YUHANI 2
2
Harusi ɗagoni Kanaani
1iSuku ya raru ɓaanda ya v̄ale, v̄uka harusi ɗagoni Kanaani hari mwa liɓavu la Galilaya. Mayahe wa Insa aka v̄ale, 2na Insa aka akariɓisiwa wajau hari mwa iharusi v̄umoja na maswihaɓa yahe. 3Iv̄o maji ya zaɓiɓu yaka yakoma, mayahe wa Insa amuambia: «Kawasina tsena maji ya zaɓiɓu.»
4Insa amudjiɓu: «Mama, manatrini uniambiao wami trongo iyo? Wakati wangu raha kawapara.»
5Sa ile mayahe aambia mayeleshezi yaka v̄ale: «Namufanye piya izo atsomuambiaonizo.»
6Na v̄ale v̄uka mitsungi sita ya ɓwe, yakorumilwa na Mayahudi wamotawaza. Kula moja uka uv̄ingi ziv̄imo#2:6 ziv̄imo: Yaãni, litiri miya jauleni. mbili ata traru.
7Sa ile Insa awaambia: «Namujadze maji mitsungi yiyo.» Wayijadza ata yakoja yitrise.
8Amwesa awaambia: «Namuɓuwe, muv̄inge ha ragisi wa ikaramu.»
Ɓas, watru wale wayav̄ingi. 9Ragisi wa ikaramu ule alaulia maji yale yagaudziwa maji ya zaɓiɓu, wala kakojua v̄ahali yalawa, ɓadi mayeleshezi yale ɗe yakojua. Sa ile amuhiri ɓwana-harusi, 10amuambia: «Watru piya uyeleshea raɓuzi maji ya zaɓiɓu mazuri, ata neka watru wano ha nguvu ɗe wayelesheao yale tsi mazuri. Ɓadi wawe uhetsi yamazuri yanu ata upara av̄asav̄anu!»
11Iyo ɗe iãlama ya midjuza ya handra yahe Insa aifanya ɗagoni Kanaani hari mwa liɓavu la Galilaya. Ha izo av̄enusa utukufu wahe, na maswihaɓa yahe yamuamini.
12Ɓaanda ya v̄ale ashuku ɗagoni Kafarnaumu v̄umoja na mayahe, wananyahe watruɓaɓa na maswihaɓa yahe, ɓadi kawaɓaki hule suku nyengi.
Insa asuĩdzia maɓahazazi moni mwa iNyumba Ndzitwaharifu
(Mat 21:12-13; Mar 11:15-17; Luk 19:45-46)
13Wakati wa Unahanizi wa uMutupio|unahanizi wa yaMayahudi uka ukuruɓia; ɓas, Insa ahea Yerusalemu. 14Na moni mwa iNyumba Ndzitwaharifu|Nyumba Ndzitwaharifu apara waudzizi-nyombe, maɓariɓari, na ndiwa, na waɓadilizi-marike waka waketsi v̄ale. 15Ɓas, arenge hamba, aifanya sapa-sapa, amwesa awaĩdzia piyawo Nyumbani v̄ale, atrusu na maɓariɓari yawo na nyombe zawo. Tsena atsanya turuturu za waɓadilizi-marike wale, na uv̄indrusa zimeza za hazi zawo. 16Aambia raha waudzizi ndiwa wale: «Namutowe zitru zini v̄anu! Musufanye iNyumba ya Ɓaɓangu amba nyumba ya ɓiashara!»
17Sa ile maswihaɓa yahe yanahana amba v̄uangihwa: «iHuɓa nilionayo na inyumba yaho, mauri moro univudzao.»
18Ɓas, Mayahudi wamudzisa: «Ãlama trini ya midjuza utsorionesao, ike udhiɓitifu amba utsojua ufanye trongo zini?»
19Insa awadjiɓu: «Namukomowe nyumba ndzitwaharifu iyo, na wami hari mwa suku traru, nitsoimidza.»
20Sa ile yaMayahudi yamuambia: «iNyumba Ndzitwaharifu ini irenge maha aruɓaini na sita iyo uundrwa, na wawe amba hari mwa suku traru utsoshindra uimidze?» 21Ɓadi inyumba ndzitwaharifu Insa akoirongoa, ɗe umwili wahe. 22Ɓas, ɓaanda aregezewa hayi ulawa ha uwafu, maswihaɓa yahe yanahana amba aka arongoa trongo ile; na v̄ale ɗe waamini uMuangishio Mutwaharifu, na urongozi ule Insa aurongoa.
Insa ujua piya zilio rohoni ha wanadamu
23Wakati Insa aka Yerusalemu hari mwa umusherehio wa Unahanizi wa Mutupio, wengi wa watru waja wamuamini uona yawo ziãlama za midjuza akozifanya. 24Ɓadi Insa, waye kakana uaminifu na wao, mana akojua namuna yawo piya. 25Kayaka amba paka ajudziwe hali za mwanadamu, mana waye-waye akojua zilio moni ha mwanadamu.
Currently Selected:
YUHANI 2: swb
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021, Wycliffe Bible Translators, Inc. All rights reserved.
