UBWANDILO 8
8
Ukumalika kwa mwelesyo
1Loli Kyala alinkunkumbuka Noa pamopene nifinyamana fyosa kangi nifitimigwa fyosa ifi fyali nagwe mu ngalaba. Alinkutuma umbelo pakisu, popapo amisi galinkukuluka panandipanandi. 2Inyibuko sya misi amasolofu namabwindo ga kumwanya gali nkwigaligwa, ifula iyi yonekaga itolo yilinkumalika; gope namisi galinkwendelela ukukuluka. 3Pabumalikisyo bwa masiku mia yumo na malongo mahano (150), amisi galinkuma gosa. 4Po lelo mmwesi gwa buhano na bubili, pisiku lya masiku kalongo na mahano pamwanya mabili (17), ingalaba yilinkwakwima pamwanya pa kyamba kya Ararati. 5Agene amisi go galinkwendelela ukukuluka ukwakufika mmwesi gwa kalongo; po lelo mmwesi gwa kalongo, pisiku lya kwanda ilya mwesi, imitu gya fyamba gilinkuboneka.
6Bo gakindilepo amasiku amalongo mana (40), Noa alinkwigulapo pibwindo ili atendekisye mu ngalaba; 7alinkulituma ilikungulu ukuti likakete linga amisi gamalike, lyo lilinkubeta kosa kosa, ukwisa kufika apa gumilaga amisi pakisu. 8Panyuma kangi Noa alinkuyituma ingunde ukwakuketa linga amisi gumile pakisu; 9loli ingunde yilinkusita nukupaga pabukanyo amalundi gake, yilinkugomokela ukwisa kwa Noa mu ngalaba, namanga amisi gakali galipo pakisu kyosa. Popapo Noa alinkugolosya ikiboko kyake alinkuyambilila nukuyingisya mu ngalaba. 10Alinkugulilapo kangi amasiku mahano na mabili, po alinkuyituma kangi ingunde ukufuma mu ngalaba, iyene ingunde yilinkwakugomoka namayolo, mundomo gwake mwalimo ilyani lya nsyunguti iliteta ili yalyapile; 11bunobuno lelo Noa alinkusyagania ukuti amisi gumile pa kisu. 12Alinkugulila kangi amasiku mahano na mabili, po alinkwenda nukuyituma kangi ingunde; iyene yilinkusita nukugomokelako kangi kwa Noa.
13Nkyinja kya ba mia bahano nayumo nikyinja kimo (601), ikya bumi bwa Noa, mmwesi gwa bubili, pisiku lya kwanda ilya mwesi, po amisi galinkuma pa kisu; Noa alinkusosyapo iki akupikile pamwanya pa ngalaba, alinkwenesya alinkwaga ukuti amisi gumile pa kisu. 14Mmwesi gwa bubili, pisiku lya malongo mabili na masiku mahano na mabili (27) mmwesi gulagula, ikisu kyosa kilinkuya kyumu itolo. 15Popapo Kyala alinkumbula Noa alinkuti, 16“Usokege mu ngalaba palikimo nunkasi gwako, na banako abalumyana, kangi na ba bakasi babo. 17Usokege nafyo fyosa ifya bumi ifi fili nanugwe ifyabumi ifya luko losa, injuni, nifinyamana, na fyosa ifi fikwendela ulwanda, ukuti fyoloke fiyo pa kisu; fibale fiye fi fingi itolo.” 18Popapo Noa alinkusoka mu ngalaba palikimo nabanake na yu nkasi, kangi na bakasi ba banake; 19palikimo nifinyamana fyosa ifya ndisu, nifitimigwa, ni njuni syosa na fyosa ifi fikwendela ulwanda, filinkusoka uluko nuluko.
Noa ikwikemesya ilikemo
20Umwene Noa alinkunjengela Untwa ikigemo kya kwikemekesyapo alinkwegapo ifinyamana fyosa ifi bikulya, ninjuni syosa isi bikulya, fyo alinkuntwalila Untwa nukwikemesya pa kigemo kila, ukuya ikemo ilyokye. 21Lelo bo Untwa alupilike uluma ulunyafu, alinkuyoba mwene mu ndumbula yake alinkuti, “Ndisakukigunamo kangi ikisu panongwa ya mundu, napa linga inyinogono sya ndumbula yake siye mbibi ukufuma mu mbutubwa bwake; fyope nifyabumi ndisakufyonanga kangi ukufwana na muno mbombile lilino. 22Bo apa ikisu kikali kikwendelela, utubalilo twa kubyalila nutwa ntondolo, utubalilo twa mbepo nu twa mafuke, utubalilo twa kisiku nu twa lumu, utwa pa musi nutwa pakilo, to tutisakumalikamo siku.”
Currently Selected:
UBWANDILO 8: NNBII
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
BAIBULO INONGWA INUNU © Bible Society of Malawi, 2017.
