မဿဲ 21
21
အောင်ပွဲခံ၍ ယေရုဆလင်မြို့သို့ ဝင်ရောက်လာခြင်း
(မာကု ၁၁.၁–၁၁; လုကာ ၁၉.၂၈–၄၀; ယောဟန် ၁၂.၂–၁၉)
1ယေသျှုနှင့် သူ၏တပည့်တော်ရို့သည် ယေရုဆလင်မြို့သို့ လာကြရာ၊ သံလွင်တောင်ခြီရင်း၌ဟိသော ဗက်ဖာဂေရွာနားသို့ ရောက်လာကြ၏။ ထိုနီရာ၌ ယေသျှုသည် တပည့်တော်နှစ်ယောက်ကို၊ 2“သင်ရို့သည်ကား ရှိ့က ရွာကို လားကတ်လီ။ ရောက်လျှင် ဘေးနားမှာ သားချေတစ်ကောင်နှင့် တွဲ၍ ချိုင်ထားသော မြည်းမတစ်ကောင်ကို တွိ့လိမ့်မည်။ ယင်း မြည်းမနှင့် မြည်းချေကို ကြိုးဖြီပြီးလျှင် ငါ့ပါးသို့ ယူလာကတ်။ 3သို့သော် တစ်ယောက်ယောက်က တစ်ခုခုပြောလျှင် ‘သခင်#၂၁.၃ သခင်၊ သို့မဟုတ် ပိုင်သျှင်။က ဤမြည်းမနှင့် မြည်းချေကို အလိုဟိလို့ပါ’ ဟု သူ့ကို ပြန်ပြောလိုက်ပါ၊ သူသည် ချက်ချင်း ယူခွင့်ပီးလိမ့်မည်” ဟု ညွန်ကြားကာ ရှိ့က စီရွှတ်လိုက်၏။
4ဤအကြောင်းအရာကား ပရောဖက် ဟောထားချက်တိ ပြည့်စုံလာခြင်းဖြစ်၏။ 5“ကြည့်ကတ်ပါ၊ သင်ရို့၏ သျှင်ဘုရင်သည် မြည်းမနှင့် မြည်းချေကို စီး၍ စိတ်နှလုံးကို နှိမ့်ချလျက် သင်ရို့ပါးသို့ ရောက်လာယာ ဟု ဇိအုန်သတို့သမီးကို ပြောကတ်ပါ” ဟူ၍ ဖြစ်၏။
6တပည့်တော်ရို့သည် ထွက်လားကြပြီးလျှင် ယေသျှု စီခိုင်းသည့်အတိုင်း လုပ်ဆောင်ကြ၏။ 7သူရို့သည် သားချေတစ်ကောင်နှင့် မြည်းမကို ယူဆောင်လာကြပြီးလျှင် ထိုမြည်းထက်၌ သူရို့၏ဝတ်ရုံများကို ခင်းပြီးနောက် ယေသျှုသည် စီးတော်မူ၏။ 8များစွာသောလူရို့သည် မိမိရို့၏ဝတ်ရုံများကို လမ်းမထက်မှာ ဖြန့်ခင်းထားကြ၏။ တချို့သည် သစ်ပင်မှ အကိုင်းအခက်များကို ခွတ်၍ လမ်းမထက်မှာ ဖြန့်ခင်းထားကြ၏။ 9ယေသျှု၏ ရှိ့မှလည်းကောင်း၊ နောက်မှလည်းကောင်း လမ်းလျှောက် လာကြသော လူတိက “ဒါဝိဒ်သားတော်အား ဟောသျှဏ္ဏ#၂၁.၉ ဟောသျှဏ္ဏ၊ ဟောသျှဏ္ဏဟူသော စကားသည် ဟေဗြဲစကားအသုံးအနှုန်းတွင် “ကယ်တော်မူပါ” ဟူ၍ အဓိပ္ပာယ်ရသည်၊ နောင်တွင် ဘုရားသခင်၏ဂုဏ်တော်ကို ချီးမွမ်းသည့် အသုံးအနှုန်း ဖြစ်လာသည်။ ဖြစ်ပါစီ။ ထာဝရဘုရားသခင်၏ နာမတော်နှင့် ကြွလာသော သူသည် မင်္ဂလာဟိပါစီ။ အမြင့်ဆုံးသောကောင်းကင်၌ ဟောသျှဏ္ဏ ဖြစ်ပါစီ” ဟု ကြွေးကြော်ကြ၏။
10ယေသျှုသည် ယေရုဆလင်မြို့သို့ ဝင်လာသောအခါ တစ်မြို့လုံး ရုတ်ရုတ်သဲသဲ ဖြစ်ကြပြီးလျှင် “ဤသူက ဇာသူလဲ” ဟု အချင်းချင်း မိန်းမြန်းကြ၏။
11လူအုပ်ကြီးက “ဤသူသည် ဂါလိလဲပြည် နာဇရက်မြို့သား ပရောဖက် ယေသျှု ဖြစ်၏” ဟု ပြောကြ၏။
ယေသျှုသည် ဗိမာန်တော်သို့ ကြွတော်မူခြင်း
(မာကု ၁၁.၁၅–၁၉; လုကာ ၁၉.၄၅–၄၈; ယောဟန် ၂.၁၃–၂၂)
12ယေသျှုသည် ဗိမာန်တော်သို့ ဝင်လာပြီး၊ ဗိမာန်တော်ထဲ၌ အရောင်းအဝယ် လုပ်နိန်ကြသောသူ အားလုံးကို မောင်းထုတ်၏။ ငွီလှဲကောင်တာစားပွဲတိ ဂြိုးငှက်ရောင်းသူများ၏ ထိုင်ခုံ စားပွဲတိကို တွန်းလှဲကာ မှောက်လှန်ပစ်လိုက်၏။ 13ကိုယ်တော်က “ဘုရားသခင်နှုတ်ကပတ်တော်ကျမ်းစာ၌ ရီးထားသည်မှာ ‘ငါ၏အိမ်တော်ကို ဆုတောင်းပတ္ထနာပြုရာ အိမ်တော်ဟု ခေါ်ဆိုရလိမ့်မည်’ ဟု ဖော်ပြထား၏။ သို့ရာတွင် သင်ရို့သည် ဤဗိမာန်တော်ကို သူခိုးဓါးပြ ပုန်းအောင်းသည့် နီရာအဖြစ် လုပ်နိန်ကြသည်တကား” ဟု မိန့်တော်မူ၏။
14ယေသျှုသည် ဗိမာန်တော်ထဲမှာ ဟိနိန်သောအခါ မျက်မမြင်များနှင့် ခြီထောက်မသန်စွမ်းသူများသည် ကိုယ်တော်အပါးသို့ ရောက်လာကြ၏။ ကိုယ်တော်က သူရို့၏ရောဂါများကို ပျောက်ကင်းစီတော်မူ၏။ 15ယဇ်ပရောဟိတ်အကြီးအကဲများနှင့် ကျမ်းတတ်ဆရာများသည် ကိုယ်တော်ပြုတော်မူသော အံ့သြဘွယ်အရာများကို မြင်၍ လည်းကောင်း၊ ဗိမာန်တော်ထဲမှာ ဟိနိန်ကြသောသူငယ်တိက “ဒါဝိဒ်၏သားတော်အဖို့ ဟောသျှဏ္ဏဖြစ်ပါစီ” ဟု ကြွေးကြော်နိန်ကြသည်ကို မြင်ရ၍လည်းကောင်း၊ ဒေါသထွက်လာကြ၏။ 16ထို့ကြောင့် သူရို့က “ဤသူငယ်တိ၊ ဇာပိုင် အော်နိန်ကြသည်ကို သင်ကြားသလား” ဟု ယေသျှုကို မိန်းကြ၏။
ယေသျှုက “ငါ အမှန်ပင် ကြား၏၊ ‘ကိုယ်တော်သည် နိ့စို့သူငယ်တိနှင့် အချေတိကို ကျေးဇူးတော် ချီးမွမ်းတတ်စီရန် သင်ကြားပီးလေပြီ’ ဟု ကျမ်းစာမှာ ရီးထားသည်ကို သင်ရို့ မဖတ်ဖူးကတ်လား” ဟု ယေသျှုက ပြော၏။
17ယေသျှုသည် သူရို့ကို ထားခပြီးလျှင် မြို့မှ ထွက်ခွါ၍ ဗေသနိရွာသို့ ကြွတော်မူကာ ထိုရွာ၌ ညအိပ်တော်မူ၏။
သင်္ဘောသဖန်းပင်အား မိန့်တော်မူခြင်း
(မာကု ၁၁.၁၂–၁၄,၂၀–၂၄)
18ယေသျှုသည် နောက်တစ်နိ့ မိုးထစောစော မြို့သို့ ပြန်ကြွတော်မူသောအခါ လမ်းမှာ ဝမ်းဆာတော်မူ၏။ 19ကိုယ်တော်သည် လမ်းဘေးမှာ သဖန်းပင်တစ်ပင်ကို မြင်၍ လားကြည့်တော်မူ၏၊ သို့ရာတွင် အရွက်များသာဟိပြီး အသီးတစ်လုံးမျှ မတွိ့သဖြင့် ကိုယ်တော်က “ဤအပင်သည် နောက်တစ်ခါမျှ အသီးမသီးပါစီကေ့” ဟု မိန့်တော်မူလိုက်သည်နှင့် သဖန်းပင်သည် ချက်ချင်း ခြောက်သွိ့လားလေ၏။
20တပည့်တော်ရို့သည် ဤအခြင်းအရာတိကို မြင်ကြသောအခါ အလွန်အံ့အားသင့်ကြ၏။ “ဤသဖန်းပင်သည် ချက်ချင်း ဇာပိုင် ခြောက်လခလဲ” ဟု သူရို့က မေးကြ၏။
21 #
မ ၁၇.၂၀; ၁ ကော ၁၃.၂ ယေသျှုက “သင်ရို့ကို ငါ အမှန်ဆိုသည်ကား သင်ရို့မှာ သံသယကင်းသည့်ယုံကြည်ခြင်းသာ ဟိမည်ဆိုလျှင် ဤသဖန်းပင်ကို ငါ လုပ်ရေပိုင် လုပ်နိ့င်သည်သာမက ဤတောင်ကုန်းကို ‘ပင်လယ်ထဲသို့ ကျလီ’ ဟု ဆိုလျှင် သင်ရို့ဆိုသည့်အတိုင်း ဖြစ်လိမ့်မည်။ 22သင်ရို့သည် ယုံကြည်ခြင်း ဟိကြလျှင် သင်ရို့ တောင်းသမျှကို ရကြလိမ့်မည်” ဟု မိန့်တော်မူ၏။
ယေသျှု၏ အခွင့်အာဏာအကြောင်းကို မိန်းလျှောက်ကြခြင်း
(မာကု ၁၁.၂၇–၃၃; လုကာ ၂၀.၁–၈)
23ယေသျှုသည် ဗိမာန်တော်သို့ ဝင်ရောက်၍ ဆုံးမဩဝါဒကို ပီးတော်မူစဉ်တွင် ယဇ်ပရောဟိတ် အကြီးအကဲရို့နှင့် ဘာသာရေးခေါင်းဆောင်ရို့သည် ကိုယ်တော်ပါးသို့ ရောက်လာကြ၏။ သူရို့က “သင်သည် ဤရာတိကို ဇာအခွင့်အာဏာနှင့် လုပ်နိန်ပါလဲ။ ယေပြီးကေ သင့်အား ဤအခွင့်အာဏာကို ဇာသူက ပီးထားလဲ” ဟု မိန်းကြ၏။
24ယေသျှုက “ငါလည်း သင်ရို့ကို မိန်းခွန်းတစ်ခု မိန်းမေ။ သင်ရို့ ငါ့ကို အဖြေပီးနိုင်လျှင် ငါသည်လည်း ဤအရာတိကို ဇာအခွင့်အာဏာနှင့် လုပ်နိန်လည်းဆိုစွာကို သင်ရို့အား ငါ ပြောပြမည်။ 25ဗတ္တိဇံပီးခြင်းငှာ ယောဟန်၏အခွင့်အာဏာသည် ဇာက လာလဲ၊ ဘုရားပါးက လာလား သို့တည်းမဟုတ် လူပါးကလား” ဟု မိန်းလေ၏။
“ငါရို့ ဇာပိုင် ဖြေရပါဖို့လဲဟု သူရို့အချင်းချင်း ငြင်းခုံကြ၏။ ‘ဘုရားပါးက’ ဟု ငါရို့ ဖြေလျှင် ‘သင်ရို့သည် ယောဟန်ကို ဇာကြောင့် မယုံကတ်လဲ’ ဟု သူက ငါရို့ကို မိန်းမည်။ 26သို့တည်းမဟုတ် ‘လူပါးက’ ဟု ဖြေလျှင် သူရို့အားလုံး ယောဟန်ကို ပရောဖက်တစ်ပါးလို့ ယုံကြည်ထားရေ အတွက်ကြောင်း လူထုပရိသတ်ကို ငါ့ရို့ ကြောက်ရ၏” 27ထို့ကြောင့် သူရို့က “အကျွန်ရို့မသိပါ” ဟု ပြန်ပြောကြ၏။
ထိုအခါ ယေသျှုက “ငါသည်လည်း ဤအရာတိကို ဇာအခွင့်အာဏာနှင့် လုပ်နိန်သည်ကို သင်ရို့အား ပြောလိမ့်မည်မဟုတ်” ဟု သူရို့အား မိန့်တော်မူ၏။
သားနှစ်ယောက်၏ ပုံဥပမာ
28“အဂု သင်ရို့ ဇာကို စဉ်းစားနိန်ကတ်လဲ။ တစ်ခါက လူတစ်ယောက်မှာ သားနှစ်ယောက် ဟိ၏။ သူသည် သားကြီးပါးသို့ လားပြီးလျှင် ‘သားကြီး၊ ဤနိ့ စပျစ်ဥယျာဉ်မှာ အလုပ် လားလုပ်ခီ’ ဟု ရွှတ်လိုက်၏။ 29သားကြီးက ‘အကျွန် မလားချင်ပါ’ ဟု ပြောသော်လည်း သူသည် တဖန် စိတ်ပြောင်းလဲကာ ဥယျာဉ်သို့ လား၍ အလုပ်လုပ်၏။ 30သူသည် သားငယ်ပါးသို့ လား၍ ထိုနည်းတူပြောသောခါ သားငယ်က ‘အကျွန် လား၍ လုပ်ခိမေ’ ဟု ပြောသော်လည်း မလားဘဲနိန်၏။ 31ထိုသားနှစ်ယောက်တွင် ဇာသူက သူ့အဖ၏အလိုတော်ကို လုပ်ဆောင်လဲ” ဟု ယေသျှုက မိန်း၏။
“သားကြီးပါ” ဟု သူရို့က ဖြေကြားကြ၏။
ယေသျှုက “သင်ရို့ကို ငါ အမှန်ဆိုသည်ကား အခွန်ကောက်သောသူတိနှင့် ပြည့်တန်ဆာမတိသည် သင်ရို့ထက် ရှိ့က ဘုရားသခင်၏နိုင်ငံတော်သို့ ဝင်နိန်ကတ်ယာ” ဟု သူရို့အား မိန့်တော်မူ၏။ 32#လု ၃.၁၂; ၇.၂၉,၃၀အကြောင်းမူကား ဗတ္တိဇံယောဟန်သည် သင်ရို့အား ဖြောင့်မတ်ခြင်းတရားလမ်းကို ညွှန်ပြရန် သင်ရို့ပါးသို့ ရောက်လာခယာ။ သင်ရို့သည် သူ့ကို မယုံခကတ်။ အခွန်ကောက်သောသူတိနှင့် ပြည့်တန်ဆာမတိက သူ့ကို ယုံကတ်တေ။ သင်ရို့သည် ဤအကြောင်းအရာကို မြင်တွိ့ခသော်လည်း သူ့ကို ယုံကြည်ရန် သင်ရို့သည် နောက်တဖန် စိတ်ပြောင်းလဲခြင်း မဟိကတ်ပါတကားဟု မိန့်တော်မူ၏။
စပျစ်ဥယျာဉ်၌ သီးစားအငှားသားများ ပုံဥပမာ
(မာကု ၁၂.၁–၁၂; လုကာ ၂၀.၉–၁၉)
33ယေသျှုက “နောက် ပုံဥပမာတစ်ခုကို နားထောင်ကတ်။ တစ်ခါက စပျစ်ဥယျာဉ်စိုက်ပျိုးသော မြီပိုင်သျှင်တစ်ယောက်ဟိ၏။ သူသည် ဥယျာဉ်ဝင်းပတ်လည်ကို ခြံစည်းရိုး ကာပြီး၊ ခြံထဲ၌ စပျစ်သီးနယ်ရန် တွင်းကို တူး၍ လင့်စင်တစ်ခုကို ဆောက်၏။ ပြီးလျှင် သူသည် ထိုစပျစ်ဥယျာဉ်ကို ဥယျာဉ်စိုက်ပျိုးသူတချို့ကို ငှားထားခပြီးနောက် ခရီးလားခလေ၏။ 34စပျစ်သီးခူးချိန် ရောက်သောအခါ သူသည် သူ့၏ခြံငှားခရမည့် သီးနှံဝီစုကို တောင်းရန် သူ၏ကျွန်တိကို ခြံငှားတိပါးသို့ ရွှတ်လိုက်၏။ 35ခြံငှားတိက သူ၏ ကျွန်တိကို ဖမ်းဆီးကာ တစ်ယောက်ကို ရိုက်ပုတ်ကြ၏။ တစ်ယောက်ကိုကား အသီသတ်ကြ၏၊ တစ်ယောက်ကို ကျောက်ခဲနှင့် ပစ်ကြ၏။ 36ခြံပိုင်သျှင်က ပထမအကြိမ်ထက်များသော ကျွန်တိကို နောက်ထပ်တစ်ခါ ရွှတ်လိုက်၏။ ခြံငှားတိက ထိုနည်းအတိုင်း ပြု၍ ရွှတ်လိုက်ကြပြန်၏။ 37နောက်ဆုံး၌ ပိုင်သျှင်က ‘သူရို့သည် ငါ၏သားကို အမှန် ရိုသီကြလိမ့်မည်’ ဟု ဆိုကာ သူ့သားကို သူရို့ပါးသို့ ရွှတ်လိုက်၏။ 38သို့ရာတွင် သီးစားအငှားသားတိက သူ၏သားကို မြင်သောအခါ ‘ဤသူသည် ခြံပိုင်သျှင်သား ဖြစ်တေ၊ လာကတ်၊ သူ့ကို သတ်ပြီးကေ သူ့အမွီကို ငါရို့ ယူကတ်မေ’ 39ဟု ခြံငှားတိက ပိုင်သျှင်၏သားကို ဖမ်းဆီးကာ ခြံပြင်သို့ ထုတ်၍ သတ်ပစ်လိုက်ကြ၏။
40“သို့ဖြစ်လျှင် စပျစ်ခြံပိုင်သျှင် လာသောအခါ သူသည် ထိုခြံငှားတိကို ဇာပိုင် လုပ်လိမ့်မည်နည်း” ဟု ယေသျှုက မိန်းတော်မူ၏၊
41“သူရို့က သူသည် ထိုဆိုးယုတ်သောသူတိကို ဧကန်မုချ သတ်ပစ်လိမ့်မည်၊ သူ၏စပျစ်ဥယျာဉ်ကိုလည်း အသီးပေါ်ချိန်မှာ သီးစားခပီးသော တခြားလူတိကို ငှားပစ်လိမ့်မည်” ဟု ဖြေကြ၏။
42ယေသျှုက သမ္မာကျမ်းစာကို သင်ရို့ တစ်ခါလည်း မဖတ်ဖူးကတ်လား၊
“ ‘တိုက်အိမ်ကို ဆောက်သောသူတိက အသုံးမဝင်၍ ပယ်ထားသော ကျောက်တုံးသည်
အဆောက်အဦးတစ်ခုလုံး၏ အရေးအကြီးဆုံးနီရာ၌ ပြန်ရောက်လာ၏။
ဤကား ဘုရားသခင် ပြုတော်မူသောအမှု ဖြစ်၏။
ငါရို့ အမြင်မှာ အလွန်အံ့သြဖို့ ကောင်း၏’ ဟု မိန့်တော်မူ၏။
43“ထို့ကြောင့် ယေသျှုက သင်ရို့ကို ငါဆိုသည်ကား ဘုရားသခင်၏နိုင်ငံတော်ကို သင်ရို့ပါးက သိမ်းယူ၍ နိုင်ငံတော်၏အသီးကို သီးမည့် လူတိပါးသို့ ပီးအပ်လိမ့်မည်” ဟု ထပ်၍ မိန့်တော်မူ၏။ 44#၂၁.၄၄ တချို့ လက်ရီးမူရင်းကျမ်း၌ အခန်းငယ် ၄၄၊ တစ်စုံတစ်ယောက်သည် ထိုကျောက်တုံးထက်မှာ လဲအံ့၊ ထိုသူသည် အပိုင်းအပိုင်း ပြတ်လားမည်။ ထိုကျောက်တုံးသည် တစ်စုံတစ်ယောက်ထက်သို့ ကျအံ့၊ ထိုသူသည် အမှုန့်အမှုန့် ကြီလားလိမ့်မည်၊ ကို ပေါင်းထည့်ထားသည် (ရှု လု ၂၀.၁၈)။
45ယဇ်ပုရောဟိတ်အကြီးအကဲများနှင့် ဖာရိယှဲများသည် ယေသျှုပြောသည့် ပုံဥမာကို ကြားကြသောအခါ မိမိရို့၏အကြောင်းကို ပြောနိန်သည်ဟု သိကြ၏။ 46ထို့ကြောင့် သူရို့သည် ယေသျှုကို ဖမ်းဆီးရန် ကြိုးစားကြ၏။ သို့သော်လည်း လူအများက ယေသျှုသည် ပရောဖက်တစ်ပါးဖြစ်သည်ဟု ယုံကြည်ကြသောကြောင့် လူထုပရိသတ်ကို ကြောက်နိန်ကြ၏။
Currently Selected:
မဿဲ 21: NTRKB24
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
The New Testament in Rakhine Language © The Word for the World International and the Rakhine Bible Translation Committee, 2024.
