Эхин 19
19
Лоодой, Содом ба Гоморрын хуби заяан
1Тэнгэриин хоёр Эльгээмэл тэрэ үдэшэ Содом хото ерэбэ. Тэрэ үедэ Абраһаамай дүүгэй хүбүүн Лоот хотые хүреэлһэн үндэр хэрэм ханын үүдэнэй хажууда һуугаа. Аяншадые харамсаараа тэрэ һууриһаа бодожо, доро дохин хэлэбэ:
2– Хүндэтэ айлшад, мэндээ! Аян замтнай амгалан гү? Хайраараа орхингүй, минии, танай богоолой, гэртэ орыт. Манайда хонолго табижа, хүлөө угаажа амараад, эдеэ хоол барихыетнай уринаб. Тиигээд үглөөгүүр аян замдаа гарана бэзэт.
– Үгы, – гэжэ тэдэ харюусаба. – Танайда орожо, түбэг ушараажа байһамнай үлүү. Бидэнэй газаашье хоноходо болохо.
3Зүгөөр Лоот тэдэниие ехэл гуйба, тиихэдэнь тэдэ зүбшөөжэ, Лоот гэгшын гэртэ ошобо. Лоот тэдээндэ эдеэ хоол бэлдэжэ, хилээмэ барижа хүндэлбэ.
4Унтарида ороодүй байхадань, Содом хотын үбгэн, залуугүй бүхы эрэшүүл Лоодой гэрые бүһэлжэ зогсоод, 5тэрэниие дуудан:
– Танайда үдэшэ ерэһэн зон хаанаб? Наашань тэдэниие гарга! Одоо бидэ зоргоороо тэдэниие эдлэхэбди! – гэжэ хашхаралдаба.
6Лоот өөрөө тэдээндэ гараад, гэрэйнгээ үүдэ нюргаараа тулан, 7хэлэбэ:
– Нүхэдни, иимэ муухай үйлэ бү хыт! 8Эрэ хүниие үшөө үзөөгүй хоёр басагад намда бии. Эдэ үхидөө таанадта үгэнэлби, юушье тэдэнтэй хэгты, зүгөөр минии гэртэ орогшодой ойро бү хүрэгты!
9– Тонило! – гэжэ тэдэ һүхирэлдэбэд. – Хэн аад, маанадые захирха болообши? Бидэ шамтай энээнһээ дороор аашалхабди!
Тэдэнэр Лоодые түлхин, гэрэйнь үүдэ эбдэхээр дугташалдаба.
10Гэртэ байһан хоёр тэдэ айлшад үүдэ онгойлгон, Лоодые досоошонь татажа оруулаад, үүдэ хаажархиба. 11Харин газаа байгша бүхы эрэшүүлые, ехэ багагүй, бултыень харахагүй һохор болгобо. Хэдышье оролдоо һаа, тэдэнэр үүдэ оложо шадахагүй болобо.
12Айлшад Лоодто:
– Энэ хотодо шинии гэхэ үшөө хэд бииб? Хүрьгэд, хүбүүд, басагад болон үшөө түрэл гаралаа бултыень эндэһээ дахуулан гарга! 13Эзэн энэ хотын зоной бузар муухай аашанууд тушаа дуулаһан ушарһаа маанадые эльгээжэ, хотые үгы хэхэ даабари үгөө, – гэжэ хэлэбэ.
14Лоот ошожо, басагадтайнь гэрлэхэ заяатай хүбүүдтэ хэлэбэ:
– Дары түргэн энэ хотоһоо гаража ошогты! Эзэн энэ хотые үгы хэхэнь!
Теэд тэдэ Лоот шоглон наадаба гэжэ һанаба.
15Үүр сайжа эхилбэ. Эльгээмэлнүүд Лоодые яаруулба:
– Һамгаяа, хоёр басагадаа абаад бушуу яба! Үгы һаа, энэ нүгэл шэбэл шэнгээһэн хото балгааһантай хамта хосорхош!
16Зүгөөр Лоот яаха гээшэб гэжэ бодолгото болон удаарба, хүдэлбэгүй. Эзэнэй Лоодые хайрлаһан ушарһаа тэдэ хоёр Эльгээмэлнүүд Лоодые, тэрэнэй һамга болон хоёр басагадыень гарһаань хүтэлэн, хотоһоо гаргаба.
17Тиигээд тэдэ Эльгээмэлнүүдэй нэгэн Лоодой гэр бүлэдэ хандажа:
– Амиды үлэхэ гэбэл, эндэһээ түргэн тэрьедэгты! Гэдэргээ эрьежэ бү харагты, талада ошожо зогсожо бү байгты! Хада өөдэ түргөөр гарагты! Үгы бол, таанад хосорхот! – гэжэ захирба.
18Теэд Лоот:
– Эзэмни! Би тэндэ ошожо шадахагүйб. 19Һанаандатнай намайе тааруу гэжэ тоолон, таанад намайе энэрэн хайрлажа, ами наһыем абаржа, һайе хэһэншье һаатнай, би тэрэ холын хада уула руу хүрэжэ үрдихэгүйлби. Тэндэ хүрэхым урда тээ аймшагтай гай тодхор намайе хүсэхэ, хосорхолби! 20Тээ тэрэ багахан хото байна. Тиишээ би гүйһүүлби, үсөөхэн зонтой тэндэ би амиды мэндэ үлэһүүлби, – гэжэ гуйба.
21– Зай, тиигэ, – гэбэ Эльгээмэл. – Таанадай хүрэжэ ошотор бидэ тэрэ хотые усадхангүй байхабди. 22Зүгөөр ехэ яаралтай тиишээ гүйхэ хэрэгтэй. Таанадай тэндэ хүрөөдүйдэ бидэ хэрэгээ эхилхэ аргагүйбди.
Энэ хото бага байһанһаа «Цооһар», оршуулбал, «Бишыхан» гэжэ нэрлэгдэнхэй.
23Наранай мандажа байха үедэ Лоот Цооһар хотодо хүрэбэ.
Содом ба Гоморро хотонуудай һүнэлгэ
24Гэнтэ Эзэн бусалжа байһан хүхэр огторгойн орьёлһоо аадар мэтэ Содом ба Гоморро хотонууд руу адхажа, 25тэдэ хоёр хотые, оршон тойронхи газар, ажаһуугша хүн зониие, хамаг ургасые үгы хэбэ.
26Лоодой һамган үбгэнэйнгөө арада ябаһанаа гэдэргээ эрьен харахадаа, тэрэ дары дабһан бахана болон зогсошобо.
27Нүгөөдэ үглөөгүүрнь Абраһаам эртэ бодожо, Эзэнтэй хөөрэлдэжэ байһан газартаа ерээд, 28Содом ба Гоморро хотонуудай байһан тала газарые шэртэн хараба: хаа-хаанагүй үнэһэн согһоо үдхэн хара утаан бааян һуунагтажа байба.
29Энэ тала дайдын хото һууринуудые үгы хэхэдээ, Бурхан Абраһаамые һанаандаа оруулжа, Лоодые абараа.
Моһааб болон аммоон яһатанай уг гарбал
30Лоот Цооһар тосхондо удаан ажаһуухаяа айжа, хоёр басагадаа абаад, хада уулада гаража, агы нүхэн соо байрлаба.
31Нэгэ үдэр ехэ басаганиинь дүүдээ хэлэбэ:
– Эсэгэмнай үтэлжэ үбгэржэ байна, дахин гэрлэхэгүйнь лабтай. Харин эндэ ши бидэ хоёрто ямар эрэ хүн олдохоб даа? 32Эсэгэеэ архяар һогтоогоод, тэрээнтэеэ унтая. Тиигэбэл, эсэгынгээ уг удамые үргэлжэлүүлхэбди.
33Дүүнь зүбшөөжэ, һүни болоходо, тэдэ эсэгэдээ үзэмэй дараһан архи уулгажа һогтообо. Эгэшэнь ерэжэ, эсэгэтэеэ унтаба, харин тэрэнь шал һогтуу соогоо юуншье боложо байһые ойлгобогүй – хайшан гэжэ унтахаяа ерэһыеньшье, яагаад ошоһыеньшье.
34Үглөөдэр эгэшэнь дүүдээ хэлэбэ:
– Үнгэрэгшэ һүни би эсэгэтэеэ унтааб. Энэ һүни эсэгэеэ дахин үзэмэй дараһан архи уулгажа һогтоое, ши ерэжэ, тэрээнтэй унтахаш. Тиигэбэл, бидэ эсэгынгээ уг удамые үргэлжэлүүлхэбди.
35Дахинаа тэдэ эсэгэдээ үзэмэй дараһан архи уулгажа һогтообо. Бага басаганиинь ерэжэ, эсэгэтэеэ унтаба, харин тэрэнь юун боложо байһые ойлгоогүй – хайшан гэжэ тэрэнэй хэбтэһыень, яагаад, хэдыдээ ошоһыеньшье.
36Тиигэжэ Лоодой хоёр басагад эсэгэһээ хээлитэй болоо һэн. 37Эгэшэнь хүбүү түрөөд, тэрэнээ Моһааб гэжэ нэрлэбэ. Тэрэнь моһааб обог зоной элинсэг эсэгэ болоно. 38Дүү басаганиинь баһа хүбүү түрөөд, тэрэнээ Бэн-Аммии#19:37-38 Еврей хэлэн дээрэ Моһааб «эсэгэһээ», Бэн-Аммии «түрэлэймни хүбүүн» гэһэн удхатай. гэжэ нэрлэбэ. Тэрэ аммоон обог зоной элинсэг эсэгэ болоно.
Currently Selected:
Эхин 19: BurBBL2024
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
