Matyiu 9
9
1Ka Mâ‐a vama o ’lende, na jabwaka, na vala o mbok‘ ’aju mětě. 2Umbwakiyate, ba vanaki Mâ momo a běkě nyolo limbelimbe bya o ikondo: ka Jisus a yěně ikamidě jabu, ka Mâ‐a vâ n‘ ubědi mua nyolo limbelimbe, na, Mwana, yěněkě mbya, mabe mâvě ma ’yidwěnd‘ âvě. 3Umbwakiyate, Balěndi bâkâ ba vâkindi bâ mětě na bâ mětě, na, Momo těkaně a kilakand‘ Anyambě. 4Ka Jisus a yowě mapikiliya mabu, ka Mâ‐a vâ na, O pikilakiya li bobe o bebumulema beanyu nande? 5Eve lě e di bobâbu wa, na o vâ, na, Mabe mâvě ma ’yidwěnd‘ âvě; na o vâ, na, Umwaka, na nâvě wa tamuwa? 6Ovaně ndi ’nyěni o ka yowěni, a ndi na Mwana moto a na ngudi o he e ’yakidě bobe, (jâ ndi jaju ja vâ n‘ ubědi mua nyolo limbelimbe, na) Umwaka, nângâkâ ikondo jâvě, na nâvě wa vala o ndabo ’âvě. 7Ka mâ‐a ’muwa, na vala o ndabo ’aju. 8Nd‘ o bebimba be yěněkidi be mamakindi, na bâ‐ba ka bendakě Anyambě, e věki bato ngudi těně.
9O Jisus a věngěměkidi oviya iboko těvině, ka Mâ‐a yěně momo, dina na Matyiu, diyango o inângânido via pago; ka Mâ‐a vâ na mâ, na, Vitakě ’Mba. Ka mâ‐a ’muwa, ka mâ‐a vitě Mâ.
10E diyakindi, o Jisus a diyakidi a jaka o ndabo, umbwakiyate, bayoli pago baitě na bato babe ba vakindi ka diya na ju na beyokwedi beaju. 11Ndi o Farisi ba yěněkidi, ka bâ‐ba vâ na beyokwedi beaju, na, E lě nde ya Uyokwidi muanyu e jakě na bayoli pago na bato babe? 12Ndi o Jisus a yokakidi a vâki na bâ, na, Ba di mepeha ba bě na mala na nganga, kabo ba běkě. 13Ndi kěkěni wa ’la ka yokuwani ka yâ e weyakě, na, Mbi vahakandi ngěbě wa na benambo. Ikajobana Mbu vaka ka ndiya bayamu, ndi kabo babe, na, ba uluake melema.
14Jâ ndi ja beyokwedi bea Jân bea viya o Mâ‐a jadi, na, E lě nd‘ eahu na Farisi e hindinakě njo iitě, ndi beyokwedi beâvě be hindine? 15Ka Jisus a vâ na bâ, na, Mbweyi j‘ ubayi i ka yâlěte o yěně ngěbě, ulingo ubayi u di na jâ? Ndi hwi i vakandi ubayi u ka nângânwě, běngě i hindinake? 16O ibě na moto a vamakě epěhi y‘ unamba mua kya o ngâi ya vyo, ikabojana e vamakwě eně e nyakandi ngâi, n‘ ibeko ja kena pě wa. 17Na bato baa vamakě ivě ja kya o mbute na vyo, o banga mbute ja tumbiya, na ivě ja hoviya, na mbute ja jongoliya: ndi ba vamakěndi ivě ja kya o mbute ja kya, vâkâna beěhěpi be tatudwěndi.
18Umbwakiyate, o Mâ‐a diyakidi a kalaka na bâ belombo těkabe, upangiyi umbâkâ u vakindi, ka mâ‐a hâhâlidě Mâ, na, Mwan‘ ’amě ua mwajo a ndi o bowaka; ndi vaka ka kahakidě mâ ikadu jâvě, vâkâna a diyendi. 19Ka Jisus a ’muwa na vitaně mâ, na beyokwedi beaju tepě. 20(Umbwakiyate, mwajo a diyakidi na ebědi ya ulema mua makiya jomu na mepuma mebale a viya o mbuhwa, ka mâ‐a kupaně imbunja ja ngâi ’aju. 21Ikabojana a vâkindi n‘ ulema, na, Pagate mba kupaně ngâi ’aju, vâkâna mbi yongindi. 22Ka Jisus a timbě iběyi, o Mâ‐a yěni mâ, ka Mâ‐a vâ, na, Mwa mwajo, yěněkě mbya; ikamidě jâvě i yongiděndi âvě. Ka mwajo tě a yonga o iwěla tědině.) 23O Jisus a pâkidi o ndabo y‘ upangiyi, ka Mâ‐a yěně ba malela na bato ba haka imbunga. 24Ka Mâ‐a vâ na bâ, na, Ta hani; ikabojana itângâ ibě wango, ndi i yakandi. 25Ka bâ‐ba věhě Mâ. Ndi o bato ba pumakudwě, ka Mâ‐a ngiya, ka Mâ‐a bweya mâ o enâ ka itângâ ja ’muwa. 26Ka kuma těně ya hamana o ehe těně yěhěpi.
27O Jisus a kěkidi, pâgu ibale i vitakidi Mâ, i yamaka, na, Mwana ua Devid, yěněkě hwě ngěbě. 28O Mâ‐a pâkidi o ndabo, pâgu tě i vakindi o Mâ‐a jadi: ka Jisus a vâ na bâ, na, O kamakiděteni na Mbi na ngudi e hakě ekae? Ka bâ‐ba vâ, na, E, Upangiyi. 29Jâ ndi jaju ja kupaně mihâ mabu, na, E diyake n‘ inyěni hohonganěngo n‘ ikamidě janyu. 30Ka mihâ mabu ma bumuwa; ka Jisus a kelevidě bâ, na, Bandamakiděni, na, e yowanake na moto. 31Ndi bâ, o bâ‐ba validi, ka bâ‐ba hamanidě kum‘ ’aju o ehe těně yěhěpi.
32O bâ‐ba diyakidi ba kěkě, umbwakiyate, ba vanaki Mâ emukumuku ya moto a bweyakudwě na děvil. 33O děvil e pumakudwě, ka emukumuku ya kala: ka bebimba bea mamana, na, Ekae e ha yěněněte n‘ ivâkwě o Israěl. 34Ndi Farisi ba vâkindi, na, A pumakěndi děvil na ihana ja upolo mua děvil.
35Ka Jisus a vala o pělě ja mboka na mabâkâ měhěpi, a yokwakidě o ndabo jabu ja Anyambě, a kalakiya sango eyamu ya ipangiya, a yongakě mehiyo meěhěpi na bebědi beěhěpi be di na bato. 36Ndi o Mâ‐a yěni bebimba, a yěněki bâ ngěbě, ikabojana ba diyakindi ba kâmbâ, na bâ‐ba ka vanjanganaka ona medâmbě me ha ibe na utati. 37Jâ ndi jaju ja vâ na beyokwedi beaju, na, Juma mětě i ndi iitě, ndi bahayi ba ndi nyěvâ. 38Ndi kalakiyani Upangiyi mua juma, na, a lomake bahayi o juma jaju.
Currently Selected:
Matyiu 9: BNG1895
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published by the American Bible Society in 1895.
