मत्ती 25

दुला चो बाट दकतो दस कुंआरीमन चो कहनी

1“सरग चो राज हुन दस कुंआरीमन चो असन होये दे जोन आपलो मशालमन धरून भाती दुला ले भेट करूक निकरला। 2हुनमन ने पांच मुरूक आउर पांच समजदार रवत। 3मुरूकमन आपलो मशालमन तो धरला, मान्तर आपलो संगे तेल नी धरला; 4मान्तर समजदारमन आपलो मशालमन चो संगे आपलो चिमनीमन ने तेल बले भरला। 5जिदलदाय दुला चो ऐतोर ने बेर होली, तेबे हुनमन सपाय झुमुक मुरयाला आउर सोऊन गेला।”

6“अधघर राती धुम मचली, ‘दका, दुला ऐये से! हुनचो ले भेट करतो काजे जो।’ 7तेबे हुनमन सपाय कुंआरीमन उठून भाती आपलो मशालमन के अच्छा करूक मुरयाला। 8आउर मुरूकमन समजदारमन ले बल्ला, ‘आपलो तेल थानले खिन्डिक आमके बल्ले दिया, कसनबल्लोने आमचो मशालमन लिबुन जाये से।’ 9मान्तर समजदारमन जबाप दिला, ‘बिलकुल ऐ आमचो आउर तुमचो काजे पुरा नी होये; अच्छा तो ऐ आय कि तुमी बिकतो बितामन चो लगे जाऊन भाती आपलो काजे घेनुन धरा।’ 10जिदलदाय हुनमन घेनतो काजे जाते रवत तेबे दुला ऐऊन पोंचलो, आउर जोन तिआर रवत, हुनमन हुनचो संगे बिहा चो घर ने जाते गेला आउर कपाट बन्द करा गेली। 11ऐचो पाचे हुनमन दुसर कुंआरीमन बले ऐऊन भाती बोलुक मुरयाला, ‘हे मालिक, हे मालिक, आमचो काजे कपाट उगाढुन देस!’ 12हुन जबाप दिलो, ‘मय तुमचो ले सते बलेंसें, मय तुमके नी जाने।’ 13ऐईकाजे चेत ने राहा, कसनबल्लोने तुमी ना हुन दिन के जानास, ना हुन घड़ी के।”

तीन झान दासमन चो कहनी

14“कसनबल्लोने ऐ हुन माने चो असन गती आय जोन परदेश जातो समया आपलो दासमन के हाग देऊन भाती आपलो धनमाल हुनमन के सोपुन दिलो। 15हुन गोटक के पांच तोड़ा, दुसर के दुय, आउर तीसर के गोटक; बल्लोने हरकोनी के हुनचो सामरत चो अनुसार दिलो, आउर तेबे परदेश गेलो। 16तेबे, जोन के पांच तोड़ा मिरू रये, हुन तुरते जाऊन भाती हुनमन ले लेन देन करलो, आउर पांच तोड़ा आउर कमालो। 17ऐई रीति ले जेके दुय मिरू रये, हुन बले दुय आउर कमालो। 18मान्तर जोन के गोटक मिरू रये, हुन जाऊन भाती माटी खोड़लो, आउर आपलो मालिक चो रूपया लुकाऊन दिलो।”

19“खुबे दिनमन चो पाचे हुन दासमन चो मालिक ऐऊन भाती हुनमन ले लेखा धरूक मुरयालो। 20जोन के पांच तोड़ा मिरू रये, हुन पांच तोड़ा आउर आनुन भाती बल्लो, ‘हे मालिक, तुय मोके पांच तोड़ा सोपु रलीस, दक, मय पांच तोड़ा आउर कमाले से।’ 21हुनचो मालिक हुनचो ले बल्लो, ‘धन्य, हे अच्छा आउर बिश्वास लायक दास, तुय खिन्डिक ने बिश्वास लायक रलीस; मय तुके खुबे तीजमन चो अधिकारी बनायेंदें। आपलो मालिक चो हरिक ने सामिल हो।’”

22“आउर जेके दुय तोड़ा मिरू रये, हुन बले ऐऊन भाती बल्लो, ‘हे मालिक, तुय मोके दुय तोड़ा सोपु रलीस, दक, मय दुय तोड़ा आउर कमाले।’ 23हुनचो मालिक हुनचो ले बल्लो, ‘धन्य, हे अच्छा आउर बिश्वास लायक दास, तुय थोड़े ने बिश्वास लायक रलीस; मय तुके खुबे तीजमन चो अधिकारी बनायें दें। आपलो मालिक चो हरिक ने सामिल हो।’”

24“तेबे जेके गोटक तोड़ा मिरू रये, हुन ऐऊन भाती बल्लो, ‘हे मालिक, मय तुके जानते रले, कि तुय कठर माने आस: तुय जोन कोनी थाने नी बुनीस हुता काटु आस, आउर जोन थाने नी बिकरिस हुता ले सकलु आस।’ 25ऐईकाजे मय डर ले आउर जाऊन भाती तुचो तोड़ा माटी ने लुकाऊन दिले। दक, ‘जोन तुचो आय, हुन ऐ आय।’ 26हुनचो मालिक हुनके जबाप दिलो, ‘हे दुष्ट आउर ठग दास, जिदलदाय तुय ऐ जानते रलीस कि जोन थाने मय नी बुनले हुता ले काटु आय, आउर जोन थाने मय नी बिकरें हुता ले सकलु आय; 27तेबे तुके जरूरत रये कि मोचो रूपया लेन-देन करतो बितामन के देऊन देतीस, तेबे मय ऐऊन भाती आपलो धन कन्तर संगे धरते। 28ऐईकाजे हुन तोड़ा हुनचो ले धरा, आउर जेचो लगे दस सिक्का आसे, हुनके देऊन दिआस। 29कसनबल्लोने जोन कोनी चो लगे आसे, हुनके आउर दिया जायेदे; आउर हुनचो लगे खुबे होयेदे: मान्तर जेचो लगे निआय, हुनचो ले हुन बले जोन हुनचो लगे आसे, धरा जायेदे। 30आउर ऐ ठग दास के बाहरे चो अंधार ने पकान दिआस, जो थाने गागतोर आउर दात कड़रतोर होयेदे।’”

ईशु जगत चो नियाय करे दे

31“जिदलदाय माने चो बेटा आपलो महिमा ने ऐये दे आउर सपाय सरगदूत हुनचो संगे ऐ दे, तेबे हुन आपलो महिमा चो सिंघासन थाने बिराजमान होये दे। 32आउर सपाय जातिमन हुनचो पुरे रूंड़ा करा जाय दे; आउर जसन धोरीई मेंडामन के बकड़ीमन ले गुचाऊन देऊ आय, असने ची हुन हुनमन के गोटक दुसर ले अलग करेंदे। 33हुन मेंडामन के आपलो उजा बाटे आउर बकड़ीमन के डेबरी बाटे उबा करेंदे। 34तेबे राजा आपलो उजा बाटे चो बितामन ले बलेदे, ‘हे मोचो बुआ चो धन्य लोगमन, ईआ, हुन राज चो अधिकारी होऊन जाआ, जोन जगत चो मुर ले तुमचो काजे तिआर करा गेली से। 35कसनबल्लोने मय भुके रले, आउर तुमी मोके खातो काजे दिलास; मय पिआश रले, आउर तुमी मोके पानी पिआलास; मय परदेशी रले, आउर तुमी मोके आपलो घर ने ठेबालास; 36मय बिन फटीई चो रले, आउर तुमी मोके फटीई पींदालास; मय बेमार रले, आउर तुमी मोचो दका-रखा करलास, मय जयलघर ने रले, आउर तुमी मोके मिलुक ईलास।’”

37“तेबे धरमी हुनके जबाप देदे, ‘हे परबु, आमी केबे तुके भुके दकलु आउर खुआलु? नाहले पिआश दकलु आउर पानी पिआलु? 38आमी केबे तुके परदेशी दकलु आउर आपलो घर ने ठेबालु नाहले बिन फटीई दकलु आउर फटीई पिंदालु? 39आमी केबे तुके बेमार नाहले जयलघर ने दकलु आउर तुके मिलुक ईलु?’ 40तेबे राजा हुनमन के जबाप देयेदे, ‘मय तुमचो ले सते बलेंसें कि तुमी जोन मोचो ऐ नानी ले नानी भाईमन ले कोनी गोटक संगे करलास, हुन मोचो ची संगे करलास।’” 41“तेबे हुन डेबरी बाट चो बितामन ले बलेदे, ‘हे सराप पड़लो लोगमन, मोचो पुरे ले हुन नी सरतो आईग ने जाते जाआ, जोन शयतान आउर हुनचो दूतमन चो काजे तिआर करा गेली से। 42कसनबल्लोने मय भुके रले, आउर तुमी मोके खातो काजे नी दिलास; मय पिआश रले, आउर तुमी मोके पानी नी पिआलास; 43मय परदेशी रले, आउर तुमी मोके आपलो घर ने नी ठेबालास; मय बिन फटीई रले, आउर तुमी मोके फटीई नी पिंदालास; मय बेमार आउर जयलघर ने रले, आउर तुमी मोचो दका-रखा नी करलास।’

44“तेबे हुनमन जबाप देदे, ‘हे परबु, आमी तुके केबे भूके, नाहले पिआश, नाहले परदेशी, नाहले बिन फटीई, नाहले बेमार, नाहले जयलघर ने दकलु, आउर तुचो सेवा शासन नी करलु?’ 45तेबे हुन हुनमन के जबाप देयेदे, ‘मय तुमचो ले सते बलेंसें कि तुमी जोन ऐ नानी ले नानीमन थानले कोनी गोटक चो संगे नी करलास, हुन मोची संगे बले नी करला।’ 46आउर ऐ हरमेशा चो डण्ड भोगदे मान्तर धरमी अमर जीवना ने ओलदे।”

Currently Selected:

मत्ती 25: HLBNT

ማድመቅ

Copy