مَتَّى 14

الْفَصْلْ رْبَعْطَاشْ

الْمُوتْ دْيَالْ يُوحَنَّا الْمَعْمَدَانْ

1وْفْدَاكْ الْوَقْتْ، سْمَعْ هِيرُودُسْ الْحَاكْمْ بْخْبَارْ يَسُوعْ، 2وْهُوَ يْݣُولْ لْلْخْدَّامَا دْيَالُه: «هَادَا رَاهْ يُوحَنَّا الْمَعْمَدَانْ اللِّي تّْبْعَتْ مْنْ الْمُوتْ، دَاكْشِّي عْلَاشْ الْمُعْجِزَاتْ كَيْتّْدَارُو عْلَى يْدِّيهْ». 3حِيتْ هِيرُودُسْ كَانْ قْبَطْ يُوحَنَّا وْكَتّْفُه وْدَخّْلُه لْلْحَبْسْ عْلَى قْبَلْ هِيرُودِيَّا مْرَاةْ خُوهْ فِيلُبُّسْ.#لوقا 3‏:19‏،20 4عْلَاحْقَّاشْ يُوحَنَّا كَانْ كَيْݣُولْ لِيهْ: «مَاشِي حْلَالْ عْلِيكْ بَاشْ تّْزَوّْجْهَا». 5وْكَانْ بَاغِي يْقْتْلُه، وَلَكِنْ خَافْ مْنْ الشَّعْبْ حِيتْ كَانُو كَيْآمْنُو بْلِّي هُوَ نْبِي. 6وْفْالْحَفْلَة دْ عِيدْ الْمِيلَادْ دْيَالْ هِيرُودُسْ، شْطْحَاتْ بَنْتْ هِيرُودِيَّا فْالْحَفْلَة، وْعْجْبَاتْ هِيرُودُسْ. 7وْهَادْشِّي عْلَاشْ حْلَفْ حْتَّى يْعْطِيهَا دَاكْشِّي اللِّي طْلْبَاتْ. 8وْحِيتْ وْصَّاتْهَا مّْهَا آشْ تْدِيرْ، ݣَالْتْ لْهِيرُودُسْ: «جِيبْ لِيَّ دَابَا رَاسْ يُوحَنَّا الْمَعْمَدَانْ فْطَبْسِيلْ!». 9وْحْزَنْ الْمَلِكْ، وَلَكِنْ عْلَى قْبَلْ الْحْلُوفْ اللِّي حْلَفْ وْالنَّاسْ اللِّي حَاضْرِينْ آمْرْ بَاشْ يْتّْعْطَى لِيهَا دَاكْشِّي اللِّي بْغَاتْ. 10وْصِيفْطْ اللِّي يْقْطَعْ رَاسْ يُوحَنَّا فْالْحَبْسْ، 11وْجَابُوهْ فْوَاحْدْ الطَّبْسِيلْ وْعْطَاوْهْ لْلْبَنْتْ، وْدَّاتُه لْمّْهَا. 12وْجَاوْ تْلَامْدْ يُوحَنَّا، وْهْزُّو الدَّاتْ دْيَالُه وْدْفْنُوهَا، وْمْنْ بَعْدْ مْشَاوْ وْخَبّْرُو يَسُوعْ.

يَسُوعْ كَيْوَكّْلْ خَمْسَالَافْ وَاحْدْ

13وْمْلِّي سْمَعْ يَسُوعْ هَادْ الْأُمُورْ، مْشَى مْنْ تْمَّ فْالْفْلُوكَة لْوَاحْدْ الْمُوضْعْ خَالِي بُوحْدُه. وْمْلِّي عَرْفُو الجّْمَاعَاتْ دْ النَّاسْ بْلِّي هُوَ غَادِي لْتْمَّ، تْبْعُوهْ مْنْ الْمْدُونْ عْلَى رْجْلِيهُمْ. 14وْمْلِّي نْزَلْ مْنْ الْفْلُوكَة شَافْ جْمَاعَة كْبِيرَة دْيَالْ النَّاسْ، وْحَنّْ عْلِيهُمْ وْشْفَى الْمَرْضَى دْيَالْهُمْ. 15وْمْلِّي جَاتْ الْعْشِيَّة، قَرّْبُو لِيهْ تْلَامْدُه وْݣَالُو لِيهْ: «رَاهْ مْشَى الْحَالْ وْحْنَا فْهَادْ الْخْلَا، إِيوَا ݣُولْ لْلجّْمَاعَاتْ دْ النَّاسْ يْمْشِيوْ لْلدّْوَاوْرْ بَاشْ يْشْرِيوْ لْرَاسْهُمْ الْمَاكْلَة». 16وَلَكِنْ يَسُوعْ ݣَالْ لِيهُمْ: «مَا كَايْنْ لَاشْ يْمْشِيوْ، عْطِيوْهُمْ نْتُمَ مَا يَاكْلُو». 17وْݣَالُو لِيهْ: «رَاهْ مَا عَنْدْنَا هْنَا غِيرْ خَمْسَة دْ الْخُبْزَاتْ وْجُوجْ حُوتَاتْ». 18وْݣَالْ لِيهُمْ: «أَرَاوْهُمْ لِيَّ لّْهْنَا!». 19وْهُوَ يْآمْرْ الجّْمَاعَاتْ دْ النَّاسْ بَاشْ يْݣَلْسُو عْلَى الرّْبِيعْ. وْخْدَا هَادُوكْ الْخَمْسَة دْ الْخُبْزَاتْ وْالجُّوجْ دْ الْحُوتَاتْ وْهْزّْ عِينِيهْ لْلسّْمَا وْشْكَرْ اللَّهْ. وْمْلِّي قَطّْعْ الْخُبْزَاتْ عْطَى لْتْلَامْدُه، وْالتّْلَامْدْ عْطَاوْ لْلجّْمَاعَاتْ دْيَالْ النَّاسْ. 20وْكْلَاوْ كُلّْهُمْ حْتَّى شْبْعُو، وْمْنْ بَعْدْ جْمْعُو طْنَاشْرْ ݣُفَّة عَامْرَة بْالطّْرُوفَ دْ الْخُبْزْ اللِّي شَاطُو. 21وْكَانُو هَادُوكْ اللِّي كْلَاوْ شِي خَمْسَالَافْ وَاحْدْ، مْنْ غِيرْ الْعْيَالَاتْ وْالْوْلَادْ.

يَسُوعْ كَيْتّْمَشَّى فُوقْ الْمَا

22وْآمْرْ يَسُوعْ تْلَامْدُه بَاشْ يْرَكْبُو دِيكْ السَّاعَة فْالْفْلُوكَة وْيْسَبْقُوهْ لْلجِّهَة لْخْرَى، عْلَى مَا يْصِيفْطْ الجّْمَاعَاتْ دْ النَّاسْ بْحَالْهُمْ. 23وْمْلِّي صِيفْطْهُمْ، طْلَعْ لْلجّْبَلْ بُوحْدُه بَاشْ يْصَلِّي. وْبْقَى بُوحْدُه تْمَّ حْتَّى جَاتْ الْعْشِيَّة. 24وْبَعّْدَاتْ الْفْلُوكَة دْيَالْ التّْلَامْدْ بْزَّافْ فْوَسْطْ الْبْحَرْ وْغْلْبُوهَا الْمَّاجْ، عْلَاحْقَّاشْ كَانْتْ الرِّيحْ مْضَادَّاهَا. 25وْفْالْفْجَرْ، جَا يَسُوعْ عَنْدْ تْلَامْدُه وْهُوَ كَيْتّْمَشَّى فُوقْ الْمَا. 26وْمْلِّي شَافُوهْ التّْلَامْدْ كَيْتّْمَشَّى فُوقْ الْمَا، تّْخَلْعُو وْݣَالُو: «هَادَا خْيَالْ شِي جْنّْ»، وْغَوّْتُو مْنْ كْتْرَةْ الْخُوفْ. 27وْفْدِيكْ السَّاعَة، تّْكَلّْمْ مْعَاهُمْ يَسُوعْ وْݣَالْ: «تْشَجّْعُو، أَنَا هُوَ، مَا تْخَافُوشْ!». 28وْهُوَ يْݣُولْ لِيهْ بُطْرُسْ: «آ سِيدِي، إِلَا كْنْتِ نْتَ هُوَ، آمْرْنِي بَاشْ نْجِي لْعَنْدْكْ كَنْتّْمْشَّى فُوقْ الْمَا». 29وْݣَالْ لِيهْ يَسُوعْ: «أَجِي!» وْهُوَ يْنْزَلْ بُطْرُسْ مْنْ الْفْلُوكَة وْمْشَى فُوقْ الْمَا لْجِهْةْ يَسُوعْ. 30وَلَكِنْ مْلِّي شَافْ الرِّيحْ قْوِيَّة تّْخْلَعْ وْبْدَا كَيْغْرَقْ، وْهُوَ يْغَوّْتْ وْݣَالْ: «عْتَقْنِي آ سِيدِي!» 31وْدْغْيَا مْدّْ يَسُوعْ يْدُّه وْقَبْطُه وْݣَالْ لِيهْ: «آ قْلِيلْ الْإِيمَانْ، عْلَاشْ شْكِّيتِي؟». 32وْمْلِّي طْلْعُو لْلْفْلُوكَة، تّْهَدّْنَاتْ الرِّيحْ. 33وْهَادُوكْ اللِّي فْالْفْلُوكَة سْجْدُو لِيهْ وْݣَالُو: «فْالْحَقِيقَة، نْتَ وَلْدْ اللَّهْ».

يَسُوعْ كَيْشَافِي بْزَّافْ دْ النَّاسْ مْرَاضْ فْجَنِّيسَارَتْ

34وْمْلِّي قْطَعْ يَسُوعْ وْتْلَامْدُه لْلجِّهَة لْخْرَى دْ الْبْحَرْ، وْصْلُو لْبْلَادْ جَنِّيسَارَتْ. 35وْعَرْفُوهْ مَّالِينْ دِيكْ الْبْلَادْ، وْدَيّْعُو خْبَارُه فْدُوكْ الجّْوَايْهْ كُلّْهُمْ، وْجَابُو لِيهْ ݣَاعْ الْمَرْضَى دْيَالْهُمْ. 36وْطْلْبُوهْ بَاشْ يْمَسُّو وَاخَّا غِيرْ جْلَايْلُه. وْكَانْ ݣَاعْ اللِّي كَيْمْسُّه كَيْتّْشَافَى.

Currently Selected:

مَتَّى 14: MSTD

ማድመቅ

Copy