लूका 4

ईशु चो परीक्षा

1फेर ईशु पवितर आत्मा ले भरून, यरदन लंदी ले फिरलो; आउर आत्मा चो चलालो ले रान ने फिरते रलो; 2आउर चालीस दिन ले शयतान हुनचो परीक्षा करते रलो। हुन दिनमन ने हुन काई नी खादलो आउर जिदलदाय हुन दिन पुरा होऊन गेली, तेबे हुनके भुक लागली। 3तेबे शयतान हुनचो ले बल्लो, “अगर तुय माहापुरू चो बेटा आस, तो ऐ पकना ले बोल, कि रोटी बनुन जाओ।” 4ईशु हुनके जबाप दिलो, “लिकलोर आसे: ‘माने मात्र रोटी ले जीव नी रये दे’।” 5तेबे शयतान हुनके निलो आउर हुनके डण्डिक ची ने जगत चो पुईतराय राज के दकालो। 6आउर हुनचो ले बल्लो, “मय ऐ सपाय अधिकार, आउर ऐ मन चो धनमाल तुके देयें दें, कसनबल्लोने हुन मोके सोपाय गेली से, आउर जेके मनकरू आंय हुनी के देऊन देऊ आंय। 7ऐईकाजे अगर तुय मोके जुहार कर से, तेबे ऐ सपाय तुचो होऊन जाय दे।” 8ईशु हुनके जबाप दिलो, “लिकलोर आसे: ‘तुय परबु आपलो माहापुरू के जुहार कर; आउर मात्र हुनचेई उपास कर’।” 9तेबे हुन हुनके यरूशलेम ने नेऊन भाती मंदिर चो गुबा थाने उबा करलो, आउर हुनचो ले बल्लो, “अगर तुय माहापुरू चो बेटा आस, तो आपन खुद के ऐथा ले खाले घसराऊन देस। 10कसनबल्लोने लिकलोर आसे, ‘हुन तुचो बारे ने आपलो सरग दूतमन के हुकुम देये दे, कि हुनमन तुके बचाओ,’ 11आउर ‘हुनमन तुके हाथे हाथ उठा दे, असन नी होओ कि तुचो पाँय ने पकना ले ठेच लगो’।” 12ईशु हुनके जबाप दिलो, “ऐ बले बोललोर आसे: ‘तुय परबु आपलो माहापुरू चो परीक्षा नी कर’।” 13जिदलदाय शयतान सपाय परीक्षा करून चुकलो, तेबे खिन्डिक समया चो काजे हुनचो लगले जाते गेलो।

गलील ने ईशु चो सेवा

14फेर ईशु आत्मा चो सामरत ले भरलोर गलील ने आपस ईलो, आउर हुनचो गोठ बात लगे-लगे चो पुईतराय देशमन ने फयलुन गेली। 15हुन हुनमन चो आराधना घरमन ने उपदेश करते रलो, आउर सपाय हुनचो बड़ाई करते रवत।

नासरत ने ईशु के नी अपनातोर

16फेर हुन नासरत ने ईलो, जोन थाने पाला पोसाय जाऊ रलो; आउर आपलो रीति चो अनुसार सब्त चो दिने आराधना घरे जाऊन भाती पड़तो काजे उबा होलो। 17यशाया अगम गिआनी चो किताब हुनके दिआय गेली, आउर हुन किताब उगाढुन भाती, हुन जगा निकरालो जोन थाने ऐ लिकलोर रली:

18“परबु चो आत्मा मोचो उपरे आसे,

ऐईकाजे कि हुन कंगालमन के नगतखबर

सुनातो काजे मोचो अभिषेक करलो से,

आउर मोके ऐईकाजे पठालो से कि बन्दीमन

के छुटकारा चो

आउर कानामन के नजर

पावतोर नगतखबर परचार करेंदे आउर

चेपाय होलो लोग के छंडायेंदे,

19आउर परबु चो हरिक रतोर बरक चो परचार करेंदे।”

20तेबे हुन किताब बंद करून सेवक चो हाथ ने देऊन दिलो आउर बसुन दिलो; आउर आराधना घर चो सपाय लोगमन चो आँईक हुनचो उपरे लगु रली। 21तेबे हुन हुनमन ले बोलुक मुरयालो, “आजी ची ऐ लेखा तुमचो पुरे पुरा होली से।” 22सपाय हुनके सहराला, आउर जोन अनुग्रह चो गोठमन हुनचो मुंह ले निकरून रली, हुनचो ले भकवा होला; आउर बोलुक मुरयाला, “काय ऐ यूसुफ चो बेटा नुआय?” 23हुन हुनमन के बल्लो, “तुमी मोचो उपरे ऐ कहनी जरूर बोला से कि ‘हे बयद, आपन खुद के चेंगा कर! जोन काई आमी सुनलु से कि कफरनहूम ने कराय गेली से, हुनके ऐथा आपलो देश ने बले कर’।” 24आउर हुन बल्लो, “मय तुमचो ले सते बलेंसें कोनी अगम गिआनी आपलो देश ने मान-समान नी पाए। 25मय तुमचो सते बलेंसें कि एलिया चो दिनमन ने जिदलदाय साढ़े तीन बरक ले बादरी बंद रली, ऐथा ले कि सपाय देश ने बड़े अकाल पड़ली, तेबे इस्राएल ने खुबे असन रान्डीमन रवत। 26मान्तर एलिया हुनमन ले काचीई लगे नी पटाया गेलो, मात्र सयदा चो सारफत ने गोटक रान्डी चो लगे गेलो। 27आउर एलीशा अगम गिआनी चो समया इस्राएल ने खुबे असन कोढ़ी रवत, मान्तर सीरीयावासी नामान के छांडुन हुनमन ले कोनी सुद नी कराय गेलो।” 28ऐ गोठमन सुनते ची खन जितरो आराधना घर ने रवत, सपाय रीस ले भरून गेला, 29आउर उठून भाती हुनके नंगर ले बाहरे निकराला, आउर जोन डोंगरी थाने हुनमन चो नंगर बसु रली, हुनचो टिप थाने धरून गेला कि हुनके हुता ले खाले घसराऊन दे ओत। 30मान्तर हुन हुनमन चो मंजी ले निकरून भाती जाते गेलो।

दुष्टआत्मा भीड़लो माने के चेंगा करतोर

31फेर हुन गलील चो कफरनहूम नंगर ने गेलो; आउर सब्त चो दिने लोगमन के उपदेश देते रलो। 32हुनमन हुनचो उपदेश ले अकचकित होला कसनबल्लोने हुनचो बचन अधिकार संगे रये। 33आराधना घर ने गोटक माने रलो, जेचो ने दुष्टआत्मा रली। हुन खुबे जोर ले चिचयाऊन उठलो, 34“हे ईशु नासरी, आमके तुचो ले काय काम? काय तुय आमके नष्ट करतो काजे ईली सीस? मय तुके जाने तुय कोन आस? तुय माहापुरू चो पवितर जन आस!” 35ईशु हुनके खिजलो आउर बल्लो, “ओगाय रा, आउर हुन थानले निकरून जा!” तेबे दुष्टआत्मा हुनके मंजी ने आपटून भाती बिना हानि पोंहचाऊन हुनचो थानले निकरली। 36ऐ थाने सपाय के भकवा लागली, आउर हुनमन आपस ने गोठमन गोठयाऊन बोलुक मुरयाला, “ऐ कसन बचन आय? कसनबल्लोने हुन अधिकार आउर सामरत चो संगे अशुद्ध आत्मामन के हुकुम देऊ आय, आउर हुनमन निकरू आत।” 37असन परकार सपाय जगा हुनचो गोठ बात होऊक मुरयाली।

पतरस चो सतरी आउर दुसर लोगमन के चेंगा करतोर

38हुन आराधना घर ले उठून भाती शिमोन चो घर ने गेलो। शिमोन चो सतरी के जर चेगु रली, आउर हुनमन हुनचो काजे हुनचो ले गुहार करला। 39हुन हुनचो लगे उबा होऊन भाती जर के खिजलो आउर जर उतरून गेली, आउर हुन तुरते उठून भाती हुनचो सेवा-शासन करूक मुरयाली। 40बेर बसतो दाय, जोन-जोन थाने लोग नाना परकार चो बेमारमन ने पड़लोर रवत, हुनमन सपाय हुनमन के हुनचो लगे धरून आनला, आउर हुन गोटक-गोटक उपरे हाथ संगाऊन भाती हुनमन के चेंगा करलो। 41आउर दुष्टआत्मामन बले चिचयाते आउर ऐ बोलते कि, “तुय माहापुरू चो बेटा आस,” खुबेमन ले निकरून गेली। मान्तर हुन हुनमन के खिजते आउर बोलुक नी देते रलो, कसनबल्लोने हुनमन जानते रवत कि हुन मसीह आय।

गलील ने परचार करतोर

42जिदलदाय दिन होली तेबे हुन निकरून भाती गोटक चिमचाम जगा ने गेलो, आउर भीड़ ची भीड़ हुनके डगराते हुनचो लगे ईली, आउर हुनके ठेबाऊक मुरयाली कि हुन हुनमन चो लगले नी जाओ। 43मान्तर हुन हुनमन ले बल्लो, “मोके दुसर नंगरमन ने बले माहापुरू चो राज चो नगतखबर सुनातोर जरूरी आय, कसनबल्लोने मय ऐईकाजे पटाया गेले से।” 44आउर हुन गलील चो आराधना घरमन ने परचार करते रलो।

Currently Selected:

लूका 4: HLBNT

ማድመቅ

Copy