लूका 10
10
सत्तर चेलामन के पटातोर
1ऐ गोठमन चो पाचे परबु ईशु सत्तर दुसर माने नियुक्त करलो, आउर जोन-जोन नंगर आउर जगा के हुन खुद जातो थाने रलो, हुता हुनमन के दुय-दुय करून आपलो पुरे पठालो। 2हुन हुनमन ले बल्लो, “पाकलो बेड़ा खुबे आसे, मान्तर भुतीयार खिन्डिक असन आसोत; ऐईकाजे बेड़ा चो मालिक ले गुहारा कि हुन आपलो बेड़ा काटतो काजे भुतीयार पटाऊन देओ। 3जाआ; दका, मय तुमके मेंडामन चो असन बिगवामन चो मंजी ने पटायें से। 4ऐईकाजे ना बटवा, ना झोरा, ना पनही धरा; आउर ना बाट ने कोनी के जुहार करा। 5जोन कोनी घर ने जाआ, पयले बल्ला, ‘ऐ घर थाने आशिर्बाद होओ।’ 6अगर हुता कोनी आशिर्बाद चो लायक होये दे, तेबे तुमचो आशिर्बाद हुनचो थाने ठेबे दे, नी होले तो तुमचो लगे लेवटून ऐये दे। 7हुनी घर ने राआ, आउर जोन काई हुनमन ले मिरो, हुनी खाआ-पिआ, कसनबल्लोने भुतीयार के आपलो भुती मिरतोर जरूरी आय; घरे-घरे नी फिरा। 8जोन नंगर ने जाआ, आउर हुता चो लोग तुमके हाग देदे, तेबे जोन काई तुमचो पुरे संगाया जाओ हुनी खाआ। 9हुता चो बेमारीमन के चेंगा करा आउर हुनमन ले बोला, ‘माहापुरू चो राज तुमचो लगे ऐऊन पहुँचली से।’ 10मान्तर जोन नंगर ने जाआ, आउर हुता चो लोग तुमके गरहन नी करोत, तेबे हुनचो हाटमन ने जाऊन भाती बल्ला, 11‘तुमचो नंगर चो धुरला बले, जोन आमचो पाँयमन ने लटकली से, आमी तुमचो पुरे फाफडून देऊ से; तेबले बले ऐ जानुन राआ कि माहापुरू चो राज तुमचो लगे ऐऊन अमरली से।’ 12मय तुमचो ले बलेंसें कि हुन दिने हुन नंगर चो हालत ले सदोम चो हालत आगर कटलातो लायक होयेदे।
मन नी फिरातो लोगमन उपरे हाय
13“हाय खुराजीन! हाय बैतसैदा! जोन सामरत चो काममन तुमचो थाने करा गेली, अगर हुनमन सूर आउर सयदा ने करा जाति तेबे टाट ओडून भाती आउर लाकड़ी ने बोसुन भाती हुनमन केबे मन फिराता। 14मान्तर नियाय चो दिने तुमचो हालत ले सूर आउर सयदा चो हालत आगर कटलातो लायक होयेदे। 15आउर हे कफरनहूम, काय तुय सरग लगले डेंग करा जासे? तुय तो अधलोक लगले खाले जासे।
16“जोन तुमचो सुनु आय, हुन मोचो सुनु आय; आउर जोन तुमके तुच्छ जानु आय, हुन मोके तुच्छ जानु आय; आउर जोन मोके तुच्छ जानु आय, हुन मोचो पठालोबिता के तुच्छ जानु आय।”
सत्तर चेलामन चो आपस ऐतोर
17हुनमन सत्तर हरिक करते-करते बाहड़ला आउर बोलुक मुरयाला, “हे परबु, तुचो नाव ले दुष्टआत्मा बले आमचो वश ने आसोत।” 18हुन हुनमन ले बल्लो, “मय शयतान के सरग ले बिजली चो असन घसरलोर दकते रये। 19दका, मय तुमके सांपमन आउर बिच्छुमन के रोमंदतोर, आउर शतरू चो सपाय सामरत थाने अधिकार दिले से; आउर कोनी तीज ले तुमके काई हानि नी होये। 20तेबले बले ऐचो ले खुशी नी हुआ कि आत्मा तुमचो वश ने आसे, मान्तर ऐचो ले खुशी हुआ कि तुमचो नाव सरग ने लिकलोर आसे।”
बेटा बाटले बुआ के उजागर करतोर
21हुदलीदाय हुन पवितर आत्मा ने होऊन भाती खुशी ले भरून गेलो, आउर बल्लो, “हे बुआ, सरग आउर धरतनी चो परबु, मय तुचो धन्यबाद करें से कि तुय ऐ गोठमन के गिआनिमन आउर समजदारमन ले लुकाऊन संगालीस, आउर लेकामन उपरे उजागर करलीस। हव, हे बुआ, कसनबल्लोने तुके ऐई अच्छा लागली। 22मोचो बुआ मोके सब कुछ सोपुन दिलो से; आउर कोनी नी जानोत कि बेटा कोन आय मात्र बुआ, आउर बुआ कोन आय ऐ बले कोनी नी जानोत मात्र बेटा चो आउर हुन जेचो उपरे बेटा हुनके उजागर करूक चाहाओ।”
23तेबे चेलामन चो बाटे पलटून भाती ऐकला ने बल्लो, “धन्य आय हुन आँईकमन, जोन ऐ गोठमन जोन तुमी दकसास दकु आय। 24कसनबल्लोने मय तुमचो ले बलेंसें कि खुबे असन अगम गिआनीमन आउर राजामन चाहला कि जोन गोठमन तुमी दकेसास दकलास मान्तर नी दकलास, आउर जोन गोठमन तुमी सुनेसास सुनलास मान्तर नी सुनलास।”
गोटक अच्छा सामरी चो कहनी
25आउर दका, गोटक नियमकारी उठलो आउर ऐ बोलुन भाती हुनचो परीक्षा करूक मुरयालो, “हे गुरू, अमर जीवना चो हकदार होतो काजे मय काय करेंदे?” 26हुन हुनचो ले बल्लो, “नियम ने काय लिकलोर आसे? तुय कसन पडु आस?” 27हुन जबाप दिलो, “तुय परबु आपलो माहापुरू ले आपलो पुईतराय मन आउर आपलो पुईतराय जीव आउर आपलो पुईतराय शक्ति आउर आपलो पुईतराय अकल चो संगे मया संगाव; आउर आपलो अड़स-पड़स चो लोग ले आपलो समान मया संगाव।” 28हुन हुनचो ले बल्लो, “तुय ठीक जबाप दिलीस, ऐई कर तेबे तुय जीव रसे।” 29मान्तर हुन आपन खुद के धरमी ठेबातोर इच्छा ले ईशु ले पचारलो, “तो मोचो पड़ोसी कोन आय?” 30ईशु जबाप दिलो, “गोटक माने यरूशलेम ले यरीहो चो बाटे जाते रलो कि डाकुमन घेरुन भाती हुनचो फटीई हिटाला, आउर मार पिट करून भाती हुनके अदमड़ा छांडुन भाती जाते गेला। 31आउर कसन होली कि हुनी बाट ले गोटक याजक जाते रलो, मान्तर हुनके दकुन ईतराऊन भाती जाते गेलो। 32ऐई रीति ले गोटक लेवी हुन जगा थाने ईलो, हुन बले हुनके दकुन ईतराऊन भाती जाते गेलो। 33मान्तर गोटक सामरी यातरी हुता ऐऊन निकरलो, आउर हुनके दकुन भाती जीव दुकालो। 34हुन हुनचो लगे ऐऊन भाती हुनचो घावमन थाने तेल आउर दाखरस डालुन भाती पटीमन बान्दलो, आउर आपलो सवारी थाने चेगाऊन भाती धरमशाला ने धरून गेलो, आउर हुनचो सेवा करलो। 35दुसर दिने हुन दुय दीनार निकराऊन भाती धरमशाला चो मालिक के दिलो, आउर बल्लो, ‘ऐचो सेवा कर आउर जोन काई तुचो आउर लागे दे, हुन मय आपस ईलो ने तुके भरून देयेदे।’ 36अदायं तुचो समज ने जोन डाकुमन ने घिरुन जाऊ रलो, ऐ तीनो थानले हुनचो पड़ोसी कोन ठेबलो?” 37हुन बल्लो, “हुनी जोन हुनचो उपरे दया करलो।” ईशु हुनचो ले बल्लो, “जा, तुय बले असने ची कर।”
मारथा आउर मरियम
38जिदलदाय हुनमन जाते रवत तेबे हुन गोटक गाँव ने गेलो। आउर मारथा नाव चो गोटक बायले लेकी हुनके आपलो घर ने हाग दिली। 39मरियम नाव हुनचो गोटक भईन रली। हुन परबु चो पाँयमन लगे बसुन भाती हुनचो बचन सुनते रली। 40मान्तर मारथा सेवा करते-करते घबराऊन गेली, आउर हुनचो लगे ऐऊन भाती बोलुक मुरयाली, “हे परबु, काय तुके काई बले चिन्ता निआय कि मोचो भईन मोके सेवा करतो काजे ऐकला ची छांडुन दिली से? ऐईकाजे हुनके बोल कि मोचो सायता करो।” 41परबु हुनके जबाप दिलो, “मारथा, हे मारथा; तुय खुबे गोठमन काजे चिन्ता करू आउर घबराऊ आस। 42मान्तर गोटक गोठ जरूरी आय, आउर हुन बड़ीया भाग के मरियम चुनली से जोन हुनचो ले झिका नी जायेदे।”
Currently Selected:
लूका 10: HLBNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Halbi Bible by The Love Fellowship is licensed under Creative Commons Attribution-ShareAlike 4.0 License.
