Génesis 27
27
So Isaac ỹanema da no'on la'aqtac soua Jacob qataq so Esaú
1Qaq so Isaac ye mashe ỹataqta ỹa'axaiquiolec, qataq mashe sa nauaañi. Nache huo'o so na'a'q, qaq iỹaxaneuga so Esaú som llalec ỹe, nache 'enapega, 'eeta':
«¡'Am ỹalcolec!»
Nache so Esaú ỹasat, 'eeta':
«¿Negue'tca, 'am ita'a?»
2Nache so Isaac, 'enapeco':
«'Am mashe 'aumeteetac da aỹem mashe aỹem ỹa'axaiquiolec, qaq huo'o ca na'a'q nache aỹem seleu. 3Qaq ỹoqo'oye sauotaique da 'anqo'oneuga na no'onaxa, 'auache ca 'archecnec qataq caua 'archecnal, da 'aulaique ca 'ane'epet shiguiỹac. 4Qaq ime qome, nache 'auo'ot ca 'arhuoshec, ỹataqta ama 'anqa'en, cam ỹataqta ñaman naxa, nache aỹem 'andoua'a qome da sachec. Qaq nache huaña qome da 'am sanem da ichoxonnataxanaxa, nagui da saxanaxa da seleu.»
5Qalaxaye aso Rebeca na'axaỹaxaataua'a so Isaac co'ollaq 'eetega so Esaú. Qaq ỹoqo'oye somaye co'ollaq tauga na no'onaxa da ne'eplec so lta'a, 6nache asomaye 'enapego' so Jacob som llalec na'asa, 'eeta':
«Aỹem sa'aqchigui ñi 'arta'a, da 'eetega so 'arqaỹa Esaú, 'eeta': 7‹Ña 'aulaique qome ca 'ane'epet shiguiỹac, nache 'auo'ot qome ca 'arhuoshec, ama 'anqa'en da yaqto' sachec qome camaye. Qaq huaña qome, nache qomi' ỹauaachiguilo Ñim Nataxala' da 'am sanem da ichoxonnataxanaxa, nagui da saxanaxa da ivita da seleu.› 8Qaq ỹoqo'oye, 'am ỹalcolec, ña 'ana'axaỹaxaachigui da ỹa'aqtac: 9'Anqo'oneuga ye hueta'a ye qana'atetpi, nache 'andoreuo caua dos quetaq llalqa maye chaxaraiqa, yaqto' so'ot ca ỹataqta ama lhuoshec ñi 'arta'a, cam ỹataqta naman ñimaye. 10Qaq 'am 'auroua'a qome ñimaye, da yaqto' chec, qataq yaqto' 'am ỹanem da lchoxonnataxanaxa, nagui da saxanaxa da ileu.»
11Qalaxaye so Jacob 'enapega aso late'e, 'eeta':
«So ỹaqaỹa ỹataqta qalota ana laso na lo'oc, aỹem qalaxaye qaca aca ỹaso. 12Qaq ñim ita'a da huo'otaq aỹem ipoteua'a, nache aỹem ỹauatton, qaq huaña qome nache ipeta'a da choche she'eetac. Nache aỹem ỹasaxalec qome ca qauem la'aqtac, qaq saishet da aỹem ỹanem ca lchoxonnataxanaxa.»
13Qalaxaye aso late'e 'enapeco':
«'Am ỹalcolec, que'eca qauem na'aqtac no'on da aỹem talec qome. Qaq 'am 'auo'ot da 'am samaxalec, 'andoreuo que'ecaua dos quetaq llalqa.»
14Nache so Jacob jec da ỹe'eguenaugalo soua quetaq llalqa, nache ndoua'alo aso late'e. Nache asomaye ỹo'ot so ỹataqta ama lhuoshec, som ỹataqta naman naxa so Isaac. 15Qaq ime, nache asomaye nqatrec soua ỹataqta 'onaxaiqa alogo so ỹe llalec Esaú maye ỹaỹamaxatta'ape. Nache ỹanaxanaxaanguilo so Jacob som llalec na'asa. 16Qaq ime, nache ỹaxateguelo naua lhua'q somaye, soua lo'oc soua quetaq llalqa, qataq na lqosot nam huaña da qaca aca laso somaye, 17nache ỹanem somaye so lhuoshec qataq aso nauole maye ỹo'o't co'ollaxa.
18Qaq huaña, nache so Jacob taua'a so hueta'a so lta'a, nache 'enapega, 'eeta':
«¡Taxare!»
«Nache so Isaac 'enapeco', aja', aỹem soota'a ne'ena. ¿Negue't 'am, ỹalcolec?»
19Nache so Jacob, 'anapeco':
«Qomye nachaỹem Esaú, maye aỹem 'ara'auaxanec 'aỹa'alec. Mashe ime da so'ot nam 'auỹaxanaique. Aỹem 'arqouaguec qoñisheguem, 'anso'ooñi, nache qollec na lapat som shiguiỹac maye ỹo'oxonec. Qaq ime qome nache aỹem 'aỹa'anem ca 'archoxonnataxanaxa.»
20Qaq huaña nache so Isaac inat somaye, 'eeta':
«¿Ca 'eeteco' da ỹataqta saqaỹaloq da 'auanata somaye 'am ỹalcolec?»
Nache so Jacob 'enapeco':
«Qomye Ñim Nataxala' maye 'Anatamnaxala', aỹem itauan da sanata.»
21Nache so Isaac, 'enapego' somaye, 'eeta':
«Ñaq aỹem 'anquigueua'a, qataq aỹem 'auasheetem da 'am sepot, shapegueto' da 'eesa da nache'am ỹalec Esaú.»
22Nache so Jacob nquigueuo, nache so lta'a ipot somaye. Qaq huaña nache so Isaac 'enapeco':
«Da lavilỹaxac nachera da lavilỹaxac ca Jacob, qalaxaye naua lhua'q, qalaq 'eeta'ama naua lhuaxaye ca Esaú.»
23Qaq saishet da ỹauatton somaye, cha'aye naua lhua'q ỹataqta qalota ana laso, 'eeta'ama naua lhua'q so lqaỹa Esaú. Qalaxaye co'ollaq mashe huotaique da ỹasaxalec da lchoxonnataxanaxa, 24nache qaltaq ỹe'eguelaxalec da inat somaye, 'eeta':
«¿Peta'a 'eesa da nache'am ỹalec Esaú?»
Nache so Jacob, 'enapeco':
«Aja', nachaỹem Esaú.»
25Nache so lta'a, 'enapego' somaye, 'eeta':
«Ñaq aỹem qouapegue' 'am ỹalcolec, yaqto' sachec nam 'ane'epet, qaq ime qome nache 'am sasaxalec da ichoxonnataxanaxa.»
Nache so Jacob iquia'axan so lta'a, qataq iroua'a nataqa'en so lataxa. Nache so Isaac deque'e qataq nỹom, 26qaq co'ollaq ime, nache 'enapega somaye, 'eeta':
«Ñaq 'anquigueuo, 'am ỹalec, nache aỹem 'anapigoxoi'.»
27Qaq so Jacob, co'ollaq nquigueua'a so lta'a da napigoxoi', nache so Isaac ncoỹaxanalo soua alogo. Qaq huaña nache ỹasaxalec da lchoxonnataxanaxa, 'eeta':
«Aja', de'era alaitaỹaxac nacheca ca ỹalec.
Damaye, 'eeta'am da alaitaỹaxac ca no'onaxa
maye Ñim Nataxala' ỹasaxalec da lchoxonnataxanaxa.
28Qaq Ñim Lo'onatac 'Enauacna, 'am ỹanem qome ca auot maye chegoqo'ot na piguem,
qataq ca no'on alaỹaxac nam nañiguishecpi ana 'alhua,
qataq 'am ỹanem qome ca saqalota trigo qataq ca lataxa.
29Qataq qalota qome cam shiỹaxauapi 'am do'onataxaatacot,
qataq cam ỹotta'a't shiỹaxauapi 'am ỹa'aroto qome naua l-llecte.
Qataq 'aulo'ogue qome ca 'aralamaxat 'arqaỹañecpi,
¡maye 'am ỹa'aroto qome naua l-llecte!
Qaq ca 'am ỹasaxalec ca qauem, qalaq talec qome cam qauem,
qaq ca 'am ichoxoren, qalaq talec qome ca nchoxonnataguec.»
30Qaq so Isaac, co'ollaq imat da ỹasaxalec da lchoxonnataxanaxa so Jacob, qaq co'ollaq chochaq ca'ai so lta'a so Jacob, nache nvireuo so Esaú da ne'eptac. 31Qaq nataqa'en somaye ỹo'ot so ỹataqta ama lhuoshec. Ime qaq iroua'a so lta'a, nache 'enapega, 'eeta':
«Qoñisheguem qome 'am taxare, nache qollec nam ne'epet shiguiỹac na 'aỹa'alec. Qaq ime qome, nache aỹem 'auasaxalec ca 'archoxonnataxanaxa.»
32Qaq huaña nache so Isaac inat somaye, 'eeta':
«¿Negue't 'am?»
Nache so Esaú 'enapeco':
«Qomye aỹem Esaú, maye aỹem ỹe 'aỹa'alec.»
33Nache so Isaac ỹataqta ỹe'elaq, nache iviloxo'l naua la'aqtaqa co'ollaq 'enapec:
«Qaq ¿negue'to' qone' som ne'epe co'ollaxa, som aỹem ndoua'a so lhuoshec? Qaq aỹem mashe ime dam iquia'axac, co'ollaq saxanaxa da 'anvireuo, qataq mashe sasaxalec somaye so ichoxonnataxanaxa, qaq nagui somaye mashe huo'o da nchoxonnataguec.»
34Qaq so Esaú co'ollaq hua'axaỹa da la'aqtac so lta'a, nache ỹataqta lta'araic da nqui'ic nache nỹeetac, nache ỹa'alaq, 'eeta':
«¡'Am Taxare, Aỹem 'aỹa'anem nataqa'en ca 'archoxonnataxanaxa!»
35Qalaxaye so Isaac 'enapeco':
«Mashe hueta'a ne'ena som 'arqaỹa, qaq somaye aỹem ỹatenachet, qaq ỹache so nchoxonnataxanaxa maye 'am talec taxa.»
36«Nache so Esaú 'enapeco': ¡Mañaxasaco' ye qoỹanagui da le'enaxat Jacob! ¡Mashe dos nagui da aỹem nqovin! Hua'auñi da deuotaxanec da shenec da aỹem ỹe ñalec. Nagui qaltaq deuotaxanec da nchoxonnataxanaxa maye aỹem talec taxa.» ¿Peta'a saishet da huo'o ca lỹa 'auaỹamaxattac 'archoxonnataxanaxa da aỹem talec?
37Nache so Isaac 'enapeco':
«Aỹem mashe sanem so Jacob da 'arataxala', qataq sogote da sanem somaye da lamaxashecpi qome na lauo' le'ecpi, qataq sanem da ỹataqta qalota qome ca hueto'ot trigo qataq ca lataxa. Qaq ¿negue'to' ca 'am so'otec nagui, 'am ỹalcolec?»
38Nache so Esaú qaltaq 'enapego' so lta'a, 'eeta':
«'Am taxare, ¿peta'a saisheto' da 'aỹa'an ca lỹa 'archoxonnataxanaxa? ¡Ñaq aỹem 'auchoxoren nataqa'en 'am taxare!»
Nache somaye qaltaq ỹe'eguelaxalec da na'alaqtapiguiñi.
39Qaq huaña nache so Isaac 'enapego' somaye, 'eeta':
«Qoueta'a qome ca 'alhua maye qaỹoqta ca 'onaxaic 'alhua,
qataq saishet qome da 'am talec na auot maye chegoqo'ot na piguem.
40Qataq 'auo'ogoxona qome ca 'ainec da 'ampaxaalec da 'anachaalaxataxac,
qataq 'am lamaxashec qome so 'arqaỹa,
qalaxaye qom ivita da 'aua'añi, nache 'ansoueguesop somaye.»
So Jacob dataueeguesop so Esaú
41Qaq nache chegoqchiguiña co'ollaxa da so Esaú nquiỹa so Jacob, souaxat so nchoxonnataxanaxa maye so lta'a ỹanem somaye, nache deuennataxaataco', 'eeta': «Mashe saqaỹaloq da huo'o ca qarasouaxac souaxat ca l-leuaxa ñi ita'a. Qaq qom ime camaye, nache aỹem salauat qome ñi ỹaqaỹa Jacob.»
42Qaq aso Rebeca co'ollaq ỹaỹaten da lhuennataxa so Esaú, nache damaxasoxoneuga so Jacob, nache 'enapega, 'eeta':
«Ñaq 'aula'a, da so 'arqaỹa Esaú ỹauotaique 'am ỹalauat da yaqto' ipalaique ca lvi'. 43Qaq ỹoqo'oye 'am ỹalcolec, ñaq aỹem 'ana'axaỹaxana, sa 'anaỹaloxon qome da 'auatauec, 'anqo'ona ye Jarán yem lma' ca ỹaqaỹa Labán. 44Qaq cara'acolec qome da qono'ot camaye, nato' qom inoxonec da lalemataic so 'arqaỹa, 45qataq icoua'ai dam 'auo'otec. Qaq huaña qome, nache 'am secoyeguen da yaqto' 'añe'eguelaq. ¡Cha'aye sa saỹamaxaren da imerauec da deqa't naua dos ỹalqa ca 'oonolec na'a'q!»
46Qaq ime, nache aso Rebeca 'enapega so Isaac, 'eeta':
«Aỹem mashe ỹataqta ñasamñi souaxat ñeua hitiita maye huaronegueta ñi Esaú. Qaq ñi Jacob da huo'otaq huaroneguet aca hitiita da 'eeta'ama ñiimaye, anam hueta'a ne'ena Canaán, qaq no'on da seleu.»
Currently Selected:
Génesis 27: LÑLE13
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.