Pulim 7
7
Na-fɔrɔ di logo baŋa maama
1 Baŋa Wɛ déem ma ta de Noah o we, “Ja n diga tiina bam maama se á zo nabworo kom wone, se logo baŋa nabiina maama wone, nmo yerane mo ye nɔn-ŋom. 2Ja vara balo na maŋe de kaanem to dwi dem balei balei kuni barepɛ, ye ba ye wo-bɛ de wo-kana n woli da se á zo nabworo kom wone. Ko maa ná ye vara balo na wo maŋe de kaanem to, se n ta‑n jege banto dwi dem wo-bɛa dedoa de wo-kana dedoa. 3Daa‑n ta ja zuna bam dwi maama wo-bɛ de wo-kana n ja n zo da. Ba de jege se ba taa ye balei balei kuni berepɛ. Konto mo wó pa se woŋo maama dwi yé jei tega baŋa ne. 4Kokuri, ko ta gɛ da yarepɛ mo se amo toŋe do-fɔrɔ se ko ba tega kam baŋa ne. Doa kam wó ne da finna mo, wea dedaane tete maama, se na-fɔrɔ ba ko chwooli woŋo kolo maama amo na kea ye ko ŋwe to ko ja jei.”
5Noah ma ke kolo maama Baŋa Wɛ na pɛ‑o ni se o ke to.
6Noah déem ye bena bia yaredo mo ye do-fɔrɔ kom ba tega kam baŋa ne. 7Wonto de o bu-baara, de ba kaana, de o kaane wom maama ma da daane ba zo nabworo kom wone, se ba lu na-fɔrɔ kolo na beene to. 8-9O ma sɛ Wɛ ni ye o ja varem dwi maama, ko woli de zuna dwi maama, balo na maŋe de kaanem to, de balo na wo maŋe de kaanem to, o ja o zo nabworo kom wone. O ta jaane tega-veila de wo-korro mo o woli da o zo. Wonnu tento maama o na jaane o zo da to ye balei balei mo, wo-bɛ de wo-kana. 10Konto kwaga ne, da yarepɛ na yi to mo do-fɔrɔ bobo se ka taa nena tega kam baŋa ne.
11Bene delo ne Noah na ye bena bia yaredo (600) to mo na taga ba nwoŋi tega ne. Wɛyuu kom de maa chuura de na-fɔrɔ. Bene dem konto chane selei chana kam da fuga-yarepɛ dɛ ne mo wonnu tento maama kea. 12Doa kam maa nena konto da finna, wea de tete maama ye ka ba kwora. 13Dento dɛ dem mo Noah de o bia, Sɛm, de Ham, de Jafete, ko woli de ba kaana batɔ bam maama de Noah kaane wom zo nabworo kom wone. 14Vara dwi maama, kago-vara dwi dwi dedaane sɔŋɔ vara bam dwi dwi ko ta woli de zuna bam dwi dwi dedaane tega-veila de wo-korro dwi maama de déem maa tɔge te wora. 15Woŋo kolo dwi maama na jege ŋwea to déem ma ba Noah tei ye te zo nabworo kom wone, telei telei. 16Vara de wonnu telo dwi maama déem nam na zo nabworo kom wone to déem ye wo-bɛ de wo-kana mo, nenɛɛne Wɛ na we Noah ke tei to. Baŋa Wɛ déem ma pe-ba o yage da.
17Da finna yam wone, doa kam lɛɛre ka lwoi konto mo chaa-chaa, ye ka ba kwora. Na-fɔrɔ kom ma zaŋe wɛɛne ye ko pa se nabworo kom puki ko dɔge na bam baŋa ne. 18Na bam laam ma tiini ba di baŋa ba gaale, ko ma pa se nabworo kom dɔge na bam baŋa ne ko via. 19Na bam déem ta na fɔge ba diini baŋa baŋa to, ba ma kwoli peo kolo na dɔra ko gaale peero tem maama to. 20Na bam ta na fɔge ba diini to, ko pɛ se peero tem baŋa kwoli de na, ye na bam baŋa dedɔrem laŋa maŋe de jatwogo de noa ni maŋem kuni fuga-benu mo. 21Kolokolo déem daa maa wo daare logo kom baŋa ne. Nabiina de vara maama, de zuna maama, de tega-veila ko woli de wo-korro maama ma te. 22Woŋo kolo maama na wo tega kam baŋa ne ye ko sii to déem ma te. 23Baŋa Wɛ déem pɛ se woŋo kolo dwi maama na ŋwe to mo saare tega baŋa ne, nabiina de vara de tega-veila de wo-korro ko ta woli de zuna balo na kare ba jaane wɛyuu ne to de. Noah yerane déem mo daare, o de balo maama na tɔge ba wo nabworo kom wone to.
24Na bam ma pɛɛle tega kam maama ko maŋe de da bi de finnu (150).
Currently Selected:
Pulim 7: KBG
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2020, Ghana Institute of Linguistics, Literacy and Bible Translation (GILLBT)
