YUHANI 10
10
Mufano wa mutsunga mwema
1«Nisumuambiani ha kweli, mutru kasungia moni na livala la maɓariɓari ha uv̄ira mulongoju, ɓadi ashiao ha uv̄ira v̄ahanu v̄wangina, uwo mwidzi, tsena murav̄izi. 2Ɓadi uwo angiao ha uv̄ira mulongoju, waye ɗe umutsunga wa yamaɓariɓari. 3Mugogezi-mulongo umuɓulia, na yamaɓariɓari uvulishia ji lahe; waye uhira maɓariɓari yahe ha madzina yawo, uyav̄inga v̄ondze. 4Ɓaanda ahisotoa v̄ondze piya yahe, waye uyakilia mbeli, na yamaɓariɓari umuɗunga, mana yasujua ji lahe. 5Kayatsoɗunga mudjeni, ɓadi yatsomutrala, mana yao kayaji ji la wadjeni.» 6Insa awaambia mufano uwo, ɓadi kawakoelewa izo akowaambiazo.
7Amwesa Insa awaambia raha: «Nisumuambiani ha kweli, wami ɗe umulongo wa yamaɓariɓari. 8Piya wao waja kaɓula ya wami, wao waidzi, tsena warav̄izi. Ɓadi yamaɓariɓari kayawavulishia. 9Wami ɗe umulongo. Mutru angiao ha univ̄ira, uwo atsohuyiwa. Atsongia na ulawa, amwesa atsopara za uɗya. 10Mwidzi, waye kaja neka tsi ahiɓe, aule, aangamidze. Wami tsija ile maɓariɓari yakane uhayati, tsena yakanewo ha uwengi.
11Wami ɗe umutsunga mwema. Mutsunga mwema udzitoa fidia ha siɓaɓu ya maɓariɓari yahe. 12Ɓadi mutru aadjiriwa amba waye tsi mutsunga, wala tsi monyewe maɓariɓari yale, amoona amba mbwa nyeha isuja, waye ulisha yamaɓariɓari, ne atrale; na imbwa nyeha uyangilia, na uyatsambadza. 13Mutru ule utrala, mana awadjiriwa, wala yamaɓariɓari kayamutria shuhuli.
14Wami ɗe umutsunga mwema. Wami ujua maɓariɓari yangu, na yao unijua, 15mauri ɗe inamuna Ɓaɓa anijuao, na wami nimujuao Ɓaɓa. Nisudzitoa fidia ha siɓaɓu ya maɓariɓari yangu. 16Tsina raha maɓariɓari yangina, yalio amba tsi ya livala lini. Yao wajau, ilazimu niyav̄inge; yatsovulishia ji langu. V̄av̄o v̄utsoka ɓangwe moja tu, na mutsunga moja tu. 17Ɓaɓa univ̄endza, mana nisuv̄a uhayati wangu, ile niurenge tsena. 18Kav̄u mutru anitoleawo, ɓadi nisuuv̄a wami monyewe. Tsina ushindzi wa uuv̄a, tsena tsina ushindzi wa uurenga raha. Iyo ɗe iãmuri naipara ha Ɓaɓangu.»
19V̄ungia tsena mufarikishano ha yaMayahudi ha siɓaɓu ya marongozi yale. 20Wengi mengoni mwawo wakorongoa: «Ana shetwani, uwo mwendza masera! Manatrini mumuvulishiao?»
21Ɓadi wangina wakorongoa: «Yao tsi marongozi ya mwendza shetwani. Hali shetwani ushindroɓua matso ya wafa-matso?»
Mayahudi yasumuhara Insa
22Wakati uka uwaswili wa usherehi uMutamanio wa iNyumba Ndzitwaharifu ɗagoni Yerusalemu. Uka wakati wa ɓaridi. 23Na Insa akotembea moni na iNyumba Ndzitwaharifu, uv̄andre uhiriwao Ɓaraza la Sulaimana. 24Mayahudi yamuzingidzia, yamuambia: «Ata lini utsorilembedzao ziroho? Neka wawe ɗe uMutsahuliwa|Mutsahuliwa, riambiye dhwahiri!»
25Insa awadjiɓu: «Tsimuambiani, ne kamusuamini. Zitrendro nizifanyao ha lidzina la Ɓaɓangu zisunilawia ushahidi. 26Ɓadi wanyu kamusuamini, mana kamusi hari mwa maɓariɓari yangu. 27Maɓariɓari yangu uvulishia ji langu. Wami uyajua, na yao uniɗunga. 28Nisuwav̄a uhayati mukamilifu wa daima. Kawatsoparwa na uangamifu ata idahari, wala kav̄u mutru atsoniv̄osheaowo muhononi hangu. 29Ɓaɓangu aniv̄awo, waye muɓole#10:29 muɓole: V̄wa ɓaãdhwi ya zio za Shigiriki zirongoao: Iyo Ɓaɓangu aniv̄ayo, iyo ɓole rahana zasalia piya. rahana piya, amwesa kav̄u mutru ashindrao awatowe muhononi ha Ɓaɓa. 30Wami na Ɓaɓa, wasi moja.»
31Sa ile Mayahudi yarenge mawe raha, wakotsaha wamuvutsiyewo. 32Insa awaambia: «Tsimuonesani zitrendro ndjema nyengi zalawa ha Ɓaɓangu. Ɓas, musuja munivutsiye mawe ha siɓaɓu ya iv̄i?»
33Mayahudi yamudjiɓu: «Tsi ha siɓaɓu ya shitrendro ndjema ɗe ritsahao rihuvutsiye mawe, ɓadi ɗe iv̄o wamukufuru Mungu, mana wawe mwanadamu usudzifanya Mungu.»
34Insa awadjiɓu: «Hali kayaangihwa moni na iSharia yanyu amba Mungu arongoa: ‹Wanyu miungu›? 35Ɓas, iSharia ihiri watru wav̄eleshedzewa urongozi wa Mungu amba wao miungu, na uMuangishio Mutwaharifu kaushindri uv̄indrusiwa. 36Na wanyu musurongoa amba uwo Ɓaɓa amutwaharisha, amuv̄eleha ulemenguni, asumukufuru Mungu ha iv̄o narongoa: ‹Wami Mwana wa Mungu›. 37Neka tsisufanya zitrendro za Ɓaɓangu, v̄av̄o musuniamini. 38Ɓadi neka nisuzifanya, wala ukana amba kamusuniamini wami, namuamini zitrendro zile, pare mujuwe amwesa muelewe, amba Ɓaɓa a moni hangu, na wami tsa moni ha Ɓaɓa.» 39Ɓas, v̄ale wakodjereɓu tsena umuzia, ɓadi awalawia mihononi hawo.
40Amwesa Insa alawa, ashia tsena nyambo ya umuro wa Jurdani, v̄ahanu Yahaya|Yahaya Muɓaĩshizi aka aɓaĩsha|uɓaĩsha mara ya handra, aɓaki v̄ale. 41Watru wengi wamujilia, wakorongoa: «Yahaya kafanya ata ãlama ya midjuza, ɓadi kula airongoa ju la mutru unu, ika kweli.» 42Na v̄ale wengi wamuamini Insa.
Currently Selected:
YUHANI 10: swb
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021, Wycliffe Bible Translators, Inc. All rights reserved.
