Gẹnẹsis 37
37
E Josẹf Vbe Etiọnrẹn
1E Jekọb keghi ye gha rre otọe Kenan eke ne erha ẹe vbe gha ye. 2Vbene okha ẹgbẹe Jekọb ye ọre ọna khin. E Josẹf, igbama ne ọ rre ukpo ehairrọvbugie keghi deba etiọnrẹn ivbi Bilha kevbe Zilpa ne egbakhian erha ẹe gha gbearoghe ohuan kevbe ẹwe. Ọ ghi do gha na iyẹn emwi dan ne etiọnrẹn ru ma erha ẹe.
3E Jekọb keghi ho ẹmwẹ e Josẹf sẹẹ ivbiẹre nikpia ni dekẹe, rhunmwuda egbe ọmaẹn ọre ọ ya biọe. Ọ keghi sẹ ẹwu ne gurọọ ne obọ ẹre vbe tan nẹẹn. 4Ugbẹn vbe etiọnrẹn ghi miẹn wẹ erha iran ho ẹmwẹ Josẹf sẹẹ vbene ọ ho ẹmwẹ iran, iran kegha muohu ọtẹn iran sẹrriọ wẹ iran i ghi guẹe ku hiehiere.
5Ẹghẹ ọkpa, e Josẹf keghi mina, ọ na tae ma etiọnrẹn. Iran keghi dọlegbe kakabọ gha mu ohu ẹre. 6Ọ Wẹẹ, “Wa danmwehọ imina ne I minaẹn. 7Ma hia kegha rre ugbo, ma na gha gbalọ ọka irhuarhua ikun ikun, ọghomwẹ keghi kpaegbe mudia kpasi, ikun ọghe uwa na tẹn lẹga ẹre, iran ya uhunmwu rhanmwẹ otọ ne ọghomwẹ.” 8Etiọnrẹn keghi nọrẹn wẹẹ, “Te uwẹ ro ighẹ u gha rri ọba yan ima ra?” Iran keghi dọlegbe kakabọ gha mu ohu ẹre rhunmwuda ẹmwẹ ne ọ tae vbe kpa iran kevbe imina rẹn. 9E Josẹf kevbe mina ọvbehe, ọ na vbe tae ma etiọnrẹn wẹẹ, “I vbe mina imina ọvbehe, I keghi miẹn owẹn, uki kevbe orhọnmwẹ owọrọ vbe iran ya uhunmwu rhanmwẹ otọ mẹ.” 10Ọ keghi vbe ta imina rẹn ma erha ẹe kevbe etiọnrẹn nikpia, erha ẹe na gha guẹe gui wẹ vbe ọ ni khun imina ne u minaẹn? Te uwẹ ro ighẹ iyuẹ kevbe imẹ kevbe etuẹn nikpia wẹ ma gha rre do gha ya uhunmwu rhanmwẹ otọ ne uwẹ? 11Etẹn Josẹf nikpia kegha guẹe mu ohu sokpan erha ẹe kegha rria ẹmwẹ nii hia vbe ekhọe.
A Khiẹn Josẹf Fi Igipt
12Etẹn e Josẹf nikpia kegha rrie Siẹkẹm ne iran ya gha gbearoghe ohuan erha iran. 13E Jekọb keghi tama e Josẹf wẹẹ, “Etuẹn gha gbearoghe avbe oghẹn ohuan vbe Siẹkẹm. Mu egbe, I ra do giọ bu iran.” E Josẹf keghi wanniẹn wẹẹ, “I mu egbe.” 14Erha ẹe keghi tama rẹn wẹẹ, “Gha khian, ya ghe ẹre a deghẹ ọ ye avbe etuẹn kevbe avbe ohuan ẹse; u ghi dọlegbe gha de do tama mwẹ.” Ẹre erha ẹe na giẹe ke iya Hibrọn kpao. Ugbẹn vbe Josẹf ghi sẹ Siẹkẹm. 15Okpia ọkpa keghi miẹn ọẹn vbe ọ lẹyo lẹrre vbe uwu oha, ọ keghi nọ rẹn wẹẹ, “Vbu a gualọ?”
16Rẹn keghi wanniẹn wẹẹ, “Etẹn mwẹ nikpia ọre I gualọ, lahọ ta ehe ne iran na su ohuan ma mwẹ.” 17Okpia nii keghi kha wẹẹ, “Iran kpao nẹ. I họn ẹn vbe iran wẹ iran rrie Dotan.” Ọre Josẹf na lele etiọnrẹn, ọ keghi miẹn iran vbe Dotan.
18Iran keghi bẹghe ẹre vbe urria, vbe ọ ma he sẹ ehe ne iran ye, iran na khuan khẹ ọre ne iran gbẹe rua. 19Iran gu egbe tae wẹẹ, “Ghe vbe ọ dee ighẹ ọmini imina nii. 20Wa larre ne I ma gbe ẹe rua ne a mu ikun ẹnrẹn fi ọkpa vbe uwu avbe uhae na, ma sẹtin kha wẹ aranmwẹ akọn ọre ọ gbe ẹe re. Ma ghi ghe vbe ne imina rẹn ghẹ ghi ya sẹ hẹ.”
21Riubẹn ghi họn, ọ kegha hia ne ọ miẹn e Josẹf fan vbe obọ iran, ọ keghi kha wẹẹ, “Wa ghẹ gia miẹn ẹnrẹn uhunmwu. 22Wa ghẹ gbe ẹe rua, wa hẹko muẹn fi uwu uhae na vbe uwu oha, sokpan wa ghẹ kuan ẹnrẹn egbe hiehiere.” Ọ ke tae vberriọ vbene ọ na te zọe vbe iro wẹ ne irẹn miẹn rẹn fan ne ọ rhie ẹre werriegbe bu erha ẹe. 23Ugbẹn vbe Josẹf ghi sẹ ehe ne avbe etiọnrẹn ye, iran keghi ban ẹnrẹn ẹwu ne gurọọ ne ọ mwẹ abọ ne ọ taẹn, 24iran keghi muẹn fi uhae ne amẹ i ye.
25Ugbẹn vbe iran ghi rri evbare, iran keghi miẹn vbe ọwarọkpa emwa Ismẹl ni ke Giliad dee, iran rrie Igipt. Iran ye ekẹtẹkẹtẹ kun avbe ọmọ erhan ne a re eso kevbe ne ọ winhin, iran viọ rrie Igipt. 26E Judah keghi tama etiọnrẹn wẹẹ, “De ere ne ima ra re vbọ a deghẹ ma gbe ọtẹn ima an vbe ne a ma na rẹn? 27Wa gie ima khiẹn ọẹn ne emwa Ismẹl na. A deghẹ ma ruẹe vberriọ ma i ra kuan ẹnrẹn egbe hiehiere, vbene ọ rhirhi gha ye hẹ, ọtẹn ima nọ, egbe kevbe esagiẹn ọkpa.” Etiọnrẹn keghi kue yọ. 28Avbe obaghẹn ne ivbi e Midian ghi se evba, etẹn e Josẹf keghi si ẹe ladian vbe uhae, iran na khiẹn ọre agiẹghẹ e siliva ugie ne ivbi Ismẹl, iran na muẹn gha rrie Igipt. 29Ugbẹn vbe Riubẹn ghi dọlegbe sẹ uhae nii, vbe ọ ghi miẹn wẹ Josẹf i ghi rre evba, ọ keghi sọ ẹwu ye egbe ẹre ẹkun zẹ vbe orhiema ọghe akhiẹ. 30Ọ keghi dọlegbe bu etiọnrẹn gha khian, ọ wẹẹ, “Ọmọ okpia nii i ghi rre evba, vbe I a ra ru hẹẹ?”
31Iran keghi gbe ẹwe, iran na fi ẹwu ne gurọọ ọ ghe Jesẹf ye uwu esagiẹn ọnrẹn. 32Iran keghi rhie ẹwu ni gie erha iran. Iran wẹẹ, “Ghe emwi ọkpa ne ima miẹn, ghe ẹre ghe a deghẹ ọghe ovbuẹ nokpia nọ?” 33Ugbẹn vbe irẹn ghi miẹn ọẹn nẹ, ọ wẹẹ, “Ẹn, ẹre ọna khin, aranmwẹ akọn gbe ẹe rua nẹ. Iran yanghan Josẹf kua nẹ!” 34E Jekọb keghi sọ ẹwu ye egbe ẹre ẹkun, ọ na mu ukpọn nekhui rhuan zẹ vbe orhiema akhiẹ, ọ keghi ya ẹdẹ nibun khiẹ ovbi ẹre. 35Ivbi ẹre nikpia kevbe nikhuo hia keghi rre do gha fu ẹre ẹko rre, sokpan ọ he ne a fu irẹn ẹko rre, ọ wẹẹ, “Te I ra khiẹ ovbi mwẹ I te ya wu.” Rhunmwuda ọnii, ọ na gha khiẹ ovbi ẹre ighẹ Josẹf. 36Vbe uwu ẹghẹ na, emwa Midian keghi khiẹn Josẹf ne Pọtifa vbe Igipt, ọkpa vbe uwu ọruemwi ọba e Fero nọ, rẹn ọrọre ọkaolotu iran ni khẹ odẹ vbe ẹguae.
Currently Selected:
Gẹnẹsis 37: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996