Эхин 12
12
Абрамые Эзэн Бурханай шэлэлгэ
1Нэгэтэ Эзэн Абрамда иимэ айладхал буулгаба:
– Энэ орон нютагаа, түрэлхидөө, эхэ эсэгын гэр байраа орхи. Минии зааһан газар дайда ошо. 2Би шамһаа үнэр үдхэн агууехэ арадые бии болгохоб, үреэхэб, шамайе нэрэ хүндэтэй хүн болгохоб, шамаар дамжан хожомой сагта олон зондо баяр баясхалан дахин ушарха.
3Хэн шамайе үреэнэб – тэрэниие Би үреэхэб!
Хэн шамайе хараанаб – тэрээндэ хараал хүртөөхэб!
Шамаар дамжуулан Би орон дэлхэйн бүхы арад зониие буян хэшэгтээ хүртөөхэб!
4Иигэжэ Абрам Эзэнэй зарлигаар харгы замда гараба; тэрээнтэй хамта дүүгэйнь хүбүүн Лоот ябалсаба. Харраанһаа гарахадаа Абрам далан табан наһатай байгаа. 5Тэрэ Сара һамгаяа, дүүгэйнгээ хүбүүн Лоодые мүн Харраанда олоһон хамаг эд зөөриеэ, зарасанараа бултыень абаад, тэдэнтэеэ Ханаһаан нютаг зорибо.
6Тэрэ үедэ Ханаһаан нютагта ханаһаан обогойхид ажаһуугаа.
Абрам Ханаһаанай урда зүгтэ оршодог Шэхээм гэжэ хотын хажуудахи Морээ гэдэг газарта ерээд, нэгэ сарса модоной дэргэдэ хонобо.
7Тэндэ Эзэн Абрамда үзэгдэжэ, иигэжэ айладхаба:
– Би энэ газар дайдые шинии үри һадаһадта үгэхэб!
Иигэжэ өөртэнь үзэгдэһэн Эзэниие хүндэлжэ байһанаа элирхэйлэн, мал үргэл болгон шатааха шулуун шэрээ Абрам тэндэ түхеэрбэ.
8Һүүлээрнь Абрам тэндэһээ урагшаа ябажа, Бэт-Ээл хотын зүүн талада оршодог хада уулатай газарта ерэжэ, майханаа татаба. Тэндэһээ баруун зүгтэ Бэт-Ээл, зүүн зүгтэ Һай хото оршодог байгаа. Абрам тэндэ үшөө нэгэ үргэлэй шулуун шэрээ түхеэрэн баряад, Эзэндэ зорюулжа мал хёрбоһолон үргөөд, Эзэниие хүндэлжэ байһан тухай үгэнүүдые хэлэбэ.
9Тэрэнэй һүүлээр Абрам улам саашаа, урда зүгтэ оршодог Нээгэб руу зорибо.
Абрам Египет орондо
10Энэ нютагта үлэн хооһон байдал тохёолдоо һэн. Тиимэһээ Абрам үшөө саашалан, Египет руу түр зуура байха газар бэдэрбэ. 11Египет орон орохынгоо урдахана тэрэ Сарада иигэжэ хэлэбэ:
– Би шамайе сэбэр һайхан гэжэ мэдэнэб. 12Египедэйхид шамайе харахадаа, минии һамган гэжэ ойлгохо, тиигээд шамайе амидыгаар орхихо, зүгөөр намайе алаха! 13Ши өөрыгөө минии дүү гээшэб гэжэ хэлээрэй, тиихэдэш намда һайнаар хандаха, ши минии ами наһа абархаш.
14Абрам Египет ерэбэ, тиихэдэнь египедэйхид Сарын сэбэр һайханиие хараба. 15Фараоной түшэмэлнүүд Сарые хаража, фараондо хэлэжэ, Сарые ордондонь абаашажа байрлуулаа һэн.
16Сарын һайгаар Египедэй фараон Абрамда һайнаар хандажа, олон хони, ямаа, үхэр, элжэгэ, тэмээ ба эрэ, эмэ зарасануудые бэлэглэбэ.
17Зүгөөр Абрамай һамган Сарые абаһанайнь түлөө Египедэй фараондо, бүхы ордонойнь албатанда Эзэн гай зоболон тохёолдуулжа, үбшэ хабшанда нэрбүүлбэ.
18Фараон Абрамые дуудажа ерүүлээд, иигэжэ хэлэбэ:
– Ши юу хэбэ гээшэбши? Юундэ тэрэниие һамгамни гэжэ нюугаабши? 19Юундэ дүү басагамни гэжэ мэхэлээбши? Тиихэдэшнил тэрэниие һамган болгожо абаа ха юмбиб. Һамгаяа абаад яба эндэһээ!
20Тиигээд Абрамые һамгантайнь, эд бараатайнь Египедһээ ябуулха тухай сэрэгтээ тэрэ захиралта үгэжэ, тэдэниие орон нютагһаа үлдэбэ.
Currently Selected:
Эхин 12: BurBBL2024
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
