Ẹksọdọs 34
34
Avbe Uhanhan Okuta Ne Ogieva
(Diuteronomi 10:1-5)
1E Nọyaẹnmwa keghi tama e Mosis wẹẹ, “Ka Uhanhan okuta eva ni ye vbe nokaro nii, I gha vbe gbẹnnẹ avbe ẹmwẹ ni rre avbe uhanhan ne okaro ne u guọghọ ua yọ. 2Owiẹ ne akhuẹ, mu egbe ne u hin oke Sainai, ne u do vba mwẹ vbe odukhunmwu ẹnrẹn. 3Ghẹ gie ọmwarhọkpa lele uẹ gha dee, ghẹ gie a miẹn ọmwarhọkpa vbe ehe rhọkpa vbe oke nii, a ghẹ gie ohuan ra ẹmila vbe gha rri irunmwu vbe ọkpẹn oke nii.”
4Ẹre Mosis na do kae uhanhan okuta eva zẹ vbe nokaro nii, ọ ghi sẹ owiẹ ẹdẹ ne ọ lele ẹe, ọ keghi viọ iran hin uhunmwu oke Sainai zẹ vbene Nọyaẹnmwa tama rẹn, ọ keghi viọ uhanhan okuta eva nii mwẹ obọ. 5E Nọyaẹnmwa keghi nana okuku tuorre, ọ keghi mudia vbe evba, ọ keghi sunu ye eni irẹn Ne ọ huanrẹn, e Nọyaẹnmwa.
6E Nọyaẹnmwa kegha gberra vbe odaro ẹre, ọ keghi datie wẹẹ, “Mẹ ne Nọyaẹnmwa, ọrọre Osanobua ne ọ vuọn ne agiẹngiẹn ne a i sẹtin rherhe ya ohu mu, ne ọ mwẹ aho ẹmwẹ ne ẹ i beghe kevbe amuẹntinyan. 7Mẹ vbe mu eyan mwẹ sẹ igba arria isẹn vbe inu ihe ne ọ khin. ne ọ ya iba, ọkhọ, kevbe emwi dan bọ ọmwa, sevba ne ẹ i mianmian ne ọ ya rria ikhi orukhọ ne avbe erha iran ru vbe egbe ivbi iran ya sẹ orre ne ogienẹ.” 8E Mosis keghi zẹgiẹgiẹ mu egbe rriotọ, ọ na ga Osanobua.
9Ọ keghi kha wẹẹ, “Adeghẹ ẹko ruẹ gele rhiẹnrhiẹn ghe mwa, I wẹ ne u lele ima gha khian, E Nọyaẹnmwa, emwa na yinehọ, sokpan ya emwi dan mwa bọ mwa, kevbe orukhọ ima ne u rhan obọ miẹn ima zẹ vbe emwa obọ ruẹ.”
Avbe Dọlegbe So Igiẹ Ye Ile Nii
(Ẹksọdọs 23:14-19; Diuteronomi 7:1-5; 16:1-17)
10E Nọyaẹnmwa keghi kha wẹẹ, “I gu uwa ta ile vbe sirra emwa uwa hia fẹẹrẹ. I gha winna iwinna nekhua egbe ne a ma he ka winna yi vbe agbọn na hia vbe ẹvboikẹvbo. Emwa ni guẹ rrọọ gha vbe miẹn emwi ne imẹ ne Nọyaẹnmwa gha sẹtin ru rhunmwuda emwi nọkhua ọre I ra ru nuẹn. 11U ghi gha lele uhi ne I gha rhie nuẹn ẹrẹna. I gha khulo iran hin odaro ruẹ rre ighẹ ivbi Amọri, e Kenan, e Hiti, e Pẹriz, e Hivi kevbe Jebus, vbene u ya nana sikẹ odaro. 12Gie a miẹn wẹ u ma gu emwa ẹvbo ni rre ehe ne u rrie ru emwamwa kugbe rhunmwuda ọna sẹtin gbe uẹ uhunmwu. 13Ye ihe ọnii, u ghi rẹnkhẹn aka iran an, u ghi guọghọ okuta iruemwi iran an, u ghi tọnnọ erhan iruemwi ẹbọ ne okhuo iran ighẹ Asiẹrra kua.
14“Ghẹ ga osa ọvbehe rhọkpa, rhunmwuda mẹ ne Nọyaẹnmwa a i gun mwẹ ta ekpẹn. 15Ghẹ gu emwa ẹvbo nii ru emwamwa emwi, iran gha ru ẹbọ iran, iran na zọ ese ghe iran, iran sẹtin rẹrẹ uẹ ya uwẹ rri evbare ne iran ya zọ ese ghe ẹbọ iran. 16Ivbi uwa sẹtin viọ ivbi iran nikhuo rọnmwẹ, iran gha ya iran fi iyeke gbe mwẹ, iran gha gho ẹbọ iran.
17“Wa ghẹ ya ematọn ne a ranran ẹn ma ẹbọ ne egbe uwa.
18“Wa ghi gha ru emwiukpo ebrẹd ne ọ ma hue, zẹ vbene I tama uwa, wa ghi ya ikpẹdẹ ihinrọn rri ebrẹd ne ọ ma hue vbe uki Abib, rhunmwuda, uki nii ọre uwa na kpa vbe Igipt. 19Emọ ọdiọn ọwọe, ọre ọghe ọmwa nọ ra aranmwẹ irri, mẹ ọ yan rẹn, ọwọe hia, emọ okaro ọghe ẹmila ra ohuan ruẹn. 20Sokpan wa ghi dẹlẹ emọ ọdiọn ọghe ekẹtẹkẹtẹ werriegbe vbe ne uwa gha na gha munọ ohuan ya rọ iran. A deghẹ wa ma dẹ ọe werriegbe, wa ghi bun ẹnrẹn ẹyaẹn, wa ghi gha dẹlẹ dọmwadẹ ọmọdiọn vbe ikpia werriegbe.
“Ọmwarhọkpa ghẹ fiabọ emwi izọhẹ gha die odaro mwẹ.
21“Ikpẹdẹ ehan wa gha ya gha winna sokpan wa ghẹ winna vbe ikpẹdẹ ne ogihinrọn, ọre ẹghẹ egua nọ ra ẹghẹ akọrhọre.
22“Wa ghi gha ru emwiukpo, emwiokọ okaro ọghe emwiorhọ ọka, wa ghi gha ru emwiukpo ọghe emwiorhọ ọmerhan vbe ufomwẹ ne uwa ya rhọ emwi la owa vbe ukpo. 23Ikpia nii rre uwu uwa hia ghi gha rri ehe ne I ye igba eha vbe ukpo, mẹ ne Nọyaẹnmwa, Osanobua ọghe Izrẹl. 24I gha ghi khulo avbe okpẹvbo hin odaro rua rre nẹ, I na vbe rhie te ehe ne otọe rua la ẹe, a i miẹn ọmwa ne ọ gha ho ne ọ ya khọn ẹvbo uwa vbe uwu igba eha ne uwa do gha miẹn mwẹ aro nii, mẹ ne Nọyaẹnmwa ne Osanobua ruẹ.
25“Wa ghẹ ya ebrẹd na ya eyist ru zọ ọhẹ mẹ vbe uwa gha ye aranmwẹ zẹ ese mẹ. A ghẹ rhie hin rre ne ẹdẹ gbe vbe uwa gha gbe emwi ya ru emwiukpo Alagberra.
26“Wa ghi gha viọ eni maa sẹ vbe avbe emwiokọ ne uwa ka gha rhọ vbe ugbo rua rriowa Nọyaẹnmwa.
“Wa ghẹ le ovbiohuan vbe uwu ewẹn iye ẹe.” 27E Nọyaẹnmwa keghi tama e Mosis wẹẹ, “Gbẹnnẹ avbe ẹmwẹ na, rhunmwuda te imẹ ye avbe ẹmwẹ na gu uwẹ ta ile kevbe ivbi Izrẹl.” 28E Mosis keghi gu e Nọyaẹnmwa gha rre evba vbe asọn iyeva kevbe avan iyeva vbe ne ọ ma na re ọ ma da. Ọ keghi gbẹnnẹ avbe ẹmwẹ ile nii ye avbe uhanhan nii, ọnii nọ wẹ uhi igbe.
E Mosis Tuorre Vbe Uhunmwu Oke Sainai
29Ugbẹn vbe Mosis ghi tuorre vbe uhunmwu oke Sainai ke ẹe kevbe vbene ọ na dada uhi igbigbe mwẹ, ọ ma rẹn wẹ rhunmwuda ne irẹn na gha gu e Nọyaẹnmwa guan ighẹ te ugbaro irẹn ghi fi wainwain. 30Errọn kevbe emwa nii hia keghi ghe Mosis, iran keghi miẹn wẹ ugbaro ẹre fi wainwain, ohan ma gie iran sikẹ ọre. 31Sokpan, e Mosis keghi tie iran, ẹre Errọn kevbe avbe olotu emwa nii na werriegbe bu ẹre, e Mosis keghi gu iran guan. 32Iyeke ọnii, ivbi Izrẹl hia keghi sikẹ ọre. E Mosis keghi viọ uhi ne Nọyaẹnmwa gbe ma rẹn hia vbe uhunmwu oke Sainai ne iran. 33Ugbẹn vbe Mosis ghi gu iran guan nẹ, ọ keghi mu emwi gue aro ẹre. 34Ẹghẹ ne Mosis a rhirhi ya la uwu Owa Ukpọn vbe odaro e Nọyaẹnmwa, ọ ghi rhie emwi ne ọ ya gue aro hin rre, ọ te do ladian. Ọ gha ghi ladian, ọ ghi tama ivbi Izrẹl emwi ne a tama rẹn ne ọ ta. 35Iran ghi miẹn wẹ aro ẹre fi wainwain, ọ ghi vbe dọlegbe mu emwi gue aro ẹre ọ te sẹ ẹghẹ ne ọ gha ghi vbe ya gha khian ne ọ ya gu e Nọyaẹnmwa guan.
Currently Selected:
Ẹksọdọs 34: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
