Matɨyo 4

Haban̰ gɨybɨ Jesu

(Marg 1:12-13; Lug 4:1-13)

1Turnɔ di da Kumu golii orɨn̰ danayi duroy daldɨŋ, ɗe Haban̰ na gɨybii. 2Ban hay kɨbi wɔlɛ toyi-poɗɨn̰ duroy kɨɗɨn̰ ga woli gaŋ bɨ, wɔlɛ toyi-poɗɨn̰ duroy son̰do dɨŋ bɨ ɨni na, kurɔŋ leeyi. 3Ɨni na, Haban̰, Ba-gɨybe kɨɗɨn̰ ɨrga gusi bɨ yeyi hɨn̰: «Ji naa Kurɨn̰-Kumu leen̰ cɨndi na, aya noy bɨn̰ karɨn̰ orun̰əŋ ga kɛ le, ɗe bɨle mapan̰əŋ bɨn̰ an̰ dii.» 4Ama ban dɨboo cay nee yoo hɨn̰: «Magtubu di da Kumu di kan walge le, ye hɨn̰: “Na mapa pɨna ɗɔ ƴɔbɨ ma, ungo na kɨya dɔɔ poɗɨn̰ naŋ. Ama na kɔl gɨ andaŋ kɨbɨ Kumu le ma ungo kɨya somɨn̰-bɨra.”#4:4 Ayge na duroy: Deutéronome 8:3.»

5Ɨni na, Haban̰ orɨn̰ danayi bɨrɨŋ a cay ƴaa-di-gumu di woy dan̰ cɨndo dɨŋ, orɨn̰ danayi ayi sii gɨɗɨgɨ ƴaa-di-da-Kumu dɨŋ, 6bɨ yeyi hɨn̰: «Ji naa Kurɨn̰-Kumu leen̰ cɨndi na, jɨrbɨ dugo, kɨya gɨ magtubu gasɨn̰-kɔl di da Kumu ye hɨn̰: “Kumu kɨya aye noyi bɨn̰ ka-ƴɔbɛ kayi ga daa nii bɨ, kan kɨya ƴon̰ daa duroy kobɨge gɨŋ ɗɔɔ gɨ oru kɨya dɔgɛ tɨban̰ dan̰ ɨya naŋ.”#4:6 Ayge na duroy: Psaumes 91:11-12.» 7Jesu jɨga dɨboo cay nee, yoo hɨn̰: «Magtubu gasɨn̰-kɔl di da Kumu kalɨn̰ ma ye hɨn̰: “Ji na kɨya gɨwase kuduroy Ba-gulɔŋ Kumu naŋ.”#4:7 Ayge na duroy: Deutéronome 6:16.»

8Haban̰ ayi orɨn̰ danayi cay garma gɨ pɨna wo̰, gɨ sɨngɨɗɨ daa kɨvbɨj ɗaŋ coŋ, gɨlii dɔɔ-ƴaa di cay gɨsəŋ gaŋ nɔm dan̰ hɨnga ga ni gusoŋ-tɔgɛ kage, 9bɨ yeyi hɨn̰: «Hɨn̰ gɨ ji na pɨya gɨban̰ dugo tumonɨ bɨ n̰ɨrəŋ na, ɨŋ kɨya bɨn̰ hɨnga ga nee le nɔm.» 10Ɨni na, Jesu jɨga yoo hɨn̰: «Sa coŋ, Sidan! Kɨya wa magtubu gasɨn̰-kɔl gɨ da Kumu ye hɨn̰: “Na Ba-gulɔŋ Kumu pɨna hayi kəɗ kəɗ ma mɨn̰ kɨya n̰ɨrii bɨ, lɔɔ gɨye bii bɨ.”#4:10 Ayge na duroy: Deutéronome 6:13.» 11Ɨni na, Haban̰ ɗeeyi nee kɔ kɛgɛgɛ. Bɨ ga ma, ka-ƴɔbɛ ga daa ɨrgage gusi Jesu bɨ solge kardi dan̰ hɨnga.

Jesu ay te gɨye koyi a cay gɨsəŋ ga Galile

(Marg 1:14-15; Lug 4:14-15)

12Ƴomge Ja̰ dangay. Kɨɗɨn̰ ga Jesu je kɔl gɨ nee le na, ban say dor gusi a kɨɗɨn̰ ga nee gaŋ coŋ, orɨn̰ a cay gɨsəŋ ga Galile gaŋ. 13Ban ɗodɨ Najarɛt or sɔmɛ Kapɛrnɔm, cay ƴaa-di-gumu di woy bongi kuray gɨ gumu taa taa gɨ Galile a cay gɨsəŋ ga da te wɔɔ gɨ da Jabulo̰ bɨ, te wɔɔ gɨ da Nɛptali bɨ. 14Naa hɨn̰ wo̰ ma, kɔl gɨ da Ijay ba-yɔɔ-kɔl-gɨ-Kumu-ba-yɔɔ or kɨɗɨn̰di gɨŋ, ban ye hɨn̰:

15«Cay gɨsəŋ gɨ da te wɔɔ gɨ da Jabulo̰ bɨ, cay gɨsəŋ gɨ da te wɔɔ gɨ da Nɛptali bɨ,

Gɨyəŋ gɨ ni orɨn̰ jɨn̰ kuray gɨ gumu taa taa gɨŋ bɨ, cay gɨsəŋ ga woy kardi kuray gɨ Jurdḛ gɨŋ bɨ,

Galile di te kalaŋ ga toyge na Jubɨ naŋ somge nee bɨ, 16te kalaŋ ga somge duroy dɨlɨm dɨŋ le, solge kɨɗɨn̰ asɨn̰ ɗen̰ ɗen̰.

Kan ga somge a cay gɨsəŋ ga tɨma di cayge gaŋ,

Lee gɨ dɨlɨm ƴee kɨɗɨn̰ ɗɨgɨm le,

Kɨɗɨn̰ kɨya asɨn̰a ɗen̰ ɗen̰ cayge.»#4:16 Ayge na duroy: Esaïe 8:23–9:1.

17Ayɨn̰ toy wɔlɛdi gɨ nee gɨŋ le, Jesu ay te tɔgɛ bɛrnɛ ye hɨn̰: «Bɨlgɨŋ gɨye-lɔɔdɨgɨŋ kɨya wa dɔɔ-ƴaa di daa bugoŋ gusɨgɨŋ mɨnde ɨni.»

Jesu te ka-ure gusa won̰ge poɗɨn̰

(Marg 1:16-20; Lug 5:1-11)

18Wɔlɛ gɨ pɨna wo̰, Jesu gor a kɨbɨ kuray gɨ Galile gɨ gumu taa taa. Ban sol kalaŋ won̰ge sɔɔ ga na ka-karme ga ka-ure gusa. Simo gɨ tɨrɨmbalayi na Pɨyɛr bɨ, kurɨndi Andɨre bɨ. Somge dɨbge bura duroy kuray gɨ gumu taa taa gɨŋ, kɨya gɨ kan na ka-ure gusa. 19Jesu yege hɨn̰: «Kɨbagɨŋ karɨnɨ. Tumɔ kɨŋ na ka-ure gusa, ama haw kɛ na ɨŋ kɨya bɨlgɨŋ leen̰ ka-budɔlɛ kalaŋ, bɨ kɨŋ kɨya budolge ɗe kan ayɨn̰ gɨyəŋ gɨ da Kumu.» 20Kɨɗɨn̰di ga nee le bɨ, kan ɗege bura toge wɨn̰ag coŋ ayɨn̰ge gɨyəŋ kardi.

21Ban or tumɔ ɗaŋ dḛ nee ɨni na, ban sol kalaŋ ga ɗaŋ sɔɔ na ka-karme: Jag kurɨn̰ Jebede dan̰ kurɨndi Ja̰. Somge duroy koburo gɨ gumu gɨŋ pɨna dan̰ bayge Jebede, ɨre n̰ange bura toge. Ban teege. 22Bɨ kɔl gɨ kɨbɨna kɛ bɨ, kan ɗege koburo koge bɨ, bayge bɨ coŋ, kobɨn̰ge kardi.

Jesu gɨlɨn̰ kalaŋ hɨnga bɨ poɗɨ ka-hɔmɨn̰ɛ bɨ

(Marg 1:39; Lug 4:44; 6:17-18)

23Jesu gor a cay gɨsəŋ ga Galile gaŋ nɔm, gɨlɨn̰ kalaŋ hɨnga a duroy ƴaa-daye-di-da-Jubɨn̰əŋ gaŋ bɨ, teen̰ bɛrnɛ Kɔl-gɨ-Ɗari gɨ ojɨ cay dɔɔ-ƴaa di daa nii bɨ, poɗɨn̰ ka-hɔmɨn̰ɛ nɔm bɨ, poɗɨn̰ ka-modoŋ nɔm duroy karɨn̰ Ɨsɨrayɛl bɨ. 24Gusondi ye ƴee cay gɨsəŋ ga Siri nɔm, lee gɨ kalaŋ ɨrgan̰ge dan̰ ka-hɔmɨn̰ɛ bɨ, ga hɔmɨn̰ɛ gɨ toy kan̰di kan̰di leege mɨrɨn̰tɨn̰i bɨ: Kan ga turnɔ ga ɨsɨndəŋ woy kuduroyge bɨ, ga jɨmgɨl leege bɨ, ka-mɨraye bɨ. Ban poɗɨge nɔm. 25Lee gɨ dɨmdɨrdi kalaŋ kobɨge kardi. Ga saygage a cay gɨsəŋ ga Galile bɨ, ga saygage a cay gɨsəŋ ga teegege cay ƴaa-ga-gɨmɨdəŋ mɔjɨ bɨ, ga saygage a cay ƴaa-di-gumu di Jerusalɛm dɨŋ bɨ, ga saygage cay gɨsəŋ ga Jude dan̰ cay gulɔŋ nɔm ga woy kardi kuray gɨ Jurdḛ gɨŋ bɨ.

Currently Selected:

Matɨyo 4: gab

ማድመቅ

Copy