YUHANI 11
11
Insa asumuregeza hayi Lazaro
1V̄uka mutruɓaɓa akohiriwa Lazaro aka aremwa na uwaɗe. Aka wa shi Ɓaitihaniya, ɗago la Mariama na mwananyahe mutrumushe Marta. 2Mariama uwo ɗe aka amutria Raɓi marashi, amwesa av̄angua mindru yahe ha nyole zahe. Na v̄ale mwananyahe mutruɓaɓa Lazaro ɗe akokodza. 3Ɓasi washe wananya waili wale wamuv̄eleshedzea Insa haɓari ini: «Raɓi, mwandzani waho asukodza.»
4Ukia yahe haɓari ile, Insa arongoa: «Uwaɗe uwo kautsomuula, ɓadi uja ile uv̄enuwe utukufu wa Mungu, pare uMwana wa Mungu atukuziwe ha indzia yawo.» 5Na Insa akomuv̄endza Marta, na mwananyahe mutrumushe, na Lazaro. 6Ne ukia yahe amba Lazaro akokodza, aɓaki v̄ahali aka muda wa suku mbili raha.
7Ɓaanda ya v̄ale aambia maswihaɓa yahe: «Narirudi Yudeya.»
8Sa ile maswihaɓa yahe yamuambia: «Fundi, tsi hale v̄anu yaMayahudi|Mayahudi yakotsaha yahuvutsiye mawe ɗe utsahao wendre oho raha?»
9Insa adjiɓu: «Hali sa za mutsana tsi kumi na mbili? Neka mutru asendra mutsana, waye kakwala, mana asuona inuru ya lidunia lini. 10Ɓadi neka mutru asendra uku, waye ukwala, mana inuru kaisi moni hahe.»
11Ɓaanda arongoa zile, awaambia: «Mwandzani watru Lazaro asindzia, ɓadi nisendra namumidze.»
12Maswihaɓa yahe yamuambia: «Raɓi, neka asindzia, v̄av̄o atsov̄ona.» 13Na Insa akorongoa ɗe ufa wa Lazaro, ɓadi maswihaɓa yahe wakofikiri amba akorongoa trongo ya tsindzi.
14Ɓasi Insa awaambia dhwahiri: «Lazaro afu. 15Ɓadi ha siɓaɓu ya wanyu tsifurahi iv̄o tsaka oho, pare muamini. Narendre ramupare.»
16Ɓas Tomasi, ule akohiriwa Mbiliju, aambia maswihaɓa wanyahe wale: «Narendre wajau, pare rife v̄umoja na waye.»
17Amowaswili hule, Insa apara amba Lazaro madza aka kaɓurini hari mwa suku nne. 18Ɓaitihaniya ika kariɓu na Yerusalemu, hari mwa ziv̄imo#11:18 ziv̄imo: iShigiriki isurongoa stadia kumi na tsano, amba kilometera traru jauleni. kumi na tsano jauleni. 19Na Mayahudi mengi yaka yaja v̄ale, pare watrulidze iroho ya Marta na Mariama ha siɓaɓu ya wafati wa mwananyawo mutruɓaɓa. 20Wakati Marta akia amba Insa akoja, andre amupara, na Mariama aka aketsi ɗagoni.
21Ɓas, Marta amuambia Insa: «Raɓi, na djeli uka v̄anu, itsoka amba mwananyangu kafa. 22Ɓadi nisujua amba ata av̄asa, Mungu atsohukuɓalia kula trongo utsomumiaoyo.»
23Sa ile Insa amuambia: «Mwananyaho atsoregea hayi.»
24Marta amudjiɓu: «Tsijua amba atsoregea hayi wakati wa umuregezeo hayi wa isuku ya mwiso.»
25V̄ale Insa amuambia: «Wami ɗe umuregezeo hayi na uhayati. Monyewe uniamini, atsoẽshi, wala ukana asuja afariki. 26Na mutru yotsi aẽshio tsena asuniamini, katsofa ata idahari. Hali usuamini trongo iyo?»
27Amudjiɓu: «Ewa Raɓi. Nisuamini amba wawe ɗe uMutsahuliwa|Mutsahuliwa, uMwana wa Mungu, uwo akolazimu aje ulemenguni.»
28Ɓaanda arongoa trongo zile, andre amuhiri mwananyahe Mariama, amuambia v̄olev̄ole: «Fundi a v̄anu, asuhuhira.» 29Amokia trongo ile, Mariama ahimi ha uharaka, andre amupara. 30Na v̄ale Insa raha kaka angia ɗagoni, ɓadi aka hule Marta aka amupara. 31Mayahudi yaka ha Mariama wamutrulidze iroho, umuona yawo iv̄o ahima ha uharaka alawa, wamuɗungu, wakofikiri amba akwendra kaɓurini andre alile.
32Mariama uwaswili yahe v̄ahali Insa aka ata amuona, awu mindruni hahe, amuambia: «Raɓi, na djeli uka v̄anu, itsoka amba mwananyangu kafa.»
33Wakati Insa amuona amba alili, waye na Mayahudi yale yaka yamuɗunga, aremwa na huzuni iroho, tsena asikitiha. 34Ɓas, adzisa: «Mumutria hav̄i?»
Wamudjiɓu: «Raɓi, ko uone.»
35Insa alili.
36Ɓas, Mayahudi yale yarongoa: «Musuona kiasi akomuv̄endza!»
37Ɓadi wasalia hari mwawo wakorongoa: «Waye aɓua yamatso ya mufa-matso, kakoshindra afanya namuna amba mutru unu asufe?»
38Ɓas, Insa aremwa na huzuni raha rohoni wakati awaswili kaɓurini|kaɓuri. Lika gumbo latsimbwa hari mwa mulima wa ɓwe, na umulongo uka uɓalwa na ɓwe. 39Insa arongoa: «Namutowe liɓwe!»
Sa ile Marta, mwananyahe wa umufu, amuambia: «Raɓi, madza asunuka. Leo suku ya nne.»
40Insa amudjiɓu: «Afa tsahuambia amba neka usuamini, utsoona utukufu wa Mungu?»
41Ɓas, watowo liɓwe. Sa ile Insa adzua yamatso, arongoa: «Ɓaɓa, nisuhuhimidia iv̄o wanivulishia. 42Hanguju nakojua amba ha dahari wawe univulishia. Ɓadi tsilagua ha siɓaɓu ya idunia yanizingidzia, pare waamini amba wawe ɗe waniv̄eleha.»
43Ɓaanda ahisa urongoa zile, ha ji lendza nguvu arongoa: «Lazaro, ko!» 44Mutru ule aka afa alawa, yimindru na yimihono yika yiv̄ambiwa zitamba, na isura ika ifinikiha na nguo.
Ɓas, Insa awaambia: «Namumuɓuliye, mumulishe andre.»
Mayahudi wasupanga wamuule Insa
(Mat 26:1-5; Mar 14:1-2; Luk 22:1-2)
45V̄ale wengi hari mwa Mayahudi waka waja ha Mariama waona trongo Insa azifanya, wamuamini. 46Ɓadi ɓaãdhwi yawo wandre wapara watru wa ishama ya Mafarisayo, wawaambia trongo zile Insa azifanya. 47Ɓas, yaMatolezi Maɓole ya Masadaka|Mutolezi-Masadaka na yaMafarisayo wahiri uMungulidzano Muɓole|Mungulidzano wa Waɓole.
Wawaambia: «Ritsofanya trini? Mana mutru unu asufanya ãlama nyengi za midjuza. 48Neka risumulisha afanye, watru piya watsomuamini, amwesa Maromu|Romu watsoja waangamidze v̄ahanu v̄utwaharifu#11:48 v̄ahanu v̄utwaharifu: Yaãni, iNyumba Ndzitwaharifu ya umuãɓudu Mungu. v̄watru na inishani yatru.»
49Ɓadi moja mengoni mwawo, ne ɗe Kayafasi aka uMuɓole wa yaMatolezi-Masadaka mwaha ule, awaambia: «Wanyu kamusuelewa ata trongo! 50Kamusuelewa amba ya afudhwali hanyuju mutru moja ufa ha ufayidisha uumati, ne inishani piya yasuangamiye.»
51Na v̄ale karongoa trongo iyo ha iwaye yahe, ɓadi ɗe iv̄o aka uMuɓole wa yaMatolezi-Masadaka mwaha ule, akorongoa shi mutrume amba Insa akojofa ha ufayidisha inishani, 52wala tsi ɗe inishani yawo tu, ɓadi tsena pare atsanganise piya uwana wa Mungu watsambaliha, wafanyishihe shitru moja. 53Rangu isuku ile waãzimia wamuule Insa.
54Ɓasi ha izo Insa kakozingidza tsena ha hadhwira ha yaMayahudi, ɓadi alawa v̄ale, andre mukaɓala kariɓu na lipadza, hari mwa ɗago lihiriwao Efraimu. Aɓaki v̄ale na maswihaɓa yahe.
55Na v̄ale umusherehio wa Unahanizi wa Mutupio|unahanizi wa Mayahudi uka kariɓu. Watru wengi wa tsiju v̄ale wahea Yerusalemu kaɓula ya uUnahanizi, ile wadzitwaharishe. 56Ɓas, wakomuzunguha Insa na udzisana moni na iNyumba Ndzitwaharifu: «Musuona jeje? Katsoja hari mwa umusherehio?» 57Na yaMatolezi Maɓole ya Masadaka v̄umoja na yaMafarisayo waka watoa ãmuri amba mutru yotsi atsojuao v̄ahali Insa alio awaambiye, pare wamusike.
Currently Selected:
YUHANI 11: swb
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021, Wycliffe Bible Translators, Inc. All rights reserved.
