Gẹnẹsis 38
38
E Juda kevbe Tama
1Ẹghẹ nii, e Juda keghi kpao sẹ avbe etiọnrẹn rae, ọ ke ya tota ke Hira ne ovbi ẹvbo ne a tie ẹre Adulam. 2E Juda keghi miẹn ọmọ okhuo ovbi Kenan ọkpa ne a tie erha ẹe Siua. Ọ keghi rhie ẹre rọnmwẹ. 3Ọ keghi hanmwa, ọ keghi biẹ ọmọ okpia ọkpa, rẹn keghi he ẹre Eri. 4Ọ kevbe dọlegbe hanmwa, ọ kevbe biẹ ọmọ okpia ọvbehe, ọ kevbe he ẹre Onan. 5Ọ kevbe dọlegbe biẹ ọmọ okpia ọvbehe ọ na he ẹre Siẹla. Akzih ọre Juda gha ye vbe ẹghẹ ne okhuo na na biẹ Siẹla.
6E Juda keghi rhie okhuo ne Eri ne ovbi ẹre nọdiọn, a kegha tie eni okhuo ni Tama. 7Emwi dan ne Eri ru keghi sọnnọ Nọyaẹnmwa, ọre Nọyaẹnmwa na gbe ẹe rua. 8Rhunmwuda ọnii, e Juda keghi tama ọtẹn Eri ighẹ Onan wẹẹ, “Ya gu amwẹ ne ọtuẹn wu sẹrae ruemwi. Ru e nọ khẹkuẹ vbọ, zẹ vbe ọtẹn ọdọ, ne ọtuẹn sẹtin gha mwẹ ivbi urho.” 9Sokpan Onan rẹnrẹn wẹ ẹ i re irẹn ọre ọ ra yan emọ nii; rhunmwuda ọnii, ẹghẹ hia ne ọ ya miẹn amwẹ ọtiọnrẹn, ọ ghi mu eku ẹre ku otọ, ne ọtiọnrẹn ghẹ miẹn ehe na gha mwẹ urho. 10Emwi ne ọ ru keghi sọnnọ Nọyaẹnmwa, E Nọyaẹnmwa na vbe gbe ẹe rua. 11Ẹre Juda ghi na khama Tama ne amwẹ ovbi ẹre wẹẹ, “Werriegbe gha rrie owa erha zẹ vbe okhuo ne ọ dẹgbẹ, e Siẹla ne ovbi mwẹ te wanrre.” Emwi ne ọ yae kha vberriọ ọrọre wẹ afianma fian ẹn wẹ a gha vbe gbe Siẹla rua zẹ vbene a gbele etiọnrẹn nikpia, ẹre Tama na werriegbe gha rrie owa erhae.
12Vbe ọ ma ghi kpẹe, amwẹ Juda keghi wu. Ugbẹn vbe Juda ghi khiẹ ọre fo nẹ, rẹn vbe ọsiọre ighẹ Hira ne ọmwa Adulam kegha rrie Timna vbe ehe ne a na gbe avbe ohuan ẹnrẹn eto.
13Emwa eso keghi tama Tama wẹẹ, “Erha ọdafọn rrie ọghe Timna ne ọ ya gbẹn ohuan rẹn eto.” 14Ẹre ọ na fi ukpọn ẹgbẹe ne ọ te yọ werriẹ, ọ keghi ye ukhiọnfọ gue aro, ọ na tota ye onurho Enaim ne ẹvbo ne a la gberra ye Timna. Rẹn rẹnrẹn wẹ Siẹla ne ovbi Juda ne okiekie wan nẹ ẹghẹ na, sokpan a ma ye rhie irẹn gie ẹe rhie rọnmwẹ.
15Ugbẹn vbe Juda ghi miẹn ọẹn, rẹn ke te gha ro ighẹ ebabotu nọ, rhunmwuda ne ọ na rhie ugbaleto gue aro. 16Rẹn keghi bu ẹre gha rrie ọkpẹn odẹ, ọ tama rẹn wẹẹ, “Larre, inu igho u miẹn ọmwa re yi?” (Ọ ma rẹn wẹ amwẹ ovbi ẹre nọ.) Rẹn ke nọ rẹn wẹẹ, “Vbu a ra rhie mẹ?”
17Rẹn keghi wanniẹn wẹẹ, “I gha mu ovbi ẹwe ke uwu oghẹn ẹwe mwẹ gue.” Okhuo nii keghi wanniẹn wẹẹ, “Ọ ma vberriọ a deghẹ u gha rhie emwi mẹ dayi u te mu nene ẹwe rre.”
18Rẹn keghi nọ rẹn wẹẹ, “De emwi ne I gha rhie nuẹn dayi yi?”
Okhuo nii wanniẹn wẹẹ, “Ẹgba iyama ruẹn kevbe okun ne a de ẹre yi, kevbe ọkpọ ne u rhie mwẹ.” Rẹn keghi viọ iran ne okhuo nii. Iran keghi miẹn egbe, okhuo nii na gha hanmwa. 19E Tama keghi guakpao, ọ na gha rrie. Ọ keghi ban ukpọn ne ọ mu gue aro hin, ọ keghi dọlegbe viọ ukpọn ẹgbẹe ye egbe.
20E Juda keghi gie ọsiọre ke Adulam gha khian ne ọ ya miẹn emwi ne okhuo nii dayi viọ rre, sokpan ọ ma miẹn nene okhuo. 21Ọ keghi nọ ikpia ni rre evba, “Ebabotu ne ọ rre ọkpẹn odẹ vbe Enaim vbo?” Iran wanniẹn tama rẹn wẹẹ, “Ebabotu ma he gha rre mwa ẹdẹ.” 22Rẹn keghi dọlegbe bu e Juda gha dee, ọ wẹẹ, “I ma miẹn okhuo nii, ikpia ni rre evba khare ighẹ ebabotu ma he di evba ya ẹdẹ.” 23E Juda wanniẹn wẹẹ, “Gie ẹe da avbe emwi na yi, agbọn gha ta ima giẹ. I te mu ovbi ẹwe na giẹe nẹ wẹ ọ re ọ ma miọẹn.”
24Ọ ghi rre uki eha, emwa eso keghi do khama e Juda wẹẹ, “Tama ne amwẹ ovbuẹ miẹn okpia, ọ wa hanmwa nian.” E Juda keghi kha wẹẹ, “Wa siẹe ladian ore ne uwa ya giẹn ọnrẹn uan ne ọ wu.”
25Ugbẹn vbe a ghi siẹe ladian, ọ ke gie ne a khama erha ọdọ ẹre wẹẹ: “Ọmwa ne ọ yan avbe emwi na ọ re ọ na mwẹ ẹko. Ghe ẹre nu u miẹn ehe na rẹn ọmwa ne ọ yan ẹgba iyama na kevbe okun ne a de ẹnrẹn yi, ke ọkpọ na.”
26E Juda keghi ye iran rre, ọ na wẹẹ, “Ẹmwata ọre ọ tae, mẹ ọre ọ ba emwi ku ru. Te ọ te kei ne I rhie ẹre ne Siẹla ne ovbi mwẹ ne ọ rọnmwẹ ọẹn.” Ọ ma ghi dọlegbe guẹe ru emwi ọvbehe.
27Ẹghẹ ghi sẹ ne ọ gha ya biẹ, a keghi miẹn wẹ ivin eva nọ. 28Ugbẹn vbe emwi ubiẹmwẹ ghi ruẹe, ọkpa vbe uwu iran keghi si obọkpa ladian, okhuo ne ọ mu ẹre emwi ubiẹmwẹ keghi dae yi, ọ na de oru ne ọ baa muẹn, ọ na kha wẹ, “Ọna ọ re ọdiọn.” 29Sokpan ọ keghi si obọ werriegbe, a na ghi ka biẹ ọtiọnrẹn. Ẹre okhuo ne ọ mu ẹnrẹn emwi ubiẹmwẹ na kha wẹẹ, “Erriọ u ghi ya ye uhunmwu zẹ odẹ ladian!” A na ghi gha tie ẹnrẹn Pẹrẹs. 30A na ghi do biẹ ọtiọnrẹn, kẹe kevbe oru ne ọ baa nii vbe obọ ẹre. A keghi he ẹre Zẹra.
Currently Selected:
Gẹnẹsis 38: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996