Ẹksọdọs 1
1
A Ya Obọ Dan Mu Ivbi Izrẹl Vbe Igipt
1Eni avbe ivbi e Jekọb ni lele ẹe gha rrie Igipt ke iran kevbe ivbi iran ẹre ena khin: 2Riubẹn, Simiọn, Livai, Juda, 3Isaka, Zebulọn, Bẹnjamin. 4Dan, Naftali, Gad kevbe Asia. 5Inu iran ne ọ wa re ivbi urho e Jekọb taara kagha re ekigbesiyenẹ. E Josẹf ne ovbi ẹre kagha rre Igipt nẹ. 6E Josẹf kevbe etiọnrẹn keghi do wulo, erriọ zẹ orre iran hia ba ere. 7Sokpan ivbi Izrẹl kegha mwẹ emọ nibun, iran bun sẹrriọ, iran vbe wegbe sẹrriọ wẹ, iran keghi wa gba otọe nii hia.
8Ọba ọgbọn ne ọ ma zẹdẹ rẹn emwikemwi vbe ekpa Josẹf kegha rre asẹ vbe Igipt. 9Ọ keghi tama emwa rẹn wẹẹ, “Wa ghee, avbe emwa na ighẹ ivbi Izrẹl bun sẹrriọ, iran vbe wegbe sẹrriọ wẹ te ima rhie uhunmwu mwẹ atataobọ. 10Rhunmwuda ọnii, wa danmwehọ, te ima gha ya ẹwaẹn ya obọ mu iran ne iran ghẹ ghi muan sayọ. Okuo i ghẹ rre, iran sẹtin wa deba avbe eghian ima gu ima gbinna, iran ghi lẹkua vbe ẹvbo na.”
11Ivbi Igipt keghi rhunmwuda ọnii zẹlẹ avbe emwa ni su oleghan ne iran, ne iran gha ya ẹtin ya iran miẹn ẹsọn ne a wiẹn iran an. Avbe ivbi Izrẹl ẹre ọ bọlọ ẹvbo ne a tie ẹre Pitọn kevbe Ramesis ne ọba, ne ọ gha re ehe ne a si evbare gboo yi. 12Sokpan vbene ivbi Igipt ya wiẹn iran an, erriọ ivbi Izrẹl ye gha bun yọ vẹ gba ehe hia. Ohan iran kegha mu ivbi Igipt. 13Iran keghi ya iran khian eviẹn edanmwidan.
14Iran keghi ya ẹdagbọn iran khian ọghe orriara vbe ne iran na ya iran gha mannọ obuẹ kevbe ibiriki, deba iwinna a gha wu a rrie ni ghi rre ugbo hia. Iran keghi ya ẹtin munọ iran gha miẹn ẹsọn ike ẹsọn ne ọ rhirhi gha khin. Iran ma vbe mwẹ itohan ghe ivbi Izrẹl. 15Ẹre ọba na tama avbe ikhuo ni mu ivbi e Hibru ubiẹmwẹ, a tie ọkpa vbọ Sifra, a keghi tie nọkpa Pus wẹẹ, 16“Wa gha mu ikhuo Hibru emwi ubiẹmwẹ, iran gha biẹ okpia wa ghi gbe ẹe rua, sokpan ọ gha re okhuo, wa ghi sọrae.” 17Sokpan iran ni mu ikhuo emwi ubiẹmwẹ ni keghi mu ohan Osanobua, iran ma ru vbene ọba khare sokpan iran kegha sẹ avbe emọ ikpia rae. 18Ọba keghi gie ne a tie ikhuo ni mu emwi ubiẹmwẹ nii, ọ nọ iran wẹẹ, “Vbọzẹ ne uwa na ru emwi na yi, ne uwa na sẹ avbe emọ ikpia nii rae ye agbọn.” 19Iran keghi wanniẹn wẹẹ, “Ikhuo Hibru i yevbe ikhuo Igipt, iran wa rherhe biẹ, ọmwa ne ọ mu emwi ubiẹmwẹ te sẹ ehe ne iran ye, iran biẹ nẹ usin.” 20Osanobua kegha ru ikhuo ni mu emwi ubiẹmwẹ nii ẹse, ivbi Izrẹl kegha muan yọ, iran na vbe wo vbe egbe. 21Osanobua keghi viọ emọ ne avbe ikhuo ni mu emwi ubiẹmwẹ nii biẹlẹ rhunmwuda ne iran na mu ohan Osanobua. 22Ẹghẹ nii ọre ọba ghi na yi iyi ne emwa irẹn hia wẹẹ, “Emọ ikpia ne emwa Hibru a rhirhi biẹ, wa gha filo iran ku ẹzẹ Nail, sokpan wa sẹ avbe emọ ikhuo ni rrọọ rae ye agbọn.”
Currently Selected:
Ẹksọdọs 1: EDO96
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
@ The Bible Society of Nigeria, 1996