Génesis 19
19
Dios la sjin lum Sodoma soc Gomorra
1Yaquix ta ijc'ubel q'uinal a te c'otic ta lum Sodoma te cheb ch'ul abatetique. Te Lot nacal ta yochibal ts'ajc' yu'un te Sodoma, ja' yawil ta bay c'aem ta stsobel sbaic te yajwal lume. C'alal te Lot la yilbey sitic, jajch' bael, la stinan sba coel c'alal ta lum, la sc'opon, 2jich la yal:
—Jtatiquetic, ya cal wocol ta atojolic te ya me xbaex ta jna te awabatone. Tey me ya xc'o apoc awacanic a, soc tey me ya xwayex a. Sab pajel ya xjajch'ex, ya xbaex —la yut.
Ja'uc me to, albot yu'un:
—Manchuc, wocol la awal. Tey ya xwayotic ta calle yo'tic —xiic.
3Ja'uc me to, te bit'il ma laj yo'tan ta stojolic, la sjoinic bael. Ochic ta sna, la spasbey swaj swe'ic te ma ba yich'oj levadura, jich la smac'lin sbaic.
4Ma to ya xwayic a, te yajwal lum Sodoma muc'-biq'uit tal sjoytayic te nae. Spisil te yajwal lum la stsob sbaic tel. 5La yawtayic te Lot:
—¿Banti ay te winiquetic ochic tel ta anae? Ticuna loq'uel tel, yu'un ya jmejts'an jbajtic soc —xiic.
6Jich te Lot loc' bael sc'opon ta ti'nail. La smac jilel te snae, 7jich la yal:
—Wocoluc, te bit'il jun co'tan jbajtic, ma me xanop ta awo'tanic mulil. 8Aiya awaiyic stojol, ay cheb cantsil-nich'nab te ma ba tabilic ta winic, ya quic' loq'uel tel, chican bi ya awutic. Ja'uc me to, ma me bi xapasbeyic te winiquetic, yu'un ochemic ta jna —la yut.
9Albotic yu'un:
—Q'ueja aba. Ma ja'uc ya xtal apasotic ta mandal te jyanlumat atuquel. Te ja'ate ya ac'an ya awac' aba ta ich'el ta muc'. C'ax jich ya awich' yo'tic te bit'il yantic to —xiic.
La stenic te Lot, c'an swuyic te ti'naile. 10Jich yu'un te cheb winiquetic la sloq'ues bael sc'abic ta ti'nail, la snitic ochel te Lot, la smaquic te ti'naile. 11Soc la sc'atp'un ta ma'sit te winiquetic, te queremetic, te mamaletic tejc'ajtic ta c'op ta ti'nail. Jich lubic ta sleel te ti'naile. 12Te Lot albot yu'un te winiquetique:
—¿Ay to bal mach'a ay xan awu'un, ay bal anialtac, soc awal-anich'nab, soc spisil bitic ay awu'un li' ta lum to? Teme aye, loq'uesa me bael. 13Yu'un ya me cac'tic lajuc te lume, melel c'otix ta stojol Cajwaltic te smulique. Jich yu'un te Cajwaltic la sticunotiquix tel ta slajinel —xiic.
14Jich loc' bael te Lot, ba sc'opon te queremetic te chapal ya yic' sbaic soc te yantsil-nich'nabe, jich la yalbey yaiyic:
—Jajch'anic, loc'anic tel, yu'un ya yich' lajinel yu'un Cajwaltic te lume —la yut.
Ja'uc me to, te queremetic la scuyic te ma meleluc. 15C'alal yaquix ta sacubel tel te q'uinale, te cheb ch'ul abatetic la sujic te Lot, jich la yalbeyic:
—Jajch'an, suja aba, ic'a bael te awiname, soc te cheb awantsil-nich'nab ajoineje, ma me pajaluc ya awich'ic castigo soc te lume —la yutic.
16Te bit'il yoquelal ma xloc' te Lot, te cheb winiquetic la stsacbeyic sc'ab, soc la stsacbeyic sc'ab te yinam soc te cheb yantsil-nich'nabe. La yiq'uic loq'uel ta lum te bit'il ayic ta c'uxtayel yu'un te Diose.#2 P 2.7. 17C'alal loq'uix bael yu'unic a, la yalbey mandal:
—Anan me bael, ma me xasujt'es aba ta yilel, soc ma me xjalajat ta spamlej. Anan bael ta witstiquil, teme ma x'ac'an ya xlajate —xiic.
18Te Lot la yalbey:
—Ma niwan, tatiquetic. 19Te bit'il lec awo'tanic cu'un te awabatone, soc te bit'il la ac'uxtayonic, cuxul la acoltayonic loq'uel tel; ja'uc me to, ma xju' ya x'anon bael ta witstiquil teme repente ay jwocol ya xc'oon, soc teme repente ya xlajon ta be. 20Ilawil, ay ch'in lum ta nopol, ma ba muc' stuquel. Tey me ya xboon ta anel a, melel ma ba muc', jich me ya xcolon awu'un tey a —xi'.
21Albotic yu'un:
—Jichuc jiche, teme jich ya sc'an awo'tane, ma ba ya cac' lajuc te lum ya awale. 22Suja aba, baan tey a. Melel ma xju' bi ya jpas ja' to teme ya xc'oat tey a —xi' sc'oplal yu'un.
Zoar c'ot sbiil te lume, ta swenta bit'il tsail stuquel.
23Loq'uix tel c'aal a te och ta lum Zoar te Lote. 24Te Cajwaltic la yac' tel azufre soc c'ajc' ta ch'ulchan jich bit'il ja'al ta stojol te lum Sodoma soc te lum Gomorra. 25Jich la slajin te cha'pam lum soc spamal te stenlej xatal q'uinale,#Mt 10.15; 11.23-24; Lc 10.12; 17.29; 2 P 2.6; Jud 7. soc spisil mach'a nainemic ta lumetic soc yawal-sts'unubic. 26Ja'uc me to, te yinam Lot#Lc 17.32. la sujt'es sba yil, jich a c'atp'uj ta balal ats'am.
27Ta yan c'aal ta buen sab bajt' te Abraham ta bay la sc'opon te Cajwaltique. 28La yil te lum Sodoma soc te lum Gomorra soc te stenlej xatal q'uinale. Xtomomet nax xch'ailel la yil jich bit'il xch'ailel yawil c'ajc'. 29Jich te Dios la yac' lajuc te lumetic ta spamlej. Ja'uc me to, na'ot yu'un Dios te Abraham, jich yu'un la sticun loq'uel te Lot c'alal la slajin te lumetic ta bay naineme.
Chicnaj moabetic soc amonetic
30Te Lot la xi' te ya xnain ta lum Zoar, jich yu'un ba nainuc ta witstiquil ta nailch'en. La sjoin bael te cheb ach'ixetic, ja' te cheb yantsil-nich'nabe. 31Te wixile la yalbey te yijts'ine:
—Mamalix te jtatique, soc ma'yuc winiquetic ta sjoylejal te ya xju' ya xnujbinotic soc, jich bit'il stalel spisil te ants-winiquetic ta balumilale. 32Ja' lec ya cac'tic xyacub ta vino te jtatique, ya jointic ta wayel, swenta yu'un jich me ay jts'umbaltic soc jtatic ya xc'ootic —xi'.
33Jich la yaq'uic yacubuc yu'un vino ta ajc'ubal te statique. Och bael te wixile, la sjoin ta wayel te state. Te state ma la sna' stojol bi ora tal sjoin ta wayel, soc bi ora jajch'. 34Ta yan c'aalil, te wixil la yalbey te yijts'ine:
—La join ta wayel ajc'ubey te jtatique. Ya me cac'tic xyacub xan ta ajc'ubal yo'tic. Ja'at me ya x'ochatix bael te ya ajoin ta wayele, swenta yu'un ay jts'umbaltic yu'un jtatic jchebaltic ya xc'ootic —xi'.
35Jich la yaq'uic yacubuc xan te statique, jajch' bael te ijts'inale, la sjoin ta wayel. Te statique ma la sna' stojol bi ora tal sjoin ta wayel, soc ma la sna' stojol bi ora jajch'. 36Jich la sta yalic te cheb yantsil-nich'nab Lot ta swenta nix te statique. 37Ayin yal te wixile, Moab sbiil c'ot yu'un. Jich te Lot ja' sts'umbal spisil te moabetic te ayic ta q'uinal ta ora to. 38Ja' nix jich ayin yal te ijts'inale, Ben-amí sbiil c'ot yu'un. Jich te Lot ja' sts'umbal te amonetic te ayic ta q'uinal ta ora to.
Currently Selected:
Génesis 19: TZOXCH
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia en Tzeltal de Oxchuc y Tenejapa © Sociedad Bíblica de México, A.C., 2001.
