Ẹksọdọs 31
31
Emwa Owinna Owa Ukpọn Ne A Ya Rẹn We E Nọyaẹnmwa Rre Evba
(Ẹksọdọs 35:30—36:1)
1E Nọyaẹnmwa tama e Mosis wẹẹ, 2“I hannọ Bezalẹl ne ovbi Uri, kevbe eyẹ Họ vbe ẹwae Juda. 3I ya orhiọn mwẹ vuọn rẹn nẹ sẹrriọ wẹ te ọ ghi mwẹ ifuẹro, ẹwaẹn kevbe ẹtin ne a ya ru emwi ona hia. 4Ne ọ guara gha mwamwa ona ifuẹro, ne ọ vbe gha ye igoru ru ẹe, esiliva kevbe oze. 5Ne ọ guara gha giagia ikpẹrọnmwọ ọmwa, ne ọ guara gha gbẹn erhan kevbe emwi ifuẹro ọvbehe hia. 6I vbe zẹ Oholiab ne ovbi Ahisamak ne ẹwae ọghe Dan ne ọ yaba re gha winna. I vbe ya ẹtin nọkhua ne avbe ọmwa ifuẹro nekpa hia fẹẹrẹ ne iran miẹn ehe na ru emwi hia ne I yi iyi ẹre ne iran ru: 7ibọkpọ ọghe odaro mwẹ, Ẹkpẹti Ile, ugue ne a ya gue ẹre kevbe emwi ne a ya te Owa Ukpọn nii hia. 8Eteburu kevbe emwi ne a viọ ke ẹe, erhan ọmukpa ọghe igoru ne a ma gua, kevbe emwi ne a viọ lele ẹe, aka ne a na giẹn eturari. 9Aka ne a na giẹn izọhẹ ne a ye erhẹn giẹn kevbe emwi ni lele ẹe khian, uwawa kevbe emwi ne a muẹn yan. 10Avbe ukpọn aghanghan nihuanrẹn nii ne Errọn ne ohẹn kevbe ivbi ẹre gha lo vbe ugamwẹ iran.” 11Ofigbọn ne a nọnọ ye emwa uhunmwu kevbe eturari ne ọ winhin ọghe esi nii ne a viọ ye ehe ne ọ huanrẹn. Iran gha ru avbe emwi na hia, vbene 1 tama ruẹn zẹe ọre iran ru ẹe.
Ẹdẹ Izola, Ẹdẹ Ne A Ya Ketin
12E Nọyaẹnmwa keghi tama e Mosis wẹẹ, 13“Tama ivbe Izrẹl, ‘Wa ghi gha zama Ẹdẹ Ikẹtin mwẹ rhunmwuda, ama nọ vbe ẹkpo imẹ vbe uwa kevbe ivbi uniẹn uwa ne a ya rẹn wẹ mẹ ne Nọyaẹnmwa ya uwa ru emwa obọ mwẹ nẹ. 14Rhunmwuda ọnii, te uwa gha zẹ Ẹdẹ Ikẹtin kọ rhunmwuda, a ya ẹe khian kpataki ne uwa nẹ. Ọmwaikọmwa ne ọ ma zọe kọ ye ne ọ huanrẹn, a ghi gha gbe ẹe rua, kevbe ọmwaikọmwa ne ọ winna iwinna rhọkpa vbe Ẹdẹ Ikẹtin nii. 15Ikpẹdẹ ehan ọre uwa gha ya gha winna iwinna uwa, sokpan ẹdẹ ne ogihinrọn, ẹdẹ ọghe ikẹtin ọre nọ, ne ọ huanrẹn nọ ne Nọyaẹnmwa. Omwa ne ọ rhirhi winna vbe ẹdẹ rriọ a ghi gha gbe ẹe rua. 16Te ivbi Izrẹl gha zẹ Ẹdẹ Ikẹtin kọ, zẹ vbe ama Ile ne a ta ẹe. 17Ama etẹbitẹ nọ ne imẹ vbe Izrẹl rhunmwuda, mẹ ne Nọyaẹnmwa, ẹdẹ ehan ọre I ya yi ẹrinmwi kevbe agbọn, vbe ikpẹdẹ ne ogihinrọn, I keghi da obọ iwinna yi, I na hẹwẹ.’ ”
18Ugbẹn vbe Osanobua ghi gu e Mosis guan fo nẹ vbe uhunmwu oke Sainai, ọ keghi viọ uhanhan ayere eveva nii nẹẹn, uhanhan okuta ne ikpinhianbọ Osanobua gbẹnnẹ uhi yi.
Currently Selected:
Ẹksọdọs 31: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
