Mak 13
13
Laagɔpaakadiea 'la gbɔlʋlɩɛ
(Mat 24.1-3; Luk 21.5-7)
1Daa Zozii wlʋ 'lɛ Laagɔpaakadiea* ‑zɔn na, ɔla gɩlɩnyaa* nɩkplaan bhlo yɔɔ 'cla lebhe: «Canyɔ, kopeka cɔkʋ ‑naa, kopeka ‑paakadɩ ‑naa!» 2Zozii yɔɔ 'cla lebhe: «‑N ‑jlɛ ‑paakadɩ ‑naa! Cokwie cɩ 'ta ɛ li ‑cokwie 'kʋ ‑to. Ɩmɩ ‑naa 'fɩan cɩ 'ka ‑gbɔlʋɔ.»
'Pʋpʋkʋ 'la bhɩadaa 'la ghleda
(Mat 24.4-8; Luk 21.8-11)
3Sa Zozii ‑kʋa 'lɛ ‑Olivʋsikikea 'wlu sa, Laagɔpaakadiea* 'la 'kʋtakpaan na, Pɩɛlɩ, Zakɩ, Zaan ɩya Andlee ‑yɔɔsɔ ya gbɛga 'nyɩ ma claa 'mɔɔ neen lebhe: 4«Solu ‑anyɩ, clɩɩsaa 'kʋ ɩmɩ ‑naa cɩ 'kaa 'lɛ ŋeni bha? 'Nyɩ ghleda saa ‑cɩ kaa 'lɛ pala lebhe ɩmɩ naa 'fɩan cɩ 'ka kpa ɩ 'ka 'plɩ bha?»
5Zozii ya maa solulɩɛ bhɔ, ɔ nabhe: «A zʋlʋ pɔlɛ 'kʋ, nclɔɔ bhlogbɩɩ 'la 'nyiglilia kɩnɩ anyɩ. 6‑Bhutukpa cɩ 'ka na 'ŋlɩa 'ma ɩya ma 'ka ci. Ma cɩ 'ka 'cla lebhe: ‑Amʋ ‑ɔ ‑kʋ 'lɛ 'dɛ, ɩya ma 'ka ncaabhutukpa mlɔa. 7Daa a cɩ 'ka 'lɛ tʋ ɩya tavʋkasɛ 'la wɔlɩ 'nu na, ɩ 'la ‑sa anyɩ pɔlɛɛn: Ɩ ‑fata lebhe ɩmɩ ‑naa ŋeni, ‑ma ‑n 'ta ka ka bhɩalɩdaa. 8‑Ghɛɛ, 'lɔlʋ cɩ 'ka 'lɔlʋ gbatlɩmʋnʋ, nyɩbhɛlɩdu cɩ 'ka nyɩbhɛlɩdu gbatlɩmʋnʋ. 'Bhlɩ ‑bhutukpa 'kʋ ‑dʋdʋa cɩ 'ka tɩtɛlɩ, ŋɔmʋ cɩ 'ka pla. Ɩmɩ ‑cɩ ka 'lɛ valʋbhlalɩɛa 'la bhɔda 'plɩ. 9A gblɩbhalɩ. Ma cɩ 'ka anyɩ 'tɩtɩplajliin ɩya bhibhiepalɩa* ‑zɔn tʋkulu, ma cɩ 'ka anyɩ ‑ngblieen bhutili. Amʋ 'wluku, ma cɩ 'ka anyɩ goonvlacɩ ɩya nyɩbhɛlɩ ‑deliin fa le a 'ka maa 'ci 'kʋ, 'na ‑danʋfʋɛ lili. 10Sa, ɩ nanɩ lebhe Dɩnanɩa*, ɩ ‑sɔɔ 'lɔlɩa 'fɩan 'fɩɔn na. 11Daa ma cɩ 'ka 'lɛ anyɩ 'kʋbhli ɩya ma 'ka 'lɛ anyɩ 'tɩtɩplajliia nɩkplaan fa na, ɩmɩa a cɩ 'ka 'lɛ nyɩtɛ na, 'la pɔɔvʋ 'la 'bhlaa anyɩ, ‑ma 'dɛ 'la 'ŋwacɩa nɩkplaan, wɔlɩa ‑ɩ ‑cɩ ka 'lɛ anyɩ ‑nyɩɔ na, a nyɩtɩɩ, sa ‑n 'ta anyɩ 'titii ‑ɔ cɩ 'tanɩ 'lɛ nyɩtɛ, ‑ma ‑Kplɔkplɔ ‑Wugoa*. 12Na, bholi cɩ 'ka ɔ bholi ‑sa le ma 'bhlɔɔ ɩya to 'ka ɔla 'cʋ ‑sa. 'Cuo cɩ 'ka mala valɩnya gbatlɩmʋnʋ ɩya ma 'ka 'cla le ma 'bhla maa. 13'Na 'ŋlɩa 'la gbʋ, ncɛlɩa 'fɩan cɩ 'ka anyɩ zɔbhɛlɩ. ‑Ma ɔmɔa ‑ɔ ‑cɩ ka 'lɛ pɔlɛ kla ‑aan bhɩalɩdaa na, 'dɛ ‑naanɔa cɩ 'ka gbʋʋnsalɩɛ 'lɩ.»
'Kwlɩbhɩɛ 'kadie 'la cɩa wɔlɩ
(Mat 24.15-22; Luk 21.20-24)
14Zozii ya ‑awlɛ maa 'cla lebhe: «Daa a cɩ 'ka 'lɛ Danyumo ‑muunzuea, daa ɩ 'ta 'lɛ ‑fata le ɛ kʋ na, 'lɩlɩ na, 'naa zɛlɩnyɔa 'nunu 'dɛ! Na, dɛ 'la daa maa ‑ɔ ‑cɩ ka 'lɛ Zudeebhlɩa 'kʋ kʋ na, 'naa ma 'gu ɩya ma mʋ 'kikia nɩkplaan. 15Ɔmɔa ‑ɔ ‑cɩ ka 'lɛ ‑palʋa 'wlʋ 'la nyɔkwɛlɩdaa kʋ na, ɔ 'la ‑kwlia, ɔ 'la blea ɔla ‑palʋa ‑zɔn le ɔ 'ka lʋʋ famʋ. 16Ɔmɔa ‑ɔ ‑cɩ ka 'lɛ 'kwlaan kʋ na, ɔ 'la cɔlɔa leen le ɔ 'ka ɔla 'bibielʋʋ 'ma. 17'Dɛ 'la clɩɩa nɩkplaan, maa ‑ɔ cɩ 'ka 'lɛ nɩkplɩ kalɩ ɩya maa ‑ɔ cɩ 'ka 'lɛ 'cuo nyɩa na, ‑muunzue ya maa bho. 18Na, a bhibhie ɩya ɩ 'la ka sɛ wɔtlɩcida 'plɩ. 19Sa, 'dɛ 'la clɩɩa cɩ 'ka 'kwlɩbhɩɛ clɩɩ 'plɩ. Bhɔdaa tooto, Laagɔ kaa 'lɛ 'pʋpʋkʋ nʋ ‑aan ‑yaka na, 'sɛ 'la 'kwlɩbhɩɛ 'ta ka ‑azla ŋeni 'nyɩ ɛla 'bhisa 'kʋ ‑naanɛ cɩ 'ta kɩnɩ 'pʋpʋkʋ ŋeni. 20'Nyɩ ɩ ka ‑kʋ lebhe ‑Kwlenyɔ 'taa clɩɩ ‑naa 'kʋsalɩ na, nclɔɔ bhlogbɩɩ cɩ 'taa 'pʋ. ‑Ma, ‑anʋa ɔ wabha 'lɛ 'nyɩ ɔ sla 'lɛ de na, mala gbʋ, dɛ ɔ ‑salɩ 'lɛ clɩɩ ‑naa 'kʋ. 21Na, gbazɩ nclɔɔ ‑ka anyɩ 'cla lebhe: 'Lɩka Laagɔ 'la ‑Sasanyɔa* ‑kʋ ‑da ‑aana ɔ ‑kʋ 'yɛɛ ‑wɔlʋ na, a 'la lɩɩ ‑nʋawlɛ. 22Laagɔ 'la ‑sasanyaa 'la yooyo ‑naanʋa ɩya yooyo Laagɔnekʋnyɩtɛnyaa* cɩ 'ka 'kʋbho, ma 'ka 'ciinzizielɩlobholi ɩya nikpooslaslawɔlɩ nʋ le ka ma ka mino na, Laagɔ 'la deslaslanyaa 'titio, ma 'ka maa mlɔa. 23Na, anyɩ, a gblɩbhalɩ, n ya anyɩ ɩmɩa 'fɩan 'la flɩɩn zʋ.»
Nclɔɔa 'Cʋa 'la cilie
(Mat 24.29-31; Luk 21.25-28)
24Zozii ya ‑awlɛ maa 'cla lebhe: «‑Ma 'dɛ 'la clɩɩa nɩkplaan, 'kwlɩbhɩɛ ‑naa 'la leen, 'ylʋbhuoa cɩ 'ka 'tutu pla, cabhuoa cɩ 'tanɩ le, 25‑zɔlʋa cɩ 'ka ‑laagɔɔn 'wlʋ, ʋ 'ka bhlilie bhɔ ɩya ‑laagɔɔn 'la 'tɛtɩa 'ka 'dɩdɔ. 26'Dɛ 'la daa, ma cɩ 'ka Nclɔɔa 'Cʋa* 'lɩ, 'nyukpli 'kɔɔ tutolu, ɔ 'ka 'tɛtɩ ɩya 'klʋagbaa ‑tɛtɛa 'fɩan nɩkplaan cili. 27Na, ɔ cɩ 'ka 'bhlaandleecɩa* lobhu, ‑dʋdʋa 'la ‑kotia ‑nmɔɔnaa nɩkplaan ɩya ‑laagɔɔn 'la 'wlukodaa, ɔ 'ka ɔla deslaslanyaa 'wluwlalɩ.»
'Figisua 'la ‑nyandlaa 'la ‑zɔnsalɩɛ
(Mat 24.32-36; Luk 21.29-33)
28Ɔ nabhe: «A 'lɩka 'figisua 'la ‑nyandlaa nɩkplaan, dɩgalɩa a cɩ 'ka 'lɛ saazʋ na: Daa ʋ pa 'lɛ 'kɔlɩ 'nyɩ ʋ la 'lɛ 'taakpɩ ‑leli na, a ‑ci lebhe ‑kɔkwɛ ya cɩmɛ. 29'Sɛtɛɛ bhlogbɩɩ, daa a cɩ 'ka 'lɛ ɩmɩ ‑naa 'lɩ, ɩ 'ka 'lɛ ŋeni na, a cibhlili lebhe Nclɔɔa 'Cʋa* ya cɩmɛ, ɔ ‑kʋnɩ anyɩ gbini 'ku. 30N solui anyɩ, ɩ ‑glɩ ‑nʋawlɛ, ‑pɔtɔnʋa ncɛlɩa cɩ 'ta ka 'plɩ 'nyɩ ɩmɩ ‑naa 'fɩan cɩ 'ka 'lɛ ŋeni. 31‑Laagɔɔn ɩya ‑dʋdʋa cɩ kpa, ɩ cɩ 'plɩ, ‑ma 'na niwɔlɩa, ɩ 'ta kpada ‑ka. 32‑Ma clɩɩ ‑naa ‑aana 'ŋwacɩ ‑naa, nclɔɔ bhlogbɩɩ 'tɩɩ ‑ci, ‑laagɔɔn 'la 'bhlaandleecɩa* ‑aana 'Cʋa 'titio, bhlogbɩɩ 'tɩɩ 'ci, ‑ma Toa bhlogbɩɩ ‑tɛɛ.»
A gblɩbhalɩ, a ‑bɛ
(Mat 25.13-15; Luk 19.12-13)
33Bhɩalɩdaa, ɔ ya maa 'cla lebhe: «A zʋlʋ pɔlɛ 'kʋ, a gblɩbhalɩ, sa a 'ta daa ɩ cɩ 'ka 'lɛ ŋenili na ‑ci. 34Ka ɩ cɩ 'ka 'lɛ kʋ le saa nclɔɔ mʋ 'lɛ lowluun na: Ɔ ya ɔla 'slea te, ɔ ya ɔla lobhocuoa ‑jioli 'nyɩ, ɔ ya nclɔɔ nclɔɔ 'la nʋnʋlobholi te 'nyɩ ɔ ya gbinibɛnyɔa 'cla le ɔ ‑bɛ, ɔ 'la ŋɔmʋa. 35Na, a 'la ŋɔmʋa, sa a 'ta daa 'sletoa cɩ 'ka 'lɛ cili na ‑ci, 'ylʋva ‑aana dɩdɩnandɩo, ‑gʋgwɩ 'la 'pada ‑aana ‑zʋkpasao, 36ɔ 'la ka sɛ ‑zɔnvuvusa ci ɩya ɔ 'la ka anyɩ claan ŋeni. 37Ɩmɩa n solu 'lɛ anyɩ na, anyɩa 'fɩan n solui 'lɛ. A 'la ŋɔmʋa.»
Dida New Testament © Bible Society of Côte d'Ivoire, 2013.
