Zona 1
1
Hukuni Zona Zihova
1Ninabe ta Zihova mai pan Zona kobur' malea ta Amitai: 2<<Lago pa sau lavat pa Ninive, beti piton vatuvisini ria di sinea, na inelelu ta tinon pa sau ia sage mai pa kenugu.>>
3Ba huku ni Zona Zihova, gumi lago pa Tasis. Gore lago pa Zopa aia, ie omeni aia kek' vaka ia nama lago pa Tasis. Beto tabari aia no tinabara, sage pa vaka aia, beti tepe lago pa tasis gumi huku pa Zihova.
4Qi oli lago Zihova ivor' lavatana pa kolhivoko, bet' gavor' mai ranebongi lavatana, beti tata opo vaka ia. 5Malangu dogurudi pa vaka, hokeka ngire kaka padi beku, beti kou kakahi ria dogur' vinavsage pa kolhivoko gumi mamdeka vaka. Ba gore zona pa kaurun vaka, ie la kole puta aia.
6Lago kapteni pan aia beti nabe, <<Osi puta goi? Turu sage bet ui lago pa mu bangara! Pu aia ke boka tokani gita, gumi dana mate gita.>>
7Qi varvivinei ria tinon tatavetedi pa vaka, <<Tokmudi ororu ta ligomo, gumi pite sega no sinea hoa, beti gavor' pinatianga hoa.>> Tokmudi ligomo beti hukuku ligomo Zona.
8Idosi ria Zona, <<Pitoni gami, sega no sinea hoa, beti gavoro pinatianga hoa pa gami? Saga taveti goi? Ova maim goi? Ova sau ta goi? Pa pukun tinon ova mai goi?>>
9Olang Aia, <<Rai Hiburu bet vahesi rai Zihova, Bangara pa talosa, aia kurin kolhivoko bet melaka.>>
10Qi malagu ria, beti idosi ria, <<saga taveti goi?>> (Gile ria ia aia huku pan Zihova, na tode pitoni aia ria.)
11Ragi bet ragi kolhivoko. Qi idosi ria aia, <<Saga ke taveti gami pan goi, gumi bule kolhivoko?>>
12Nabe aia, <<Edek' sage rai bet kou goreni rai pa kolhivoko,>> Olang aia, <<Beti ke bule ragi, gile rai, sinea hoa ta rai, igua gosori gamu ranebogi lavatan hoa.>>
13Qi popodek ria tinon pa vaka gumi vose gore mule pa melaka ba dana boka ria, na babaros hola lagomu ranebongi. 14Qi ngire lago pan Zihova ria, <<Kei Zihova, dana vamate goi gami pa tekun tinoa ta aia. Dana zutu goi gami vamate tinon ia daksa no sinea, kei Zihova, vagorkakahi goi saga kate lean pan goi.>> 15Qi teku ria Zona bet kou kakahi ria aia pa kolhivoko, beti bule ranebongi. 16Pa totos aia, malangu holani ria tinoni Zihova, beti vuvukihi sage ria pan Zihova, bet taveti ria di vintatara lago pa Aia.
17Ba tode vanamani Zihova igan lavatana ia kate mai polangi Zona, Zona pakorap hiapan igan, kuhe rane beti kuhe bongi.
© 2024, Islands Bible Ministries. All rights reserved.
