Masmur 2
2
Vatano Amisye taune Po aijaseo akarijo titi rai
1 # 2:1 Anemo 1 muno 2 ratoe akato no Arakov. 4:25-26. Wakoe! Veanimaibe susyo wanave Amisye Ai jewene ubesea mangkakeraive?
Veanimaibe susye kotare manatantonave ana ngkakai rai?
Weramu indati ubea marudija!
2Akari titi mine so wanatatayaube tenambe,
muno akari akokoe wanunugambe wanyinyaube,
indamu umarovave AMISY Ai, muno Apa akari titi Po aijaseo#2:2 No koano Israel raijamo vatano wo apatimu indamu be akari titive opamo manino saitun rauvaro akari rai. ai.
3Akari akokoe umaso wo raura ware:
‘‘Wade! Wampapaya irati aya ibe akarive wansai rai,#2:3 Munijo una no Israel makijani nawamo wonae akari titi Israel be akarive maiji, weti ware umarovave ai.
muno wamo aya vambunino mo wansaokaisye radaut.’’
4Akoe tuna no Apa kursijo titi rai no Manunggara
pugoeno mai muno Po maura tantunawi.
5Umba soowato mai Apa parijo mangke rai,
muno Po mapapabe irati Apa parijo mpanyoane rai.
6Amisy Po raura pare: ‘‘Nai Sion, Sya unato ndandinit,
Syo akari syatayao aijaseo akari titi rai to!’’
7Ribeker syare syo AMISY Apa ayao Po raura aje rinai ravov,
Po raura pare: ‘‘Winyamo Sya arikainye pi winy!#2:7 Ayao so ratoe tavon no Arakov. 13:33; Ibr. 1:5, 5:5.
Masyoto unumeso Syo naijaseo akari rai, Syo nawainamo Sya arikainye pi winy.
8Syare nyo Rinanajo indamu Syo susye kotare maunande ti nya ura mai tawan,
muno muni tename som ti nto no ama marane rai, omamo syo raunande indamu wimbe akarive rai tenambe.
9Wenawamo indati winyo manepati nya isyo besije rai,
muno nyo makupi vintabo, maisyare kavine inta ravari ti ngkukupi vintabo wemaisy.’’
10Maisyare omaiti, akarijo titi weap, syare wapo rakarae kobe!
Inya, akari akokoe mine so weap, wapo ananyao raraniv kobe!
11Wabeaje wapanapatambe AMISY Ai muno wapo asyaniv,
wabeaje watutar no Amun.
12Indamu vemo Amisye parijo wasai mo wapuenen papabe inya,
weye Apa parijo mangke mamo nde papabe rave.
Kove ngkov irati vatano ugaugambe Amisye Aije mai.
Currently Selected:
Masmur 2: yva
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)