Génesis 33
33
So Jacob nmane' so Esaú
1Qaq so Jacob co'ollaq ila'aguet so Esaú, nnaictague' so cuatrocientos nalleppi, nache somaye iỹorecache so ñaqpiolec, huo'o so ỹanem aso Lea, qataq aso Raquel, qataq soua dos lamaxashel. 2Ime, nache ỹa'auaxaarec soua lamaxashel nnaictagueto soua llalqa. Qaq ime, nache jec naqa'en aso Lea, nnaictagueto naqa'en soua llalqa, qaq pa'atec naqa'en da jec aso Raquel qataq so llalec José. 3Ime, nache so Jacob hua'aua'ague da taỹa'ague somayepi, nache siete da ỹe'eguelaxalec da ỹa'alyiñi naua l-llecte, qataq iviraxata'aguet naqa'en na latap na 'alhua, choche ivitta'a da saqaỹapeque naqa'en so lqaỹa. 4Qalaxaye so Esaú, nqalgoqta'aguet somaye, nache qapalot na lqosot, qataq napigoxoi'. Nache soomaye nỹeeta'a't. 5Qaq ime co'ollaxa, nache so Esaú ỹamataigui so 'alpi, qataq so ñaqpiolec, nache denataxan, 'eeta':
«Qaq ne'enapi ¿negue'tna?»
Nache so Jacob 'enapeco':
«Qomye nachena na llalaqpi nam 'aramaxashec maye Ñim Lo'onatac 'Enauacna ỹanem namaye.»
6Qaq huaña nache soua lamaxashel, qataq soua llalqa nquiguereuo, nache ỹa'alyiñi naua l-llecte, qataq iviraxatta'agueta naqa'en naua lata'api na 'alhua, 7ime, qaltaq nquigueuo aso Lea qataq soua llalqa, nache nataqa'en ỹa'alyiñi naua l-llecte da 'eeta'ama soua hua'auyiñi, qaq pa'atec da nquigueuo aso Raquel qataq so llalec José, qaq nataqa'en soomaye ỹa'alyiñi naua l-llecte. 8Qaq huaña nache so Esaú denataxan, 'eeta':
«¿Negue't cam qonetapeguec som shiguiỹacpi maye ñateetapeeguet?»
Nache so Jacob, ỹasateguet somaye, 'eeta':
«Qomye sauotaique da chegoqchigui somayepi da aỹem 'auchoxoren.»
9Nache so Esaú, 'enapeco':
«'A'i, 'am ỹaqaỹolec, 'eeso'oya' nam ña'atetpi. Nache 'am hueto'ot qome nam 'ana'atetpi.»
10Qalaxaye so Jacob ỹe'eguelaqto'ot somaye, 'eeta':
«'A'i, ñaq aỹem 'arqouaguec. Da ỹoqta 'eesa da aỹem 'auchoxoren, nache no'on da 'auaconeguet nam sauotaique 'anmepi, cha'aye nagui da 'am ñauane', qalaq 'ena'am da nacheñi Ñim Lo'onatac 'Enauacna da ñauane', qataq da aỹem 'auaỹamaxatta nagui da 'am ñauane'. 11Qaq ỹoqo'oye 'am ñachoxonnot da 'auaconeguet nam 'anmepi maye 'am ñerota'a, cha'aye Ñim Lo'onatac 'Enauacna ỹo'ot da aỹem sallaxanec, nache qaica ca seueetaique.»
Qaq so Jacob, ye ỹataqta ỹe'eguelaqto'ot somaye, nache so Esaú ivitta'a da ỹaconeguet so nmepi, 12qaq ime, nache so Esaú, 'enapeco':
«Hua', qolaq qome. Qaq nache ñenaigaqtega't.»
13Nache so Jacob, 'enapeco':
«'Am ỹaqaỹolec, 'am 'auaỹateeta da na ñaqpiolec sa da'añi, qataq huo'o ana ilo qaguetapi, qataq anam huacapi maye cheta'ague da deco'o, qaq da nasamñi anamayepi, nache ishet da huaigui ca 'oonolec na'a'q da ileu 'enauac ana qaguetapi. 14Qaq no'on da 'am 'aua'auta'ague dam tata'ague ne'ena 'aramaxashec, qaq aỹem qalaq choche ñeqocheeta qome, souaxat da lqauaxac nam shiguiỹacpi, qataq na ñaqpiolec maye ñenaictague'. Qaq maiche ñauanaxa't qom huaña ye Seir.»
15Nache so Esaú, 'enapeco':
«Hua' ỹaỹamaqchiguiñi, qalaxaye aỹem 'aua'aqta'a da sauo'oi caua 'am ño'onaxata'agueta nam ñalleppi maye ñenaictague'.»
Qalaxaye so Jacob, 'enapeco':
«¡'A'i, aỹem 'arqouaguec qome! ¡Ta'ainco' ctaxa da aỹem 'auqochetague', ye 'eeso'oya' da mashe aỹem 'auaỹamaxatta!»
16Qaq nacheso se'eso na'a'q, da so Esaú ỹe'eguelaxa ye Seir. 17Qaq so Jacob, qalaq taỹa ye Sucot. Qaq huaña yemaye nache ỹo'ot so lma', qataq ỹa'ara't so lpe'l so lalopi. Qaq ỹoqo'oye, yi'iye 'alhua ỹanagui da le'enaxat Sucot.
18Qaq so Jacob, co'ollaq chegaqa'a ye Padán Aram, nache co'ollaq ivita ye Canaán qalaq no'oitom, qataq qaica camachaqca da nachaalataxac, nache nalec yem datatta ye huaqta'a't nỹecpi le'enaxat Siquén. 19Qaq huaña, nache desheenaxana so na'alhua soua llalqa so Jamor, som lta'a so Siquén, qaq cien aso monedas maye chegaqaigui na lcat plata aso lasheue. Qaq nache ỹanaña somaye so lpe'l. 20Ime, qaq ỹo'ot aso lca'atoxonaxalate, nache ỹanagui da le'enaxat: Ñim Lo'onatac 'Enauacna, nacheñi Ñim Natamnaxala' na Israel.
Currently Selected:
Génesis 33: LÑLE13
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.