Matiyu 18
18
Ende hon e dgwa ti ara a tswa zǝnotì mo Ehwya ángá
(Marku 9:33-37; Luka 9:46-48)
1Atan enò, be ye è ba Yeso anga è bwa a zǝn ye nè ká ye eka jan, “Ara dgwa ti ara a ge, a tswa zǝnotì mo Ehwya?”
2Kǝnggwa gè fǝ́ nweshan akan dwa bwa nè du nó ywa a engga mo be. 3Gè jan be, “M jan nye ebi, ano nye twafwe chu nye no nye abu mbǝgyashan ra, nya kwa a didi nye a tswa zǝnotì mo Ehwya ra. 4Enona, ende e ngǝchu mbwe a sen abu nweshan ena, dgwa ti ara a tswa zǝnotì mo Ehwya.
5“Egwa egwa e cha ende akan abu nweshan ena a chu m, cha anga a me. 6Tea ano ende akan du akan mo mbǝgyashan abu ena, ya e tsǝ́ekǝ̀n no a chu m ángá, bwe ebgen; gà se a tkyan a ge, a zǝn ye, bà a ti dgomo a tè adi hywá moekpwam ekeke ti hwya a fu ye a shwa na à ti ye à twa a shi a tswa sǝn evǝnvǝn.
7“Ebwe no a chu mo be nobǝ a tswa zǝnchaje, adia be mò ya e du be nobǝ a bwe ebgen anga no a tswa mo nó. Ge no kenm jan be mò ena a bwa, tea ebwe no a chu ende nwene a adi efka mbwe, be mò hon bwa ángá. 8Ano bu mbo akan eno e ra fù mbo akan du o bwe ebgen, sen ti ye twafwa. Ge setkyan we fo etkwa mo nya e no a fwa efwam, ngge bu eno e ra fù mbo akan è fwa ye ra, chàshín a be e ti o ngge be bu mbo fà eno e ra be fù mbo fà e twa a sen-ehwa. 9Ano nwen fǝzǝn mbo akan du o bwe ebgen, chawya ye twafwa. Ge setkyan we fo etkwa mo nya e no a fwa efwam ngge nwen fǝzǝn mbo akan, chàshín a be e ti o ngge be nwen fǝzǝn mbo fà ti e twa a sen-ehwa.
Hufwa a chu son è tku da ángá
(Luka 15:3-7)
10“Nye e di e pin nye akan mo mbǝgyashan ena ra. Adia m jan nye anga, be maleka e dgon be anga, no kpwà a zǝn Àtà m a kpe. [ 11Adia Nwen Nobǝ è bwa tén evǝa ge e ti e vǝ́ be nobǝ ya è tku da ara ángá.]
12“Mò a nye ka anga a ano? Ano son akan a tswa be son gwé akan mo ende akan tku da ara, ga gwa ye be son gwi chwen a ndwe chu chwen a ndwe (99) hon a chu hwì hon, n ken tkú a nda ye akan hon sangǝ́ ra? 13Ano ge di ara nó, m jan nye ebi anga, etkwa efom mbwe a chu akan hon a tkyan a chu gwi chwen a ndwe chu chwen a ndwe hon éè chà tku da be ra ángá. 14Ba anona, Ate nye e no a kpe ángá dgyan ye jan akan mo be mbǝgyashan ena e tku e da ra.
Abu wa bwe ngge nwenjwa e bwe o edan anga
15“Ano nwenjin o bwe o edan, ken jantu ye edan hon, a bo ngge ge fà fà. Ano ge buton fo o, n cha ara dwa dan, o vǝ ye twabǝ bwa ara a tswa zǝno nwenjwa mo nye. 16Tea ano be se ge e buton e fo o, we ti nwenjwa akan eno e ra fà efki e twa e bo, nye e ken a zǝn ye, adia ano nobǝ fà eno e ra ta, janvǝ mo be no mò akan a chu fwa akan hon, mò a be jan ángá no ara edefǝfǝ. 17Ano ge se ge e buton e fo be, jantu be ya ekǝ̀n-etsǝ́m. Ano ge se ge e buton e fo èé be ya ekǝ̀n-etsǝ́m hon, ti ye abu ende e yi ye Ehwya ra eno e ra ya tse-eten echam.
18“M jan nye ebi, egwa egwa mo mò a nye tèfǝn ara a tswa zǝnchaje, no ara etèfǝnm a kpe ngge mò a nye fken ara a tswa zǝnchaje ena, no ara efkenm a kpe.
19“Efwe m jan nye anga, ano nobǝ fà a engga mo nye cha ara dwa a chu mò akan a nye bgó a tswa zǝnchaje ena, Àtà m e no a kpe ángá a bwe nye nó. 20Adia zǝn a be nobǝ fà eno e ra ta fǝnno adi ti mam, m no ngge be.”
Hufwa a chu ya mochi è di ye ashi ra ángá
21Kǝnggwa Bitru è bwa a zǝn Yeso nè ká ye eka jan, “Etsodwe, a kè mbwe a m gwa a no nwenjin m ano ge no kpwà m adi edan ebwem? Kè chwen a fà?”
22Yeso è janfwe ye, “M jan o anga, fwa ye kè chwen a fà ra, tea kè gwi chwen a fà chu chwen a fà (77).”
23“Adia zǝnotì mo Ehwya no abu tì akan è dgyan ge e ká e se tse mbwe a gè ti no be ya mochi mbwe kpo ángá. 24Abu gè kwa ara tse hon ekasem ángá, be ti ya mochi mbwe akan a gè ba nó tse talenti echo gwi, tse hon a ge kpwa a ti ye adi nya mbwe a tswa zǝnchaje ena ra, bwa. 25Abu gè kpwa ti ye tse hon ra ángá, yagwamo mu mbwe è du jan be e ti ye, gwa ye, mbǝgya mbwe tangge binbin mo be mò a gè no ngge be ángá e jwa e de, evǝa be e kpwa tse hon a gè ba nó anga.
26“Ya mochi hon è kposhi a sen a chu be ekpanvǝ mbwe a chafya mo yagwamo mu hon, nè bgó jan, ‘Bonshi ekǝ̀n ngge me ma kpwa a gu o be tse mbo’ 27Yagwamo mu mo ya mochi hon, è di ashi mbwe nè gwano gu ye tse hon, nè twagwa ye ge e nya.
28“Tea atan a ya mochi hon eni è vǝ́ a je ángá, gè ben shushwa ye adi mochi akan, a gè ba nó anga ngge dinari gwé akan, (tse mochi mo tsǝnò gwé akan). Gè chifu shushwa ye egǝ́n, nè jan, ‘Kpwa m tse a m ba o anga.’
29“Shushwa ye adi mochi hon è kposhi a sen a chu be ekpanvǝ mbwe nè kwa ara ye ebgom jan, ‘Bonshi ekǝ̀n ngge me, ma kpwa a gu o tse mbo.’
30“Tea gè se ye, nè du bè ti nobǝ hon ti twa a àtá ehwyatu. Gè jan ne be e fki e gwa be ye ra, kpwà tén ano ge kpwa gu ara ye tse mbwe sangǝ́. 31Atan a be shushwa mochi mbwe efki è di mò a gè bwe ángá, bè bgen nya àywá. Bè ken jantu yagwamo mu be binbin, mò a gè bwe ángá.
32“Ekǝnggwa yagwamo mu mo be hon è fǝ́ ya mochi hon a gé gwano ara nó tse ángá dwa, nè jan, ‘A bo ya mochi, nobǝ fǝ̀, ḿ gwano gu o tse a m̀ ba o anga adia ó bgó m ángá. 33O gwano a yi mbo shushwa o adi mochi, tse a o ba ye anga, abu ḿ gwano o ángá ra?’ 34A tswa nya ebgenm, yagwamo mu mbwe hon è ti ye du a bu mo be edgonzǝn a àtá ehwyatu, be e tswa ye ekan ngge be e ken a pe ye, ti e ken e ngga atan a ge kpwa gu ara tse a gè ba nó ángá sangǝ́.
35“Ena a mò a Àtà m e no a kpe ángá, a bwe ngge egwa egwa mo nye, ano nye gwano nye nwenjin nye a tsuruku mo nye ra.”
Currently Selected:
Matiyu 18: ICH
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2024 Luke Initiative for Scripture Translation
