Matayo 26

Makanze Aakuyaya Jeso

(Maako 14:1-2; Luka 22:1-2; Johani 11:45-53)

1Inzho naakamana kwaamba mazwi aza oonse wakabaambila ba shiciiya bakwe ati, 2#Kul 12:1-27“Mulizhi ati kwaita mazuba obile kulakaba ipobwe lya Kwiitilila, ubobo Mwanaa Muntu ulakaabwa kwaamba akankaminwe aciciinkano.”

3Inzho bapaizhi bakando ubakando baba Juda bakabungana kulubanza lwa mupaizhi mukando Kayafa. 4Bakateelezhanya kwaamba bayane inzhila yakumukwata Jeso cakuseseka kwaamba ayayiwe. 5Pele bakaamba ati, “Kutaamba ciindi ce pobwe, nkaambo kulaba nikuba lupyopyongano akati ka bantu.”

Jeso Wananikwa ku Betaniya

6Inzho Jeso naakaakuli ku munzhi wa Betani muŋanda yaka Simoni uutewa ati Shicinsenda, 7#Lk 7:37, 38kwakashika mukaintu umwi wakaakukwete impawo ya mafwuta aanunka kalonze a muulo mukando cini cini. Wakaatila a mutwi waka Jeso ciindi naakaakulya. 8Pele ba shiciiya nibakabona bobo, bakatongauka baamba ati, “Anu azonaukilanzhi mafwuta aza? 9Nkaambo kaayelele kusambalwa mali manji manji, amana apewa ku bapushi.” 10Jeso wakacizhiba ncibakaakwaamba amane wababuzha ati, “Anu ngwaanzhi ngumupenzha wezu mukaintu? Wancitila cintu cibotu. 11#Ciz 15:11Bapushi mulaakuli abo lyoonse, pele tamuukuli ame lyoonse pe. 12Naantila aza mafwuta wabamba mubili wangu kuya kukuzhikwa. 13Cini cini ndamwaambila ati kufwumbwa koko kuya kukambaukwa Makani Mabotu ano anshi yoonse, mpaka uceci ncaacita wezu mukaintu cilakaambwa, kwaamba bakaakumutelaicila ngawo.”

Judasi Wahumina Kumwaaba Jeso

(Maako 14:10-11; Luka 22:3-6)

14Ubobo umwi wabo bali ikumi ubatwesha bobile uutewa ati, Judasi Shikaliyoti wakaya ku bapaizhi bakando, 15#Zaka 11:12wakababuzha ati, “No mulampaanzhi kuti ndamwaaba Jeso nkumubele?” Bakamupa mali a muwaya waya ali makumi otatwe. 16Inzho kuhwaawo wakakanka kukapula ciindi cibotu cakumwaaba.

Jeso Walya Ipobwe lya Kwiitilila u ba Shiciiya Bakwe

(Maako 14:12-21; Luka 22:7-14, 21-23; Johani 13:21-30)

17Inzho mu buzuba butaanzhi bwepobwe lya cinkwa ciina bumena ba shiciiya bakeza kwa Jeso boombuzha ati, “No nkukwi nkuuzanda ati tukakubambile ipobwe lya Kwiitilila kwaamba ulye?”

18Jeso wakabaingula ati, “Kamuya mu munzhi kwandaba mukamwaambile ati, Mwiiyi waamba ati, ciindi cangu cili afwaafwi. Ndazanda kulya ipobwe lya Kwiitilila kuŋanda yako antoomwi u ba shiciiya bangu.” 19Ubobo, ba shiciiya bakacita umbona mbubakalaililwa. Bakoobamba Mulalilo uwe Pobwe lya Kwiitilila.

20Nikwakaba kumangolezha, Jeso u ba shiciiya bakwe bali ikumi ubatwesha bobile bakakala kulya. 21Inzho nibakaakucilya wakaamba ati, “Cini cini ndamwaambila ati, umwi wenu ulangaba.” 22Bateelele bobo ba shiciiya bakausa cini cini, ubobo bakakanka kumubuzha womwi womwi ati, “Sa ndime Mwami?.” 23#Inte 41:9Walo wakaingula ati, “Nguwena ngutubwenga aze nguukangaba. 24Mwanaa Muntu ulakafwa umbona mbukulembelwe shamakani akwe. Pele ulikwete mapenzhi wezo muntu uukamwaaba Mwanaa Muntu! Kacili cibotu kwaamba naatakazhalwa.” 25Ngoonaawo Judasi, wezo wakamwaaba Jeso wakamubuzha ati, “Sa ndime Mwiiyi?” Jeso wakaingula ati, “Waamba.”

Mulalilo wa Mwami

(Maako 14:22-26; Luka 22:14-20; 1 Bakolinto 11:23-25)

26Inzho nibakaakucilya wakabweza cinkwa wakalumba kwa Leza, wacikomauna, wacipa ba shiciiya bakwe waamba ati, “Amubweze mulye wezu ngu mubili wangu.” 27Amane wakabweza inkapu, naakamana kumulumba Leza wakabapa waamba ati, “Amunwe noonse, 28#Kul 24:8; Jele 31:31-34bobu mbubulowa bwangu bwa cihuminano cipiya, bwatililwa banji banji kwaamba shibi shabo shilekelelwe. 29Ndamwaambila ati, kuhwa bwasunu nshikanwi linji mushinza wamasaansa mpaka kushika mu buzuba mbutukaanwa amwe mu bwami bwaka Taata.”

30Inzho nibakamana kwiimba lwiimbo, bakaya ku lupili lwa masamu ama Oliva.

Jeso Waambila ati Pita Ulakamutama

(Maako 14:27-31; Luka 22:31-34; Johani 13:36-38)

31 # Zaka 13:7 Ngoonaawo Jeso wakabaambila ati, “Umwe noonse bwasunu mashiku mulalukanka, ukunshiya ice, nkaambo kulilembelwe ati, ‘Ndakauma mweembezhi, butanga bulakamwaala.’ 32#Mat 28:16Pele ndakabushiwa ndakamutaangunina kuya ku Galilaya.” 33Ngoonaawo Pita wakamwaambila ati, “Nikuba ati boonse bakakushiye, ume nshikakushiyi pe.” 34Jeso wakamwaambila ati, “Cini cini ndakwaambila ati, bwasunu mashiku aza ngoona katana u kulila mukombwe ulantama shiindi shotatwe.” 35Pita wakaamba ati, “Nikuba ku lufwu, nshikakutama.” Umbona bobo mbubakaamba ba shiciiya boonse.

Jeso Wakomba mu Getisemani

(Maako 14:32-42; Luka 22:39-46)

36Inzho Jeso u ba shiciiya bakaya kubusena butewa ati Getisemani, amane wakabaambila ati. “Amukale ano ndayaalya nkakombe.” 37Jeso wakaya u Pita, ubanakwe Zebedi bobile. Amane wakakanka kuusa ukupenga mu monzo. 38Wakabaambila ati, “Monzo wangu ulyuusile cini cini ubuusu bwa lufwu. Amushaale awa mulindile mutoona.” 39Jeso wakaya ambele ashoonto amane wahuntama, wakomba waamba ati, “Taata, kuti naa cilakonzheka, yezhi inkapu yamapenzhi neenjitilile. Nikuba bobo kutabi kuzanda kwangu pele luzando lwako lucitwe.”

40Amane wakaya ngaakashiya ba shiciiya bakwe, weza kuyana baloona. Wakamwaambila Pita ati, “Sa umwe tamukonzha kwaamba mulindile antoomwi ame iwoola lyomwi bulyo? 41Amulindile mutoona mukombe kwaamba mutanjili mu masunko. Cini cini moza ulazandisha pele mubili wabula insana.”

42Jeso wakaya lwabili, wakomba ati, “Taata, kuti naa inkapu yezhi teekonzha kunjitilila cita bulyo kwiinwa, luzando lwako alucitwe.” 43Amane wakashika ulimwi ku bashiciiya, wayana bakoona menso alema.

44Ulimwi Jeso wakabashiya waya kukomba ulwatatu, u kwaamba mazwi ngoonaazo bulyo. 45Amane wakeza ku bashiciiya bakwe wabaambila ati, “Mutoona ukulyoocezha nizho, mulalyocezha katotu. Amubone ciindi cashika, Mwanaa Muntu waabwa u matashi a ba shishibi. 46Amuzhimuke tuukuya. Nguwezu shikungaba washika.”

Kwaabwa kwa Jeso

(Maako 14:43-50; Luka 22:47-53; Johani 18:3-12)

47Jeso naakaakucaamba bobo, Judasi umwi wabo bali ikumi ubatwesha bobile wakashika, kali iinkamu inkando ya bantu bakwete maceba iinkoli. Yezhi inkamu yakatumwa ku bapaizhi bakando ubakando baba Juda. 48Inzho shikumwaaba kabapele citondezho cakuti, “Wezo ngunkaashonta inguwe mukamwaange.” 49Ubobo wakashika kwa Jeso waamba ati, “Wabonwa Mwiiyi!” Amane wakamushonta. 50Jeso wakamwaambila ati, “Mweenzuma cita nciwazhila.” Ngoonaawo bakahuumuka bamukwata. 51Umwi wa babo mbucakaakuli u Jeso wakasomona iceba lyakwe wakukosola kutwi kwa muzhice wa mupaizhi mukando. 52Jeso wakamwaambila ati, “Libweezhe iceba lyako munkomo yalyo, nkaambo boonse basebezha maceba balakayayiwa u maceba. 53Sa ulatelaika ati, nshikonzha kumukumbila Taata kwaamba antumine ndilyona ninzho inkamu ya baanjelo babaala kwikumi ubatwesha bobile kwiza kunhuna? 54No kuti ndacita bobo, ushilembelwe u maŋwalu shilacitika buti?” 55#Lk 19:47; 21:37Amane Jeso wakayambila inkamu ya bantu babo ati, “Nkamboonzhi mweza kunkwata u maceba iinkoli ukoya numweza kukwata mutewu? Abuzuba abuzuba ndakaakukala ndayiisha muŋanda ya Leza, pele mwiina nimwakankwata. 56Pele sheshi shoonse shakacitika kuzuzucizha nshibakalemba bashinshimi.” Ngoonaawo ba shiciiya boonse bakamushiya balukanka.

Jeso Wabetekwa

(Maako 14:53-65; Luka 22:54-55, 63-71; Johani 18:13-14, 19-24)

57Babo bantu bamane kumukwata Jeso bakamutola kwa Kayafa Mupaizhi mukando, koko kwakaakubungene balembi ubakando baba Juda. 58Pita wakacilila keza bubalya intende intende mpaka wakashika kulubanza lwa mupaizhi mukando. Wakenjila mukati, wakala antoomwi ubalindizhi kwaamba abone cikacitika. 59Bapaizhi bakando antoomwi u babeteshi bakando boonse bakasoleka kukapula bumboni bwakumutamikizha Jeso kwaamba bamuyaye. 60Bayina nibakayana bumboni nikuba ati bakamboni babeshi banji banji bakeza kumubeesha twaambo. Ku mamanino kwakashika bantu bobile 61#Joh 2:19bakaamba ati, “Wezu kaamba ati, ‘Ume ndakonzha kwiiyaya iŋanda ya Leza ukwiizaka mu mazuba otatwe.’ ”

62Mupaizhi mukando wakazhimuka wamubuzha Jeso ati, “Sa wiina cakwiingula? No ncinzhi ncibakutamicizha?” 63Jeso wakaliinza bulyo. Mupaizhi mukando wakamwaambila ati, “Ndakwaambila mwizhina lya Leza uupona ati tushimwine naa ndiwe Munanike wa Leza, Mwanaa Leza.” 64#Dan 7:13Ngoonaawo Jeso wakaingula ati, “Waamba. Pele ndamwaambila ati kuhwa ninzho mulakoombona Mwanaa Muntu ulishite kwitashi lya cilyo lya Bwami. Mulakoombona ulimwi uleza mu makumbi a kwizeulu.” 65#Bale 24:16Ngoonaawo mupaizhi mukando wakazapaula cakusama cakwe u kwaamba ati, “Wezu muntu ulasampaula Leza. Anu mbwaanzhi bumboni bunji mbutulanga? Mwaliteelelela nubeni mbwaamba? 66No mulamupa mulandunzhi?”

Ngoonaawo bakaingula ati, “Ulyeelele kufwa.”

67 # Aiz 50:6 Bamane bakamufwila mate ku bushu ukumuuma kalusu, bamwi bakamuuma inkumbaizhi, 68baamba ati, “Shinshima uwe umunanice wa Leza. Sonda, nguni wakuuma?”

Pita wa Mutama Jeso

(Maako 14:66-72; Luka 22:56-62; Johani 18:15-18, 25-27)

69Inzho Pita kashite ansengwe mulubanza. Ndilelyo umwi mukaintu musebezhi wa mupaizhi mukando wakeza kwakwe wamwita ati, “Uwe aze mwakaakuli u Jeso muna Galilaya.” 70Pita wakatama kabateelele boonse ati, “Nshicizhi ncuuamba pe.” 71Inzho naakaakuzanda ati ahwe ansengwe, uumwi mukaintu wakamubona, wakaambila babo mbaakaakuzhimine abo ati, “Wezu mulombwana aze kabali u Jeso waku Nanzaleta.” 72Ulimwi Pita wakatama cakupinga ati, “Ngu Leza mwini, nshimwizhi muntu wezu.” 73Kwiite bulyo kaindi kashoonto babo mbucaakuzhimine abo bakeza kwa Pita baamba ati, “Cini cini aze uwe uli umwi wabo baba nkaambo kwaamba kwako kulakuzubulula.” 74Ngoonaawo wakakanka kuzumanana ukupinga miya ati, “Wezu nshimwizhi cini cini.” Ngoonaawo mukombwe wakalila. 75Inzho Pita wakalizhibaluka izwi ndyaakaamba Jeso lyakuti, “Mukombwe katana kulila ulakaakuntamine shiindi shotatwe.” Wakahwa ansengwe waya kulila cabulowe.

Currently Selected:

Matayo 26: ILL

ማድመቅ

Copy