मत्ती 14

हेरोदेस चो ईशु चो बारे ने सुनतोर

1हुन समया चवथाई देश चो राजा हेरोदेस ईशु चो चरचा सुनलो, 2आउर आपलो सेवा करूमन ले बल्लो, “ऐ यूहन्ना डूबन देतो बिता आय! हुन मरलो थानले जीव उठलो से, ऐईकाजे हुनचो ले सामरत चो काम उजागर होये से।”

यूहन्ना चो हत्या

3कसनबल्लोने हेरोदेस आपलो भाई फिलिप्पुस चो बायले हेरोदियासनी चो लागुन, यूहन्ना के धरून भाती बान्दलो आउर जयलघर ने ढ़ाकुन रलो। 4कसनबल्लोने यूहन्ना हुनचो ले बोलु रलो कि ऐ बायले के संगातोर तुचो काजे ठीक नुआय। 5ऐईकाजे हुन हुनके मारूक चाहते रलो, मान्तर लोगमन ले डरते रलो कसनबल्लोने हुनमन हुनके अगम गिआनी मानते रवत। 6मान्तर गोटक दिन जिदलदाय हेरोदेस चो जनम दिन ईली, तेबे हेरोदियासनी चो बेटी भोज ने सगा चो पुरे नाचा दकाऊन भाती हेरोदेस के हरिक करली। 7ऐ थाने हुन किरिया खाऊन भाती बचन दिलो, “जोन काई तुय मांग से, मय तुके देयें दें।” 8हुन आपलो आया चो उच-उचातो के बल्ली, “यूहन्ना डूबन देतो बिता चो मुण्ड थारी ने ऐथाय मोके मंगाऊन देस।” 9राजा हेरोदेस मुरमुरा होलो, मान्तर आपलो किरिया चो, आउर संगे बसलो बितामन चो लागुन, हुकुम दिलो कि देऊन दिया। 10आउर हुन जयलघर ने लोगमन के पटाऊन भाती यूहन्ना चो मुण्ड कटाऊन दिलो; 11आउर हुनचो मुण्ड थारी ने आनला आउर लेकी के दिला, जेके हुन आपलो आया चो लगे निली। 12तेबे यूहन्ना चो चेलामन ईला आउर हुनचो लाश के नेऊन भाती तोपला, आउर जाऊन भाती ईशु के खबर दिला।

पांच हजार मानेमन के खुआतोर

13जिदलदाय ईशु ऐ सुनलो, तेबे हुन ड़ोंगा उपरे चेगुन भाती हुन थानले कोनी चिमचाम जगा ने धिआन ने गेलो। लोग ऐ सुनुन भाती नंगर-नंगर ले हिन्ड़ते ची हुनचो पाट-पाट गेला। 14हुन निकरून भाती गोटक बड़े भीड़ दकलो आउर हुनमन उपरे जीव दुकालो, आउर हुनमन चो बेमारमन के चेंगा करलो। 15जिदलदाय सांज होली तेबे हुनचो चेलामन हुनचो लगे ऐऊन भाती बल्ला, “ऐ चिमचाम जगा आय आउर बेर होये से; लोगमन के बिदा करू कि हुनमन बस्तीमन ने जाऊन भाती आपलो काजे भात घेनोत।” 16मान्तर ईशु चेलामन ले बल्लो, “हुनमन चो जातोर जरूरी निआय! तुमी ची ऐ मन के खातो काजे दिआस।” 17चेलामन ईशु ले बल्ला, “ऐथा आमचो लगे पांच रोटी आउर दुय ठान मछरी के छांडुन भाती आउर काईची निआय।” 18ईशु बल्लो, “हुनमन के ऐथा मोचो लगे धरून ईआ।” 19तेबे हुन लोगमन के लाटा थाने बोसतो काजे बल्लो, आउर हुन पांच रोटी आउर दुय मछरी के धरलो; आउर सरग बाटे दकुन भाती धन्यबाद करलो आउर रोटी के छिड़ाऊन-छिड़ाऊन भाती चेलामन के दिलो, आउर चेलामन लोगमन के। 20जिदलदाय सपाय खाऊन भाती संतुष्ट होला, तेबे चेलामन बाचलोर गोंदामन ले भरलोर बारा टुकना उठाला। 21आउर खातो बिती बायले लेकी आउर लेकामन के छांडुन भाती पांच हजार मानेमन चो लगे-लगे रवत।

पानी उपरे ईशु चो हिन्ड़तोर

22तेबे ईशु तुरते आपलो चेलामन के ड़ोंगा थाने चेगालो कि हुनमन हुनचो ले पयले गलील चो झील चो हुनपाट जाओत, जिदलदाय ले हुन लोगमन के बिदा करो। 23हुन लोगमन के बिदा करून, पारथना करूक अलगे डोंगरी उपरे गेलो; आउर सांज बेरा हुन हुता ऐकला रलो। 24हुन समया ड़ोंगा झील चो मंजी हरला ले डोलते रली, कसनबल्लोने लेहरा पुरे चो रली। 25आउर ईशु राती चो चवथा पाहार झील थाने हिन्ड़ते-हिन्ड़ते हुनमन चो लगे ईलो। 26चेलामन हुनके झील थाने हिन्ड़तोर दकुन भाती डरला। आउर बोलुक मुरयाला, “ऐ भूत आय!” आउर डर काजे चिचयाऊक मुरयाला। 27तेबे ईशु तुरते हुनमन ले गोठयालो आउर बल्लो, “हिम्मत करा! मय आंय, नी डरा!” 28पतरस हुनके जबाप दिलो, “हे परबु, अगर तुय ची आस, तेबे मोके आपलो लगे पानी थाने हिन्डुन भाती ऐतोर हुकुम देस।” 29ईशु बल्लो, “आव!” तेबे पतरस ड़ोंगा थानले उतरून भाती ईशु चो लगे जातो काजे पानी थाने हिन्डुक मुरयालो। 30मान्तर लेहरा धुका के दकुन भाती पतरस डरलो, आउर जिदलदाय बुडूक मुरयालो तेबे चिचयाऊन भाती बल्लो, “हे परबु, मोके बचाव!” 31ईशु तुरते हाथ लमाऊन भाती हुनके धरलो आउर पतरस ले बल्लो, “हे अल्पबिश्वासी, तुय केंव संका करलीस?” 32जिदलदाय हुनमन ड़ोंगा थाने चेगला, तेबे लेहरा ठेबली। 33आउर हुनमन जोन ड़ोंगा थाने रवत, हुनके पाँय पडुन बल्ला, “सते, तुय माहापुरू चो बेटा आस।”

ईशु गन्नेसरत ने खुबे रोगीमन के चेंगा करतोर

34हुनमन गलील चो हुनपाट उतरून भाती गनेसरत ने अमरला। 35हुता चो लोगमन ईशु के चिताला आउर लगे-लगे चो सपाय जगा ने खबर पठाला, आउर सपाय बेमारीमन के हुनचो लगे आनला, 36आउर ईशु ले गुहार करूक मुरयाला कि हुन हुनमन के आपलो फटीई चो आंचर के ची छिंऊक देओ; आउर जितरो लोगमन हुनचो पिन्दलो फटीई के छिंवला, हुनमन चेंगा होला।

Currently Selected:

मत्ती 14: HLBNT

ማድመቅ

Copy