Mataayo 1
1
Oruganda rwa Yeesu Kirisito
(Ruuka 3:23‑38)
1Ganu nigo amasiina ga oruganda rwa Yeesu Kirisito. Yeesu Kirisito ꞉aasookereeye mu‑ruganda rwa omukama Dawudi, mu‑rwibhuro rwa Bhurayimu.
2Bhurayimu ꞉eebhuuye Isaaka,
Isaaka ˆneebhura Yakobho,
Yakobho ˆneebhura Yuuda na abhamura bhaabho.
3Yuuda ˆneebhura Pereesi na Jeera ku‑Tamaari,
Pereesi ˆneebhura Ejirooni,
Ejirooni ˆneebhura Araamu,
4Araamu ˆneebhura Aminadaabhu,
Aminadaabhu ˆneebhura Nasyoni,
Nasyoni ˆneebhura Sarumooni,
5Sarumooni ˆneebhura Bhoowaaji ku‑Raabhu,
Bhoowaaji ˆneebhura Obheedi ku‑Ruutu,
Obheedi ˆneebhura Yeese,
6na Yeese ˆneebhura omukama Dawudi.#1:3‑6 Ringira Ruutu 4:18‑22.
Omukama Dawudi ˆneebhura Seremaani ku‑mugasi wa Uriya,#1:6 Ku‑mugasi wa Uriya. Omugasi oyo aariga ˆnaatogwa Bhetisyebha. Ringira 2 Samweri 12:24‑25.
7Seremaani ˆneebhura Rewobhowamu,
Rewobhowamu ˆneebhura Abhiya,
Abhiya ˆneebhura Aasa,
8Aasa ˆneebhura Jewosyafati,
Jewosyafati ˆneebhura Joraamu,
Joraamu ˆneebhura Wujiya,
9Wujiya ˆneebhura Jootamu,
Jootamu ˆneebhura Ayaaji,
Ayaaji ˆneebhura Ejeekiya,
10Ejeekiya ˆneebhura Manaase,
Manaase ˆneebhura Amooni,
Amooni ˆneebhura Joosiya,
11na Joosiya ˆneebhura Yeekoniya na abhamura bhaabho.
Omwanya nigutura‑wo, Abhayisirayeeri nibhasirwa mu‑bhugaya mu‑chaaro cha Bhaabheeri.
12Abhayisirayeeri bhejire bhaamara okusirwa mu‑bhugaya eyo,
Yeekoniya ˆneebhura Syeratiyeeri,
Syeratiyeeri ˆneebhura Jerubhabheeri,
13Jerubhabheeri ˆneebhura Abhiwudi,
Abhiwudi ˆneebhura Eriyaakimu,
Eriyaakimu ˆneebhura Ajoori,
14Ajoori ˆneebhura Sadooki,
Sadooki ˆneebhura Akimu,
Akimu ˆneebhura Eriwudi,
15Eriwudi ˆneebhura Eriyajeeri,
Eriyajeeri ˆneebhura Matani,
Matani ˆneebhura Yakobho,
16Yakobho ˆneebhura Jejefu, omurume wa Maryamu,
na Maryamu niwe nyiramwene Yeesu unu kaatogwa Kirisito.#1:16 Kirisito. Ni musango gwa Echiyunaani, obhugajuro bhwagwo ni unu abhambagirwe amafuta. Mu‑Chiyebhuraniya ogutogwa ati, Masiya. Abhayawudi bhaariga nibheeyikanya ati, Nyamuwanga arituma Masiya, oyo niwe unu aribhachungura okusooka mu‑nyaako. Ku‑meeresyo amaafu, ringira mu‑Meeresyo inguru ya Emisango Emikomeeye.
17Mbe, okusooka ku‑Bhurayimu okukingira okwibhurwa omukama Dawudi, gaariga gari‑wo amayimbo ekumi na gana. Ka wone, okusooka ku‑Dawudi okukingira ku‑mwanya gunu Abhayisirayeeri ꞉bhaasirirwe mu‑bhugaya mu‑chaaro cha Bhaabheeri, gaariga gari‑wo amayimbo ekumi na gana. Okusookerera omwanya gunu ꞉bhaasirirwe Bhaabheeri okukingira okwibhurwa kwa Kirisito, gaariga gari‑wo amayimbo agandi ekumi na gana.
Okwibhurwa kwa Yeesu Kirisito
(Ruuka 2:1‑7)
18Woori, emisango ja okwibhurwa kwa Yeesu Kirisito, ꞉jaakorekeene ku‑njira inu. Maryamu nyiramwene Yeesu, aariga ari‑kwo obhuko na omuunu umwi ˆnaatogwaga Jejefu. Nawe bhachaari okutwarana, Maryamu ˆneefurwa ari na inda ku‑bhuturo bhwa Mwoyo Mweru. 19Jejefu unu aariga ateeye‑ko obhuko, aariga ari muunu omurengeresi imbere ya Nyamuwanga. Jejefu ꞉ateendere okuswasya Maryamu, kurwa ejo, ˆneeganirisya okumusiga bhumbise.#1:19 Okuruubhana na jitungwa ja Abhayawudi, araabha omusigaji aariga asirire obhuko ku‑muyarakaji, bhaariga nibhabharwa ati, ni murume na omugasi. Nawe gwaturaga omuguuga omukobhe nibharindiriraga okukingira omwanya gunu bharitwarana. Omwanya ogwo gwone, ꞉bhateekirisiibhwe okwikara aamwi wuti murume na omugasi okukingira omwanya gunu bharitwarana. Omusigaji okusiga omuyarakaji unu aariga asirire‑ko obhuko, okususanyibhwa na omurume okutaana na omugasi.
20Jejefu ejire eeganirisya kutyo, awoawo maraayika#1:20 Maraayika. Ku‑meeresyo amaafu, ringira mu‑Meeresyo inguru ya Emisango Emikomeeye. wa Raatabhugenyi ˆnaamusoromokera mu‑chirooto. Maraayika oyo, ˆnaamubhwira ati, “Jejefu, omwana wa Dawudi, waasiga okuubhaya okutwara Maryamu, kwa okubha inda yaaye ayibhwene ku‑bhuturo bhwa Mwoyo Mweru. 21Ariibhura omwana wa echirume, na urimutoga Yeesu,#1:21 Yeesu. Obhugajuro bhwa risiina Yeesu ni ati, Raatabhugenyi Nyamuwanga kaachungura. kwa okubha oyo, niwe arichungura abhaanu bhaaye okusooka mu‑bhibhiibhi bhyebhwe.”
22Ejo joone ꞉jaakorekeene kutyo, korereki gukuumire omusango gunu Raatabhugenyi ꞉aayikire okutura ku‑muragi waaye ati,
23“Ringira, omuyarajuma arijira inda,
ariibhura omwana wa echirume.
Risiina ryaye bharimutoga Manweri.”#1:23 Ringira Iisaya 7:14.
Obhugajuro bhwa risiina eryo ni ati, “Nyamuwanga ari aamwi na eswe.”
24Jejefu ejire aarafya okusooka mu‑tiro, ˆnaakora rwa kutyo maraayika wa Raatabhugenyi ꞉aamuragiriiye. Jejefu ˆnaatwara Maryamu, 25nawe ꞉ataamaamire nage okukingira omwanya gunu Maryamu ꞉eebhuuye omwana waaye oyo. Jejefu ˆnaatoga omwana oyo Yeesu.
Currently Selected:
Mataayo 1: jit
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2023, Wycliffe Bible Translators, Inc. All rights reserved.
