GENESA 12
12
Timhaka ta Abrama.
1Kutani Yehovha a byela Abrama, a ku: “Huma etikweni ra wena ni le rixakeni ra wena, ni le ndlwini ya tata wa wena, u ya etikweni leri ndzi nga ta ku kombisa rona. 2Ndzi ta ku endla tiko lerikulu; ndzi ku katekisa, ndzi kurisa vito ra wena, u va xihlovo xa mikateko. 3Ndzi ta katekisa lava nga ta ku katekisa, ndzi rhuketela lava nga ta ku rhuketela, kambe ha wena ku ta katekisiwa tinxaka hinkwato ta misava.”
4Kutani Abrama a rhurha, hilaha Yehovha a n'wi byeleke hakona, na yena Lota a suka na yena. Abrama a a ri ni malembe ya 75, loko a huma eHarana. 5Abrama a teka Sarayi, nsati wa yena, na Lota, n'wana wa makwavo, ni swa vona hinkwaswo leswi va swi fuweke, ni vanhu lava va va velekeke eHarana, kutani va suka va ya etikweni ra Kanana; kutani va ya fika etikweni ra Kanana.
6Abrama a tsemakanya etikweni, a fika exivandleni xa Xikeme, ku nga eMikuhlwini ya More; kambe Vakanana a va ri etikweni lero enkarhini wolowo. 7Kutani Yehovha a humelela eka Abrama, a ku eka yena: “Misava leyi, ndzi ta yi nyika vatukulu va wena.” Kutani a akela kona gandzelo eka Yehovha la nga humelela eka yena. 8Kutani a suka kona, a ya entshaveni ya le vuxeni ka Betele, a dzima kona ntsonga wa yena, a ri na Betele hitlhelo ra vupeladyambu, na Ayi hitlhelo ra vuxa: a aka kona gandzelo ra Yehovha, a khongela vito ra Yehovha. 9Kutani Abrama a suka, a famba mimpfhuka, a ya tlhelo ra dzonga.
Ta Abrama loko a ya Egipta.
10Ku we ndlala etikweni lero, kutani Abrama a rhelela eEgipta ku ya tshama kona, hikuva ndlala a yi kurile etikweni. 11Kuteloko a lave ku nghena eEgipta, a byela Sarayi, nsati wa yena, a ku: “Waswivo, ndza swi tiva leswaku u mbhuri ya wansati; 12kutakuloko Vaegipta va ku vona, va ta ku: ‘I nkatakwe!’ Kutani va ta ndzi dlaya, wena va ku tshika u hanya.” 13Hikwalaho u nge u makwerhu, ndzi ta tiva ku rhurheriwa swinene hikwalaho ka wena, ndzi va ndzi hanya ha wena. 14Kutani kakuloko Abrama a nghena eEgipta, Vaegipta va vona nsati wa yena leswaku u sasekile ngopfu. 15Tindhuna ta Faro na tona ti n'wi vona, ti n'wi dzunisa emahlweni ka Faro, kutani nsati loyi, a yisiwa endlwini ya Faro. 16Kutani Abrama a rhurheriwa swinene hikwalaho ka nsati wa yena, a kuma swifuwo leswitsongo ni leswikulu, ni timbhongolo, ni makhumbi ya xinuna ni ya xisati, ni matswele ya timbhongolo, ni tikamela.
17Kambe Yehovha a ba Faro ni yindlu ya yena hi makhombo lamakulu hikwalaho ka Sarayi, nkata Abrama. 18Kavaloko Faro a vita Abrama, a ku eka yena: “U ndzi endlise yini? A ku ndzi tivisanga ha yini-ke leswaku i nsati wa wena? 19U vurise ku yini u ku: ‘I makwerhu,’ ndzi ko ndzi n'wi endla nsati wa mina? Kutani sweswi, nsati wa wena hi loyi; n'wi teke u famba na yena.” 20Kutani Faro a lerisa malandza ya yena leswaku ma n'wi hlongola, yena ni nsati, ni hinkwaswo leswi ngi a ri na swona.
Currently Selected:
GENESA 12: TSO29
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bible in Xitsonga 1929/2012 © Bible Society of South Africa 2012. Digital Version © Bible Society of South Africa 2012. All rights reserved. www.biblesa.co.za.
