ลูกา 21
21
เพรเหมาะโอ่แคร๊ อา เตหลู่แต
(มาระโก ๑๒:๔๑-๔๔)
1เบ๊อะเหย่ซู่ แม๊แถ่ เบ๊อะเนอ, อา แม๊เถอะ แกแยดุแหย่ เต๊เห่ แฮ ฉู่โน แลแค อา เตหลู่แต เต๊เห่ เด๊อ เหล่แด่โอ่ปล๊อ รือเต๊อกู เด๊อ เตหลู่แตโฮกู. 2โทเรอ อา แม๊เถอะ เพรเหมาะโอ่แคร๊ โซพ๊าโซแร เตเพร แฮ ฉู่โน เกอ รือ ตีลีแบ เนอเม๊. 3เร๊อ เหย่ซู่ เฮ๊ เน๊อ, “แว เฮ๊จ๊อจ๋อ ซี, เพรเหมาะโอ่แคร๊ เนอเตเพร ฉู่โน เอ๊เล๊อเล๊อ เจ๊อ เร๊อ อูโร เต๊เห่ เฮ๊อ. 4เมเตเฮ๊เรอ ล๋อ อา แฮฉู่โน รือ เนอเต๊เห่หม่า, อา เตโอ่เล๊อโอ่บา ซิลือ เร๊อ อา แฮฉู่โน แพ๊ แลแค อาเต โอ่ แก่ชอแก่เฉ่ แก เนอเต๊เห่ แพ๊. หม่าแน๊เรอ เพรเหมาะโอ่แคร๊ เออเตเพรเนอ อา โซพ๊าโซแร แหน่เจ๊อ ตื๊อดื่อเรอ อา แฮฉู่โน ลอหล่าตี๊กลิ เจ๊อ ล๋อ รือ เด๊อ อา โอ่ เร๊อ ลู เออเนอ เจ๊อ.”
เหย่ซู่ เฮ๊เร๊อ เตหลู่แตโฮ เก่ ตาพรอ ปา อาหรี่อาแก
(มัทธิว ๑๔:๑-๒, มาระโก ๑๓:๑-๒)
5เหย่ซู่ อา โคเจ่ อาเกล เต๊เห่เห่เนอ, อา เฮ๊เบ่โด่แน เกอเร๊อ เป่ลู เร๊อ เด๊อเตหลู่แตโฮ อู ตี๊หรี่แตแร ตว่า อา เร๊อ หล่อ อางูดุงูชอ เต๊เห่ เร๊อ ตาเต เด๊อ อู หลู่แถ่ เร๊อ จอแปแหร่ เนอเต๊เห่ อาขว่าอาคยา, อาตว่า แหน่เจ๋อ เหย่ซี โด่แน เกอเร๊อ ลู ฮู๊เนอ ตื๊อดื่อเรอ เหย่ซู่ เฮ๊ เหย่ซี เนอ, 6“ล๋อ เต เด๊อ ซี แม๊เถอะ กู๊แหน่เออ เต๊เห่ เนอ, อู เก่ แฮด่อ ตาพรอแก ลอ อา ปา. หล่อ เออเต๊เห่ เนอ อา โอ่จิจือ ปา เจ๊อ ลู เตเม๋ โต่ ปาเนอ, เบ๊อะเก่ แฮโต่ เตอเนอ ปา.”
เต แป่เตเช เร๊อ เตเมจา เมจือ
(มัทธิว ๒๔:๓-๑๔, มาระโก ๑๓:๓-๑๓)
7เหย่ซี แด๊เฮอ เน๊อ, “ซ๊าร๊า, เต เออเต๊เห่เนอ เก่ ทวาแถ่ เบ๊อะเกเต ปา? เบ๊อะเตเร แฮโต่เฮ๊อ ปา เนอ เตโค๊ตีกลี๊เจ๊อ อาม๊าอาแด เต๊อเจ่อเจ่อ อา โอ่โลแถ่เหร่อ ปา แอ?”
8เหย่ซู่ เฮ๊ฉื่อ เหย่ซี เน๊อ, “แซ่ฮู๊ อู เก่ อี๊ลอแลโฮ จว๊าหนิ แต่ ซี แต่เหม่เนอ, โอ่รอโอ่เร แลแค ซีเหน่ นี๋ แกแย เด๊อ อา เก่ แฮ แด๊กว๊า แลโฮ แลแค อาเหน่ เร๊อ แวมุย ปาเนอ อา โอ่ เอ๊ ลู ปา. เร๊อ อา เก่ แด๊กว๊า แลโฮ แล เกอ เร๊อ แลแค อาเหน่ เน๊อ, ‘แว หม่า ครี๊ เฮ๊อ,’ เร๊อ ‘เบ๊อะผื่อโต่ เฮ๊อ,’ ฮู๊เนอ ปา ตื๊อดื่อเรอ ครอครวา แต่ แลแค เหย่ซี แต่เหม่ นี๋. 9เบ๊อะซี หนิโฮ เตช๊าเตปา เร๊อ ตอปลอ ตือซือ โอ่แถ่ เบ๊อะเนอ, คย๊ายื๊อ แต่ แลแค แต่เหม่ นี๋. เมเตเฮ๊เรอ ล๋อ เต เออเต๊เห่เนอ, อา เบ่ โอ่ทวาแถ่ เหร่อเล๊อ แหน่ปา. ตื๊อดื่อเรอ เห่ขุ ตื๊อดื่อ แฮโต่ เจ๊อ เฮ๊อเนอ หม่าล๋ายโต่.”
10เหย่ซู่ เฮ๊ เป่แฮ โป่ เน๊อ, “แกแยเมวเจอะ เต๊อเจ่อ เร๊อ เต๊อเจ่อ อา ซิเถ่ซิฮา ลู ปา. เทอเก่ เต๊เก่ เร๊อ เต๊เก่ เก่ช๊าเก่ปา ลู ปา. 11เตเน่วท๊อดี เก่ โอ่แถ่โทโอ่แถ่แล ลอปลี เด๊อ เห่ขุเออ โต๊โผ่ โท โต๊โผ่ ปา. เก่ โอ่วีโอ่กอ เร๊อ อาหร่าอาดวา เต๊เห่ อา โอ่แถ่โทโอ่แถ่แล เด๊อ เหล่โอ่ เอ๊ลา ปา. เตต๊อหร่อเซ๊ ซิอิเช เต๊เห่ เร๊อ อาม๊าอาแด เด๊อ อา โคตีกลี๊ แหน่เจ๊อ เต๊เห่ เก่ โอ่โลแถ่ เด๊อ ม๊อเล ปา.
12“หม่าแน๊เรอ เบ๊อะเตเออเต๊เห่ ทวาแถ่ แต่ล๋ายโต่ เบ๊อะเนอ, เด๊อ แวมุย อาขว่าอาคยาเร๊อ, อู เก่ ปื่อ ซี อู เก่ เมจาเมจือ ซี ปา. อู เก่ ซูจว๊า ซี เด๊อ เตจ๊อเบโฮกู ปา เร๊อ อู เก่ เจแม๊ ซี ปา, อู เก่ ด๊อตา ซี เด๊อ ทอกู ปา. โทเรอ อู เก่ ซูจว๊า ซี เด๊อ คุ๊ย เร๊อ จ๊อแผ่ เต๊เห่ อา เป๊เส่เง ปา. 13เออ หม่า หม่าเฮ๊อ ซี เก่ พย๊าหนิ เบ๊อะเด๊อ ซี เก่ แด๊โฉ่โด่แหน่ เป่ อู เร๊อ แวหรี่แวแก เนอ เฮ๊อ. 14แด่กู่แด่แก หนื่ออื่อ เหร่อ แต่ ซี ซิปล่อ เร๊อ ซี เก่ เฮ๊เบ่แลเปล๊ เกอเร๊อ ซิเหน่ ฮู๊เต ฮู๊เต ปา เนอ แต่เหม่ นี๋.#ลูกา ๑๒:๑๑-๑๒ 15เมเตเฮ๊เรอ, เตเฮ๊เบ่แจ่ เฮ๊เบ่โปล เร๊อ เตลีแมลีเพ๊ เด๊อ แกแย ซิเถ่ ซีเต๊เห่ เก่ เฮ๊ กาคยาฉื่อ แจ่ ปา เจ๊อ ซี เตเพร่ว โต่ เต๊เห่เนอ, แว เก่ เด๊อะดื่อ ซี ปา. 16ซี โป่แหว่, โหมะเพ, กลุยแล, โคซว๊า เต๊เห่ อา อิแช๊เซอ เกอ เร๊อ ดื่อ ซีมุย ปา. เหย่ซี เก่ เมเซอ ซีเต๊เห่ ปา. 17เด๊อ แวขว่าแวคยา เร๊อ แกแย ปว๋า เตเพร อา ซิโตโค ลอ ซี ปา. 18หม่าแน๊เรอ เบ๊อะซี กู๊โล โตโบ๊ แพ๊ ปาเนอ, อาโอ่เหม่แก เป่ โต่. 19โอ่หม่าแตแน แลแค เร๊อ ซี เก่ เตเมแลเปล๊แก เกอเร๊อดื่อ ซีเหน่ ปา.
เหย่ซู่ เฮ๊เร๊อ อู เก่ เมตาพรอแก วี เยรูซาเล็ม ปา อาหรี่อาแก
(มัทธิว ๒๔:๑๕-๒๑, มาระโก ๑๓:๑๔-๑๙)
20“ช๋า ซี แม๊เถอะเฮ๊อ เร๊อ เกลอฮู๊ เต๊เห่ แฮบ่อตาวา เฮ๊อ วีเยรูซาเล็ม ปา เบ๊อะเนอ, ซี เบ่ ซิเง เร๊อ งยาแต่โต่ ปา หม่า, อู เก่ เม่ปย๊าแก อา เฮ๊อ ปา. 21เบ๊อะเนอโตโพ๊, แกแย โอ่ เด๊อ วียูดาห์เก่ เต๊เห่ เบ่ เถ่แกล่จว๊า โอ่ เด๊อ โฉ่ขุ ปา. แกแย โอ่ เด๊อ วีดุเก่แหล่ เต๊เห่เนอ, อา เบ่ เถ่จว๊าแก ปา, เร๊อ แกแย โอ่ เด๊อ วีกู โต่ เต๊เห่เนอ จว๊าโกโน แต่ เด๊อ วีกู แต่เหม่ นี๋. 22เมเตเฮ๊เรอ, ฮู๊ ลีเทส่อพ๊า ราหนื่ออื่อ เตแด๊เฮอ เจแม๊ อาม๊อเนอม๊อเซ เออเต๊เห่ อาหรี่อาแก เก่ เล๊อแถ่บาแถ่ ปา อาเง แพ๊.#โฮเชยา ๙:๗ 23ม๊อเนอม๊อเซ เบ๊อะเนอเค ปา หม่า, เพรเหมาะ เด๊อ อา โอ่ เร๊อ อาฮ๊ออาเซ๊ เต๊เห่ เร๊อ โหมะ เด๊อ อา โอ่ เร๊อ พู๊ปีตี๊ เด๊อ อา อินู๊ ปา ลู เต๊เห่เนอ, อู เก่ ซิยอ เกอเร๊อ แหน่เจ๊อ เหย่ซี ปา. เตจาเตจือ เก่ แฮ เบ่ เทอเก่ เออเต๊เก่ ปา เร๊อ จอแปแหร่ อาเต เมจากาคยา เก่ ตาเบ่ เด๊อ แกแย เออตู๊หมู่ อาขุ ปา. 24อู เก่ เมเซอ เหย่ซี เต๊เห่เห่ เร๊อ เน๊ ปา, เร๊อ เต๊เห่เห่เนอ, อู เก่ ปื่อจุ่ยจว๊าแก เหย่ซี เด๊อ เก่ปว๊าเต๊เก่ เด๊อ เห่ขุ เออเนอ ปา. แกแยยิวพู๊ หม่าโต่ เต๊เห่ เก่ เมจาเมจือ เป่เอ่ เป่โอ วีเยรูซาเล็ม เต๊เห่ ปา. เร๊อ อา เก่ เป๊อ โต่เด๊อ เหย่ซี แกแยยิวพู๊ หม่าโต่ เต๊เห่ เบ๊อะเล๊อแถ่บาแถ่ เฮ๊อ โตโพ๊ ปา.
แกแยเห่ขุ อาพู๊คู เก่ แฮ คยาแซ๊ อาหรี่อาแก
(มัทธิว ๒๔:๒๙-๓๑, มาระโก ๑๓:๒๔-๒๗)
25“เตม๊าเตแดโค๊ตีกลี๊ คยา เต๊เห่ อา โอ่โล แถ่โล เด๊อ ต๊อเหมาะกู, เลกู, เฉ่ซี เต๊เห่ อากู ปา. เด๊อ เห่ขุ เออเนอ, เทอ เด๊อ เทอดุซาวา อากู เต๊เห่ อา ฮ๊าโฮ๊ พรา ตอว๊อตือซือ ฉว่าแหน่เจ๊อ อาขว่าอาคยา, เทอเก่ ปว๋าเต่เก่ เก่ต๊อหร่อเซ๊ ซิอิเช ลอ เร๊อ อา เก่ เถ่ตาปา ลอปลี เจ๊อ เหย่ซี ปา.#อิสยาห์ ๑๓:๑๐, เอเสเคียล ๓๒:๗, โยเอล ๒:๓๑, เตเด๊อะโลแถ่ ๖:๑๒-๑๓ 26เตเออเต๊เห่ เก่ ทวาแถ่ ลอ เจ๊อ เห่ขุ ต๊าบ่าลอ ปา. โท๊โต่ จอแปแหร่ อา ท๊อโกโย ลอ ลอ ม๊อเล อา เตโพรเตเตอเร๊ออาฉว่าชอ เนอเต๊เห่ ปา อาขว่าอาคยา, แกแย เต๊เห่ อา ต๊อหร่อเซ๊ ซิอิเช ลอปลี เจ๊อ ปา. 27โทเรอ เหย่ซี เก่ แม๊เถอะ แลแค แกแยพู๊คู หม่าเฮ๊อ แวเออ เก่ แฮแล เด๊อ อ๊อโหล่เกล ปา, เร๊อ แว เก่ โอ่เล๊อบา เจ๊อ เร๊อ แว เตโพรเตเตอเรอ เร๊อ แว เตเตอเรอดุ เตอเรอทู เร๊อ อาฉว่าอาชอ เออเนอเต๊เห่ ปา.#ดาเนียล ๗:๑๓, เตเด๊อะโลแถ่ ๑:๗ 28ช๋า เตเออเต๊เห่ เป๊อแถ่ เมเฮ๊อ อาเบ๊อะเนอ ปาเนอ, ก๊อถ่อ แลแค เร๊อ จอแถ่ แลแค ซี กู่กล๊อ, เมเตเฮ๊เรอ, งยาแต่โต่ ปาหม่า จอแปแหร่ เก่ เมแลเปล๊กา เฮ๊อ ซี ปา เฮ๊อ.”
พย๊าหนิ เตอิซว๊า เด๊อ ก่อดุ๊ยเหมาะ ต๊อเหมาะ อา โอ่
(มัทธิว ๒๔:๓๒-๓๕, มาระโก ๑๓:๒๘-๓๑)
29เหย่ซู่ เฮ๊ค๊าโข่ เป่ เหย่ซี เน๊อ, “เตเนแม๊ แลแค ก่อดุ๊ยเหมาะ ต๊อเหมาะ เร๊อ ส่อเหมาะ อิเตเต๋ เบ่เบ่ เนอ. 30ซี แม๊เถอะ เร๊อ อาเหล่ ดา แด๊เจเถ่เฮ๊อ เฮ๊เนอ, ซี ซิเง เร๊อ เก่กู่เค ผื่อแฮ เฮ๊อ. 31ฮู๊เนอเฮ๊อ เบ๊อะซี แม๊เถอะเฮ๊อ เตเออ เต๊เห่ ทวาแถ่เฮ๊อ อาเค ปาเนอ, ซิเง แลแค เน๊อ จอแปแหร่ เกเร แฮ เป๊อเทอเป๊อเก่ ผื่อแถ่ เฮ๊อ นี๋.
32“แว เฮ๊แหน่เจ๊อเจ๋อ เจ๊อ ซี, ล๋อ แกแย เด๊อ อา โอ่เซอเพร กู๊แหน่เออตือทือ เต๊เห่ เซอลอ แต่ล๋ายโต่ เนอ, เตเออเต๊เห่ อา ทวาแถ่ ลอ ปา. 33ม๊อขุ เร๊อ เห่ขุ เก่โอ่เหม่แก ปา. ตื๊อดื่อเรอ แวลาแวโหง่ เออเต๊เห่เนอ อาโอ่เหม่แก เป่ แตแค๋ โต่.
เป เบ่ ส่าเซ
34“รอหนิ แลแค ซีเหน่ นี๋. เบ๊อะซี เอ่มือโอมือ เบ๊อะเนอ, ซี เมบูเมบย่า เต เนอเต๊เห่ เบ่เบ่, ซี เตเนกู่เตเนแก แลแค เร๊อ ซี เตโอ่เซอเพร เด๊อ เห่ขุเออ ตือทือ เต๊เห่เนอ เบ่เบ่, เมลอ แกเด แต่ ซี ม๊อเนอม๊อเซ เนอเต๊เห่ แต่เหม่ นี๋. ปาหม่า แกแยพู๊คู หม่าเฮ๊อ แวเออ อา แฮโต่คย๊า เด๊อ ซี โอ่ เบ๊อะซี เตเนเต่อโต่ เนอเตอเนอ เนอเตเซ ปา. 35เมเตเฮ๊เรอ เตจาเตจือ เบ๊อะเนอ อาแซ่เน๊อ เตวี ต๊าบ่าเนอ ปา, อา เก่ แฮปื่อหนื่อ ลอ ล๋อ แกแย โอ่ เด๊อ เห่ขุ เออต๊าบ่า เนอเต๊เห่ ปา. 36แซ่ฮู๊ ซี เก่ แลเปล๊ แร๊แร๊แจ่ เน๊อ เต เตเร ทวาแถ่ เออเต๊เห่ ปา. โท๊โต่ แซ่ฮู๊ ซี เก่ ก๊อถ่อ เด๊อ แกแยพู๊คู หม่าเฮ๊อ แวเออ เป๊เส่เง ปา เนอเรอ, ส่าเซ เร๊อ กุยจ๊อเบ แลแค ปว๋า โตโพ นี๋.”
37เหย่ซู่ อิซว๊าอี๊แส่ ตา อู เด๊อ เตหลู่แตโฮกู ปว๋า เตอเนอ เจ๊อ. เร๊อ เบ๊อะเหมาะเฮ๊แล เบ๊อะเนอ, อา จว๊าแถ่ เด๊อ โฉ่ เด๊อ อู เอ๊ เร๊อ โต๊โฉ่โฉ่ เออเนอเตเหม่ อาขุ, เร๊อ อา โอ่ เบ๊อะเนอ โต่เด๊อ เหมาะลี เจ๊อ.#ลูกา ๑๙:๔๗ 38แกแย เต๊เห่ ซิแฮ หนิดา แลแค อา เตเฮ๊โฉ่โด่แน เต๊เห่ เร๊อ อา แฮ โรมื่อ ลอปลี เด๊อเตหลู่แตโฮกู.
Currently Selected:
ลูกา 21: EKTNTGEN
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wycliffe USA
