MATHAI 7
7
Minawk Lokcaekhaih Kawng
(Luk 6:37,38,41,42)
1“Minawk lokcaek hmah, toti baloa Sithaw mah doeh lok na caek mak ai. 2Kawmawtiah minawk lokcaek batih toengah nangmah doeh Sithaw mah lokcaek ueloa minawk nuiah na patoh ih nawtcung hoitoah Sithaw mah na nawt toeng tih.#Mrk 4:24 3Tipongmaw na mik thungih kaom thingboeng to na hnuh hmaloe aiah naukamza mik ah kaom miknuen to na hnuk pae lat. 4Na mik thungah thingboeng a oh khaeh tomah kawbangmaw nam naukamza mik ah kaom miknuen to ‘Na miknuen to na la pae ue’ tiah na naa thaih loa? 5Nang laiha kami, na mik thungih thingboeng to la hmaloe rae ah, topacoengah ni loa nam naukamza ih miknuen to kacai ta-ah hnuh ueloa na la pae thaih tih.
6“Kacai hmuen to ui paek o hmah. Nangmahcae bangah angqoi ueloa na kaek o tih. Pale hlung to ok hma-ah koeng pae o hmah. Khok hoiah ni loa cawh o romram tih.
Hnik, Pakrong, Takhuek
(Luk 11:9-13)
7“Hnih ah, na paek o tih; Pakrong ah, na hnuh o tih; takhuek ah, thok na paong pae o tih. 8Kawmawtiah ka hnih kami boih loa paek ah om tih, ami doeh pakrong loa hnuh ueloa takhuek kami boih loa thok paong pae ah om tih. 9Na capa mah takaw ang hnik o na-ah nangcae nam panawk mah hlung na paek o han maw? 10Tangaa ang hnik o na-ah pahui na paek o han maw? 11Kami na set o parai e, na caanawk hanah loa hmuen kahoih paek han na panoek o nahaeloa van ih kaom nangcae Ampa mahcae loa ka hnih kaminawk khaeah natanto maw hmuen kahoih to na paek aep tih.
12“Mimah aicae nuiah sah na soe tiah na koeh o ih batih toengah to minawk nuiah sah o toeng ah. Hi hae Mosi ih Tawklok hoi tahmanawk patukhaih ih mah thuihkoehhaih ih ni.#Luk 6:31
Khongkha Tamcaek
(Luk 13:24)
13“Khongkha tamcaek thungah akun oah, kawmawtiah hell khongkha loa a kauk, caehhaih loklam doeh a zoi moa kami paroeai mah pazui o. 14To-e hinghaih thungah akunhaih khongkha loa tamcaek, a caehhaih loklam doeh paroeai rai moa ka hak kami to tamsi.
Thingkung hoi Athaih
(Luk 6:43-44)
15“Tahma kamlainawk to acoe oah, tasabang loa tuu batiah nangcae khaeah angzo ueloa athungbang loa tasui kasaeng batiah om o tih. 16Nangcae mah anihcae to athaih hoitoah na mat o tih. Khringkung mah misur athaii vaih ai moa khringkung mah doeh thaiduet athaii vaih ai. 17Thingkung kahoih mah athaih kahoih to athaih moa thingkung kahoih ai mah athaih kahoih ai to athaih. 18Thingkung kahoih mah athaih kahoih ai athaii vaih ai moa thingkung kahoih ai mah doeh athaih kahoih athaii vaih ai. 19Athaih kahoih ka thaii ai thingkung boih loa pakhruk moa hmai thungah a vah o.#Mat 3:10; Luk 3:9 20Tobatih toengah tahma kalingnawk to loa a sakhaih ih hoitoah na panoek o thaih tih#Mat 12:33.
Kang Panoek O Ai
(Luk 13:25-27)
21“‘Angraeng, Angraeng,’ tiah na kawk kami boih mah van Poenghaih thungah akun o boih mak ai. To-e van ih kaom Pa ih koehhaih ka sah kami khueh mah ni loa akun o tih. 22Lokcaekhaih Ni a phak na-ah kami paroeai mah, ‘Angraeng, Angraeng! Na hmin hoiah Sithaw ih tamthang lok ka thuih, na hmin hoiah taqawk zetpui ka pathok moa dawnraihaih zetpui ka sak o,’ tiah kai khaeah na thui o tih. 23Tona-ah anihcae khaeah, “Kang panoek o vaih ai, kai khae hoitoah caeh o ving ah, nangcae kami kasaenawk!” tiah ka naa han.#Sam 6:8
Im Sahkung Longhnetto
(Luk 6:47-49)
24Topongah ami doeh ka lok to ka thaih moa ka pazui loa lungsong nuiah im ka sah kacing kami longto batiah ni oh. 25Khopui khopa angzoh moa tuizunpui a thoh, takhi kaham a songh moa im to a suh. To-e lungsong nuiah sak pongtoah amtim ai.
26“To-e ami doeh ka lok to thaih moa ka pazui ai loa savuet nuiah im ka sah kamthu batih ni oh. 27Khopui khopa angzoh moa tuizunpui a thoh, takhi kaham mah a daengh moa amtim; ato amrohaih ih loa katingai a lenh,” tiah a naa.
Jesuh Ih Akaatawnhhaih
28Jesuh loa hi loknawk a thuih pacoeng na-ah mipuinawk loa a patukhaih ning pongah a dawnrai o.#Mrk 1:22; Luk 4:32 29Anih loa Tawklok patukkungnawk batih aiah akaatawnhhaih hoiah patuk pae lat.
Currently Selected:
MATHAI 7: AKNT2023
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Asang Khongso New Testament in Eastern Khumi © Bible Society of Myanmar, 2023.
