मत्ती 28

ईशु चो जीव उठतोर

1सब्त चो दिन चो पाचे सपता चो पयले दिन उजर होते ची मरियम मगदलीनी आउर दुसर मरियम कबर के दकुक ईला। 2आउर दका, गोटक बड़े भुईं डोल होली, कसनबल्लोने परबु चो गोटक दूत सरग ले उतर लो आउर लगे ऐऊन भाती हुन पकना के उलटालो, आउर हुनचो उपरे बसलो। 3हुनचो रूप बिजली चो असन आउर हुनचो फटीई पाले चो समान उजर रये। 4हुनचो भय ले राका करूमन थरथरुन उठला आउर मरलो समान होऊन गेला। 5सरगदूत बायले लेकीमन ले बल्लो, “नी डरा, मय जाने से कि तुमी ईशु के जोन कुरूस थाने चेगाया जाऊ रये डगरायसास। 6हुन ऐथा निआय, मान्तर आपलो बचन चो अनुसार जीव उठलो से। ईआ, ऐ जगा दका, जोन थाने परबु पडुन रलो, 7आउर झटके जाऊन भाती हुनचो चेलामन ले बल्ला कि हुन मरलो थानले जीव उठलो से, आउर हुन तुमचो ले पयले गलील ने जाये से, हुन थाने हुनचो दरशन पाहा से! दका, मय तुमचो ले बोलुन दिले।” 8हुनमन भय आउर बड़े हरिक चो संगे कबर ले झटके बाहडून भाती हुनचो चेलामन के खबर देतो काजे पराला।

बायले लेकीमन के ईशु चो दरशन

9तेबे ईशु हुनमन के भेट होलो। आउर बल्लो, “सलाम”। हुनमन लगे ऐऊन भाती आउर हुनचो पाँय धरून भाती हुनके पाँय पढ़ला। 10तेबे ईशु हुनमन ले बल्लो, “नी डरा; मोचो भाईमन ले जाऊन भाती बल्ला कि गलील ने जाते जाओत, हुता मोके दक दे।”

राका करूमन चो खबर

11हुन बायले लेकीमन जाते ची रवत कि राका करूमन थानले आदो नंगर ने ऐऊन भाती पुरा हाल परधान याजकमन ले बोलुन सुनाला। 12तेबे हुनमन सियानमन चो संगे रूंड़ा होऊन भाती सहमती करला आउर पलटनमन के खुबे चाँदी देऊन भाती बल्ला, 13“ऐ बोला कि राती बेरा जिदलदाय आमी सोहते रऊँ, तेबे हुनचो चेलामन ऐऊन भाती हुनके चोरून नीला। 14आउर अगर ऐ गोठ मुखिया चो कान लगले पोंचे दे, तेबे आमी हुनके समजाऊँ दें आउर तुमके खतरा ले बचाऊँ दें।” 15आउर हुनमन रूपया धरून भाती जसन सिकाय जाऊन रये, असने ची करला। ऐ गोठ आजी ले यहूदीमन ने परचलित आसे।

चेलामन के दरशन आउर आखरी हुकुम

16गियारा चेलामन गलील ने हुन डोंगरी थाने गेला, जेके ईशु हुनमन के सांगुन रये। 17हुनमन हुनचो दरशन पाऊन भाती हुनके जुहार करला, मान्तर कोनी-कोनी के संका होली। 18ईशु हुनमन चो लगे ऐऊन भाती बल्लो, “सरग आउर धरतनी चो सपाय अधिकार मोके दिआ गेली से। 19ऐईकाजे तुमी जाआ, सपाय जातिमन चो लोगमन के चेला बनाहा; आउर हुनमन के बुआ, आउर बेटा, आउर पवितर आत्मा चो नाव ले डूबन दिआस, 20आउर हुनमन के सपाय गोठमन जोन मय तुमके हुकुम दिले से, मानुक सिकाआ आउर दका, मय जगत चो आखरी तक हरमेशा तुमचो संगे आंसे।”

Currently Selected:

मत्ती 28: HLBNT

ማድመቅ

Copy