Génesis 16
16
Aso Agar qataq so llalec Ismael
1Qaq aso Saraí ye sareco'o, nache so lhua Abram qaica co'ollaxa ca llalaqpi, qalaxaye huo'o co'ollaxa aso l-lata Egipto lashe maye le'enaxat Agar. 2Nache aso Saraí, 'enapego' so lhua Abram, 'eeta':
«Ñaq 'aula'a da Ñim Nataxala', saishet da aỹem ỹanem ca ỹalec, qalaxaye 'am ñachoxonnot da qoue'eguet qome añi ilata Agar, shapegueto' ishet da huo'o ca ỹalec da chegoqchigui añimaye.»
Nache so Abram, ỹaỹamaxareeta da la'aqtac aso Saraí, 3Nache aso Saraí, ỹauegueuo aso Agar maye Egipto lashe, nache ỹanem so Abram da ỹauo'o lhua, co'ollaq mashe ivi' soua diez vi'iye da netraña ye Canaán. 4Nache so Abram hue'eguet co'ollaxa aso Agar, nache asomaye hualaxai. Qalaxaye co'ollaq nomla't asomaye da hualaxai, nache chegoqchiguiña da ỹe'eetac aso na'acoro. 5Nache aso Saraí, 'enapego' so Abram, 'eeta':
«¡'Am maye 'arasouaxashet da ara Agar ỹataqta aỹem ỹe'eetac! Qamaq nachaỹem maye 'am sanem co'ollaxa da 'auauo'o 'arhua, qaq nagui, da aramaye ỹaỹaten da huo'o qome ca llalec, nache aỹem napacapeguelec. ¡Qalaxaye, huo'o Ñim Nataxala' maye ỹa'axat qome negue't ca huo'o ca lasouaxashet da shenaqta, 'am, huo'otaq aỹem!»
6Nache so Abram, ỹasateguet asomaye nache, 'eeta':
«Aja', maicheye cam 'auataxaateuga aramaye, cha'aye aramaye maiche 'arlata.»
Nache aso Saraí, quetot da ỹataqta saiyacnapec asomaye, ỹoqo'oye aso Agar datauec. 7Qalaxaye som lamaxashec Ñim Nataxala', natenalec asomaye co'ollaq huaña so toolec 'alhua, hueta'a so loigue aso npaxaatasheguem na 'etaxat, maye naña na loigue so nqa'aic maye taỹa'a ye Shur. 8Nache inat, 'eeta':
«Agar, 'am maye 'am l-lata aca Sarai, ¿hua'ague ca 'auachegoqta'ague, qataq hua'ague ca 'ata'ague?»
Nache asomaye, 'enapeco':
«Qomye sataueguesop añi ña'acoro Saraí.»
9Qaq huaña, nache so lamaxashec Ñim Nataxala' 'enapega asomaye, 'eeta':
«'avi'eguelaxa qome añi 'ana'acoro, nache 'auo'ot qome 'enauac cam 'am ỹamaxalec.»
10Qaq nataqa'en so lamaxashec Ñim Nataxala', 'enapega, 'eeta':
«Ỹataqta qalota qome ñaqa'en ca 'am chegoxoguetpi,
nache qaica qome ca ishet da naloqten.
11'Am, mashe 'am hualaxai,
qaq huo'o qome ca 'aỹa'alec,
qaq camaye 'aỹa'anagui qome da le'enaxat Ismael,
cha'aye Ñim Nataxala' hua'axaỹa da 'anque'eenaxac.
12Qaq camaye ỹataqta huegaqaic qome,
'eeta'am da lhuegaxayec ca shiguiỹac maye huauec,
camaye delogui' qome 'enauac na chochaqna,
qataq 'enauac na chochaqna delogui' qome camaye,
qalaxaye cam chegoxoguetpi nquictauec qome da la'añaxac,
na'aictaxa da ca lqaỹañecpi dataỹa'aguet camaye.»
13Qaq aso Agar ye detaqtague' co'ollaxa Ñim Nataxala', nache ỹanagui da le'enaxat: «Ñim Lo'onatac 'Enauacna maye aỹem ila'a,» cha'aye asomaye 'enapeco': «Ñim Lo'onatac 'Enauacna, aỹem ila'a co'ollaxa, qalaxaye aỹem ña ñeca'altauec.» 14Qaq nataqa'en aso mpaxaatasheguem na 'etaxat, ỹanagui da le'enaxat, «Nshere lalamaqte ñim nca'altauec, qataq aỹem ila'a.» Qaq asa'aso nshere ñechiguingui na laiñi yeua Cades qataq ye Bered.
15Qaq aso Agar, ñiguiñi co'ollaxa so llalec, nache so Abram ỹanagui da le'enaxat Ismael.
16Qaq so Abram, mashe ivi' co'ollaxa soua ochenta y seis vi'iye da nachaalataxac, co'ollaq ñiguiñi so Ismael.
Currently Selected:
Génesis 16: LÑLE13
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.