GÉNESIS 32
32
Jacob, Esauhuan tuparingapa alichirijushcamanda
1Ñanda catishpa Jacob rijujpimi, Taita Diospaj angelcunaca tuparimurca. 2Paicunata ricushpami, Jacobca: “Taita Diosca, caipimari Paipaj carpata churashca” nishpami chai pambataca, “Mahanaim” shutita shutichirca.
3Jacobca, paipaj huauqui Esauman villachunmi, ñaupachishpa cacharca. Esauca, Seir shuti llactapi tiyaj, Edom shuti pambacunapimi causajurca. 4Chai villajcunataca, cashna nichunmi cacharca: “Ñucata mandaj Esautaca cashna ninguichi: ‘Cambajta ruraj Jacobca cashnami nin: Ñucaca, cai tucui huatacunami Labán runapaj huasipi causajurcani. 5Ñucaca, huagracunata, burrucunata, llamacunatami charini. Shinallata, ñucapajta ruraj jaricunatapash, huarmicunatapashmi charini. Cambaj ñavipi ali ricuringapami, can ñucata mandajman cashna villachun cachamuni’ ninmi” nishpami cacharca.
6Villangapa rishcacunaca, Jacobpajman tigramushpaca cashnami ninajurca:
“Cambaj huauqui Esaupajmandami shamunchi. Paipash chuscu patsaj runacunandimi, canda tuparingapa shamujun” ninajurcami.
7Shina nijpimi Jacobca, ninanda manllarishpa llaquirishpa, paihuan shamuj gentecunataca llamacunandi, huagracunandi, camellocunandi, tandachishpa ishcaipi shicanyachirca. 8Esaú shamushpa shujcunata llaquichijujpica, caishujcunaca pacajungami yashpami, chashna rurarca. 9Chaimandami Jacobca, cashna nijurca: “Ñuca taita Abrahambaj, ñuca taita Isaacpaj Taita Dioslla. Can Mandaj Taita Diosllatami: ‘Cambaj llactaman, cambaj ayllucunapajman tigrailla. Ñucami, candaca bendiciasha’ nihuarcangui. 10Ñucata ninanda llaquichunga, ima alitapash na rurapashcanichu. Shina cajpipash, Cambajta ruraj cajpimi, ñucamanga alita rurahuashcangui. Cai Jordán yacutaca, tauna caspihuanllami yalircani. Cunanga, ishcandi manñamanmi carpacunata charini. 11Cunanga, ñuca huauqui Esautami ninanda manllani, paipaj maquimanda quishpichihuailla. Pai shamushpaca, huarmicunatapash, huahuacunatapash huañuchishpa tucuchinga yashpami, ninanda manllani. 12Canllatami cashna nihuarcangui: ‘Ñucami, candaca bendiciasha. Cambaj miraicunaca, mama cucha manñapi t'iyu alpashna ashtacapacha cajpi, na yupai ushanallami canga’ nihuarcanguimi” nijurcami.
13Chai tutaca Jacobca, chaipillatami puñurca. Pai imatalla charishcacunatami, paipaj huauqui Esauman carangapa agllashpa churajurca: 14Paica, ishcai patsaj huarmi chivocunata, ishcai chunga jari chivocunata, ishcai patsaj huarmi llamacunata, ishcai chunga jari llamacunata, 15quimsa chunga huarmi camellocunata, huahua camellocunandi, chuscu chunga huarmi huagracunata, chunga shicucunata, ishcai chunga huarmi burrucunata, chunga jari burrucunatami agllashpa shicanyachirca. 16Chashna rurashpami chaicunataca, paipajta rurajcunaman shican shican cushpa:
“Animalcunataca shican shican churashpa, ñucata ñaupashpa richi” nirca.
17Ñaupashpa rijuj runataca, cashnami nirca:
“Ñuca huauqui Esaú canda tuparishpa: ‘¿Pihuanda causangui? ¿Maimanda rijungui? ¿Caicunataca pimanda apajungui?’ nishpa tapujpica, 18cashna ningui: ‘Cambajta ruraj Jacobmi, ñucata can mandaj Esauman carachun cachamujun. Paipashmi, ñucanchita catishpa shamujun’ ningui” nircami.
19Shinallata, shujpaj cati rijujtapash, ishcaipaj cati rijujtapash, shicanyachishca chai animalcunapaj huashata catinajuj gentecunatapash, cashna nishpami mandashpa cacharca:
“Esauta canguna tuparishpaca, cangunapash chashnallatami nina canguichi.
20Shinallata cashnatapash ninguichi: ‘Cambajta ruraj Jacobca, ñucanchita catishpami shamujun’ ninguichi” nircami.
Jacobca cashnatami yarijurca: “Caranacunata punda ñaupachijpica, pai ninanda fiñarishcataca, ashatallapash yalichishpa, ñucata ricushpaca chasquihuangapashchari” yajurcami. 21Chai caranacunataca, ñaupachishpa cachashpami paica, chai tutaca carpapi puñurca.
Peniel shuti pambapi angelhuan Jacob macanajushcamanda
22Chai tuta jatarishpami Jacobca, paipaj ishcandi huarmicunandi, paipaj huarmipajta ruraj ishcandi huarmicunandi, paipaj chunga shuj churicunata pushashpa, yali ushanalla Jaboc shuti rijuj yacuta chimbarca. 23Paicunata pushashpami, tucui ima charishcacunatapash apashpa, chai yacuta yalichijurca. 24Jacobca pailla saquirishpami, shuj runahuan punllayangacaman macanajurca. 25Chai runaca, Jacobhuan macanajuita na ushashpaca, huasha changapi huactashpami, Jacobpaj changa mucu anguta fitirca. 26Chai runaca Jacobtaca:
“Saquihuai, ñamari punllayamun” nirca.
Shina nijpimi Jacobca:
“Ñucata na bendiciajpica, candaca na cacharishachu” nircami.
27Shina nijujpimi chai runaca, Jacobtaca:
¿Ima shutita cangui? nijpi, paica, Jacobmi cani nirca.
28Chai runaca, Jacobtaca cashnami nirca:
“Cambaj shutica, ña na Jacob cangachu. Ashtahuangarin, cunanmandaca Israel shutimi canga. Taita Dioshuambash, runacunahuambash macanajushpa mishashcamandami, chashna shutita charingui” nircami.
29Shina nijpimi Jacobca, cashna nishpa tapurca:
“Cunanga, cambaj shutita villahuai” nijpimi, chai runaca:
“Ñuca shutitaca, ¿narachu yachangui?” nirca.
Chai jipami, paitaca chaipillata bendiciarca. 30Chaimandami Jacobca: “Taita Diosta, ñavi ñavi ricushpapash causanirami” nishpami chai pambataca, “Peniel” shutita shutichirca.
31Peniel shuti pambata rijujpimi, indica llujshimurca. Jacobca, paipaj changa mucu angu fitirishca cashpami jangajurca. 32Chaimandami Israelcunaca, animalcunapaj huasha changa angutaca, cunan punllacaman na micun. Jacobta, changa mucu angupi huactashcata yarishpami, chashna na micun.
Currently Selected:
GÉNESIS 32: QVI16
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.