Gẹnẹsis 40
40
E Josẹf Rhan otọ Imina Avbe Oleghan
1Ọ ghi kpẹe kherhe, odibo ne ọ siẹnro ayọn kevbe ọkaolotu iran ni le ebrẹd ne ọba Igipt keghi fidọn ghe arowa iran. 2Ohu ọruemwi ẹnrẹn eva na keghi mu e Fero, 3Ọ na rhunmwuda ọnii hẹ iran ku ẹwẹdọ ne ọ rre uwu owa ọkaolotu avbe abodẹ, vbe ehe ọkpa ni ne a mu e Josẹf khui yi. 4Ọkaolotu avbe abodẹ keghi rhie Josẹf ba iran ne ọ gha ruẹmwi ne iran. Iran keghi kpẹẹ vbe uwu eghan ẹsẹse.
5Ẹdẹ ọkpa ghi rre, ke ne ọsiẹnro ayọn kevbe olotu avbe iran ni le ebrẹd ọghe ọba Igipt ke mina. Dọmwadẹ ọghọe keghi mina imina ọghọe ne ovbe mwẹ emwi ne a yae kha. 6Ugbẹn vbe Josẹf ghi sẹ ehe ne iran ye vbe owiẹwiẹmwọkpa, ọ keghi miẹn wẹ aro iran i ma vbe uhunmwu. 7Ọ keghi nọ iran wẹẹ, “Vbe uwa miẹn ẹre na yi?” 8Iran keghi wanniẹn wẹẹ, “Ma eveva ọre ọ wa mina, ma ma miẹn ọmwa ne ọ gha rhan otọ iran ma ima.” E Josẹf keghi wanniẹn wẹẹ, “Osanobua ọ re ọ rhie ẹtin ne a ya rhan imina ne ọmwa, wa tama mwẹ vbene uwa mina hẹ.”
9Ẹre ne ọ siẹnro ayọn na ta imina rẹn, “I ghi rre imina, erhan alimo ayọn kegha rre odaro mwẹ, 10ọ kegha mwẹ abọ eha, ọ ghi suẹn gha zẹ ebe, ọ keghi wa mọ, alimo ni keghi gha vbo. 11Mẹ keghi mu ukpu e Fero mwẹ obọ, ọ re I na viọ alimo nii, I na gha minọ ẹn ye ukpu mu nẹẹn.” 12E Josẹf keghi kha wẹẹ, “Emwi ne a yae kha ọre ọ na khin: abọ eha nii, ikpẹdẹ eha nọ. 13Vbe irakhuẹ, e Fero gha tie ruẹ, ọ ghi ya bọọ, ọ ghi dọlegbe rhie ruẹ ye ukpo ne u ka ye ẹghẹ ne u na gha re ne ọ siẹnro evbare. 14Sokpan emwi hia gha ma nuẹn nẹ, u ghi ye mwẹ rre o, u ghi vbe ru ọmwa esi sẹrriọ ne u te ẹmwẹ mwẹ ma e Fero, ne a mu mwẹ hin uwu eghan na rre. 15Ne I guẹ rẹn nian wẹ te a do mwẹ mu vbe ẹvbo emwa Hibru, kevbe emwa na vbe Igipt I ma ru emwi rhọkpa ne a rhunmwuda ẹre mu mwẹ fi eghan na.”
16Ugbẹn vbe ọkaolotu iran ni le ebrẹd ghi miẹn wẹ vbene a rhan otọ imina nii maa, ọ tama e Josẹf wẹẹ, “Mẹ vbe mina imina. Okhuae ebrẹd eha na gha rrọ mwẹ uhunmwu. 17Vbe ne ọ ke odukhunmwu vbọ, evbare ughughan ne a ranmwẹ ne Fero kegha rrọọ sokpan avbe ahianmwẹ kegha rriọe.” 18E Josẹf keghi wanniẹn wẹẹ, “Emwi ne a yae kha ọ re ọ na khin: okhuae eha nii, ikpẹdẹ eha nọ. 19Vbe irakhuẹ e Fero gha tie ruẹ, ọ ghi fian an uhunmwu fua! Ọ ghi si ikun ruẹn rrọ ye uhunmwu erhan, avbe ahianmwẹ ghi gha rri efun egbe ruẹ.”
20Vbe ikpẹdẹ ne ogieha ne ọ re ẹdẹ ayere ubiẹmwẹ Fero, ọ keghi le evbare ne avbe ọruemwi ẹnrẹn hia, ọ keghi tie ne ọsiẹnro ayọn rẹn kevbe ọkaolotu iran ni le ebrẹd ye odaro avbe ọruemwi ẹnrẹn. 21Ọ keghi rhie ukpo nọ siẹnro ayọn rẹn dọlegbe nẹẹn, 22sokpan ọ keghi si ọkaolotu e ni le ebrẹd rrọ. Ọ na kegha re emwi ne Josẹf wẹ a ya imina iran kha zẹẹ. 23Sokpan nọ siẹnro ayọn ma ghi mu ẹmwẹ Josẹf roro, ọ keghi mianmianẹn.
Currently Selected:
Gẹnẹsis 40: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996