Ẹksọdọs 22
22
Uhi Ọzẹba
1“Omwa gha do ẹmila ra ohuan mu, ọ na gbe ẹe ra ọ na khiẹn ọẹn, ọ ghi ya ẹmila isẹn ha osa ẹmila ọkpa, ọ ghi ya ohuan enẹ ha osa ohuan ọkpa. 2-4Te ọ gha ha osa ẹre. A deghẹ ẹ i mwẹ emwi rhọkpa, a ghi mu irẹn khiẹn ne a ya ha osa emwi ne ọ do viọ. Emwi ne ọ do mu nii, a gha miẹn ọẹn vbe obọ ẹre vbe ọ ma he wu, ọre ẹmila nọ ra ekẹtẹkẹtẹ ra ohuan, ọ ghi ha ukhukhu eva.
“A deghẹ obọ vba oyi vbe ọ wa gbe ẹkhu la owa vbe asọn a na gbe ẹe rua, ọmwa ne ọ gbe ẹe rua nii ma de izigha. Sokpan a deghẹ avan nọ, te ọ de izigha.
5“Omwa gha gie emwirri ẹre ya gha rri irunmwu khian vbe ehe hia ra ugbo emwiokọ, deghẹ iran ghi mu va iran na ya rri oha ẹrrẹe, ọ ghi ya oha ẹre ne ọ maa sẹ ra ugbo emwiokọ ẹre ne ọ maa sẹ ha osa. 6Ọmwa gha hie erhẹn, ọ na la uwu irunmwu, ọ na giẹn ọka ne ọ sẹ dee ra ọka na ma he fian ra ugbo emwiokọ, ọmwa ne ọ hie erhẹn nii ghi ha osa emwi ne ọ rhiaraa.
7“Omwa gha rhie igho ra emwi ighobioye ọvbehe ne ọmwa dayi nẹẹn, oyi na do ẹre rhie vbe owa ọmwa nii, ọ ghi ha osa ukhukhu eva a deghẹ a mu oyi nii. 8Sokpan, a deghẹ a ma mu oyi nii, a ghi mu ọmwa ne ọ yan owa nii gha die owa ugamwẹ ne ọ do vẹn ihẹn wẹ ẹ i re irẹn ọre ọ viọ emwi ọmwa nọkpa nii.
9“A gha sinmwi emwikemwi ọre ẹmila nọ ra ekẹtẹkẹtẹ ra ohuan ra ukpọn ra emwi ne ọ rhirhi a wi, ne ọmwa ọvbehe khare wẹ rẹn ọre ọ yan rẹn, a ghi viọ ẹmwẹ iran e eva gha die owa ugamwẹ ọmwa ne Osanobua ghi bu abe gbe ghi hae ukhukhu eva ne ọmwa nọkpa.
10“Omwa gha mu ẹmila, ekẹtẹkẹtẹ. ohuan ra emwirri ne ọrhirhi a gha khin ne ọmwa mwẹ ighẹ ọ na wu, ra te a kuan rẹn ra te iran khu ogbugbu muẹn gha rrie, a deghẹ osẹe i rrọọ, 11ihẹn vbe owa ugamwẹ ọre a ghi ya rẹn a deghẹ te ọ ma do emwi ọmwa nọkpa nii rhie. a deghẹ ẹki oyi irrọọ, e nọyan rẹn ghi sẹ ẹmwẹ emwi ne ọ wiri rae vberriọ vbe ne ọmwa nii i na vbe ha ẹre osa. 12Sokpan, a deghẹ te iran do aranmwẹ nii mu te ọmwa nii gha hae osa ne nọyan rẹn. 13Adeghẹ aranmwẹ akọn ọre ọ gbe ẹe re, ọ ghi viọ iku ẹre gha dee do ya zẹ osẹ yọ; ọ ma kei ne ọ ha osa emwi ne aranmwẹ akọn gbe uẹ ua.
14“Omwa gha mu emwirri ọmwa ọvbehe mọmọ, ọ na wu ra te emwi kuan rẹn vbene ọmwa nii nọyan rẹn i na rre evba, te ọmwa nii gha ha osa emwirri nii. 15Sokpan deghẹ enarẹn ọre ọ ye gue, ọmwa nii i ra ha osa ẹre, a deghẹ emwirri ne a ya gbe agbeghae nọ igho agbeghae nii ghi gha re ne a ya ha osa yọ.
Uhi Uhuanmwẹ Kevbe Ugamwẹ
16“Ọmwa gha rẹrẹ ọvbokhan uvbi ne a ma ya ne ọdọ, ọ na guẹe ru emwi, ọ ghi ha igho ne a mu ye okhuo nẹẹn ọ ghi rhie ẹre rọnmwẹ. 17Sokpan erhae gha wẹ ne ọ ghẹ rọnmwẹ ọẹn, ọ ghi hae igho ne a ya rhie ọvbokhan uvbi nẹẹn.
18“Okhuo ne ọ re oso, wa ghi gbe ẹe rua.
19“Omwa gha gu aranmwẹ oha ru emwi, a ghi gbe ọmwa nii uan.
20“Omwa gha zọ ese ghe osa ọvbehe vbe ọ gberra ne Nọyaẹnmwa wa ghi gbe ẹe rua.
21“Wa ghẹ ya obọ dan mu orhunmwuyẹn ra ne a ru ẹe khọ, yerre wẹ orhunmwuyẹn wẹ vbe gha khin vbe Igipt. 22Wa ghẹ ru ọmọ ne ẹ i mwẹ erha ra ẹgbẹ khọ. 23Wa gha ru iran khọ, iran na tu ma mwẹ nọ iyobọ, I gha zẹmwẹ wanniẹn iran. 24Ohu gha wa kakabọ mu mwẹ, I ghi gbele uwa a vbe okuo. avbe amwẹ uwa ghi khian ẹgbẹe, ivbi uwa ghi khian emọ ne ẹ imwẹ erha.
25“A deghẹ wa rhie igho ne emwa mwẹ mọmọ, ne iran ne ivbiogue vbe uwu uwa, wa ghẹ ru zẹ vbe ọmwa ne ọ rhie igho isu ne ọmwa, wa ghẹ wẹ ne ọ su ẹe rre. 26U gha rhie ẹwu su ọmwa ye osa ne ọ gha ha ruẹ re, u ghi rhie ẹre werriegbe nẹẹn vbe owẹn te de fua. 27Rhunmwuda ọnii ọkpa ọre ọ mwẹ ne ẹ i ra gie ọnii gbe ẹe. De emwi ọvbehe ne ọ gha ghi ya hin egbe? Ọ gha tu ma mwẹ nọ iyobọ, I gha zẹmwẹ wanniẹn ọẹn rhunmwuda ọmwa itohan mẹ khin.
28“Ghẹ fi unu gie Osanobua, ghẹ kpa unu ghe ọkaolotu emwa ruẹn. 29Ghẹ mwẹ u ma gha viọ imuohan gun mwẹ vbe ọka ruẹ, ayọn ruẹn kevbe ofigbọn oliv ruẹ vbe ẹghẹ a sẹ ẹe. Wa ghi gha ya ivbi uwa ne ikpia ne ọdiọn fiohan mẹ. 30Wa ghi vbe ya ọmọ ne ẹmila uwa kevbe ohuan uwa ka gha bie mẹ, ọwọe ne okaro ghi gbe ẹdẹ ihinrọn vbe obọ iye zẹẹ, ikpẹdẹ ne ogierẹnrẹn, wa ghi ya ẹe zọ ese mẹ. 31Emwa mwẹ wa khin, rhunmwuda ọnii wa ghẹ rri emiowo ara-nmwẹ ne aranmwẹn akọn gbe fua vbe oha, wa gha muẹn ne ivbiakota.
Currently Selected:
Ẹksọdọs 22: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996
