Mak 11
11
Zozii ble Zolizalɛmʋ
(Mat 21.1-9; Luk 19.28-40; Zan 12.12-16)
1Daa Zozii ɩya ɔla gɩlɩnyaa* mɛ 'lɛ Zolizalɛmʋ cɩ na, Bɛtɩfazee ɩya Betanii 'la 'klia nɩkplaan, ‑Olivʋsikike ‑gbazɔa, Zozii ya ɔla gɩlɩnya ‑mɔsɔ lobhu 2'nyɩ ɔ ya maa 'cla lebhe: «A mʋ 'dua ‑ʋ ‑kʋ 'lɛ anyɩ 'kʋklʋʋn na 'kʋ: A ‑kʋʋ nɩkplaan ble ‑jaa na, a cɩ 'ka 'flumuco 'lɩ, ʋ ‑gʋɔ, nclɔɔ bhlogbɩɩ 'ta ka ‑azlʋʋ 'kʋ 'tɔ, a ‑bluluu ɩya a ‑lamʋʋ. 3Gbazɩ nclɔɔ ‑ka anyɩ neencla lebhe: 'Lɩsaa 'la gbʋ a nʋa 'lɛ ɩmɩ ‑naa bha? A 'clɔɔ lebhe: ‑Kwlenyɔa 'matɩʋ, ‑ma ɔ cɩ 'kʋʋ ‑da cala 'fan.»
4Ma ya mʋ 'nyɩ ma ya 'flumucoa 'lɩ, ʋ ‑gʋɔa ‑jlukuun 'sligbine cɩ, clikpoa nɩkplaan. Ma yʋʋ ‑blulu. 5Maa ‑ɔ ‑kʋa 'lɛ 'dɛ na, ‑anʋa ya maa neencla lebhe: «'Lɩsaa 'la gbʋ a blulua 'lɛ 'flumucoa bha?» 6Ma ya maa, saa ‑tɛɛa Zozii nyɩtɛ 'lɛ na, solu 'nyɩ ma ya maa 'cintalɩ. 7Ma ya 'flumucoa Zozii ‑la, ma yʋʋ mala lokua 'kʋ 'pa 'nyɩ Zozii yʋʋ 'kʋ sakʋ. 8Ncaabhutukpa ya mala lokua ‑gugwiea 'kʋ ylʋ 'nyɩ ‑anʋa paa 'mɛɛ silabhɩa ma 'kɔtɔlʋa 'lɛ 'kwlaa nɩkplaan na 'kʋ. 9Maa ‑ɔ ‑kʋa 'lɛ Zozii 'kʋklʋʋn ɩya maa ‑ɔ gɩɩa 'mɔɔ 'lɛ 'kʋ na, ma ‑gaa nɩkplaan: «Ozana!» 'Nyupalɩɛ ŋeni ɔmɔa ‑ɔ cili 'lɛ ‑Kwlenyɔa 'la 'ŋlɩa nɩkplaan na! 10'Nyupalɩɛ ŋeni ‑kwleliea ‑ɩ ci 'lɛ na, ‑a to Daviti 'la ‑kwleliea! 'Klʋagba ŋeni 'kʋzilo Laagɔ 'yɛpɩ ‑laagɔɔn! 11Ɔ ya Zolizalɛmʋ, Laagɔpaakadiea* ‑zɔn ble. Ɔ bhɩalɩ 'lɛ daa ‑tɛtɛa 'fɩan 'cikpalɩɛ na, ɔ ya ‑zɔnwlʋ 'nyɩ ɔya 'kʋgba ‑mɔsɔa ya Betanii mʋ, sa 'ylʋ yaanɩa tooto mʋ na.
'Figisua ‑ʋ tlʋ 'ta 'lɛ na
(Mat 21.18-19)
12Da ‑zeli ze 'lɛ 'nyɩ Zozii ɩya ɔla gɩlɩnyaa* ‑kʋa 'lɛ Betanii 'wlʋda na, ŋɔmʋ yɔɔ kla. 13Ɔ ya 'figisu, ‑ʋ ‑ka 'lɛ 'taakpɩ 'wlu na 'vʋʋn 'lɩlɩ 'nyɩ ɔ ya mʋ le ɔ 'ka kope, ka ɩ ‑ka ‑kʋ lebhe ɔ cɩa 'mʋʋ lʋʋ 'wlu 'lɩlɩ na. ‑Ma daa ɔ mɩʋ 'lɛ cɩ na, 'taakpɩ bhlobhlo ɔ ŋeniu 'lɛ 'wlu, sa ‑n 'ta ka kaa 'figi 'la tlʋda na. 14Ɔ ya nesa, ɔ yʋʋ 'cla lebhe: «Nclɔɔ bhlogbɩɩ 'la liakɩnɩ ‑naa cie ‑ylɛylɛ.» Ɔla gɩlɩnyaa ‑poa 'nyukwliin.
Zozii ya lɩɩpɛlʋzʋnyaa Laagɔpaakadiea ‑zɔn 'tli
(Mat 21.12-17; Luk 19.45-46; Zan 2.13-17)
15Zozii ɩya ɔla gɩlɩnyaa* ya Zolizalɛmʋ ŋeni. Ɔ ya Laagɔpaakadiea* ‑zɔn ble 'nyɩ ɔ ya maa ‑ɔ ‑kʋa 'lɛ 'yɛpɩ, ‑ɔ zʋa 'lɛ 'pɛlʋ ɩya maa ‑ɔ pɩaa 'lɛ na 'tlilɩɛ bhɔ. Ɔ ya 'dalakacinyaa 'la 'tlɔnblɩcɩa ɩya 'kpaakpɩ 'pɛlʋzʋnyaa 'la kpua sagblii. 16'Nyɩ ɔ te 'taa nclɔɔ bhlogbɩɩ ne ɔya bhɛbhɛlʋʋ 'ka Laagɔpaakadiea 'ŋatɩ. 17Ɔ caa maa 'nyɩ ɔ 'claa maa lebhe: «Ɩ 'ta ‑zieo lebhe: 'Na ‑palʋa, ʋmʋ ma cɩ 'ka 'lɛ 'lɔlɩa ‑tɛtɛa 'fɩan 'la bhibhiepalʋ* la bha? ‑Ma anyɩ, a yʋʋ 'winya 'la zizieda ple.» 18‑Teyiyinyaa tocɩa ɩya ‑jlɩmaazienyaa* ya ɩmɩa ‑ɩ 'plɩ 'lɛ na 'nu 'nyɩ ma 'matɩanɩa ɔla 'bhlada. ‑Ma ma 'gulua 'mɔɔ, sa ɔla cacawɔlɩa klaa ‑alawleea pɔlɛ na. 19'Ylʋ mʋ 'lɛ na, Zozii ɩya ɔla gɩlɩnyaa ya 'dua nɩkplaan 'wlʋ.
Pɔɔtɛtɛ ɩya bhibhieli
(Mat 21.20-22)
20‑Zʋkpasaa, Zozii ɩya ɔla gɩlɩnyaa* ‑kʋa 'lɛ 'plɩda na, ma ya 'lɩ lebhe 'figisua ya yɛ ‑aan ʋla ‑sikplɩa nɩkplaan. 21Pɩɛlɩ ya luoli, ɔ yɔɔ 'cla lebhe: «Canyɔ, 'figisua ‑n 'pa 'lɛ na, ʋ 'fɩan ya yɛ.» 22Zozii ya maa 'cla lebhe: «A kalɩ Laagɔ 'la pɔɔtɛtɛ. 23N solui anyɩ, ɩ ‑glɩ ‑nʋawlɛ, gbazɩ nclɔɔ ‑ka 'kikee ‑naa 'cla lebhe: 'Wlʋ ‑gluu ɩya ‑n bhlili geen, 'nyɩ pɔɔvʋ 'tɔɔ pɔlɛɛn ‑kʋ, ‑ma ɔ ka pɔɔtɛtɛ ‑ka na, ɩ cɩ sɛɛ 'plɩ. 24Ɩmɩ 'wluku na, n cla anyɩ lebhe: Ɩmɩa 'fɩan a cɩ ka 'lɛ bhibhieli nɩkplaan 'clalɩ na, a kalɩ pɔɔtɛtɛ lebhe a yɩɩ 'lɩ ɩya ɩ 'ka anyɩ ‑nyɩɔ. 25Gbazɩ, a ‑ka bhibhieda ‑kʋ 'nyɩ a ‑ka luoli lebhe aya nclɔɔ bhlo ‑kalɩ wɔlɩ na, a va ɩya a Toa ‑ɔ ‑kʋ 'lɛ ‑laagɔɔn na, ɔmɔ ‑ma, ɔ 'ka ala nyinyia va.» [26]#11.26 ‑Godogodofluwia ‑anɩ ya wɔɔke ‑naa Zieziewɔlɩa nɩkplaan ‑pla: «‑Ma a 'ta va na, a Toa ‑ɔ ‑kʋ 'lɛ ‑laagɔɔn na, ɔmɔ ‑ma, 'ɔ cɩ 'ta ala nyinyia va.»
'Ndagbazɩ Zozii 'la ‑kwleliea 'wlʋlʋa 'lɛ bha?
(Mat 21.23-27; Luk 20.1-8)
27Zozii ɩya ɔla gɩlɩnyaa* ya ‑awlɛ Zolizalɛmʋ mʋ. Zozii ‑kʋa 'lɛ Laagɔpaakadiea* ‑zɔn 'kʋnamʋnamʋnʋda na, ‑teyiyinyaa tocɩa, ‑jlɩmaazienyaa* ɩya ncaakpasɩa yɔɔ cɩmɛ. 28Ma yɔɔ neencla lebhe: «'Ŋlɩ saa nɩkplaan ‑n nʋnʋa 'lɛ ‑anɩ ‑naa bha? Ncaasaa ‑ɔ 'nyɩɔ 'lɛ ɩla nʋjiolɩ bha?» 29Zozii ya maa 'cla lebhe: «N 'ka anyɩ wɔɔkle bhlogbɩɩ ‑tɛɛ neencla. A ŋonuun neen ɩya ‑amʋ ‑ma, n 'ka anyɩ 'ŋlɩa nɩkplaan n nʋnʋ 'lɛ ‑anɩ ‑naa na pala. 30Zaan 'la 'nyuwluzʋlɩɛa, ‑laagɔɔn ɩ 'wlʋlʋa 'lɛ bha, ‑ma ncɛlɩ wlɩɩn bha? A ŋonuun neen.» 31Ma guguanɩa maa bhlobhlo macɩ nɩkplaan 'nyɩ ma claa lebhe: «Gbazɩ ‑a ‑ka 'cla lebhe: ‑Laagɔɔn na, ɔ cɩ 'ka 'cla lebhe: 'Lɩsaa 'la gbʋ a 'ta 'lɛ ɔla wɔlɩa ‑nʋawlɛ la bha? 32'Nyɩ gbazɩ, a ‑ka 'cla lebhe: Ncɛlɩ wlɩɩn na,» ‑alawleea 'la ŋanɔ bhlaa maa, sa maa ‑tɛtɛa maa Zaan le Laagɔnekʋnyɩtɛnyɔ* 'titi na. 33Ma ya Zozii neenŋonu lebhe: «‑A 'ta ‑ci.» 'Nyɩ Zozii ya maa 'cla lebhe: «‑Amʋ ‑ma, 'n pala 'ta anyɩ, 'ŋlɩa nɩkplaan n nʋnʋ 'lɛ ɩmɩ ‑naa na.»
Dida New Testament © Bible Society of Côte d'Ivoire, 2013.
