Ẹksọdọs 28
28
Ẹwu Avbe Ohẹn
(Ẹksọdọs 39:1-7)
1“Tama iran ne iran viọ ọtuẹn ighẹ Errọn kevbe avbe ivbi ẹre e Nadab, Abihu, Eliaza kevbe Itama ke uwu ẹbu emwa Izrẹl ladian gha dee ne iran do gha ga mwẹ zẹ vbe avbe ohẹn. 2U ghi se ẹwu ne ọ huanrẹn ne Errọn ne ọtuẹn ne ọ gha re ọghe ọghọ kevbe ose. 3Tama emwa ifuẹro hia ni guẹ ona, iran hia ne I ya ẹe wẹ, ne iran sẹ ẹwu Errọn ne a miẹn ehe na ya ẹe fi ohan ne ọ gha ga mwẹ zẹ vbe ohẹn. 4Ẹwu ne iran gha sele ọre ena khin. Ne a mu rhu ẹwẹe, adaghọ, agbada, ẹwu ne a do, ukugba uhunmwu kevbe ọza, iran ghi se ẹwu ne ọ huanrẹn ne Errọn ne ọtuẹn ke avbe ivbi ẹre nikpia ne iran sẹtin gha ga mwẹ zẹ vbe ohẹn. 5Emwi ne avbe owinna nii gha lo ọrọre eto aranmwẹ, igoru, ne raghoragho, ne ọ vboro rha-an kevbe ne ọ baa kevbe eto ovbiohuẹ ne mose ne a do.
6“A ghi ya oru ne raghoragho, ne ọ vboro rhan-an, ne ọ baa, igoru kevbe eto ovbiohuẹ ne vbukhẹẹ, se adaghọ, a ghi do ona lele ẹe. 7A ghi vbe rhie okun izabọ eva ne a gha ya gha gba ẹe yọ ẹre asefẹn eveva. 8A ghi vbe rhie ugbẹkun ne a vbe ya egbe oru nii do yẹnghẹẹn ye adaghọ nii, ne iran wa gba gha re ọkpa. 9U ghi viọ ikpẹrọnmwọ usie eva, u ghi gbẹnnẹ eni ivbi e Jekọb iweva vbene a ya biẹlẹ iran lele egbe yọ. 10U ghi gbẹnnẹ eni ehan ye ne okaro kevbe ehan ye enọkpa zẹ vbene a ya biẹlẹ iran lele egbe. 11U ghi ye ifuẹro ọsivie kevbe owinna, ya gbẹnnẹ eni ivbi e Jekọb ne iweva ye okuta ẹrọnmwọ eveva nii. U ghi mama okuta ẹrọnmwọ nii mu uhanhan igoru. 12U ghi sikan iran mu abọ ne ọ la izabọ ọghe adaghọ nii ne a ya gha ye eni ivbi Izrẹl rre. Erriọ ọre Errọn gha na gha dada eni iran khian vbe izabọ ẹre, erriọ ọre imẹ ne Nọyaẹnmwa gha na gha ye iran rre ẹghẹ hia. 13U ghi vbe ru uhanhan igoru eva, 14kevbe eghan eva ọghe igoru ne ama gua ne a baa re. U ghi dele iran mu avbe uhanhan nii.
Uhanhan Ukpọn Ẹwẹe
(Ẹksọdọs 39:8-21)
15“U ghi ru uhanhan ukpọn ẹwẹe ne ogie ohẹn ne ọ yagha rẹn emwi ne Osanobua ho a ghi duẹe mose mose, zẹ vbe iwinna adaghọ nii, u ghi lo eto ohuan, igoru, ne raghoragho, ne ọ vboro rhan-an kevbe ne ọ baa kevbe eto ovbiohuẹ ne mose ne a do. 16A ghi gie ẹe gha re umwọmwẹ vbe igienenẹ, a ghi bun ẹnrẹn eva yan egbe, akhuẹn obọ ihinrin vbe uvbẹmwẹ, akhuẹn obọ ihinrin vbe utanmwẹ. 17U ghi sele uviẹn enẹ ọghe ikpẹrọnmwọ lele ẹe, uviẹn nokaro ghi gha re rubi, topaz kevbe ganẹt. 18Ne ogieva ghi gha re emẹrad, safaia kevbe daiamọn. 19Ne ogieha ghi gha re tọkuọsi, ageti kevbe ametist. 20Uviẹn ne ogienẹ ghi gha re bẹril, kanelian, kevbe Jaspa. A ghi sikan ena ye uhanhan igoru. 21Eni ivbi e Jekọb iweva ghi gha rre ọkpọkpa vbe avbe okuta na. Ọna ghi do mudia ye ihe ẹwae ivbi Izrẹl. 22U ghi ru irri ne a baare ọghe igoru ne ama gua ye uhanhan ukpọn ẹwẹe nii. 23U ghi vbe ru ẹgba eva ne u sele ẹe ginna igẹngẹn odukhunmwu ọghe uhanhan ẹwẹe nii, 24U ghi rrilo irri igoru eva nii ginna aban eveva nii. 25U ghi dee ukpẹ irri nii eva ginna obọ eveva, u ghi rhie ẹre la odaro vberriọ ya rri ẹe ginna ọza izabọ ne ọ rre adaghọ. 26U ghi ru oroka igoru eva ne u rrilo ẹe ginna ototọ uhanhan ukpọn ẹwẹe, vbe ehe ne ọ diake ẹwu nọ ke odẹ ukhunmwu sẹ. 27Vbe dọlegbe ru oroka eva ne u dele ẹe ginna ototọ vbe odaro ọza izabọ eva ọghe adaghọ vbe ọkpẹn ehe ne a na dọlọ ẹe vbe odukhunmwu ọza eto ovbiohuẹ ne a do mose mose nii. 28Iran ghi ya okun ne raghoragho dele oroka ọghe uhanhan ukpọn ẹwẹe ginna oroka ọghe adaghọ ne uhanhan ukpọn ẹwẹe nii miẹn ehe na ke odukhunmwu ne ugbẹkun ne ọ ghẹ ya kuọghọ kua.
29“Errọn gha la uwu ehe ne ọ Huanrẹn nii, ọ ghi gbẹnnẹ eni ivbi Izrẹl ye uhanhan ukpọn ẹwẹe ne imẹ ne Nọyaẹnmwa miẹn ehe na gha ye iran ne emwa mwẹ rre vbe ẹghẹ hia. 30U ghi viọ avbe uta eveva nii ne a tie ẹre Urim kevbe Tumin ye uhanhan ukpọn ẹwẹe ne a miẹn wẹ Errọn gha rrie ehe nọhuanrẹn ne imẹ ye iran ghi gha rre ọre ẹwẹe. Ọ gha yo ehe ne Nọyaẹnmwa ye, ọ ghi viọ emwi ne a ya ta uhanhan ukpọn ẹwẹe mwẹ, ne ọ miẹn ehe na rẹn vbene imẹ mu ẹmwẹ ivbi Izrẹl yi.
Avbe Ẹwu Nekpa Ne Ohẹn Yọ
(Ẹksọdọs 39:22-31)
31“U ghi ya eto ohuan ne raghoragho ọkpa sẹ adaghọ ne a gha mu yan ẹwu ọkotọ nii. 32U ghi fian uvun ne a gha mu uhunmwu la ye adesẹneva ẹre, a ghi do uvun na lẹga zẹ vbe urhu ẹwu ne a ya ohian se ne ọ ghẹ miẹn ehe na sọọ. 33-34U ghi dele emwi ne ọ yevbe otiẹn ne raghoragho, ne ọ vboro rhan-an, ke ne ọ baa ne a ye eto ohuan ru lele adaghọ nii vbe ototọ ẹre lẹga fẹẹrẹ, a ghi sele ẹroro igoru lele ẹkpo ẹre. A ghi do miẹn wẹ emwi ne ọ yevbe otiẹn kevbe ẹroro igoru lẹga ehọ ẹre hia. 35Errọn ghi gha muẹn yọ vbe ọ gha winna iwinna rẹn zẹ vbe ohẹn, vbe ọ gha la uwu ehe Ne ọ huanrẹn nii, vbe odaro e Nọyaẹnmwa ra vbe ọ gha kpa vbe evba rre a ghi họn urhu ẹroro nii, ẹghẹ nii a i ghi gbe ẹe rua.
36“U ghi ya igoru ne a ma gua ru emwi itegbe ọkpa, wa ghi gbẹn yọ wẹẹ, ‘Te a ya fi ohan ne Nọyaẹnmwa.’ 37U ghi ya ọza ne raghoragho de ẹre ginna ukugba uhunmwu. 38Errọn ghi muẹn ye uharo ẹre, odẹ vbenian, ọ ghi rhie abakuru ne ọ rhirhi gha rre avbe emwikemwi ne ivbi Izrẹl ya fi ohan ne imẹ. Te Errọn ra wa gha yọe vbe ẹghẹ hia ne emwi ihaoko nii miẹn ehe na gha yẹ Nọyaẹnmwa. A gha rhe miẹn wẹ iran ma ru emwi ẹse vbe iran ha oko gunmwe. 39Ọ ghi do ẹwu ne a ya eto ovbiohuẹ ne yẹnghẹẹn ru, u ghi ru ukugba uhunmwu kevbe ọkpọ ne a do emwi yi ya te ẹre egbe. 40U ghi vbe do ẹwu ne ivbi Errọn nikpia ke ẹkpo kevbe ẹrhu ne ọ gha rhie uyi kevbe ose ye ọmwa egbe. 41U ghi yọ Errọn ne ọtuẹn ke ivbi ẹre nikpia ẹwu na, iyeke ọnii, u ghi nọnọ ori oliv ye iran uhunmwu, ma iran ohẹn, ne u ya iran fiohan, ne iran sẹtin gha ga mwẹ zẹ vbe ohẹn. 42Sele utalawẹ ne ọ gha gue ẹkun ya sẹ ekuawẹ ne iran, ne iran ghẹ ya gha bannọ uan. 43Ẹghẹikẹghẹ ne Errọn kevbe avbe ivbi ẹre a rhirhi ya gha rrie Owa Ukpọn Ne ọ huanrẹn mwẹ, iran ghi rhie ẹre gba, ne iran ghẹ ya bannọ uan ne a ghẹ gbele iran an. Iyi etẹbitẹ ọre ọna khin ne Errọn kevbe ivbi uniẹn ọnrẹn ẹdẹdẹmwẹdẹ.
Currently Selected:
Ẹksọdọs 28: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
