Mateo 20
20
Bobe turo mu adwumayɔfoɔ
1 #
Mat 21:33
“Na soro ahennie he te sɛ afuowura bi a ɔkɔɔ abɔntene anɔpatutuutu sɛ ɔɔkɔpɛ apaafoɔ akɔ ne bobe turo mu. 2Ɔne bɛ dii ano maa osii sɛ obetua paani da korɔ akatua ama he, ɔmaa bɛkɔɔ ne bobe turo mu. 3Berɛ a ofirii abɔntene bɛyɛ nnɔn nkron he, ohuu apaafoɔ foforɔ dwaso sɛ begyina hɔ a bɛnnyɔ hwee. 4Na ɔka kyerɛɛ bɛ sɛ, ‘Ho nso ho nkɔ bobe turo mu hɔ, na metua ho ka sɛdeɛ ɔsɛ.’ Nti bɛkɔeɛ. 5Berɛ a ɔkɔɔ abɔntene bio bɛyɛ awigyina ne bɛyɛ nnɔn mmeɛnsa he, ɔyɔɔ saa. 6Na ɔbɔɔ bɛyɛ nnɔn num he ɔkɔɔ abɔntene kohuu sɛ binom gyinagyina hɔ; na obisaa bɛ sɛ, ‘Mmɛ nti ne hogyina hɔ kwa da mu nyinaa?’ 7Bɛka kyerɛɛ no sɛ, ‘Nipa biaa mmɔ yɛ paa nti a.’ Ɔka kyerɛɛ bɛ sɛ, ‘Ho nso honkɔ bobe turo mu hɔ.’ 8Nnwunu dwoeɛ he, bobe turo wura he ka kyerɛɛ ne hwɛsoni sɛ, ‘Frɛ apaafoɔ he na tua bɛ ka, firi deɛ otwa toɔ so kosi deɛ odi kane so.’ 9Ɔfrɛɛ apaafoɔ a ɔfaa bɛ nnɔn num he baeɛ, na ɔmaa bɛ mu biaa sɛnea paani dakorɔ akatua teɛ. 10Afei bɛ a bedii kane baeɛ he, na benim sɛ bebenya bebree; nso bɛ mu biaa nyaa sɛnea paani dakorɔ akatua teɛ. 11Na bɛ nsa kaeɛ he, benwinwini tiaa bobe turo wura he, 12kaa sɛ, ‘Yeinom a bɛbaa akyire yi yɔɔ adwuma dɔnhwere baako pɛ, nso woama yɛ a yɛayɔ adwuma da mũ nyinaa ama awia ahye yɛ ne bɛ nyinaa pɛ.’ 13Nso obuaa bɛ mu baako sɛ, ‘Damfo, wotee me aseɛ sɛ wobɛgye dakorɔ akatua; nti menyɔɔ wo bɔne biaa. 14Fa wo akatua kɔ; ɔyɛ mepɛ sɛ mɛma bɛ a bɛbaa akyire yi sɛ wo. 15#Rom 9:16; 9:21 Menni ho kwane sɛ mede m’agyapadeɛ yɔ deɛ meaa me pɛ? Anaa m’ayamyɛ nti na w’ani abere yi? 16#Mat 19:30; 22:14 Saa ne akyidifoɔ bedi kane, na adikanfoɔ mmom abedi akyire.”
Yesu wuo ne ne wusɔreɛ ho nkɔmhyɛ a ɔtɔ so mmeɛnsa
(Marko 10:32-34; Luka 18:31-33)
17Berɛ a bɛɛkɔ Yerusalem he, Yesu frɛɛ asuafoɔ dummienu he gyinaa nkyɛne, na ɔka kyerɛɛ bɛ kwane so sɛ, 18#Mat 16:21; 17:22-23 “Hwɛ, yɛɛkɔ Yerusalem, na bɛde Nipa Ba he bɛhyɛ asɔfo mpanyimfoɔ ne atwerɛfoɔ he nsa, na bebebua no kumfɔ; 19na bɛde no ahyɛ Amanamane mufoɔ nsa ama bɛadi ne ho fɛw na bɛabɔ no mmaa, na bɛabɔ no asennuam, na da a ɔto so mmeɛnsa he Nyankopɔn anyane no afiri awufoɔ mu.”
Ɔsɛ dikanfoɔ sɛ ɔyɛ somfoɔ
(Marko 10:35-45)
20 #
Mat 10:2
Afei Sebedeo mma he ne bɛ maame baa Yesu hɔ. Na bɛ maame he buu nkotodwe Yesu anim, na ɔsrɛɛ ne hɔ bibi. 21#Mat 19:28 Na obisaa no sɛ, “Mmɛ ne woopɛ?” Na ɔka kyerɛɛ no sɛ, “Hyɛ sɛ w’ahennie mu hɔ me mma mmienu yi bɛtena wo nifa ne wo benkum so.” 22#Mat 26:39; Yoh 18:11; Luk 12:50 Nso Yesu buaa sɛ, “Wonnim deɛ woobisa he. Hobetumi anom kuruwaa a mɛnom he bi?” Bebuaa sɛ, “Yebetumi.” 23Na ɔka kyerɛɛ bɛ sɛ, “Kuruwaa a mɛnom he deɛ ho nso hobɛnom, nso sɛ hobɛtena me nsa nifa ne benkum so deɛ, ɔnnyɛ me ne mede bɛma, na mmom, ɔya hɔ ma bɛ a m’ Agya asiesie de ama bɛ.”
24 #
Luk 22:24-26
Berɛ a asuafoɔ du he tee yei he, bɛ bo fuu anuanom mmienu yi paa. 25Nso Yesu frɛɛ bɛ baa ne nkyɛne kaa sɛ, “Honim sɛ wiase Amanamane sodifoɔ hyɛ bɛ nkurofoɔ so, na bɛ mu akɛsefoɔ he di bɛ so tumi. 26#Mat 23:11 Ɔnsɛ sɛ ho deɛ hoyɔ saa; na deɛ ɔpɛ sɛ ɔyɛ kɛseɛ ho mu he ɔsɛ sɛ ɔyɛ ho mu somfoɔ, 27#Mar 9:35 na deɛ ɔpɛ sɛ ɔyɛ ho mu dikanfoɔ he, ɔsɛ sɛ ɔyɛ akoa ho mu; 28#Luk 22:27; Flp 2:7; 1 Ti 2:6 sɛdeɛ Nipa Ba he nso amma sɛ bɛnsom no na mmom ɔbɛsomeɛ na ɔde ne nkwa ayɛ agyedeɛ ama nipa bebree he.”
Yesu saa mmeema anifirafoɔ mmienu bi yadeɛ
(Marko 10:46-52; Luka 18:35-43)
29Beefiri Yeriko he, nipadɔm pii tu dii n’akyi. 30Na mmeema anifirafoɔ mmienu bi tete kwane nkyɛne. Berɛ a bɛtee sɛ Yesu ootwam he, bɛteaam sɛ, “Awurade hu yɛ mmɔbɔ, Dawid Ba!” 31Nnipadɔm he hyɛɛ bɛ ketee sɛ bɛnyɔ komm; nso bɛteateam kɛse paa sɛ, “Hu yɛ mmɔbɔ, Awurade, Dawid Ba!” 32Yesu gyinaa hɔ dinn, na ɔfrɛɛ bɛ, bisaa bɛ sɛ, “Mmɛ ne hopɛ sɛ menyɔ ma ho?” 33Bɛka kyerɛɛ no sɛ, “Awurade, ma yenhu adeɛ.” 34Yesu huu bɛ mmɔbɔ, na ɔde ne nsa kaa bɛ ani. Amonom hɔaa behuu adeɛ bio na bedii n’akyi.
Currently Selected:
Mateo 20: BBTP
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Bono New Testament © The Bible Society of Ghana, 2021
