मरकुस 4
4
बीज बुनतो बिता चो कहनी
1हुन फेर झील चो रेटे उपदेश देऊक मुरयालो: आउर असन बड़े भारी भीड़ हुनचो लगे रूंड़ा होली कि हुन झील ने गोटक ड़ोंगा थाने चेगुन भाती बसलो, आउर सपाय भीड़ भूईं थाने झील चो रेटे उबा रली। 2आउर हुन हुनमन के कहनीमन ने खुबे असन गोठमन सिकाऊक मुरयालो, आउर आपलो उपदेश ने हुनमन ले बल्लो, 3“सुना! गोटक बुनतो बिता बीज बुनुक निकरलो। 4बुनतो समया खिन्डिक बाट चो रेटे घसरली आउर चड़ीईमन ऐऊन भाती हुनके खादला। 5खिन्डिक चचरली भूईं थाने घसरली जोन थाने हुनके खुबे माटी नी मिरली, आउर गड़ीयां माटी नी मिरतोर लागुन झटके अकरली, 6आउर जिदलदाय बेर निकरली तेबे जरून गेली, आउर चेर नी धरतोर लागुन सुकुन गेली। 7खिन्डिक लाटा-बुटामन ने घसरली, आउर लाटा-बुटामन बाडुन भाती हुनके चेपाऊन दिला, आउर हुन फर नी आनली। 8मान्तर खिन्डिक अच्छा माटी थाने घसरली, आउर हुन अकरली आउर बाडुन भाती फर धरली; आउर कोनी तीस गुना, कोनी साठ गुना आउर कोनी सव गुना फल आनला।” 9तेबे हुन बल्लो, “जेचो लगे सुनतो काजे कान आसे, हुन सुना।”
कहनीमन चो अरत
10जिदलदाय हुन ऐकला रलो, तेबे हुनचो संगवारीमन हुन बारा झान संगे हुनचो ले ऐ कहनीमन चो बारे ने पचारला। 11हुन हुनमन ले बल्लो, “तुमनमन के तो माहापुरू चो राज चो भेद चो समज दियाय गेली से, मान्तर बाहार बितामन चो काजे सपाय गोठमन कहनीमन ले होऊ आय।” 12ऐईकाजे कि
“हुनमन दकते-दकते दकोत आउर हुनमन के दका नी देओ
आउर सुनते-सुनते सुनोत बले आउर नी समजोत;
असन नी होओ कि हुनमन फिरोत, आउर छमा कराय जाओत।”
बीज बुनतो बिता कहनी चो अरत
13फेर हुन हुनमन ले बल्लो, “काय तुमी ऐ कहनी नी समजास? तो फेर आउर सपाय कहनीमन के कसन समजा से? 14बुनतो बिता बचन बुनु आय। 15जोन बाट चो रेटे चो आत जोन थाने बचन बुना जाऊ आय, ऐ हुनमन आत कि जिदलदाय हुनमन सुनला, तेबे शयतान तुरते ऐऊन भाती बचन के जोन हुनमन थाने बुनाय जाऊ रये, उठाऊन जाऊ आय। 16असने ची जोन चचरली भुईं थाने बुना जाऊ आय, ऐ हुनमन आत जोन बचन के सुनुन भाती तुरते हरिक ने गरहन करू आत। 17मान्तर आपलो भीतरे चेर नी संगातोर लागुन हुनमन खिन्डिक ची असन दिनमन काजे रऊ आत; ऐचो पाचे जिदलदाय बचन चो लागुन हुनमन उपरे तकलीस नाहले कल-कल होऊ आय, तेबे हुनमन तुरते ठोकरना खाऊ आत। 18जोन लाटा बुटामन ने बुना गेली ऐ हुनमन आत जोनमन बचन सुनला, 19आउर जगत चो चिन्ता, आउर धन चो धोका, आउर दुसर तीजमन चो लोभ हुनमन ने भिडुन भाती बचन के चेपाऊन देऊ आय आउर हुन बिना फल चो रऊ आय। 20आउर जोन अच्छा भूईं ने बुना गेली, ऐ हुनमन आत जोन बचन सुनुन भाती गरहन करून आउर फर आनु आत कोनी तीस गुना, कोनी साठ गुना आउर कोनी सव गुना।”
दिया चो कहनी
21हुन हुनमन ले बल्लो, “काय दीया के ऐईकाजे आनु आत कि पयमाना नाहले खटिया चो खाले संगाया जाओ? काय ऐईकाजे नाई कि पटेरा उपरे संगाया जाओ? 22कसनबल्लोने कोनी तीज लुकलोर निआय, मान्तर ऐईकाजे आय कि उजागर होओ; आउर ना काई गुपत आसे, मान्तर ऐईकाजे आय कि उजागर होओ। 23अगर काचीई सुनतोर कान आसे, तो हुन सुना।” 24फेर हुन हुनमन ले बल्लो, “सचेत राआ कि काय सुनेसास। जोन नाप ले तुमी नापेसास हुनचेई ले तुमीमन काजे बले नापा जाये दे, आउर तुमके खुबे दिआय जाये दे। 25कसनबल्लोने जेचो लगे आसे, हुनके दिआय जाये दे; आउर जेचो लगे निआय, हुनचो ले हुन बले जोन हुनचो लगे आसे, धरा जाये दे।”
अकरतो बिती बीज चो कहनी
26फेर हुन बल्लो, “माहापुरू चो राज असन आय, जसन कोनी माने भूईं थाने बीज बुनो, 27आउर रात ने सोओं आउर दिन ने चेतो, आउर हुन बीज असन अकरो आउर बाड़ो कि हुन नी जानो। 28धरतनी आपने खुद फर आनु आय, पयले गाजा, तेबे खेड़, आउर तेबे खेड़मन ने तिआर बीज। 29मान्तर जिदलदाय बीज पाकुन जाऊ आय, तेबे हुन तुरते हिरा लगाऊ आय, कसनबल्लोने कटनी ऐऊन पोंचली से।”
राई बीज चो कहनी
30फेर हुन बल्लो, “आमी माहापुरू चो राज चो उदाहरन काचो ले देऊँ दें, आउर कोन कहनी ले हुनचो बरनन करवां? 31हुन राई चो बीजमन चो असन आय; जिदलदाय भूईं ने बुना जाऊ आय तेबे भूईं चो सपाय बीजमन ले नानी होऊ आय, 32मान्तर जिदलदाय बुनाय गेली, तेबे अकरून भाती सपाय साग डार ले बड़े होऊ आय, आउर हुनचो असन बड़े खेंदामन निकरू आय कि बादरी चो चड़ीई हुनचो छांय ने डेरा करू आत।” 33हुन हुनमन के असन परकार चो खुबे असन कहनी देऊन-देऊन हुनमन चो समज चो अनुसार बचन सुनाते रलो, 34आउर बिना कहनी बोललोर हुन हुनमन ले काई बले नी बोलते रलो; मान्तर ऐकला ने हुन आपलो निज चेलामन के सपाय गोठमन चो मतलब सांगते रलो।
ईशु लेहरा धुका के थमातोर
35हुन दिने जिदलदाय संझ होली, तेबे हुन चेलामन ले बल्लो, “ईआ, आमी हुनपाट जांवा।” 36आउर हुनमन भीड़ के छांडुन भाती जसन हुन रलो, असने ची हुनके डोंगा थाने संगे निला; आउर हुनचो संगे आउर बले ड़ोंगामन रली। 37तेबे बड़े लेहरा-धुका ईली, आउर हरलामन ड़ोंगा थाने ऐथा तक लगली कि हुन पानी ले भरी होते रये। 38मान्तर हुन खुद पाटकुती गद्दा थाने सोहते रलो। तेबे हुनमन हुनके चेताऊन भाती हुनचो ले बल्ला, “हे गुरू, काय तुके चिन्ता निआय कि आमी नष्ट होऊ से?” 39तेबे हुन उठून भाती लेहरा-धुका के खिजलो, आउर पानी ले बल्लो, “ओगाय रा, ठेब!” आउर लेहरा-धुका ठेबली आउर बड़े शान्त होऊन गेली; 40आउर हुनमन ले बल्लो, “तुमी केंव डरेसास? काय तुमके ऐबले बिश्वास निआय?” 41हुनमन खुबे ची डरला आउर आपस ने बल्ला, “ऐ कोन आय कि लेहरा-धुका आउर पानी बले हुनचो हुकुम माने सोत?”
Currently Selected:
मरकुस 4: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
