Mak 7
7
Zozii ɩya Zifʋnyaa 'la ‑jlɩmaa
(Mat 15.1-20)
1Falizɩɛnnyaa* ɩya ‑jlɩmaazienya* ‑zlʋsaasa ya Zolizalɛmʋ 'wlʋlʋ, ma ya ci 'nyɩ ma ya Zozii cɩ 'wluwlalɩ. 2Ma ya 'lɩ lebhe ɔla gɩlɩnyaa* ‑anʋa, ma 'ta wlɩwɔlʋ, saa mala ‑jlɩmaa 'clalɩ 'lɛ na 'nyɩ ma ya 'lɛ li. 3Falizɩɛnnyaa* ɩya ‑daa Zifʋnyaa* 'fɩan 'plɩlɩ ma tokadɔcɩ 'la ‑jlɩmaa 'kʋ. Ma 'ta ka 'nanɩ wlɩwɔlʋ na, 'ma li 'ta. 4'Nyɩ gbazɩ ma ‑ka ‑adabhlaan 'wlʋ, 'nyɩ ma 'ta ka cɩwɔlʋ na, maa li 'ta. 'Sɛ 'la ‑godogodonʋnʋgbɩ ‑bhutukpa, ma 'plɩlɩ 'lɛ 'kʋ na, ɩ ‑kʋ. Ɩmɩ -ɩ -glɩ 'lɛ 'nyumlakobhi, nyidi ɩya ‑dakwɩ 'la cɩwɔlʋlɩɛ. 5Falizɩɛnnyaa ɩya ‑jlɩmaazienyaa ya Zozii neencla lebhe: «'Lɩsaa 'la gbʋ ‑naa gɩlɩnyaa 'plɩlɩ 'taa 'lɛ ‑a tokadɔcɩ 'la ‑jlɩmaa 'kʋ bha? Wɔɔsaa 'wluku maa wɔlʋ 'ta 'lɛ wlɩ 'nyɩ ma lia 'lɛ bha?» 6Zozii ya maa 'cla lebhe: «Yooyo ncɛlɩnyɩ, Laagɔnekʋnyɩtɛnyɔ* Izayii ‑kaa 'ge, daa ɔ 'cla 'lɛ lebhe:
Laagɔ nabhe: 'Lɔlʋʋ ‑naa,
nimli 'kʋ ʋ kanvʋlʋʋn 'lɛ,
‑ma ʋla pɔlɛa tlʋʋn cɩ da.
7 'Kpɔkpɔ 'titi ma gʋgwlaan 'lɛ,
sa, mala wɔlɩa ma ca 'lɛ na,
ncɛlɩ 'la ‑jlɩmaa ɩ ‑glɩ 'lɛ.»
8Zozii ya ‑awlɛ maa 'cla lebhe: «A salɩ Laagɔ 'la ‑jlɩmaa 'ci kʋ 'nyɩ a 'plɩlɩ ncaanʋnʋgbɩa 'kʋ.» 9Zozii claa maa lebhe: «A salɩ Laagɔ 'la ‑jlɩmaa 'ci 'kʋ le a 'ka a 'naa 'nanɩ 'kʋ 'plɩlɩsa cibhlili. 10Sa Moyizi ya 'cla lebhe: Zʋ ‑n 'nɔ ɩya ‑n to. Ɔ ya ‑awlɛ 'cla lebhe: Ɔmɔa ‑ɔ ‑cɩ ka 'lɛ ɔ to ‑aana ɔ 'nɔ vla na, ɩ ‑fata lebhe ma 'bhlɔɔ. 11‑Ma anyɩ a cla lebhe: Ka ɩ ‑ka ‑kʋ le nclɔɔ ‑ka ɔ to ‑aana ɔ 'nɔ 'cla lebhe: Lʋʋa n cɩ 'kaa ‑mɔɔ 'lɛ 'nyɩ le n 'kɔɔ klalɩ na, ʋ ‑glɩ ‑kɔlʋban, ɩ sa ‑zɔn le n yʋʋ Laagɔ 'ŋlɩ cɩ slalɩ na, 12a nyɩ 'dɛ ‑naanɔa ‑jioli le ɔ 'la klalɩanɩ ɔ to ‑aana ɔ 'nɔ. 13'Lɩka ‑sa, a sa 'lɛ 'dɛ Laagɔ 'la wɔɔnyɩtʋa, 'nyɩ a ca 'lɛ ala ‑jlɩmaa. 'Nyɩ a nʋ 'sɛ 'la nʋnʋgbɩ ‑bhutukpa.»
Ɩmɩa ‑ɩ nyumo 'lɛ nclɔɔ Laagɔ 'ci 'kʋ na
(Mat 15.10-20)
14Zozii ya ‑awlɛ ‑alawleea la 'nyɩ ɔ yaa 'cla lebhe: «Anyɩa 'fɩan a poon 'nyukwliin ɩya a 'nu. 15Lʋʋa ‑ʋ mʋ 'lɛ nclɔɔ nɩkplaan na, ‑n 'ta ʋmʋ nyumo 'tɔɔ 'lɛ Laagɔ 'ci 'kʋ, ‑ma ɩmɩa ‑ɩ 'wlʋlʋɔ 'lɛ nɩkplaan na, ɩmɩ ‑ɩ nyumoo 'lɛ.» [16]#7.16 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «Na, nclɔɔ ‑ɔ ‑ka 'nyukwli ‑ka le ɔ 'ka ’nu na, 'naa ɔ 'nu.»
17Na, daa Zozii 'wlʋlʋ 'lɛ ‑alawleea cɩɩn 'nyɩ ɔ mʋ 'lɛ 'sleen na, ɔla gɩlɩnyaa* yɔɔ 'cla le ɔ ‑sa maa ‑nyandlaa ɔ bu 'lɛ na ‑zɔn. 18Ɔ ya maa 'cla lebhe: «Na anyɩ ‑ma, ka 'a 'nu 'ta 'lɛ bha? 'A 'lɩ 'ta le lʋʋa ‑ʋ mʋ 'lɛ nclɔɔ nɩkplaan na, 'ʋ nyumo 'tɔɔ Laagɔ 'ci 'kʋ bha? 19Sa 'ʋ mʋ 'ta ɔla pɔlɛa 'ciin, ‑ma ɔla nɩkplaan ʋ mʋ 'lɛ 'nyɩ ɔ mʋ 'lɛ 'kwla 'kʋ.» Ka Zozii cla 'lɛ ‑da lebhe lililɩɩa 'fɩan ɩ ‑kplɔ. 20Ɔ ya ‑awlɛ 'cla lebhe: «Ɩmɩa ‑ɩ 'wlʋlʋ 'lɛ nclɔɔ nɩkplaan na, ɩmɩ ‑ɩ nyumoo 'lɛ Laagɔ 'ci 'kʋ. 21Wɔɔgugwie ‑nyinyea 'fɩan, ɛ 'wlʋlʋ nclɔɔ nɩkplaan, ɔla pɔlɛ 'ciin: ‑Badaaglu, 'wi, ncaabhlalɩɛ, 22ŋodimatɩɛ ɩya ŋlʋmatɩɛ, ‑lɩɩtʋtʋɛ, ‑abhɔlɛ, ‑kplakpla, yooyogbanʋlɩɛ, woze, ‑glaankalɩɛ, ‑tutule ɩya pɔɔbhlagbɩ. 23Wɔɔnyinyi ‑naa ‑tɛtɛa, nclɔɔ 'la pɔlɛ 'ciin ɩ 'wlʋlʋ 'lɛ 'nyɩ ɩ nyumoo 'lɛ Laagɔ 'ci 'kʋ.»
Lowluŋlɔ bhlo 'la pɔɔtɛtɛ
(Mat 15.21-28)
24Zozii ya 'dɛ 'wlʋ 'nyɩ ɔ ya Tilibhlɩa 'kʋ mʋ. Ɔ ya 'sle bhlo nɩkplaan ble, ɔ 'taa ‑wa lebhe nclɔɔ cibhlilia sɛɛ, ‑ma ma ya sɛɛ cibhlili ‑tɛɛ. 25'Ŋlɔ bhlo, 'wugo ‑nyunyu bhɩa ɔla ŋlʋcʋkwla 'kwlɩ. Daa ɔ 'nu 'lɛ Zozii 'la wɔlɩ na, 'kplookʋ, ɔ ya ci 'nyɩ ɔ yɔɔ ‑deliin ‑kukoonkplii sasla. 26'Ŋlɔ ‑naa ‑glɩa Glɛkɩŋlɔa ma valɩlɩ 'lɛ Silofenisibhlɩa 'kʋ na. Ɔ 'clalɩa Zozii le ɔ ‑sa ɔ ‑nyɔŋlɔ 'wugo ‑nyunyua nɩkplaan. 27Zozii yɔɔ 'cla lebhe: «'Talɩ 'cuoa 'cin ma 'ka lo 'fɩɔn, sa ɩ 'ta nanɩ lebhe ma 'ma 'cuoa 'la 'flawoa ɩya ma 'pʋʋ goye.» 28'Ŋlɔa yɔɔ 'cla lebhe: «‑Kwlenyɔ, ɩ ‑glɩ ‑nʋawlɛ, ‑ma goyea kʋ 'tlɔnblɩa ‑zɔn 'nyɩ ɩ li ne 'kʋ 'la 'kli pɩa ‑ɩ bhli 'lɛ na.» 29Zozii yɔɔ 'cla lebhe: «Wɔlɩ ‑naa ‑n nyɩtɛ 'lɛ na, ɩmɩ 'wluku, mʋ, ‑ma 'wugo ‑nyunyua ya ‑naa 'cʋa nɩkplaan 'wlʋ.» 30Daa ɔ cɔlɔ 'lɛ 'sleen na, 'cileea ‑gataa 'kusia 'kʋ, 'wugo ‑nyunyua yaa 'mɔɔ nɩkplaan 'wlʋ.
Zozii ya ‑amunaanyɔ bhlo jabha
(Mat 15.29-31)
31Zozii ya Tilibhlɩa 'kʋ 'wlʋ, ɔ ya Sidɔɔn 'plɩlɩ, ɔ ya Dekapɔlʋbhlɩa 'ŋatɩ 'nyɩ ɔ ya Galileenyia cɩ cɔlɔ. 32Ma yɔɔ 'nyukwlitelinyɔ bhlo nyɩtʋ bhɩaa 'lɛ 'kwlɩ na, ‑la 'nyɩ ma yɔɔ 'clalɩ le ɔ ‑gbɛɔ sɔ 'wlu. 33Ɔ ‑yɔɔsɔ ya ‑alawleea cɩɩnwlʋlʋ 'nyɩ ma ya gbɛga. Ɔ yɔɔ ‑wlɩca 'nyukwliin fa, ɔ ya ɔcɩ ‑daadʋ ‑wlɩca 'ciin zʋ 'nyɩ ɔ ya nclɔɔa 'la mɩɔa ko. 34Ɔ ya ‑laagɔɔn kope, ɔ ya nyɔmʋslu 'nyɩ ɔ ya 'cla lebhe: «Efata», ɩ sa ‑zɔn lebhe: «Kalɩ 'gbo.» 35'Kplookʋ, ɔla 'nyukwlia ya 'gbokalɩ, ɔla mɩɔa ya ‑blulu 'nyɩ ɔ nyɩtɛanɩa 'nanɩ. 36Zozii ya maa 'fɩan 'cla lebhe ma 'la ‑saa nclɔɔ bhlogbɩɩ 'dɩ, ‑ma saa ɔ saa 'mɩɩ 'lɛ maa neen na, sɛ ma saa 'mɩɩ 'lɛ ‑tɛɛ. 37Nikpoo ‑slaa maa 'kadieda 'nyɩ ma claa lebhe: «‑Zaagbʋsa, lɩɩa ‑tɛtɛa ɔ nʋ 'lɛ na, ɩ nanɩ! Ɔ gba 'nyɩ 'nyukwlitelinya nu 'nyɩ ‑amunaanya nyɩtɛ.»
Dida New Testament © Bible Society of Côte d'Ivoire, 2013.
