उत्पत्ती 8
8
परमप्रभुम ब्वाक्कु सोव़पाइश्शो
1मिनु परमप्रभुमी नोआह नु ठेयब डोंगामी बाक्ब नेल्ल ब्वाकी ङा जन्तु नु बी ब्यफ क्यारश भेडा आन कली मप्रेंदीमी बाक्त। मिनु परमप्रभुमी रागीम फश पपदा बाक्त। मिनु ब्वाक्कु सोव़माक्त। 2मिनु ब्वाक्कु बुक्तीके नेल्ल सोव़ना सोव़न लमा बाक्त। रेउ यो देक्माक्त। 3मिनु मेको ब्वाक्कु सोव़ना सोव़न लशा, सहे का ५० नाक्त नोले शुश सोव़माक्त।
4मिनु मेको बर्स ङा ७ महिना ङा १७ नाक्त मेको ठेयब डोंगा आरारात माइश्शो डांडामी जाक्दीश्शा दिक्माक्त। उत्पत्ती ७:११ 5मिनु मेको बर्स ङा १० महिना सम्म ब्वाक्कु सोव़ना सोव़न लमाक्त। १० महिना ङा ङोंइती नाक्ती अर्को पहाड ङा डांडा तांइसमा बाक्त।
6मिनु ४० नाक्त नोले नोआहम आ सेल्शो डोंगा ङा झेल रोक्गा बाक्त। उत्पत्ती ७:१२,१७ 7मिनु मेकेर रे खद का सोइक्ता बाक्त। मेको रागी ङा ब्वाक्कु मसोव़म सम्म एर ओंथ बेरशा बाक्माक्त।
8मिनु नोआहमी “ब्वाक्कु नेल्ल सोव़मा कों” दे तुइक्चा कली ढुकुर का यो सोइक्ता बाक्त। 9मेको ढुकुर चहिं जुक्तीक मथित्थु लेश्शा, नोआह आ बाक्तीके जाक्माक्त। मारदे हना आ लतीकेमी ब्वाक्कुम सुम्शो बाक्माक्त। मिनु नोआहम गुइ दिंशा ताक्शा, मेको कली ओंइदा बाक्त। 10मिनु अर्को ७ नाक्ती रिम्शा, मेको ढुकुर कली लेंशा डोंगा रे सोइक्ता बाक्त। 11मिनु नाक्नाक्दो ढुकुरमी आ ठुंडमी नक वाशो तेल रवा आ सफा का कुरशा जाक्माक्त। मिनु नोआहमी “ब्वाक्कु नेल्ल सोव़माक्त” दे तुइक्ता बाक्त। 12मिनु नोले यो ७ नाक्त रिम्शा, ढुकुर कली सोइक्ता बाक्त। मिनु मेको ढुकुर मलेम्माक्त।
ब्वाक्कु सोव़शो
13मेको नोआह ६ सहे बर्स का दुम्मे आ ङोंइती ङा महिना ङा ङोंइती ङा नाक्तीम रागीमी ब्वाक्कु सोव़माक्त। नोआहमी ठेयब डोंगा आ छाना थूशा, कोव़शा “लो, ब्वाक्कु नेल्ल सोव़माक्त” देंमाक्त। उत्पत्ती ७:११ 14मिनु महिना का नु २७ नाक्त नोले खप नेल्ल सोव़माक्त।
15मिनु परमप्रभुमी नोआह कली 16“गे, इ मीश, इ तौपुकी नु इ चाइमीपुकी डोंगा रे ग्रूङीन” देंमाक्त। 17मिनु “मारेइ मारेइ ब्रोंइशा बाक्ब, चिक्ब, जन्तु नु खपीम ग्रेशा गाक्ब आइक्च जन्तु नेल्ल आन कली यो ग्रुंइदो। मेकोपुकी सोशा बोशा रागीम शुश दुम्चा माल्नीम” देंमाक्त। 18मिनु नोआह, आ तौपुकी, आ मीश नु आ चाइमीपुकी ग्रूमा बाक्त। २ पत्रुस २:५ 19मिनु जन्तु नेल्ल, खपीम ग्रेशा गाक्ब आइक्च जन्तु नेल्ल, चिक्ब नेल्ल नु रागीम ब्रोंइशा बाक्ब मार मार नेल्ल डोंगा रे ग्रूमा बाक्त।
परमप्रभु यावेमी गेशो लोव़
20मिनु नोले नोआहम परमप्रभु यावे कली चढ़ेतीक का सेला बाक्त। मिनु चढ़ेचा दुम्ब बस्तु नु चढ़ेचा दुम्ब चिक्ब नेल्ल लाइश्शा चोशा चढ़ेतीक चढ़ेवा बाक्त। उत्पत्ती ७:२ 21मिनु परमप्रभु यावेमी मेको ब्रोव़शो रिना नाम्शा, ग्येरसे बाक्त। आ थुंमी “मुरुम मरिम्शो पतीकेम खप कली मुल सराप गेनायो मपाइनुङ। मुर आ थुं मरिम्शो बाक्त हना यो, गेनायो सराप मपाइनुङ। गो ब्रोंइशा बाक्ब नेल्ल आन कली साइश्शा क्याम्ताक्ङ। मोदेंशो गेनायो लेंशा मपाइनुङ। उत्पत्ती ६:५; अय्युब १४:४; भजन संग्रह १४:३; मत्ती १५:१९; रोमी ३:२३ 22रागी बाक्म सम्म शोक्चा, ख्रुम्चा नु रिक्चा तांइसीब। ग्यू पाइब, हुप्ब, हिंउद नु बर्खा दुम्ब। नाक्दो नाक्त दुम्ब” दे लोव़ पवा बाक्त। येरमीया ३३:२०,२५
Currently Selected:
उत्पत्ती 8: susz
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2011, Wycliffe Bible Translators, Inc. All rights reserved.
