मत्ती 23
23
शास्तरीमन आउर फरीसीमन चो गुन-दोष सांगतोर
1तेबे ईशु भीड़ ले आउर आपलो चेलामन ले बल्लो, 2“शास्तरीमन आउर फरीसी मूसा चो आसन थाने बसला सोत; 3ऐईकाजे हुनमन तुमचो ले जोन काई बलदे हुन करा आउर माना, मान्तर हुनमन चो असन काम नी करा; कसनबल्लोने हुनमन बलु तो आत मान्तर करू नुआत। 4हुनमन गोटक असन भारी बोज के जेके उठातोर मशकिल आय, बान्दुन भाती हुनमन के मानेमन चो खांदमन उपरे संगाऊ आत; मान्तर खुद हुनके आपलो अंडकी ले बले सरकातोर नी चाह ओत। 5हुनमन आपलो सपाय काम लोगमन के दकातो काजे करू आत हुनमन आपलो ताबिजमन के ओसार करू आत आउर आपलो फटीईमन चो धड़ी बड़ाऊ आत। 6भोज ने मुख्य-मुख्य जगा, आउर सभा ने मुख्य-मुख्य आसन, 7हाटमन ने जुहार, आउर मानेमन ने रब्बी बलाय होतोर हुनमन के भाऊ आय। 8मान्तर तुमी रब्बी नी बलाय हुआ, कसनबल्लोने तुमचो गोटक ची गुरू आसे, आउर तुमी सपाय भाई आस। 9धरतनी थाने कोकीई आपलो बुआ नी बोला, कसनबल्लोने तुमचो गोटक ची बुआ आसे, जोन सरग ने आसे। 10आउर मालिक बले नी बलाय हुआ, कसनबल्लोने तुमचो गोटक ची मालिक आसे, बल्लोने मसीह। 11जोन तुमचो ने बड़े आय, हुन तुमचो सेवक बनो। 12जोन कोनी खुद के बड़े बनाये दे, हुन नानी करा जाये दे: आउर जोन कोनी खुद के नानी बनाये दे, हुन बड़े करा जाये दे।
13“हे कपटी शास्तरीमन आउर फरीसीमन, तुमचो उपरे हाय! तुमी मानेमन चो काजे सरग राज चो दुआर बंद कर सास, ना तो खुद हुन थाने ओलु आस आउर ना हुन थाने ओलतो बितामन के ओलुक देऊ आस। 14(हे कपटी शास्तरीमन आउर फरीसीमन, तुमचो उपरे हाय! तुमी रान्डीमन चो घरमन के खाये सास, आउर दकातो काजे बड़े बेर ले पारथना करते रऊ आस: ऐईकाजे तुमके खुबे डण्ड मिरेदे।)
15“हे कपटी शास्तरीमन आउर फरीसीमन, तुमचो उपरे हाय! तुमी गोटक जन के आपलो मान्दी ने आनतो काजे सपाय पानी आउर भुईं ने फिरे सास, आउर जिदलदाय हुन मान्दी ने ऐऊन जाऊ आय तेबे हुनके आपलो ले दुना नरक बनान देऊ आस।
16“हे काना बाट दकाऊमन, तुमचो उपरे हाय! जोन बोलु आस कि अगर कोनी मंदिर चो किरिया खाये दे तेबे काई नुआय, मान्तर अगर कोनी मंदिर चो सोना चो किरिया खाये दे तेबे हुनचो ले बन्दुन जायेदे। 17हे मुरकमन आउर कानामन, कोन बड़े आय; सोना नाहले हुन मंदिर जेचो ले सोना पवितर होऊ आय? 18फेर बोलु आस कि अगर कोनी बेदी चो किरिया खाये दे तेबे काई नुआय, मान्तर जोन भेट हुन थाने आसे, अगर कोनी हुनचो किरिया खाये दे तेबे बन्दुन जायेदे। 19हे कानामन, कोन बड़े आय; भेट नाहले बेदी जेचो ले भेट पवितर होऊ आय? 20ऐईकाजे जोन बेदी चो किरिया खाऊ आय, हुन हुनचो आउर जोन काई हुन थाने आसे, हुनचो बले किरिया खाऊ आय। 21जोन मंदिर चो किरिया खाऊ आय, हुन हुनचो आउर हुन थाने रतो बितामन चो बले किरिया खाऊ आय। 22जोन सरग चो किरिया खाऊ आय, हुन माहापुरू चो सिंघासन चो आउर हुन थाने बसतो बिता चो बले किरिया खाऊ आय।
23“हे कपटी शास्तरीमन आउर फरीसीमन, तुमचो उपरे हाय! तुमी पदीना, आउर सोंप, आउर जीरा चो दसमांस तो देये सास, मान्तर तुमी नियम चो भीतर चो गोठमन के बल्लोने नियाय, आउर दया, आउर बिश्वास के छांडुन दिलास; जरूरी रये कि ऐमन के बले करते रतास आउर हुनमन के बले नी छांड़तास। 24हे काना बाट दकाऊमन, तुमी मछर के तो छानुन देये सास, मान्तर ऊंट के गिरुन जाय सास।
25“हे कपटी शास्तरीमन आउर फरीसीमन, तुमचो उपरे हाय! तुमी बटका आउर थारी के उपर-उपर ले मांजे सास मान्तर हुन भीतरे अंधार आउर अधिरजा ले भरलोर आसे। 26हे काना फरीसी, पयले बटका आउर थारी के भीतर ले मांज कि हुन बाहरे बले छुक-छुका होओ।
27“हे कपटी शास्तरीमन आउर फरीसीमन, तुमचो उपरे हाय! तुमी चुना पोतलो बिती मोट चो असन आस जोन उपर ले तो सुन्दर दका देऊ आय, मान्तर भीतरे मोड़ीमन चो हाड़ामन आउर सपाय परकार चो मईल भरली से। 28ऐई रीति ले तुमी बले उपर ले मानेमन के धरमी दका देये सास, मान्तर भीतरे कपट आउर अधरम ले भरला सास।
29“हे कपटी शास्तरीमन आउर फरीसीमन, तुमचो उपरे हाय! तुमी अगम गिआनीमन चो मोटमन सजारते आउर धरमीमन चो मोट बनाऊ आस, 30आउर बले सास, ‘अगर आमी आपलो बुआ दादीमन चो दिनमन ने होतु तेबे अगम गिआनीमन चो हत्या ने हुनमन चो संगवारी नी होतु।’ 31ऐचो ले तो तुमी आपलो उपरे खुद गोहई देये सास कि तुमी अगम गिआनीमन चो हत्यारामन चो पिलामन आस। 32आउर तुमी आपलो बुआ दादीमन चो पाप चो हांडी पुरा-पुरा भरून दिआस। 33हे सांपमन, हे करीतमन चो पिलामन, तुमी नरक चो डण्ड ले कसन बचा से? 34ऐईकाजे दका, मय तुमचो लगे अगम गिआनीमन आउर अकल बितामन आउर शास्तरीमन के पटायें से; आउर तुमी हुनमन थानले कितरो के मारून पकाआ से आउर कुरूस उपरे चेगाहा से, आउर कितलो के आपलो आराधना घरमन ने कोड़ा मारा से आउर गोटक नंगर ले दुसर नंगर ने खेद ते फिरा से। 35जेचो ले धरमी हाबिल ले धरून भाती बीरीक्या चो बेटा जकर्याह लगले, जोन के तुमी मंदिर आउर बेदी चो मंजी ने मारून राआस, जितरो धरमीमन चो लऊ धरतनी थाने बोहड़ाया गेली से हुन सपाय तुमचो मुण्ड उपरे पड़ेदे। 36मय तुमचो ले सते बलेंसें, ऐ सपाय गोठमन ऐ समया चो लोगमन उपरे ऐऊन पड़ेदे।
ईशु चो यरूशलेम थाने दुख
37“हे यरूशलेम, हे यरूशलेम! तुय अगम गिआनीमन के मारू आस, आउर जोन तुचो लगे पटाया गेला, हुनमन उपरे पोकना मारू आस। कितलो हार मय मन करले कि जसन कुकड़ी आपलो पिलामन के आपलो पाटकी चो खाले रूंड़ा करू आय, असने ची मय बले तुचो लेकामन के रूंड़ा करें, मान्तर तुमी नी मन करलास। 38दका, तुमचो घर तुमचो काजे उजराऊन छांडा जाये से। 39कसनबल्लोने मय तुमचो ले बलें सें कि अदायं जिदलदाय ले तुमी नी बला से, ‘धन्य आय हुन, जोन परबु चो नाव ले ऐऊ आय’ हुलदाय ले तुमी मोके फेर केबीई नी दका से।”
Currently Selected:
मत्ती 23: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
