ลูกา 24
24
เหย่ซู่ครี๊ เซอเพร กาคยา เด๊อ เตเซอ
(มัทธิว ๑๘:๑-๑๐ มาระโก ๑๖:๑-๘ ยอห์น ๒๐:๑-๑๐)
1ม๊อเนอ โซซว๊าเตอเนอ กูลู่เล๊อ เตอเนอ เบ๊อะเหมาะลีโรมื่อ เบ๊อะเนอ, เพรเหมาะ เออเต๊เห่ พย๊าหนิ เทอโนมื๊อ เด๊อ เหย่ซี ตี๊หรี่แตแร หนื่ออื่อ เฮ๊อ เออเต๊เห่ เร๊อ อา แฮ แลแค เด๊อ โลขุ. 2เร๊อ หล่อ เด๊อ อู ถู่ลอบี๊ ลู เร๊อ โลกู เนอเตเมเนอ, เหย่ซี แม๊เถอะ เร๊อ อู ถู่ลอตาพา จว๊าแก ลู. 3เหย่ซี โนแม๊ ตื๊อดื่อเรอ อา แม๊เถอะ ปา เหย่ซู่ อาโล โต่. 4เบ๊อะเหย่ซี ก๊อถ่อ เตเน อาทวาแถ่ ฮู๊เออ เบ๊อะเนอ, แกแย เด๊อ อา กือแซ๊ เห่อจ่า เต๊อเค่อเตเค ซิเนอ โอ่โลแถ่คย๊า เป่ เหย่ซี เร๊อ อา แฮก๊อถ่อโอ่ เด๊อ เหย่ซี ช๊า. 5เพรเหมาะ เออเต๊เห่ ซิอิเช ตาลว๊าซิลือ เร๊อ อา แด๊งือแล เร๊อ งอตีกลี๊ ตาลอ อาเป๊เส่ เด๊อ เห่ขุ, เร๊อ แกแย เออซิเนอ เฮ๊ เหย่ซี เน๊อ, “ซี จว๊าแม๊ปู แกแย เซอเพร เด๊อ แกแย เซอ เต๊เห่ อาเกล เมเต? 6เหย่ซู่ โอ่ปา เบ๊อะเออ โต่ เฮ๊อ, อา ก๊อถ่อ เซอเพร กาคยา เฮ๊อ. เตเนแถ่โต่เบ่ คยาแซ๊ แลแค เบ๊อะอา โอ่ เด๊อ กาลิลีเก่ เบ๊อะเนอ เร๊อ อา เฮ๊โฉ่แก โทเฮ๊อ ซี โหง่ เนอเต๊เห่เนอ.#มัทธิว ๑๖:๒๑, ๑๗:๒๒-๒๓, ๒๐:๑๘-๑๙, มาระโก ๘:๓๑, ๙:๓๑, ๑๐:๓๓-๓๔, ลูกา ๙:๒๒, ๑๘:๓๑-๓๓ 7‘แกแย อาพู๊ หม่าเฮ๊อ แวเออ, อู เก่ เด๊อะตาแก แว เด๊อ แกแย เตซื๊อพู๊ เต๊เห่ อา กู๊ยากู ปา. อู เก่ มือเซอแถ่ แว เด๊อ อี๊ถื่อดีเต่ โล ปา, เร๊อ เบ๊อะโซเนอ เตอเนอ ปาเนอ, แว เก่ ก๊อถ่อ เซอเพร กาคยา คยาแซ๊ ปา.’” 8เออโตโพ๊เรอ เพรเหมาะ เต๊เห่ ซิเหน่แถ่โต่เบ่ คยา อา เตเฮ๊โฉ่ หนื่ออื่อแก เนอเต๊เห่.
9เร๊อ เหย่ซี เถ่กาแก เด๊อ อาหี่ เร๊อ อา กาแด๊โฉ่ เป่ ลอ เตหรี่แตแก เออ เร๊อ เพรโด่แนพู๊ เต๊เห่ เช๊อเตเพร เออเนอ เร๊อ แกแย เด๊อ อาโร เด๊อ อา โอ่เกอ เร๊อ เหย่ซี ล๋อ ปลี เบ๊อะเนอ เต๊เห่. 10เพรเหมาะ เออเต๊เห่ หม่า หม่าเฮ๊อ แกแย มักดาลา ดอกูโหมะ เหมาะมารีย์, โหมะโยอันนา เร๊อ คูยากอบ อาโหมะ โหมะมารีย์ ซีเนอ เต๊เห่ เฮ๊อ. เหย่ซี เออเต๊เห่ เร๊อ เพรเหมาะ เด๊อ อาโร เต๊เห่ แด๊โฉ่โล เป่ เพรโด่แนพู๊ เต๊เห่ เร๊อ เตทวาแถ่ เออเต๊เห่. 11หม่าแน๊เรอ เพรโด่แนพู๊ เต๊เห่ เออเต๊เห่ เตเน แลแค เด๊อ เพรเหมาะ เออเต๊เห่ เฮ๊บูเฮ๊บย่า แพ๊ อาขว่าอาคยา, อา หยื่อเอ่ เกอ เหย่ซี โต่. 12หม่าแน๊เรอ คูเปโตร ก๊อถ่อแกล่แฮ เด๊อ โลขุ เร๊อ เบ๊อะอา แฮงอแม๊โจ โน เบ๊อะเนอ, อา แม๊เถอะ ตื๊อ อิเก แบ๊ปลีทู เนอต๊าบ่า แพ๊. อา แฮแม๊ โท ฮู๊เนอเร๊อ อา กาคยา คยาแซ๊ เด๊อ หี่. อา จว๊าทวาแถ่ โต่ ฮู๊เออ เมเต อา เตเน เร๊อ อา คย๊าอายื๊อ แหน่เจ๊อ.
แกแย เต๊เห่ จว๊า เด๊อ ดอเอมมาอูส
(มาระโก ๑๖:๑๒-๑๓)
13เบ๊อะเนอเตอเนอ เฮ๊อ, เหย่ซู่ อา โคเจ่ ซิเนอ จว๊า เด๊อ ดอเอมมาอูส เด๊อ อา โอ่ ยา เร๊อ วีเยรูซาเล็ม หม่า อา ผื่อ โอ่ เช๊อตีกี๊โล๊. 14เร๊อ เหย่ซี โด่แนจว๊า เกอ เร๊อลู เร๊อ ล๋อ เตเมทวาแถ่ โทเฮ๊อ อาหรี่อาแก เออเนอเต๊เห่. 15เบ๊อะเหย่ซี เฮ๊เบ่โด่แน เกอเร๊อลู เบ๊อะเนอ, เหย่ซู่ แฮผื่อเกอ เด๊อ เหย่ซี อา โอ่ เร๊อ อา จว๊า ผรว่า เกอ เร๊อ เหย่ซี. 16เหย่ซี แม๊เถอะ ลู ตื๊อดื่อเรอ อา ซิเง แลแค ลู โต่.
17เหย่ซู่ เฮ๊ เหย่ซี เน๊อ, “ซี เฮ๊เบ่โด่แนจว๊า แคร๋ ลู เร๊อ เตหรี่เตแก อิเตเต?”
เออโตโพ๊เรอ เหย่ซี ก๊อถ่อโอ่โก๊ แลแค เร๊อ เหย่ซี เป๊เส่เงเนอ, อา ซิเปลซิหย่อ ลอปลี เจ๊อ. 18เบ๊อะเนอ อาเกล เตเพร เด๊อ อามุย เร๊อ คูคาเลโอปัส เออเตเพรเนอ อา แด๊เฮอ ลู เน๊อ, “เด๊อ วีเยรูซาเล็ม อากู เออเนอ, แกแย ทวาซีเผร่ หม่า อา โอ่แน๊ แพ๊ตื๋อ เนเตเพร แหน่ เฮ๊อ. ป่าเฮ๊โอเฮ๊หนื่อเนอ เร๊อ อู เมแคร๋ หม่าอิเต เนอหม่า เน ซิเง เกอ แหน่ อู เตอเจ๋อ โต่ แอ?”
19เร๊อ เหย่ซู่ เแด๊เฮอ ลู เน๊อ, “อู เมแคร๋ อิเตเออ?”
เร๊อ เหย่ซี เฮ๊ฉื่อ ลู เน๊อ, “หม่าแหน่เฮ๊อ วีนาซาเร็ธอาพู๊ เหย่ซู่ อาหรี่อาแก เนอ กอก๋อ. อา หม่า เพรโพร เตเพร. อา เตเฮ๊เบ่เฮ๊โช เร๊อ อา เตเอ่เตแร เด๊อ จอแปแหร่ เร๊อ แกแย ล๋อ ปลี อาเป๊เส่เง เนอ, อา โอ่ เร๊อ เตโพรเตเตอเรอ เจ๊อ. 20แซ่ฮู๊ เป เพรหลู่แต ทวาดุทวาเต เต๊เห่ เร๊อ เป แกแยดุ เต๊เห่ เก่ เด๊อะเฮอ เมจากาคยา เซอ แก ลู อาเงเนอ, อา เด๊อะตาแก ลู เด๊อ คุ๊ยปีลาต อา กู๊ยากู เร๊อ อา มือเซอแถ่แก ลู เด๊อ อี๊ถื่อดีเต่ลู. 21หม่าแน๊เรอ เป แม๊ชือ ซิเลหนิ อา เร๊อ อา เก่ เมแลเปล๊กา อิสราเอลพู๊ เต๊เห่ ปา. ฮู๊เนอโทโต่, เออเตอเนอหม่า เตเมทวาแถ่ อาเหน่ โอ่บาเฮ๊อ โซเนอ เฮ๊อ. 22เพรเหมาะ เด๊อ เปเกล เต๊เห่เนอ, เหย่ซี แฮ โรมื่อ แลแค เด๊อ โลขุ เร๊อ อา กา เฮ๊คย๊าเฮ๊ยื๊อ ลอปลี เป. 23เมเตเฮ๊เรอ เหย่ซี แฮ เร๊อ อา แฮ แม๊เถอะ โล เออเนอ โต่ เฮ๊เน๋อ. เหย่ซี กาคยา เร๊อ อา กาเฮ๊ เร๊อ เหย่ซี แม๊เถอะ เตเน่วม๊อขุพู๊ เต๊เห่ เด๊อะโลแม๊เถอะ เป่ เหย่ซี, เร๊อ อา เฮ๊ เหย่ซี เน๊อ เหย่ซู่ เซอเพร กาคยา เฮ๊อ, เฮ๊เนอ. 24เพรคู เด๊อ เปเกล เต๊เห่เห่ แกล่แฮแม๊ แลแค เด๊อ โลขุ เร๊อ อา แม๊เถอะ เหย่ซู่ โลกู โอ่กอคูแก แซ่เน๊อ เพรเหมาะ เนอเต๊เห่ เฮ๊เนอแพ๊, เฮ๊เนอ. เร๊อ เหย่ซี แม๊เถอะ เหย่ซู่ โต่, เฮ๊เนอ.”
25ฮู๊เนอ โทเรอ เหย่ซู่ เฮ๊ เหย่ซี เน๊อ, “แกแย โอ่เล๊อโอ่กลอ ซี๋, เพรโพร เต๊เห่ เฮ๊หนื่ออื่อแก โหง่ เต๊เห่เนอ, ซี หยื่อเอ่ แหย่ แหน่เจ๊อ ว๋า! 26ครี๊หม่า อาโตเบ่ ข่า เตจาเตจือ เออเต๊เห่, โทเรอ อา เก่ จว๊าโน เด๊อ อา เตเตอเรอดุ เตอเรอทู อากู ปา หม่าโต่ แอ?” 27โทเรอ เหย่ซู่ เฮ๊โฉ่โด่แนโปล เป่ เหย่ซี เร๊อ ลีเทส่อพ๊า เฮ๊หนื่ออื่อ โทเฮ๊อ อา อาหรี่อาแก, เป๊อแถ่ เด๊อ คูโมเสส ราแก ลี เนอเต๊เห่ เร๊อ ล๋อ เพรโพร ราแกหนื่ออื่อ เนอเต๊เห่.
28เบ๊อะเหย่ซี จว๊าโตผื่อเฮ๊อ เร๊อ ดอ เด๊อ อา เตเร จว๊า เออตอดอ เบ๊อะเนอ, เหย่ซู่ เม ฮู๊ อา เตเร จว๊า ตา ลว๊าแก เร๊อ ดอเออเนอ. 29หม่าแน๊เรอ เหย่ซี เอ๊ ตื๊อดื่อ ลู เร๊อ อา เฮ๊ ลู เน๊อ, “โน โอ่โก๊เกอ เร๊อ เป เบ๊อะเออ เฮ๊อ, เหมาะ เตเร ผื่อตาเฮ๊อ, ปาหม่า เหมาะคี๊ ตีตีเล๊เน เห่.” ฮู๊เนอ อาขว่าอาคยา, เหย่ซู่ จว๊าโน โอ่โก๊เกอ เร๊อ เหย่ซี เบ๊อะเนอ.
30เบ๊อะอา โอ่แน โอ่เอ่เต่อเกอ เร๊อ เหย่ซี เบ๊อะเนอ, อา พย๊า ค๊อมู เร๊อ อา เฮ๊บุ๊ยเฮ๊เตอเรอแถ่ จอแปแหร่ โทเรอ อา บิกยา ค๊อมู เร๊อ อา เด๊อะเอ่ เป่ เร๊อ เหย่ซี. 31โทเรอ เหย่ซี เป๊เส่ ลีแถ่ เร๊อ อา ซิเง โตหม่าหนิ คยา เหย่ซู่, เร๊อ โตโพ๊โต แบ่เจ่ เหย่ซู่ โอ่เหม่ เป่แก เด๊อ เหย่ซี เป๊เส่เง. 32เหย่ซี เฮ๊ เกอเร๊อ เป่ลู เน๊อ, “เบ๊อะอา เฮ๊เบ่ เร๊อ เป เด๊อ แกล๊ลู เบ๊อะเนอ เบ่เบ่, เบ๊อะอา เฮ๊โฉ่โด่แนโปล เป่ เป เร๊อ ลีเทส่อพ๊า อา เตเฮ๊โฉ่หนื่ออื่อ ซีเต๊เห่ เบ๊อะเนอ เบ่เบ่, เด๊อ เป ซิปล่อกู เนอ, อา ตือพรือก๊อหย่อ ซิครือซิลอแถ่ เจ๊อ ฮู๊เนอ แวเฮ๊แต๋?”
33โตโพ๊โต เหย่ซี ก๊อถ่อกา เด๊อ วีเยรูซาเล็ม. เร๊อ เหย่ซี กาแม๊เถอะ เร๊อ เพรโด่แนพู๊ เต๊เห่ เช๊อเตเพร เร๊อ อูโร เต๊เห่ โอ่ปล๊อ เต่อลอ ลู เบ๊อะเนอ. 34เพรโด่แนพู๊ เต๊เห่ เออเต๊เห่ เฮ๊ เป่ แกแย แฮโต่ ตื๊อแฮโต่ปา เออซิเนอ เน๊อ, “แบ่เจ่ ก๊อถ่อ เซอเพร กาคยา หม่าแหน่ เจ๊อ เฮ๊อ เม. อา เด๊อะโล เป่ โทเฮ๊อ อาเหน่ เร๊อ คูซีโมน เฮ๊อ!” 35อา เฮ๊โทฮู๊เนอ เร๊อ แกแย เออซิเนอ แด๊โฉ่โล เป่เกอติ เหย่ซี เน๊อ เบ๊อะเหย่ซี จว๊า เด๊อ แกล๊ลู เบ๊อะเนอ, อา เมแคร๋ เป่ เหย่ซี ฮู๊เต, โทเรอ เหย่ซี ซิเงเนอ แพ๊ เหย่ซู่ เบ๊อะอา บิกยา ค๊อมู เบ๊อะเนอ แพ๊, อา แด๊โฉ่โล เปเกอ เหย่ซี ฮู๊เนอ.
เหย่ซู่ เด๊อะโล เป่ อาเหน่ เร๊อ อา โคเจ่ เต๊เห่
(มัทธิว ๒๘:๑๖-๒๐, มาระโก ๑๖:๑๔-๑๘, ยอห์น ๒๐:๑๙-๒๓, เพรโด่แนพู๊ เต๊เห่ ๑:๖-๘)
36เบ๊อะแกแย เออซิเนอ เฮ๊โฉ่เป่ เหย่ซี เน๊อ เตหรี่เตแก เออ เบ๊อะเนอ, เหย่ซู่ อาเหน่ แบ่เจ่ เร๊อดื่อ แฮก๊อถ่อ โอ่โลคย๊า เป่ เร๊อ เหย่ซี กล๊าเมกู เร๊อ อา เฮ๊ เหย่ซี เน๊อ, “เตซิปล่อ ตู๊จู่เตอเจ๊อ อา โอ่เกอดื่อ เร๊อ ซี นี๋.”
37เหย่ซี เตเน แลแค เน๊อ อา แม๊เถอะ โลเน๊ เร๊อ อา ซิอิเช คย๊ายื๊อ แหน่เจ๊อ. 38เร๊อ เหย่ซู่ เฮ๊ เหย่ซี เน๊อ, “ซี เตเน ซิอิเช ลอ แลแค เมเต? ซี ซิปล่อ หร่ารอหร่าเหร่ ลอ แลแค เมเต? 39แซ่ฮู๊ ซี เก่ แม๊เถอะซิเง ตาเต เร๊อ แว เหน่กล่อ โอ่ หม่าแหน่ อาเงเนอ, แม๊มอ แลแค แว กู๊ขุ เร๊อ แว กู๊โด่เออ, แฮขร่าแม๊ แลแค มอ แวเหน่เออ, เมเตเฮ๊เรอ, โลเน๊ เนอหม่า, อาพ๊าอาหย่า อาครุ๊ยอาคร๊วา โอ่เกออู ฮู๊ แว เออเนอ โต่.”
40อา เฮ๊โท เป่ เหย่ซี ฮู๊เนอเรอ อา เด๊อะโล เป่ เหย่ซี เร๊อ อากู๊ขุ เร๊อ อากู๊โด่. 41เหย่ซี ซิครือซิลอ แลแค เร๊อ อา อาเถ่ ตี๊ปี่ตาปา ลอ แลแค ลู อาขว่าอาคยา, อา หยื่อเอ่แร๊ แลแค ล๋ายโต่. โทเรอ เหย่ซู่ แด๊เฮอ เหย่ซี เน๊อ, “ซี เหล่เอ่เหล่โอ โอ่ เต๊อเจ่อเจ่อ แอ?” 42เหย่ซี เด๊อะ ลู เต๊วชื๊อเอ่ ต๊ากว่าฮู๊. 43เร๊อ อา พย๊าฉื่อ เร๊อ อา เอ่โอ่โล เป่ เร๊อ เหย่ซี เป๊เส่เง.
44โทเรอ อา เฮ๊ เป่ เหย่ซี เน๊อ, “เบ๊อะแว โอ่เกอปา เร๊อ ซี เบ๊อะเนอ, ล๋อ อู ราโอ่ โทเฮ๊อ แวหรี่แวแก เด๊อ คูโมเสส อาลีกู เนอเต๊เห่ เบ่เบ่, เพรโพร ราโอ่แก เนอเต๊เห่ เบ่เบ่, เด๊อ ลีถู่เซ๊แถ่ อากู เนอเต๊เห่ เบ่เบ่, อา เบ่ เล๊อบาแถ่ ลอปลี ปว๋า เต๊อเจ่อ ปาเนอ, แว แด๊โฉ่โล เป่ โทลอเฮ๊อ ซี เฮ๊อ.”
45โทเรอ แซ่ฮู๊ เหย่ซี เก่ ซิเงโปลเพ๊แร๊ ลีเทส่อพ๊า เต๊เห่ อาเงเนอ, อา โบ๊โมแถ่ เป่เฮ๊อ เหย่ซี ซิปล่อเตเน เต๊เห่ เฮ๊อ. 46เร๊อ อา เฮ๊ เป่ เหย่ซี เน๊อ, “ลีเทส่อพ๊า เฮ๊หนื่ออื่อ เนอ, ครี๊ เก่ ข่าเบ่ เตจาเตจือ ปา, โทเร๊อ โซเนอ เตอเนอ ปาเนอ, อา เก่ ก๊อถ่อเซอเพร กาคยา เด๊อ เตเซอ ปา. 47โทเรอ เด๊อ อามุย อากู เร๊อ อู เก่ แด๊โฉ่โด่แน ถู่แหล่แต๊แกละกา ซิปล่อ อาหรี่อาแก เน๊อ เตปลวาแก เตซื๊อเตปล๊า เออเนอเต๊เห่ อาหรี่อาแก ปา. อู เก่ แด๊โฉ่โด่แน อา เด๊อ เก่โร ปวาเต๊อเจ่อ อาเง ปา, เร๊อ อู เก่ เป๊อแถ่ เฮ๊โฉ่เหร่อเล๊อ เด๊อ วีเยรูซาเล็ม อากู เนอปา. 48ซี หม่า เพรข่าเฮ๊โล เด๊อ อา ทวา เป่ เตหรี่เตแก เออเต๊เห่ อาเง เต๊เห่ เฮ๊อ. 49เร๊อ แว เก่ นอตาแล เป่ ซี ฮู๊ แวเพ อ๊อแล หนื่ออื่อ โทเฮ๊อ เนอเต๊อเจ่อ เด๊อ ซีโหล่ ปา. หม่าแน๊เรอ ซี เก๊ พย๊าหนิ แต่ล๋าย เตเตอเรอฉว่าชอ เด๊อ อา โอ่ เด๊อ ม๊อขุเออ แฮแล แต่ล๋าย เด๊อ ซีเหน่ลูโต่ เนอ, ซี เบ่ โอ่ป่อตื๊อดื่อ เบ๊อะวีกู เออเนอ ปา.”#เพรโด่แนพู๊ เต๊เห่ ๑:๔
พย๊า กาแถ่แก เหย่ซู่ เด๊อ ม๊อขุ
(มัทธิว ๑๖:๑๙-๒๐, เพรโด่แนพู๊ เต๊เห่ ๑:๙-๑๑)
50โทเรอ เด๊อเหร่อเนอ, อา เอ๊จว๊า อา โคเจ่ เต๊เห่ เด๊อ วีกลอ, เร๊อ อา เอ๊จว๊าโต เหย่ซี เด๊อ ดอเบธานี อาช๊า, เร๊อ อา บ๊อแถ่ อากู๊ขุ เร๊อ อา เด๊อะบุ๊ยเด๊อะเตอเรอ เหย่ซี.#เพรโด่แนพู๊ เต๊เห่ ๑:๙-๑๑ 51เบ๊อะอา เด๊อะบุ๊ยเด๊อะเตอเรอ ปาแพ๊ เหย่ซี เบ๊อะเนอ, อู จอกากี๊แถ่ ตาพาแก ลู เด๊อ ม๊อขุ เร๊อ อา แด่โอ่แก แก อา โคเจ่ เต๊เห่. 52เหย่ซี จ๊อบู่จ๊อเบแถ่ โท ลู เร๊อ เหย่ซี ซิครือซิลอ กาคยา แลแค เด๊อ วีเยรูซาเล็ม อากู. 53โทเรอ เหย่ซี โอ่ เด๊อเตหลู่แตโฮกู ปว๋า โตโพ๊ เร๊อ ถู่เซ๊ เฮ๊บุ๊ยเฮ๊เตอเรอแถ่ จอแปแหร่ เบ๊อะเนอ.
Currently Selected:
ลูกา 24: EKTNTGEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wycliffe USA
