VAKATEKIVU 5
5
Na Kawa i Atama
(1Vei 1.1-4)
1Oqo na i vola ni kawa i Atama. (Ena gauna sa bulia kina na tamata na Kalou, a sa bulia me veiucui kei na Kalou.#Vteki 1.27-28 2E a bulia na tagane kei na yalewa, a sa vosa vakalougatataka, ka vakatoka me “Kawa Tamata”.)#Maciu 19.4; Mari 10.6 3Ena gauna sa 130 kina na yabaki i Atama, a sa sucu e dua tale na luvena tagane, ka ucui koya vinaka; a sa vakatoka me yacana o Seci. 4Ni sucu oti o Seci, a sa bula voli o Atama me 800 tale na yabaki. Ena loma ni gauna o ya era sa sucu tale kina eso na luvena tagane kei na yalewa.
5Ia na balavu ni gauna kece sa bula kina o Atama e 930 na yabaki; a sa qai mate.
6Ni sa yabaki 105 o Seci, sa qai sucu e dua na luvena tagane, o Inosi na yacana. 7Ia ni sa sucu oti o Inosi, a sa bula voli o Seci me 807 tale na yabaki. Ena loma ni gauna o ya, sa sucu tale kina eso na luvena tagane kei na yalewa. 8Na balavu ni gauna a bula kina o Seci e 912 na yabaki; a sa qai mate.
9Ni sa yabaki 90 o Inosi, sa qai sucu na luvena tagane, o Keinana na yacana. 10Ia ni sa sucu oti o Keinana, a sa bula voli o Inosi me 815 tale na yabaki. Ena loma ni gauna o ya, sa sucu tale kina eso na luvena tagane kei na yalewa. 11Na balavu ni gauna sa bula kina o Inosi e 905 na yabaki; a sa qai mate.
12Ni sa yabaki 70 o Keinana, sa qai sucu na luvena tagane, o Malelieli na yacana. 13Ia ni sa sucu oti o Malelieli, a sa bula voli o Keinana me 840 tale na yabaki. Ena loma ni gauna o ya, sa sucu tale kina eso na luvena tagane kei na yalewa. 14Na balavu ni gauna sa bula kina o Keinana e 910 na yabaki; a sa qai mate.
15Ni sa yabaki 65 o Malelieli, sa qai sucu na luvena tagane, o Joreti na yacana. 16Ia ni sa sucu oti o Joreti, a sa bula voli o Malelieli me 830 tale na yabaki. Ena loma ni gauna o ya, sa sucu tale kina eso na luvena tagane kei na yalewa. 17Na balavu ni gauna sa bula kina o Malelieli e 895 na yabaki; a sa qai mate.
18Ni sa yabaki 162 o Joreti, a sa sucu na luvena tagane, o Inoke na yacana. 19Ia ni sa sucu oti o Inoke, a sa bula voli o Joreti me 800 tale na yabaki. Ena loma ni gauna o ya, sa sucu tale kina eso na luvena tagane kei na yalewa. 20Na balavu ni gauna sa bula kina o Joreti e 962 na yabaki; a sa qai mate.
21Ni sa yabaki 65 o Inoke, a sa sucu na luvena tagane, o Meciusela na yacana. 22Ni oti o ya, erau sa daulako vata o Inoke kei na Kalou me 300 na yabaki. Ena loma ni gauna o ya, era a sucu tale kina eso na luvena tagane kei na yalewa. 23A bula voli me 365 na yabaki o Inoke. 24E rau sa daulako vata o Inoke kei na Kalou me yacova ni sa yali, baleta ni sa kauti koya yani na Kalou.#Ipe 11.5; Juta 14
25Ni sa yabaki 187 o Meciusela, a sa sucu na luvena tagane, o Lemeki na yacana. 26Ia ni sa sucu oti o Lemeki, a sa bula voli o Meciusela me 782 tale na yabaki. Ena loma ni gauna o ya, era a sucu tale kina eso na luvena tagane kei na yalewa. 27Na balavu ni gauna sa bula kina o Meciusela e 969 na yabaki, a sa qai mate.
28Ni sa yabaki 182 o Lemeki, a sa sucu na luvena tagane. 29A sa vakatoka me yacana o Noa#5.29 Noa: Na yaca oqo e balebale vaka na “veivakacegui” ena vosa vakaiperiu. ni a kaya, “O koya oqo ena solia vei keda na veivakacegui mai na noda oca kei na cakacaka ni ligada mai na qele ka sa cudruva ko Jiova.” 30Ia ni sa sucu oti o Noa, a sa bula voli o Lemeki me 595 tale na yabaki. Ena loma ni gauna o ya, a sa sucu tale kina eso na luvena tagane kei na yalewa. 31Na balavu ni gauna sa bula kina o Lemeki e 777 na yabaki; a sa qai mate.
32Ni oti na nona yabaki 500 o Noa, e ratou sa lewe tolu na luvena tagane, o Semi, kei Ame, vata kei Jefeca.
Currently Selected:
VAKATEKIVU 5: FNV
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Fijian New Version Bible, Revised Edition © Bible Society of the South Pacific, 2017, 2021.
