Matius 20
20
Wanakunu man howok kirna anggure
1Yesus nala wanakunu naho'ok konohi hi'ihehewi Makromod Lalap nodi molollo ri mormori na'ahenia, “Al'alam lerida orkirna ida namhara laa nanoin man howok leke howok nina kirna. 2An lernaledi ri, la ne'e pair man howok onnenihe alam ida kupan pere ida, la hopon hi lar howok me'e. 3Riuk wohii an laa pasar do'on ri ida woro'o ra'aroromo, 4de napanak hi lar howok nina kirne haenhi, la nou nala naiwe'el ma namlolo hi, de lar howok me'e. 5Riuk idaweli woro'o, noro riuk wokelu (lere mamamal) namhara wali'ur nanoin man howok. 6Riuk wolima (na'akeki lere helem) namhara ho'o me'e, la an do'on ri ida woro'o ra'alehe honowok, de na'ukanihe, ‘Alhi'ihepenia lere eniyenia ma'aromo mamani la kam howok haida-haide?’
7Enine hir walha ra'ahenia, ‘Ri ka nala honowok mayai.’
Orkirna na'aheni, ‘Lam howok ainu'u kirna enne.’
8Rakan lere helem orkirne onne hopon nin ma namwali uluwakun man howok enihe napolu man howok kirna enihe maiwuku leke pair rira maha-mahe. An pair man howok kauli'ur nolu, mene pair ma nolu eni.
9Man howok kauli'ur enihe kokala kupan pere ida. 10Ende man mai nolu howok, pene'ek lo'o pair hi narehi man kauli'ur, maa mai ne kokala kupan pere ida haenhi. 11Enpenia man howok nolu onnenihe akin apinha, de rawalha lira noro orkirna eni ra'aheni, 12‘Alhi'ihepenia ri eniyenihe howok jam ida mehe, maa pair hi namnenehe noro mayai? Am howok lere kekeme lolo lere manmanha raram!’
13Orkirne onneni walhala man howok ida na'ahenia, ‘Ya'u ka'u hi'i sala ida noro i wal'u. O me'e kokala kupan pere ida penia mam howok. 14Kokala kupan eniyeni la mala'a here. Ya'u raram nodi pair man mai howok kauli'ur namnenehe noro o. 15Yo odi ainu'u kupan pair, de menmololla'u. Lo'o makehen ono ya'u hi'i ha man wa'an noro hie?’ ”
16Yesus na'aheni wali'ur, “Ende man kauli'ur namwali ma nolu, la ma nolu namwali man kauli'ur.”
Yesus wakunu Nin makmaki
(Mrk. 10:32-34; Luk. 18:31-34)
17Yesus noro Nina man lernohi pakunohi idaweli woro'o enihe rala'a laa Yerusalem. Ahille kalla makun, An kukunohi hi na'ahenia, 18“Makaniyala! Lere eni ik kala'a mamani laa Yerusalem. Ik rakan enne, ri na'olu Ya'u, ma namwali Ri Mormori Anane, nala kanile imam lalape roro meser Horok Lap enihe mene hir hukumnesnA'u, 19la rala Ya'u kanile ri ma ka namwali Yahudi enihe. Hir ilnohi ralnohi Ya'u, riuk rerhe Ya'u#20:19 Nadedem hi rodi arpau ulikin man nair kimiruwana aile honon riuk rerhe ri., la wairesne Ya'u lolo au kekiyowok. Maa alam wokelu Ya'u mori wali'ur.”
Man panulu ilitolle ri namehin
(Mrk. 10:35-45)
20Yakobus, Yohanis, noro inna (hono naran Zebedeus) mai Yesus. Inna kadi ein korno Ai kalarna leke napanak haida.
21Yesus na'ukani ai, “Mame nina panaeku inhawe?”
Ai na'aheni, “Ya apanak lere Makrom'u mamwali Rai, ya an'u woro'o enihe raikorala herum mariri malanna.”
22Maa Yesus ne'el ai, “O ka mauroin inhawe man mapapanak onneni.” Yesus po'onala anan woro'ohe, na'ukani, “Mi lo'o mamkene momun oir man meru#20:22 ‘Oir man meru’ nin panaeku apinpinha wo'operperi man Yesus lo'o lernala. nano cawan ma ka nalo'ol Yo omune?”
Hir walha, “Ai mamkene, Pape.”
23Yesus ne'el, “Namlolo, mi lo'o momun oir man meru nano Ainu'u cawan, maa Ka odi molollo wekel inhoi naikoro Ya'u herne mariri malanna. Ya Am'u niliyedi ri man Ai raram nodi naikoro lolo onne, la na'akenedi rir onno me'e.”
24Man lernohi pakunohi idaweli namehin derne woro'ohe rira napanak eni ne, hi ra'ahan.
25Enime'ede Yesus napolu hi na'akeme maiwuku, na'aheni, “Mi mauroin nahenia hair-hair rira rai-rai roro rir uluwakun lalapa ma ka nauroin Makromod Lalap enihe, rodi molollo kerne dalha ri mormoriyane, 26maa yom hi'i heheni. Inhoi raram nodi namwali man panulu lolo mi, ai namkene ilitolle mi.
27Inhoi raram nodi namwali ma nolu, ai onne helkaki namdaru namkene namwali hophopon wahwahan ki mi, 28leke maise Maya'u ma namwali Ri Mormori Anane. Ka'u mai leke rin ilitolle Maya'u, maa Ya'u mai leke ilitolle ri la ala I kem'u resne leke huri we'er ri nammori nano rira dohohale.”
Yesus hi'i wa'an maktoko woro'o minle Yeriko
(Mrk. 10:46-52; Luk. 18:35-43)
29Yesus noro Nina man lernohi pakunohi enihe ramhara nano Yeriko, ri namansa lernonohi hi. 30Lolo kalla, ri maktoko woro'o raikoro aile kalla arkanne. Hir derne Yesus lo'o lole kalla onneni, de wakau ra'aheni, “Makromod Yesus, Daud Anan,#20:30 Ri Yahudi rauroin nahenia lerida ri ida mai nano Makromod Lalap man An kikan namwali Rai laa ewi-ewi de nodi molollo hi naise nonolu eni Daud nodi molollo hi upun a'an. Lere mak toke onne rapolu Yesus, “Daud Anan,” hi rauroin Yesus namwali Rai laa ewi-ewi man hir lalapan eni. maramyakala mayai ke'e!”
31Heri rahu onnenihe dadiyala woro'ohe, “Karkaramedi!”
Maa hir wakau eren rarururi, “Makromod, Daud upun anan, maramyakalai ke'e!”
32Yesus rakanedi woro'ohe miminloleni ne, Ai namririyala, napolu woro'ohe la na'ukani, “Mi raram nodi Ya'u hi'i inhawa ki mie?”
33Hir walhe, “Makromod, ai raram nodi do'onedi here!”
34Yesus nararamyakala woro'ohe, de kemenala liman makanhe. Idewe woro'ohe makan mouwedi la lernohi Yesus.
Currently Selected:
Matius 20: kje
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2008, Yayasan Sumber Sejahtera. All rights reserved.
