Levitikọs 3
3
Isara
1“Omwa gha ya ọkpa vbe uwu ẹmila obọ ẹre sisara, ọ kere ne ọ gha re ẹkhuia ra ẹmila amwẹ ne ẹ i mwẹ okan. 2Ọ ghi rhie obọ ẹre yan uhunmwu aranmwẹ nii, ọ ghi gbe ẹe vbe onurho Owa Ukpọn ẹ Nọyaẹnmwa, avbe ohẹn Errọn ghi hihiẹ esagiẹn ọnrẹn ye igienenẹ ọghe aka. 3Iran ghi viọ ne a ra sunu yi na vbe egbe aranmwẹ nii gie Nọyaẹnmwa zẹ vbe ihaoko evbare: 4ẹvbi ni rre ẹkpokhurhu ẹre hia, ihẹnmwẹ ọnrẹn kevbe ẹvbi ni rrọ kevbe ititi ẹvbi ni rre udu ẹre. 5Avbe ohẹn ghi giẹn ena hia vbe uhunmwu aka deba ese ne a giẹn uan nii. Uwinhinmwẹ emwi ihaoko evbare na yẹ Nọyaẹnmwa. 6A deghẹ ohuan ra ewe ọre a ya sisara, ọ ghi gha re ọwa ra amwẹ, sokpan ọ ghi gha re ne ẹ i mwẹ okan. 7Ọmwa gha ya ohuan haoko, 8ọ ghi rhie obọ yan ọre uhunmwu, ọ ghi ghe ẹe vbe odaro Owa Ukpọn. A vbe ohẹn ghi gbe esagiẹn ọnrẹn khakha ye igienenẹ ọghe aka. 9Ọ ghi viọ ehe ne a ra sunu yi vbe egbe aranmwẹ na gie Nọyaẹnmwa zẹ vbe emwi ihaoko evbare: ẹvbi ẹre, kevbe ẹrhunrhun ẹnrẹn ne a wa fian la ugboloko uvinyeke, ẹvbi ni wa rhu lele ẹkpokhurhu ẹre hia. 10Ihẹnmwẹ ọnrẹn kevbe ẹvbi ni rrọ, kevbe ititi ẹvbi ni rre udu ẹre. 11Ohẹn ne ọ ru ugamwẹ ghi giẹn ena hia zẹ vbe evbare ihaoko gie Nọyaẹnmwa.
12“Omwa gha ya ewe zọ ese, 13ọ ghi rhie obọ yan ẹre uhunmwu ne ọ gbe ẹe vbe odaro Owa Ukpọn. Avbe ohẹn ghi gbe esagiẹn ọnrẹn ye igienenẹ ọghe aka. 14Ọ ghi vbe viọ ehe ne a ra sunu yi gie Nọyaẹnmwa zẹ vbe emwi ihaoko evbare: ẹvbi hia ni rre ẹkpokhurhu ẹre. 15Ihẹnmwẹ ke ẹvbi ni rrọ ke ẹe kevbe ititi ẹvbi ni rre udu ẹre. 16Avbe ohẹn ghi giẹn ena hia zẹ vbe emwi ihaoko evbare gie Nọyaẹnmwa. Ẹvbi ni rrọ hia, ọghe Nọyaẹnmwa nọ. 17Ivbi Izrẹl rhọkpa ghẹ rri ẹvbi ra esagiẹn; uhi ne emwa hia gha da yi ke orre yasẹ orre vbe ehe ne iran arhirhi gha ye, ọre ọna khin.”
Currently Selected:
Levitikọs 3: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996