itinlama mani tâk?” a tia. Khan, nupangnu’n, “Mirûlin a ni huanga, ki ifâk tâk a ni,” a tia.
Pathian hremna
14Khan, Rengpa Pathianin mirûl kuang khan, “Hi thil hi ni tho tâk sikin ramsa le sa murdi laia le ramsa tinrêng laia chu khosâl tongin om bîk ni ta, ni boka irvâkin fe hen ni ta, ni hring sûngin vâiphin ni ifâk hrang a ni. 15Khan, nang le nupang hi nangni irdoitir ki ta, ni’rchihai le a’rchihai khom la’rdoitir ki ti: kha khan ni lu zêmirnôitir a ta, nangin a ke ârtui lei inchuk pe ni ti,” a tia.
16Nupangnu kuang khan, “Ni dengtheina le ni nâi vongna kha a saterengin nang inpungtir pe ki ta; intak takin nâi nei ngai ni ta; khannisianlân ni nuamlam chu ni pasal tiang ni a ta, ama khan ni chunga ircham nei ngai a ti,” a tia.
17 #
Heb 6.8
Khan, Adama kuang khan, “Ni dôngma thu ni zôm ta, thing inkhat, ‘A ra ni ifâk hrang ni mah’ tia thu nang ki ipêk kha, a ra ni fâk sikin irnêng hi nangma sikin khosâl tongin a iom tâk a ni; ni dam sûngin intak taka sinin a ra kha fa ta ni ti. 18Ilhling le hloisûlhai khom nang inpung pe ki ta; khan, irnênga ansûl hloihna fâkin om ta ni ti. 19Khan, irnênga ni kîr nôk mâka chu ni hmâia irthântui luang zon zonin bu ne ta ni ti; irnêng pil ata lâksuak ni ni sikin: Pil ni nia, pila dên ni ikîr nôk hrang a ni,” a tia.
20Khan, Adama khan a dôngma kha mihring murdihai nu a ni sikin a’rhminga Evi a tia. 21Khan, Rengpa Pathianin Adama-hai sangram hrangin savun songkol irfualhai a siam pehaia, a innghâktirhai a ni.
Irhuan ata Adama le Evi inhnot suak an ni
22 #
Thup 22.14
Khan, Rengpa Pathianin, “Irngai roi, mihriam chu a siat le sa inhriatin einihai ang an hong ni ta; atûn chu a kuta inbanin, hringna thing ra irhmala fâkin, kumkhua’n hring rôi a ti,” a tia. 23Khasikin Rengpa Pathianin ama a ilâk suakna irnêng pil tuk hrangin Eden irhuan ata a tîrsuak tâk a ni. 24Khanchu, mihriam kha an hnotsuak tâka; khan, hringna thing lampui kha enkol hrangin Eden irhuan nisua tiang pang cherubhai le mei khandai irvêl lop lop kha an omtir tâka.
المحددات الحالية:
IRPHUTNA 3: HRACLBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Hrangkhol CL Bible - PATHIAN LEKHABU IRTHIANG
Copyright © 2008 by The Bible Society of India
Used by permission. All rights reserved worldwide.
